Yʋʋm-vẽkre

A Zeezi ‘yãa’ raoã ma wã sũur sẽn sãam wʋsgã, tɩ rẽ poor ‘t’a nimbãaneg yõk-a.’ (Luk 7:13) La a Zeezi pa wilg bal t’a kʋmda pagã ye. A wilgame me t’a zoeta a nimbãanega. Sãmbg kae t’a goma ne-a ne bʋgsem n yeel yaa: “Da le yãb ye.” Rẽ poore, a yãka yam n na n maan bũmb n sõng-a. A vʋʋga biigã sẽn da ki wã, n “lebs-a a ma wã.” (Luk 7:14, 15) A Zeezi sẽn maan yel-solemd n vʋʋg pʋg-kõorã biigã wilgda tõnd bõe? Wilgdame tɩ d segd n zoee neb nins neb sẽn maan kaalmã nimbãanega. La wa a Zeezi, tõnd me tõe n maaga d yĩng n ges d sẽn tõe n kʋm neb nins neb sẽn maan kaalmã to-to. D tõe n goma gomd wall d maan bũmb n sõng-ba, sẽn na yɩl n bels-ba. (Yel. 17:17; 2 Kor. 1:3, 4; 1 Pɩy. 3:8) Gomd wall bũmb sẽn pa zem baa fʋɩ ne tõnd tõe n sõng-b-la wʋsgo. w23.04 5-6 s. 13-15

Baa a Zeezi sẽn da mi t’a zoa wã maana kaalmã, a kell n paa a sẽn da beẽ wã n maan rasem a yiib n paase, n yaool n dɩk Betani sore. A sẽn wa n ta be wã t’a Lazaar kaalmã taa rasem a naase. A Zeezi yãka yam n na n maan bũmb sẽn na n sõng a zo-rãmbã, la sẽn na n waoog Wẽnnaam. (Zã 11:6, 11, 17) Kiba-kãngã wilgda tõnd bũmb sẽn tar yõod wʋsg zoodã wɛɛngẽ. Tẽeg-y t’a Maari ne a Mart sẽn tʋm tɩ b tɩ togs a Zeezi wã, b pa kos-a t’a wa Betani ye. B yeel-a lame bal t’a zo-nongrã pa keem ye. (Zã 11:3) A Lazaar sẽn maan kaalmã, a Zeezi ra tõe n paa yɩɩg n vʋʋg-a. Baasgo, a yãka yam n kẽng Betani, n tɩ yã a Maari ne a Mart sẽn yaa a zo-rãmbã. Yãmb tara zoa sẽn na n sak n wa sõng-yã, baa y pa kos-a bɩ? Sã n yaa woto, y miime tɩ yaa ned y sẽn tõe n teeg “yel-pakr wakate.” (Yel. 17:17) Bɩ tõnd me rɩk a Zeezi togs-n-taare, n yɩ zo-rãmb a woto buudu. w23.04 10 s. 10-11

D zu-loɛɛgã sã n wa paamd pãnga, d tõe n wa tagsdame t’a Zeova dũni-paalgã pa na n tol n wa ye. Woto rat n yeelame tɩ d tẽebã pa tar pãng bɩ? Ayo. D rɩk makre. Tʋʋlgã sã n wa zabd wʋsgo, d tõe n wa tagsdame tɩ waoodã wakat pa na n tol n ta ye. La waoodã wat n baas n waame. Woto me, d sũurã sã n wa sãam wʋsg tɩ d koms raoodo, d tõe n wa tagsdame tɩ dũni-paalgã pa na n tol n wa ye. La d tẽebã sã n tar pãnga, d na n kɩsa sɩd tɩ Wẽnnaam pʋlemsã na n pidsame. (Yɩɩn. 94:3, 14, 15; Ebre. 6:17-19) Woto sõngd-d lame tɩ d kell n lʋɩɩs a Zeova tũubã taoore. D gom bũmb a to me wɛɛngẽ d sẽn tog n tall tẽeb sẽn tar pãnga. Yaa koɛɛgã moonego. Neb wʋsg tagsdame tɩ ‘koe-noog’ ning d sẽn togsd Wẽnnaam dũni-paalgã wɛɛngẽ wã yaa belgre. (Mat. 24:14; Eze. 33:32) D da wa tol n maan sãmbs wa nin-kãens ye. Sẽn na yɩl n da yɩ wa bãmba, d segd n ket n paasda d tẽebã pãnga. w23.04 27 s. a 6-7; 28 s. 14

Yãmb zoe n maana sãmbs a Zeova sã n leokda y pʋʋsg bɩ? Sã n yaa woto, bɩ y bãng tɩ y pa y yembr ye. Saam-biis la saam-bi-pogs wʋsg me tagsda woto, sẽn yɩɩd fãa, b sã n wa maood ne zu-loeese. D sã n wa namsdẽ, tõe n yɩɩ toog ne tõnd me tɩ d bãng a Zeova sẽn leokd d pʋʋsgã to-to. Bõe n kɩt tɩ d tõe n kɩs sɩda, t’a Zeova leokda a nin-buiidã pʋʋsgo? Biiblã wilgdame t’a Zeova nonga tõnd hal wʋsgo, la tɩ d tara yõod wʋsg a nifẽ. (Aaze 2:7; 1 Zã 4:10) Yaa rẽ n so t’a yet tõnd tɩ d pʋʋs-a n kos a sõngre. (1 Pɩy. 5:6, 7) A tʋll n sõng-d lame tɩ d kell n yɩ a zo-rãmba, la d tõog n mao ne d zu-loeesã. Biiblã pʋgẽ, d wae n yãtame t’a Zeova leoka neb sẽn da tũud-a pʋʋsgo. Ãnda yell n wat y yamẽ? w23.05 8 s. a 1-4

A Maari mengã ra tara zood sõma ne a Zeova. A tẽebã ra pa tik bũmb nins a Zozɛf sẽn da maandã bal ye. A ra mii Gʋls-sõamyã sõma. Sẽn paase, a ra baooda sẽk n bʋgsd Gʋls-sõamyã zugu. (Luk 2:19, 51) Sãmbg kae t’a Maari tẽebã ra kɩtame t’a yaa pʋg-sõngo. Rũndã-rũndã, pagb wʋsg n modgd n dɩkd a Maari togs-n-taare. Saam-bi-poak a ye yʋʋr sẽn boond t’a Emiko yeelame: “Mam sẽn wa n nan pa kẽ kãadmã, m da yãka wakat takɩ n zãmsd Biiblã. La d kãadmã poore, mam sɩdã sẽn da pʋʋsd tõnd yĩng wakat fãa wã, la a lʋɩt taoor zag pʋgẽ Biibl zãmsgã sasa wã, m wa n mikame tɩ m tẽebã tika bũmb ning a sẽn da maandã bal zugu. M wa n bãngame tɩ yaa maam n segd n modge, tɩ maam ne a Zeova zoodã pãng paasdẽ. Masã, m yãka wakat takɩ m Wẽnnaamã yĩnga, n pʋʋsdẽ, n karemd Biiblã la m bʋgsd a tagsa wã zugu.” (Gal. 6:5) Pagba, y sã n modgd n ket n paasd yãmb ne a Zeova zoodã pãnga, y sɩdbã na n maneg n pẽg-y lame la b nong-yã.—Yel. 31:30. w23.05 22 s. a 6

D pa rogd ne a Zeova zoees ye. Yaa bũmb d sẽn segd n zãmse. Bũmb a ye d sẽn tõe n maan tɩ sõng-d rẽ wɛɛngẽ, yaa d sẽn na n get bũmb nins a sẽn naanã. D sã n yã ‘bũmb nins a Zeova sẽn naanã’ sẽn wilgd a nonglmã to-to wã, a pãngã la a sẽn nong tõnd to-to wã, na n kɩtame tɩ d maneg n waoogd-a la d nong-a. (Rom. 1:20) Bũmb a ye d sẽn tõe n maan n paas d wẽn-zoeerã yaa d sẽn na n pʋʋsd a Zeova wakat fãa. Woto, d bãngd-a lame n paasdẽ. Wakat ning fãa d sẽn na n pʋʋs a Zeova n kos t’a kõ-d pãng tɩ d mao ne d zu-loɛɛga, tẽegda tõnd a pãngã sẽn yaa kãseng to-to wã. D sã n pʋʋs a Zeova bark a sẽn sak n kõ-d a Bi-riblã, tẽegd-d lame t’a nong-d-la wʋsgo. Sẽn paase, d sã n kos a Zeova t’a sõng-d tɩ d welg d zu-loɛɛga, tẽegda tõnd t’a yamã yaa kãsenga. Pʋʋsg a woto kɩtdame tɩ d maneg n waoogd a Zeova. Leb n kɩtdame, tɩ d maneg n yãk yam n pa na n maan bũmb sẽn na n sãam d zoodã ye. w23.06 15 s. a 6-7

A Zeova kõta a nin-buiidã noy sẽn yaa vẽenese. Wala makre, pipi kiris-nebã taoor lʋɩtb sullã wilga bũmb a tãab wɛɛngẽ kiris-nebã sẽn segd n yals kãn-kãe: 1) B segd n zãaga b mens ne bõn-naands pʋʋsgo, n tũ a Zeova a ye tãa. 2) B segd n saka a Zeova noorã zɩɩmã sẽn yaa sõngã wɛɛngẽ. La 3) b segd n tũu Biiblã noyã, n zãag b mens ne yoobo. (Tʋʋ. 15:28, 29) Rũndã-rũndã, wãn to la kiris-nebã tõe n sak a Zeova bõn-kãensã a tãabã wɛɛngẽ? Yaa d sẽn na n waoogd a Zeova la d sakd-a. A yeela Israyɛll nebã tɩ b segd n waooga yẽ a ye tãa. (Tõo. 5:6-10) A Sʋɩtãan sẽn wa n mak a Zeezi wã, a Zeezi yeelame tɩ yaa a Zeova a ye bal la d segd n waooge. (Mat. 4:8-10) Rẽ n so tɩ d pa waoogd bõn-naands ye. Sẽn paase, d pa waoogd ninsaalb wa Wẽnnaam ye. Wala makre, d pa waoogd tũudmã taoor dãmba, politikã taoor dãmba, neb nins yʋy sẽn yi ɛspoorã wall reem toor-toorã wɛɛngẽ tɩ loog noor ye. D waoogda a Zeova a ye tãa sẽn yaa soab ning sẽn “naan bũmb fãa” wã.—Vẽn. 4:11. w23.07 14-15 s. a 3-4

A Sʋɩtãan dũniyã neb nonga yoobo, la yoobã yɛl gesgo. (Efɛɛ. 4:19) Dẽnd d segd n ket n bɩɩsda wẽn-zoeere, la d zãag d mens ne sẽn yaa wẽnga. Yel-bũn sak a 9 wã pʋgẽ, b gomda yam ne yalemd yelle, n dɩk-b n mak ne pagba. B yeelame tɩ yamã ne yalemdã b sẽn mak ne pagbã boonda sẽn pa tar-b minimã, rat n yeel tɩ “sẽn pa tar-b yamã.” Yaa wa b ned kam fãa sẽn yet yaa: ‘Wa-y mam doogẽ wã, n dɩ rɩɩbo.’ (Yel. 9:1, 4-6) La bũmb ning sẽn paamd sẽn sakd-b boollã yaa toor-toor wʋsgo. D gom ‘pʋg-yalmã’ boollã yelle. (Yel. 9:13-18) A zẽkda a koɛɛg n boond sẽn pa tar-b minimã n yetẽ yaa: ‘Wa-y ka’ tɩ d rɩ rɩ-noodo, hal tɩ yãnd pa tar-a ye. La bõe n na n paam-ba? “Neb nins sẽn ki n pa le tõe n maan bũmbã bee be.” B sagend-d lame tɩ d gũus d meng ne “pʋg-wɛgeng” la “pʋg-yoodre.” B paasame t’a “roogã sigda kũum zĩigẽ.” (Yel. 2:11-19) Yel-bũn 5:3-10 pʋgẽ me, b yetame tɩ d gũus ne “pʋg-wɛgeng” a to, bala “a naoã sigda kũum zĩigẽ.” w23.06 21-22 s. a 6-7

Kãsem-dãmbã segd n kõo mak-sõngo, n yaa wʋmdba. (1 Tɩm. 3:2, 3) Wala makre, kãsem-soab pa segd n tagsdẽ tɩ yaa tɩlɛ tɩ kãsem-dãmb a taabã sakd yẽ sẽn yet bũmb ningã wakat fãa, yẽ yʋʋm sẽn yɩɩd-bã yĩng ye. A miime t’a Zeova vʋʋsem sõngã tõe n sõnga sẽn yaa kãsem-soab ning fãa t’a togs bũmb tɩ b tõog n tik rẽ n yãk yam-sõngo. Kãsem-dãmbã sã n naag taab n yãk yam tɩ pa kɩɩsd Biiblã noyã, kãsem-soab sẽn yaa wʋmd teenda yam-yãk-kãnga, baa a sã n getame tɩ yam-yãkr a to n yaa sõma n yɩɩda. D sã n yaa wʋmdba, d paamda bark buud toor-toore. D na n paamame tɩ zems-n-taar kell n zĩnd tõnd ne d tẽed-n-taasã sʋka, la kɩt me tɩ laafɩ kell n zĩnd tigingã pʋgẽ. D sẽn ne neb nins sẽn tũud a Zeova wã zʋg la b manesem sẽn yaa toor-toor tɩ b baas n zemsd taab n tũud a Zeova wã, d sũur yaa noogo. Sẽn yɩɩd fãa, d sũur nooma d sẽn mi tɩ d rɩkda d Wẽnnaam a Zeova sẽn yaa wʋmdã togs-n-taarã. w23.07 25 s. 16-17

A Dãniyɛll kõo mak-sõng bãngr-goamã zãmsg wɛɛngẽ. Yaa bʋʋm-tɩrg yĩng n kɩt t’a zãms bãngr-goamã. A ra rat n bãnga sɩdã. A Dãniyɛll ra yaa sik-m-meng soab me, n miẽ t’a Zeova sõngda neb nins sẽn mi-a la b tũud a noyã sẽn yaa tɩrsã, tɩ b wʋmd bãngr-goamã võore. (Dãn. 2:27, 28) A Dãniyɛll wilgame t’a yaa sik-m-meng soaba, n da teeg a Zeova t’a sõng-a. (Dãn. 2:18) A ra maagda a yĩng n zãmsdẽ me. A maana vaeesg Biiblã sɛb nins sẽn da be wakat kãngã pʋgẽ. (Zer. 25:11, 12; Dãn. 9:2) Wãn to la y tõe n dɩk a Dãniyɛll togs-n-taare? Bao-y n bãng-y bũmb ning sẽn kɩt tɩ y zãmsd bãngr-goamã. Yaa y sẽn dat n bãng sɩdã ne y sũur fãa yĩng bɩ? Sã n yaa rẽ, a Zeova na n sõng-y lame. (Zã 4:23, 24; 14:16, 17) Neb kẽer zãmsda bãngr-goamã sẽn na yɩl n paam bũmb n tik n wilg tɩ pa Wẽnnaam n vẽneg tɩ b gʋls Biiblã ye. B yetame tɩ Biiblã sã n pa yit Wẽnnaam nengẽ, rẽnd b tõe n yãkda sẽn yaa sõma la sẽn yaa wẽng b toore. La d segd n zãmsa bãngr-goamã bʋʋm-tɩrg yĩnga. w23.08 9 s. a 7-8

D sã n makd d meng ne d taabã, d tõe n wa getame tɩ yaa tɩlɛ tɩ d maan modgr n paase. (Gal. 6:4) D sã n maand woto, tõe n wa kɩtame tɩ d lebg sũ-kĩ-neda, la ned sẽn nong wags-n-taare. (Gal. 5:26) D sã n modgd n na n yɩ wa d taabã, tõe n wa kɩtame tɩ d maan bũmb sẽn yɩɩd d pãnga, tɩ wa ne yɛla. Sẽn mik tɩ “ned sã n gũud bũmb tɩ kaoosd n pa watẽ, sãamda a sũurã,” d sã n gũud bũmb d sẽn pa na n tol n paame, rẽ n sãamd sũur n yɩɩda. (Yel. 13:12) Tõe n booga d pãngã, la kɩt tɩ d pa le zoet zoeesã ne yẽesem ye. Ra bao-y n maan-y bũmb sẽn yɩɩd a Zeova sẽn dat tɩ y maanã ye. A zɩ n bao tɩ d kõ bũmb d sẽn pa tar ye. (2 Kor. 8:12) Bas-y y yam t’a Zeova pa makd yãmb sẽn maand bũmb ningã ne y taabã ye. (Mat. 25:20-23) A sũur nooma ne y sẽn tũud-a ne y sũur fãa wã, y maan-sɩdã, la y tõog-toogã. w23.08 29 s. 10-11

A Zeova kelga a Sãmsõ kosgã, n maan yel-solemd tɩ ko-bundg zĩig puki. A Sãmsõ sẽn yũ koomã, “a pãngã leb n waame t’a nengã yẽege.” (Bʋ. 15:19, notã.) Wõnda ko-bund-kãng kell n paa yʋʋm wʋsg poore, hal n tãag wakat ning Wẽnnaam sẽn vẽneg no-rɛɛs a Sãmwɛll t’a gʋls Bʋ-kaoodb sebrã. Israyɛll nebã sã n da yã ko-kãng sẽn bundã, tõe tɩ ra tẽegd-b lame tɩ neb nins sẽn maand sɩd ne a Zeova wã sã n teeg-a, a na n sõng-b-la b sẽn wat n dat sõngr wakate. Tõnd me segd n teega a Zeova, baa d sẽn tar minim ninga, wall d sẽn tõog n maan bũmb ning a tũudmã pʋgẽ. D segd n sika d mens n sak n deeg tɩ yaa d sẽn na n teeg a Zeova bal la d na n tõog n maan a sẽn datã. A Sãmsõ sẽn yũ koomã a Zeova sẽn kõ-a wã, a le paama pãnga. Sẽn na yɩl tɩ d tẽebã kell n tall pãnga, tõnd me segd n dɩɩ bũmb nins a Zeova sẽn kõt tõndã yõod wa a Sãmsõ.—Mat. 11:28. w23.09 4 s. a 8-10

Ned sã n wa baood d noore, bõe la d tõe n maane? Wala makre, ned sã n wa gomd n paoogd a Zeova wall Biiblã. D segd n pʋʋsa a Zeova n kos-a vʋʋsem sõngã la yam sẽn na yɩl n tõog n leok ne bʋgsem. La d sã n wa bãng tɩ d pa leok sõma wa sẽn da segdã, bõe la d tõe n maane? D tõe n pʋʋsa a Zeova yel-kãng wɛɛngẽ, la d tags d sẽn tõe n leok to-to tɩ yɩ sõma nindaare. A Zeova na n kõ-d-la a vʋʋsem sõngã, tɩ sõng-d tɩ d tõog d menga, la d tall sũ-bʋgsem. Biiblã vɛrse wʋsg n be n tõe n sõng-do, sã n wa yaa toog tɩ d gom ne bʋgsem. Wẽnnaam vʋʋsem sõngã tõe n tẽega tõnd vɛrse-kãense. (Zã 14:26) Wala makre, sagls nins sẽn be yel-bũn sebrã pʋgẽ wã tõe n sõng-d lame tɩ d yɩ sũ-bʋgsem soaba. (Yel. 15:18) Biiblã seb-kãng wilgdame me tɩ d sã n tõog d meng baa pa nana, nafd-d lame.—Yel. 10:19; 17:27; 21:23; 25:15. w23.09 15 s. a 6-7

Tẽn-tʋmd a Pɩyɛɛr da miime tɩ ra pa na n kaoos la b kʋ-a ye. A tũu a Zeova ne a sũur fãa n kaoos yʋʋma. Wakat kãnga a pʋga a Zeezi, a moona koɛɛgã zĩis b sẽn da nan pa moone, la a yɩ siglgã taoor lʋɩtb sull neda. La a Pɩyɛɛr tʋʋmã ra nan pa sa ye. Yʋʋmd 62-64 sẽnese, Wẽnnaam vẽneg-a lame t’a gʋls lɛta a yiibu. Yaa pipi la yiib Pɩyɛɛr sɛbã sẽn be Biiblã pʋgẽ wã. (2 Pɩy. 1:13-15) Wẽnnaam sẽn wa n na n vẽneg a Pɩyɛɛr t’a gʋls a lɛta wã t’a tẽed-n-taasã ra maooda ne “zu-loees toɛy-toɛya.” (1 Pɩy. 1:6) Nin-wẽns n da maood n na n kẽes zãms-yood la tʋʋm-dẽgd tigingã pʋgẽ. (2 Pɩy. 2:1, 2, 14) Ra pa na n kaoos la kiris-neb nins sẽn be Zerizalɛmmã yã “bũmb fãa saabo,” rat n yeel tɩ Rom sodaasã sẽn na n sãam Zerizalɛm la a wẽnd-doogã ye. (1 Pɩy. 4:7) Yaa vẽeneg t’a Pɩyɛɛr lɛta wã sõnga kiris-nebã tɩ b bãng b sẽn tõe n mao ne zu-loees nins b sẽn da tarã la zu-loees nins sẽn da watã to-to. w23.09 26 s. a 1-2

Tõnd me wae n zãmsda sakr zu-loees sasa wa a Zeezi. Wala makre, koronaviriisã bã-loangdgã sẽn wa n sɩng tɩ b yeel tɩ d ra le tigimd taab Rĩungã rotẽ la d ra le moond koɛɛgã zak-zakã, yɩɩ toog ne-y tɩ y sak bɩ? Yaa vẽeneg tɩ y sakrã kogl-y lame, n kɩt tɩ zems-n-taar kell n zĩnd tigingã pʋgẽ, la noog a Zeova sũuri. Tõnd ned kam fãa segl n saame n na n sak noy nins fãa b sẽn na n kõ-d to-kãsengã sasa wã. Tõe n yɩɩ yõor yelle. (Zoob 36:11) D sẽn yãk yam n na n sak a Zeova wã, yaa d sẽn nong-a la d rat n ta a yamã yĩnga. (1 Zã 5:3) D pa tõe n dol a Zeova bũmb nins fãa a sẽn maan n kõ-dã ye. (Yɩɩn. 116:12) La d tõe n saka yẽ ne neb nins a sẽn kõ zu-sobendã. D sã n yaa sakda, d wilgdame tɩ d yaa yam soaba. D sã n yaa yam soaba, noogda a Zeova sũuri.—Yel. 27:11. w23.10 11 s. 18-19

Malɛk sã n wa gom ne yãmba, y na n kelga a sẽn yet bũmb ningã bɩ? Rũndã-rũndã, malɛk n gomd ne “neb sẽn yit buud fãa pʋsẽ, sẽn gomd buud-goam toɛy-toɛya, la sẽn yit tẽns toɛy-toɛy pʋsẽ.” Bõe la a yeta? A yetame yaa: “Zoe-y Wẽnnaam la y pẽg-a. . . . Bɩ y waoog sẽn naan-a saagã ne tẽngã.” (Vẽn. 14:6, 7) A Zeova a ye tãa n yaa Wẽnnaam sɩd-sɩdã, tɩ ned buud fãa segd n waoog-a. D sẽn paam t’a sak tɩ d waoogd-a a ro-kãsengã sẽn pa ninsaalb nus n me wã pʋgẽ wã sɩd noom-d-la wʋsgo! Wẽnd-do-kãsengã sẽn pa ninsaalb nus n me wã yaa bõe, la yɛ la d tõe n yã bũmb toor-toor sẽn wilgd rẽ? Wẽnd-doog ning sẽn pa ninsaalb nus n me wã pa roog sɩd-sɩd ye. Yaa bũmb nins a Zeova sẽn maan tɩ d tõe n tũ-a wa sẽn segde, a Zeezi sẽn ki tɩ yɩ maoongã maasem yĩngã. Tẽn-tʋmd a Poll goma rẽ yell lɛtr ning a sẽn gʋls n tool kiris-neb nins sẽn da yaa Ebre-rãmb n da be Zide wã pʋgẽ. w23.10 24 s. a 1-2

Yʋʋmd 522 sẽn deng a Zeezi rogmã, Zʋɩf-rãmbã bɛɛbã tõogame tɩ b yiis noor n gɩdg a Zeova roogã lebs n me wã. La a Zakari yeela Zʋɩf-rãmbã tɩ b bas b yam t’a Zeova na n tũnuga ne a vʋʋsem sõngã sẽn tar pãngã, n menes bũmb nins fãa sẽn gɩdgd tʋʋmdã. Yʋʋmd 520 S.D.Z.R., rĩm a Daryuus yiisa noor n kõ Zʋɩf-rãmbã sor tɩ b lebs n me wẽnd-doogã. Sẽn paase a kõ-b-la ligdi, la a yeel guvɛrneer-dãmbã tɩ b sõng-ba. (Ɛsd. 6:1, 6-10) A Zeova pʋlma a nin-buiidã tɩ b sã n lʋɩɩs wẽnd-doogã meeb taoore, a na n sõng-b lame. (Aaze 1:8, 13, 14; Zaka. 1:3, 16) No-rɛɛsdbã sẽn keng Zʋɩf-rãmbã raoodã, b lebs n sɩnga wẽnd-doogã meeb yʋʋmd 520 S.D.Z.R., n baas-a tɩ pa ta yʋʋm a nu ye. Zʋɩf-rãmbã sẽn lʋɩɩs a Zeova raabã taoor baa ne zu-loeesã, b paamame t’a ges b yelle. Kɩtame tɩ b tũ a Zeova ne sũ-noogo.—Ɛsd. 6:14-16, 22. w23.11 15 s. a 6-7

Baa neb wʋsg sẽn zoe n wʋm tɩ b gom a Abrahaam yellã, b pa mi bũmb wʋsg a zug ye. La yãmb mii bũmb wʋsg a Abrahaam zugu. Wala makre, y miime tɩ b boola a Abrahaam tɩ “neb nins fãa sẽn . . . yaa nin-tɩrs b tẽebã yĩngã ba.” (Rom. 4:11) Tõe tɩ y sokda y meng yaa: ‘M tõe n dɩka a Abrahaam togs-n-taar n tall a tẽebã buud bɩ?’ N-ye, y tõeeme. Bũmb a ye d sẽn tõe n maan n tall a Abrahaam tẽebã buudu, yaa d sẽn na n zãms a kibarã. A Abrahaam ra maanda bũmb ning fãa Wẽnnaam sẽn yeel t’a maanã. Wala makre, a sakame n yi tẽng ning a sẽn da be wã n kẽng tẽng sẽn zãre, n tɩ zĩnd fu-rotẽ n kaoos yʋʋm wʋsgo. A sakame me n na n dɩk a bi-ribl-nongr a Izaak n maan maoong n kõ a Zeova. A Abrahaam maana bõn-kãensã fãa, a tẽebã sẽn da tar pãngã yĩnga. A tẽebã la a tʋʋm-tʋmdɩ wã kɩtame t’a ta Wẽnnaam yam, n lebg a zoa. (Zak 2:22, 23) A Zeova ratame tɩ tõnd ned kam fãa paam bark a woto buudu. Rẽ n so t’a vẽneg a Poll ne a Zak tɩ b gom a Abrahaam yell Biiblã pʋgẽ. w23.12 2 s. a 1-2

Saam-bi-pogse, zãms-y kelgr la goama. Kiris-ned segd n maagda a yĩng n kelgdẽ, la a gomd ne bʋgsem. Zĩ-kãng wɛɛngẽ, karen-biig a Zak kõ-d-la sagl-sõngo, n togs goam nins sẽn be yĩngrã. F sã n maagd f yĩng n kelgd f taabã f wilgdame tɩ f ‘kʋmd-b lame.’ (1 Pɩy. 3:8) F sã n pa wʋmd bũmb ned sẽn yeel võore, wall a tagsg sẽn yaa a soab bũmb ning wɛɛngẽ, bɩ f sok-a sogsg sẽn zemse. Rẽ poore, bɩ f tags n yaool n leoke. (Yel. 15:28, notã.) Sok f meng yaa: ‘Bũmb ning m sẽn na n togsã yaa sɩda, la kengd raood bɩ? Na n yɩɩ ne bʋgsem, la wilgdẽ tɩ m waoogda a soabã bɩ?’ Rɩk yam saam-bi-pogs nins sẽn wɩngd ne kelgr la sẽn gomd ne bʋgsmã nengẽ. (Yel. 31:26) Gũusd n get b sẽn gomd to-to wã. F sã n zãms goam la kelgre, foo ne neb a taabã moor na n noomame. w23.12 21 s. 12

Rũndã-rũndã, a Zeova tõe n tũnuga ne d zakã neba, d zo-rãmb wall kãsem-dãmbã n sõng-do. La d sũur sã n wa sãam wʋsgo, d tõeeme n pa nong neb a taab zĩigẽ ye. D sẽn dat bal yaa d be d yembre. Zu-loe-kɛgeng taoore, d manesem mi n yaa woto. La bõe la d tõe n maan n paam t’a Zeova sõng-do? Modg-y n da n zãag-y y meng ne nebã ye. D sã n zãag d meng ne nebã d tõe n tagsda d mengã yell bala, la zu-loɛɛg ning d sẽn maood ne wã yelle. Tagsa a woto tõe n kɩtame tɩ d pa bãng n yãk yam sẽn yaa sõma ye. Yaa sɩd tɩ tõnd fãa mi n data wakat n yaa d yembre, sẽn yɩɩd fãa d sã n wa maood ne zu-loe-kɛgemse. La d sã n lak d meng n kaoose, tõe tɩ d zãgsda neb nins a Zeova sẽn tũnugd ne n na n sõng tõndã sõngre. Woto wã, bɩ y sak y zakã rãmba, y zo-rãmbã la kãsem-dãmbã sõngre. Tẽeg-y t’a Zeova tũnugda ne-b n sõngd yãmba.—Yel. 17:17; Eza. 32:1, 2. w24.01 24 s. 12-13

Ned sã n da yaa Nazireyẽ, a pa segd n wõrs a zugã ye. Rẽ ra wilgdame t’a sakda a Zeova ne a sũur fãa. Zu-bʋko, Israyɛll soolmẽ wã, wakat n zĩnd tɩ nebã ra pa nong Nazireyẽ-rãmbã, n da pa teend-b me ye. Ra mi n yaa tɩlɛ tɩ Nazireyẽ paam daood wʋsgo, n tõog n pids a pʋlengã n kell n yɩ toore. (Amos 2:12) D sẽn yãk yam n tũud a Zeova raabã kɩtame tɩ d yaa toor ne neb a taabã. Yɩl n togs neb a taabã lekollẽ wã wall tʋʋmã zĩigẽ tɩ d yaa a Zeova Kaset soab baooda raoodo. Sẽn paase, dũni-kãngã nebã tagsgã la b manesmã sẽn tar sãoong n dabdã, yaa vẽeneg tɩ Biiblã noyã tũub la koɛɛgã mooneg na n lebgda toog n paasdẽ. (2 Tɩm. 1:8; 3:13) La tẽegd-y wakat fãa tɩ d sã n tall raood n kell n yɩ toor ne neb nins sẽn pa tũud a Zeova wã, d noogda a sũuri.—Yel. 27:11; Mal. 3:18. w24.02 16 s. a 7; 17 s. a 9

D gom Rom tigingã nebã sẽn da yaa toor-toorã yelle. Pa b fãa n da yaa Zʋɩf-rãmb b sẽn zãms hal b yãadmẽ tɩ b segd n sakda a Moyiiz Tõogã ye. Bu-zẽms neb minund sẽn yaa toor-toor n da be b sʋka. Tõe tɩ kiris-neb kẽer da yaa yembse, tɩ sãnda yaa yembs sẽn paam b mense. Tõe meng tɩ kẽer da tara yembse. Kiris-nin-kãens maana wãn n tõog n nong taaba, baa ne b yɛlã sẽn da pa wõnd taab baa bilfã? Tẽn-tʋmd a Poll sagl-b lame tɩ b “reegd taab sõma.” A gomdã võor yaa bõe? Gom-bil ning b sẽn lebg tɩ ‘reegã’ rat n yeelame tɩ f maan ned sãand sõma, wa f sẽn na n deeg ned f zakẽ, wall f yõg zood ne-a. Wala makre, a Poll wilga a Filemo a sẽn tog n deeg a Onezɩm sẽn yaa a yamb sẽn da zoe n bas-a wã to-to. A yeelame yaa: “Bɩ f reeg-a neere.” (File. 17) A Pirsill ne a Akila reega a Apolos sẽn da pa mi bũmb kẽer Kirist tũudmã wɛɛngẽ wã neere, n “peeg-a n tɩ wilg-a” bũmb wʋsgo. (Tʋʋ. 18:26) Pipi kiris-nebã pa bas tɩ b yɛlã sẽn da yaa toor-toorã welg-b ye. B ra reegda taab sõma. w23.07 6 s. 13

Pipi bũmb sẽn na n kɩt tɩ y rɩk y meng n kõ a Zeova yaa y sẽn nong-a wã yĩnga. Nonglem-kãng pa tik vɩʋʋgẽ ye. Y ‘bãnga Wẽnnaam la a raabã’ tɩ kɩt tɩ y sẽn nong-a to-to wã paase. (Kolo. 1:9) Y sẽn zãms Biiblã, y kɩsa sɩd 1) t’a Zeova sɩd beeme, 2) tɩ Biiblã yaa a Gomd a sẽn vẽneg tɩ b gʋlse, la 3) t’a tũnugda ne a siglgã n pidsd a raabã. Neb nins sẽn dɩk b mens n kõ a Zeova wã segd n mii Wẽnnaam Gomdã zãms-nana wã, la b tũud a noyã b vɩɩmã nens fãa pʋsẽ. B maanda b sẽn tõe fãa n wilgd neb a taabã bũmb nins b sẽn zãmsdã. (Mat. 28:19, 20) B sẽn nong a Zeova to-to wã pãng paasdame, tɩ b rat ne b sũur fãa n tũ yẽ a ye tãa. Pa woto ne yãmb sɩda? w24.03 4-5 s. a 6-8

A Abigayɩll ra kẽe kãadem ne a Naball sẽn da yaa nin-toaag la tʋʋm-yood soabã. (1 Sãm. 25:3) Ra segd n yaa toog ne a Abigayɩll t’a zĩnd ne rao a woto. A Abigayɩll wa n paama sor n tõe n paam a meng ne a sɩdã bɩ? N-ye. Yɩɩ wakat ning a Davɩɩd sẽn da na n wa lebg Israyɛll rĩmã sẽn yãk yam n na n kʋ a Abigayɩll sɩdã, a sẽn tʋ yẽ ne a nebã yĩngã. (1 Sãm. 25:9-13) A Abigayɩll ra tõe n zoeeme n looge, n bas t’a Davɩɩd wa kʋ a Naballe. La a pa maan woto ye. A pʋd n kosa a Davɩɩd t’a ra kʋ a Naball ye. (1 Sãm. 25:23-27) Tõe tɩ yaa bõe n kɩt t’a maan woto? A Abigayɩll ra nonga a Zeova, n da tũud noy nins a sẽn gãneg kãadmã wɛɛngẽ wã. A ra miime t’a nifẽ, kãadmã yaa sõngo. A ra rat n taa Wẽnnaam yam, tɩ kɩt t’a ra maand a sẽn tõe fãa n na n kogl a sɩdã ne a zakã rãmba. A yɩɩ tao-tao n maan bũmb sẽn na yɩl t’a Davɩɩd ra kʋ a Naball ye. w24.03 16-17 s. a 9-10

Neb bee yãmb tigingã pʋgẽ n modgdẽ n pa gĩt b vɩɩmã ne bũmb wʋsgo, b sẽn dat n tʋm a Zeova tʋʋmã wʋsgã yĩng bɩ? Yãmb mii kom-bɩɩs sẽn tar daood n yaa toor ne b taabã lekollẽ wã baa sẽn pa nana ne-bã bɩ? Yãmb mii neb sẽn ket n maand sɩd ne a Zeova, baa ne b zakã rãmb sẽn namsd-b b tẽebã yĩngã bɩ? Bɩ d tũnugd ne segb buud fãa n gomd goam sẽn kengd raood ne d tẽed-n-ta-kãense, n wilgdẽ tɩ d sũur nooma ne-ba, b sẽn mongd b mens bũmb toor-toor la b tar daoodã yĩnga. (File. 4, 5, 7) A Zeova kɩsa sɩd tɩ d rata ne d sũur fãa n noog a sũuri, la tɩ d tʋll n monga d meng bũmb toor-toore, sẽn na yɩl n vɩɩmd tɩ zems ne d sẽn pʋlm-a bũmb ning n dɩk d meng n kõ-a wã. A sẽn kõ-d sor tɩ d tõe n yãk bũmb ning d sẽn na n maan n wilg tɩ d nong-a lame wã, yaa zu-zẽkre. (Yel. 23:15, 16) Woto wã, bɩ d kell n wɩng ne a Zeova tũubu, la d sakd n mongd d mens bũmb toor-toor a yĩnga. w24.02 18 s. 14; 19 s. 16

Mams-y y yamẽ bũmb ning sẽn maan yʋʋmd 29 a Zeezi rogmã poorã, a sẽn wa n sɩng a koɛɛgã moonegã. Yẽ ne a ma a Maari kẽnga yi-kãadem kibs Kana. A Maari ra sõngd-b lame n get sãambã yelle. La kibsã sasa, bũmb n maane. Divẽ wã wa n saame. A Maari yɩɩ tao-tao n yeel a Zeezi yaa: “B pa le tar divẽ ye.” (Zã 2:1-3) Bõe la a Zeezi maan-yã? A maana yel-solemde, n kɩt tɩ koom lebg “divẽ-sõngo.” (Zã 2:9, 10) A Zeezi koe-moonegã sasa, a maana yel-soalem a taaba. A talla a pãn-kãsengã n sõng neb tusa. Wala makre, ad yel-soalem a yiib a sẽn maane: A rɩlga rap tus a nu, tɩ rẽ poor t’a rɩlg rap tus a naase. D sã n naag nin-kãensã fãa taaba, n paas pagbã la kambã sẽn da be be wã, b sõorã tog n yɩɩda neb tus pisi la a yopoe. (Mat. 14:15-21; 15:32-38) Yel-solem-kãensã a yiibã sasa, a Zeezi sãooga bãad-dãmb wʋsg me.—Mat. 14:14; 15:30, 31. w23.04 2 s. a 1-2

Yel-beed poore, wakat kẽere d sũurã mi n sãamame hal tɩ d getẽ tɩ d pa le tõe n maan baa fʋɩ ye. D tõe n getame tɩ yaa toog ne-d tɩ d yik d gãagẽ wã wa sẽn yɩ to-to ne a Eli wã. D sẽn dat bal yaa d gõe. (1 Rĩm. 19:5-7) Tõe n yɩɩ tɩlɛ tɩ d paam sõngr sẽn na yɩl n kell n tʋm a Zeova tʋʋmã. Sã n wa yaa woto a Zeova yet-d lame t’a na n sõng-d lame, wa rũndã daar vɛrse wã sẽn wilgdã. Rĩm a Davɩɩd paama sõngr a woto buudu. A sẽn wa n maood ne zu-loees tɩ bɛɛb me baood-a n na n kʋ wã a yeela a Zeova yaa: “Yãmb nug-rɩtg teenda maam.” (Yɩɩn. 18:35) A Zeova wae n tũnugda ne neb a taaba, n sõngd tõndo. Wala makre a Davɩɩd sẽn wa n koms raoodo, a zoa a Zonatã wa n kaag-a lame n bels-a la a keng a raoodo. (1 Sãm. 23:16, 17) A Zeova yãka a Eliize me t’a na n sõngd a Eli.—1 Rĩm. 19:16, 21; 2 Rĩm. 2:2. w24.01 23-24 s. 10-12

A Zeova yaa kõat wʋsgo. B sẽn gom ‘yam hakɩɩkã’ b sẽn mak ne pagã yell to-to Yel-bũn sak a 9 pʋgẽ wã wilgdame t’a Zeova yaa kõata, la t’a kõta tõnd bõn-sõma wʋsgo. Kibarã wilgame tɩ yam hakɩɩkã b sẽn mak ne pagã rʋga a nemd tɩ bɩ sõma, n kalem a divẽ la a maneg a taable. (Yel. 9:2, notã.) Sẽn paase, vɛrse a 4 ne a 5 wã pʋgẽ, “a [yam hakɩɩkã] yeta sẽn pa tar-b yamã yaa: ‘Wa n dɩ-y mam dɩɩbã.’” Bõe yĩng tɩ d segd n kẽng yam hakɩɩkã roogẽ n tɩ rɩ a rɩɩbã? A Zeova ratame t’a kambã tall yam la b zĩnd bãane. A pa rat tɩ d bao yɛl n kõ d mense, n wa maand d bãngẽ n yaool n dɩk yam ye. Rẽ n so t’a ‘bĩng yam nin-tɩrsã yĩnga.’ (Yel. 2:7) D sã n zoet a Zeova wa sẽn segdã, d na n dat n taa a yam. D na n kelgda a saglsã la d tũudẽ, tɩ d sũy noome.—Zak 1:25. w23.06 23 s. 14-15

Baa d sã n wa pa le tõe n tʋm a Zeova tʋʋmã wʋsg wa d sẽn datã, d tõe n basa d yam t’a sũur nooma ne d sẽn maand d sẽn tõe wã. Bõe yĩng tɩ d yet woto? No-rɛɛs a Zakari wakatẽ wã, a Zeova yeel-a lame t’a yãk sãnemã ne wanzuri wã neb nins sẽn be Babilonnã sẽn toolã n maan maanf-bedre. (Zaka. 6:11) “Maanf-bedrã” ra yaa sẽn na yɩl tɩ b “tẽegd” kũunã b sẽn kõ ne yamleoogã yelle. (Zaka. 6:14, notã.) D tõe n basa d yam t’a Zeova pa na n tol n yĩm d sẽn tũud-a ne d sũur fãa baa ne zu-loeesã ye. Yaa vẽeneg tɩ d sẽn vɩ yaoolem wakatã, d na n ket n segda zu-loees buud toor-toore. (2 Tɩm. 3:1, 13) La tõe tɩ yɛlã wa keng meng n yɩɩd woto. La d pa segd n maan yɩɩr tɩ loog noor ye. Tẽeg-y-yã a Zeova sẽn yeel a nin-buiidã bũmb ning a Aaze wakatẽ wã. A yeelame yaa: “Mam bee ne yãmba. . . . Ra zoe-y rabeem ye.” (Aaze 2:4, 5) Tõnd me tõe n kɩsa sɩd tɩ d sã n maand d sẽn tõe fãa sẽn na yɩl n maan a Zeova raabã, a na n kell n zĩnda ne-do. w23.11 19 s. 20-21

Bãng-y t’a Zeova ra tõe n kɩtame tɩ b pa gʋls tẽn-tʋmd a Pɩyɛɛr kongr toor-toorã Biiblã pʋgẽ ye. La a kɩtame tɩ b gʋlse, sẽn na yɩl tɩ d rɩk yam. (2 Tɩm. 3:16, 17) D sã n bãng bũmb nins a Pɩyɛɛr sẽn mao ne wã, na n sõng-d lame tɩ d bãng t’a Zeova pa baood tɩ d yɩ neb sẽn zems zãng ye. A ratame tɩ d kell n mao baa ne d pãn-komsmã, n da koms raood n bas ye. Bõe yĩng tɩ tar yõod tɩ d ra koms raood n base? D sã n wa tagsdẽ tɩ d maoo ne pãn-komsem ning n tõoge, d tõe n le wa lʋɩɩ a pʋgẽ. La d tõe n kell n modgame n da koms raood ye. D fãa mi n yeela gomd wall n maan bũmb n wa maand d bãngẽ. Baasgo d sã n pa koms raood n base, a Zeova na n sõng-d lame tɩ d tõog d pãn-komsmã. (1 Pɩy. 5:10) A Zeezi sẽn zoe a Pɩyɛɛr nimbãaneg baa ne a sẽn kong naoor wʋsgã, tõe n sõng-d lame tɩ d kell n tũ a Zeova ne d sũur fãa. w23.09 20-21 s. a 2-3

Sɩd me, a Zeezi ra tõe n sãooga a Lazaar wala a Mart sẽn yeel rũndã daarã vɛrse wa pʋgẽ wã. La a yãka yam n na n maan bũmb sẽn na n ling-b wʋsgo. A pʋlma a Mart n yeel-a yaa: “Fo tãoã na n vʋʋgame.” Sẽn paase, a yeelame: “Mam yaa kũum vʋʋgrã la vɩɩmã.” (Zã 11:23, 25) Sɩd me, Wẽnnaam kõo a Zeezi tõog t’a tõe n vʋʋg kũum. Sẽn deng rẽ, a vʋʋga bi-pugl sẽn maan kaalem tɩ ra nan pa kaoos ye. Bi-bɩɩg a ye me n da maan kaalem, t’a vʋʋg-a daar-n-kãng bala. (Luk 7:11-15; 8:49-55) La rẽ yĩnga, a ra na n tõog n vʋʋga ned sẽn maan kaalem sẽn ta rasem a naase, t’a yĩngã sɩng põogr sɩda? A Lazaar tão a Maari me yiime n tɩ seg a Zeezi. Yẽ me togsa a Zeezi a Mart sẽn yeel bũmb ningã. A yeelame: “Zu-soaba, yãmb sã n da zĩndẽ ka, mam tãoã ra kõn kiẽ ye.” (Zã 11:32) A Zeezi sẽn da ne a Maari ne neb nins sẽn da be ne-a wã sẽn yãbdã, a sũurã sãama hal wʋsgo. A zo-rãmbã nimbãaneg yõk-a lame, hal t’a raag nintãm. A miime tɩ ned d sẽn nong sã n maan kaalem, zabdame. Sɩd me, a yãgdame n na n menes bũmb ning sẽn da kɩt tɩ b yãbdã! w23.04 10-11 s. 12-13