Wao-fugdgu

Rĩm a Ezekɩyaas sẽn wa n bẽed bã-kɛgenga, a pʋʋsa a Zeova n kos t’a kõ-a laafɩ. A Zeova leoka a pʋʋsgã, n kõ-a laafɩ. (2 Rĩm. 20:1-6) La tẽn-tʋmd a Poll sẽn wa n yõk a Zeova sɛɛg t’a yãk ‘gõaag a yĩngã pʋgẽ wã,’ a Zeova pa kɩt t’a zu-loɛɛgã sa ye. (2 Kor. 12:7-9) Tẽn-tʋmdb a Zak ne a Pɩyɛɛr ra tara zu-loees sẽn wõnd taaba. Rĩm a Erood ra baood n kʋʋ b yiibã fãa. Tigingã neb pʋʋsa a Pɩyɛɛr yĩnga, la yaa vẽeneg tɩ b pʋʋsa a Zak yĩng me. La b kʋʋ a Zake, tɩ Wẽnnaam yaool n maan yel-solemd n yiis a Pɩyɛɛr bãensã roogẽ. (Tʋʋ. 12:1-11) D tõe n soka d meng yaa: ‘Bõe yĩng t’a Zeova fãag a Pɩyɛɛre, n yaool n pa fãag a Zake?’ Biiblã pa wilg rẽ ye. La d tõe n kɩsa sɩd t’a Zeova “pa tol n maand kɛgr ye.” (Tõo. 32:4) Wakat ninga a Zeova tõe n leoka d pʋʋsgã tɩ pa yɩ wa d sẽn da tẽedã ye. La d sẽn kɩs sɩd t’a Zeova leokda d pʋʋsgã wakat fãa ne nonglem la tɩrlmã, d sũur pa sãamd ne a sẽn leok d pʋʋsg to-to ye.—Zoob 33:13. w23.11 21 s. a 6

Biibl-gʋlsd a Zak yeelame tɩ neb nins sẽn tar yamã ‘sakda nana.’ Tags-y n ges-y rẽ sẽn dat n yɛɛlga. D segd n yɩta tao-tao n sakd neb nins a Zeova sẽn kõ zu-sobendã, la d maand rẽ ne yamleoogo. La ned sã n wa yeel tɩ d maan bũmb sẽn kɩɩsd a Zeova noore, yaa vẽeneg t’a Zeova pa rat tɩ d sak ye. (Tʋʋ. 4:18-20) Yaa nana tɩ d sak a Zeova n yɩɩd ninsaala. Sɩd me, wakat fãa a Zeova kõta noy sẽn zems zãnga. (Yɩɩn. 19:7) La pa woto ne neb nins sẽn tar zu-sobendã ye. Baa ne rẽ, d saasẽ Ba wã kõo roagdbã, nanambsã la kãsem-dãmbã zu-sobendo. (Yel. 6:20; 1 Tes. 5:12; 1 Pɩy. 2:13, 14) D sã n sakd-ba, yaa a Zeova la d sakda. w23.10 6 s. a 2-3

Bũmb a ye d sẽn tõe n maan tɩ keng d tẽebã yaa d sẽn na n tagsd a Zeova pãn-kãsengã yelle. A tara pãng n tõe n pids a sẽn pʋlem fãa. Sɩd me, yẽ la Wẽnnaam Sẽn-tõe-a-fãa. (Zoob 42:2; Mark 10:27; Efɛɛ. 3:20) Baa ne a Abrahaam ne a Saara yʋʋmã sẽn da vẽsgã, a yeel-b lame tɩ b na n paama biiga. (Sɩng. 17:15-17) Sẽn paase, a yeela a Abrahaam t’a yagensã na n wa sooga Kanaã tẽngã. Israyɛll nebã sẽn yaa a Abrahaam yagensã sẽn zĩnd yembd Ezɩpt tẽngã n maan yʋʋm wʋsgã, ra wõnda a Zeova sẽn yeel bũmb ningã pa na n tol n pids ye. La pidsame. A yeela a Maari sẽn da pa mi raoã, t’a na n doga yẽ meng Bi-riblã, soab ning waoong a sẽn da pʋlem yʋʋm tusa sẽn looge, Edɛn zẽedã zĩigẽ wã. (Sɩng. 3:15) Pʋlen-kãng me pidsame. D sã n tagsd bũmb nins a Zeova sẽn pʋlem la a sẽn pidsã zugu, na n kɩtame tɩ d maneg n tẽ t’a tara pãn-kãseng n na n pids a sẽn pʋlem tɩ dũni-paalg n watã.—Zoz. 23:14; Eza. 55:10, 11. w23.04 28 s. 10-12

A Zeova leoka a Davɩɩd sẽn pʋʋs n kos fãagrã. (1 Sãm. 19:10, 18-20; 2 Sãm. 5:17-25) Tõnd me tõe n basa d yam ne rẽ. (Yɩɩn. 145:18) A Zeova tõe n leoka d pʋʋsgo, tɩ pa yɩ wa d sẽn da tẽedã ye. A Poll kosa a Zeova t’a yãk a “gõaag yĩngã pʋgẽ.” Yaa hal naoor a tãab la a Poll pʋʋs zu-loe-kãng yĩnga. A Zeova leoka a pʋʋsgã bɩ? N-ye. La pa yɩ wa a Poll sẽn da tẽedã ye. A Zeova pa kɩt tɩ zu-loɛɛgã loog n bas-a ye. La a kõ-a-la pãng sẽn sek a na tõog n kell n maan sɩd ne-a. (2 Kor. 12:7-10) Wakat ninga, a Zeova tõe n leoka tõnd me pʋʋsgo, tɩ pa yɩ wa d sẽn da tẽedã ye. D tõe n basa d yam t’a Zeova mii a sẽn tõe n sõng-d to-to, tɩ naf-d n yɩɩda. A tõeeme meng n “maan tɩ yɩɩg bũmb nins fãa tõnd sẽn kot wall d sẽn tagsdã hal zĩig sẽn zãre.” (Efɛɛ. 3:20) Rẽ n kɩt tɩ wakat ning a sẽn na n leok d pʋʋsgã, wall a sẽn na n leok to-to wã tõe n pa yɩ wa d sẽn da tẽedã ye. w23.05 8-9 s. a 4-6

Yɩta sõma tɩ d mi n tagsd Biiblã sẽn pʋlem tɩ sẽn ki-bã na n vʋʋgame wã zugu. Bõe yĩnga? Bala d pa mi wakat ning d sẽn na n tiig n lʋɩ bã-kɛgenga, wall d ned sẽn na n tiig n maan kaalem ye. (Koɛ. 9:11; Zak 4:13, 14) D sẽn tẽed kũum vʋʋgrã tõe n sõng-d lame tɩ d tõog toog zu-loees a woto sasa. (1 Tes. 4:13) Biiblã wilgdame tɩ d Ba sẽn be saasẽ wã mii tõnd sõma, la t’a nong-d-la wʋsgo. (Luk 12:7) Tags-y n ges-y-yã, a Zeova sẽn mi tõnd sõma wã, a tõe n vʋʋg-d lame tɩ d ket n tar d pʋ-tẽerã, tɩ d zʋgã ne d manesmã me pa toeem ye. A Zeova nong-d-la wʋsgo, la a kɩt tɩ d tõe n vɩɩmd wakat sẽn kõn sa. Dẽnd baa d sã n ki, a na n vʋʋg-d lame! Bõe yĩng tɩ d tõe n tẽ tɩ sẽn ki-bã na n vʋʋgame? Bala d kɩsa sɩd tɩ sẽn pʋlm-a wã tʋllame n pids a pʋlengã, la t’a tara pãng bɩ tõog n tõe n maan dẽ. w23.04 8-9 s. a 2-4

A Zozɛf ne a Maari ra naagda taab n maand bũmb toor-toore, sẽn na yɩl n paas bãmb ne a Zeova zoodã pãnga. B ra miime tɩ tara yõod tɩ zak neb naagd taab n waoogd a Zeova. (Luk 2:22-24; 4:16) Ad sɩd yaa mak-sõng tɛkẽ sẽn kẽ-b kãadmã yĩnga. Wa a Zozɛf ne a Maari, yãmb me sã n tara kamba, tõe n yɩɩ toog tɩ y kẽnd tigissã, wall y yãk wakat takɩ y zak pʋgẽ Biibl zãmsgã yĩnga. Tõe n yɩɩ toog me tɩ yãmb y yiibã yãk wakat takɩ n zãmsd Biiblã, la y naagd taab n pʋʋsdẽ. La tẽeg-y tɩ y sã n naagd taab n tũud a Zeova, yãmb ne yẽ zoodã pãng paasdame, tɩ yãmb y yiibã me nonglmã paasdẽ. Woto wã, lʋɩɩsd-y-yã a Zeova tũubã taoor y kãadmã pʋgẽ. Y sã n tar zu-loees y kãadmã pʋgẽ, tõe tɩ y yamã ka be y na naag taab n maand zak pʋgẽ Biibl zãmsg ye. Sã n yaa woto, sẽn na yɩl n sɩnge, bɩ y sõs bũmb sẽn be yamleoog zug koɛɛg-koɛɛga. Rẽ na n paasa y nonglmã la y zems-n-taarã, la kɩt tɩ y tʋll n naagd taab n tũud a Zeova. w23.05 22 s. a 7-8

Wãn to la a Abdiyaas sẽn da zoet Wẽnnaam wa sẽn segdã sõng-a? Sõng-a lame t’a ra yaa pʋ-peelem soaba, la ned b sẽn tõe n teege. Rẽ kɩtame tɩ rĩmã yãk-a t’a ra get na-yirã neb yelle. (Ges-y Neemi 7:2.) Sẽn paase, a Abdiyaas wẽn-zoeerã kɩtame t’a paam raood wʋsgo. Ra yaa tɩlɛ t’a tall raood a woto. A vɩɩmda rĩm-wẽng a Akaab wakatẽ wã. (1 Rĩm. 16:30) A pag a Zezabɛll sẽn da waoogd wẽn-faoog a Baallã me ra kisa a Zeova wʋsgo, hal n bao n na n menes tũudum hakɩɩkã rɩtg soolmã pʋgẽ. A kʋʋ Wẽnnaam no-rɛɛsdb wʋsg menga. (1 Rĩm. 18:4) A Zezabɛll sẽn wa n gẽesd Wẽnnaam no-rɛɛsdbã n na n kʋ wã, a Abdiyaas solga no-rɛɛsdb koabga, “sul pis-nu-nu tãng bogdẽ n da kẽnd n kõt-b rɩɩb ne koom.” (1 Rĩm. 18:13, 14) A Zezabɛll sã n da bãnge, yaa vẽeneg t’a ra na n kʋʋ a Abdiyaas sẽn da tar daoodã. Sãmbg sẽn kae, a Abdiyaas me ra zoeta kũum wa nebã fãa. La a ra nonga a Zeova ne neb nins sẽn tũud-a wã n yɩɩd a mengã yõore. w23.06 16 s. a 9-10

A Zeova ket n wilgda a nin-buiidã sor rũndã-rũndã wa pĩndã. A tũnugda ne a Gomdã la ne a Bi-riblã sẽn yaa tigingã zu-soabã. D nee kaset sẽn wilgd tɩ Wẽnnaam ket n tũnugda ne ninsaalb n wilgd-d sor bɩ? N-ye. Wala makre, tẽeg-y bũmb nins sẽn maan yʋʋmd 1870 soabã poorã. A Charles Russell ne a tʋmd-n-taasã bãngame tɩ yʋʋmd 1914 na n yɩɩ yʋʋmd sẽn tar yõod wʋsg Wẽnnaam Rĩungã luglg wɛɛngẽ. (Dãn. 4:25, 26) Yaa Biiblã bãngr-goam la b zãms n bãng rẽ. A Zeova ra sõngd-b-la Biiblã zãmsg pʋgẽ bɩ? Yaa vẽenega. Bũmb ning sẽn maan dũniyã gill zug yʋʋmd 1914 wilgame tɩ Wẽnnaam Rĩungã sɩnga naam dɩɩbo. Dũni gill pipi zabrã sɩngame, tɩ rẽ poore, bã-longdse, tẽn-digimds la kom zĩndi. (Luk 21:10, 11) A Zeova sɩd ra tũnugda ne nin-kãens sẽn yaa pʋ-peelem dãmbã n sõngd a nin-buiidã. w24.02 22 s. 11

Tõnd sẽn yaa a Zeova nin-buiidã, d miime t’a nong-d lame la t’a ratame tɩ d vɩɩmã tall barka. (Rom. 8:35-39) D kɩsa sɩd me tɩ d sã n tũud Biiblã saglsã, nafda tõnd wakat fãa. (Eza. 48:17, 18) La d sã n wa paam zu-loees d sẽn da pa tẽede, d manesem segd n yɩɩ wãna? Wala makre, d zakã ned tõe n maana bũmb n sãam d sũuri. Tõeeme tɩ d ka laafɩ, tɩ kɩt tɩ d pa tõe n tʋm a Zeova tʋʋmã wa d sẽn datã, wall yaa sabab-wẽng n maan d sẽn beẽ wã, tɩ pa nana ne-d ye. Tõe me tɩ b namsda tõnd d tũudmã yĩnga. D sã n wa maood ne zu-loees a woto buudu, d tõe n wa sokda d meng yaa: ‘Bõe yĩng tɩ yel-kãngã paam maam? Mam maana bũmb sẽn yaa wẽng bɩ? Woto rat n yeelame tɩ m pa tar a Zeova bark bɩ?’ Yãmb zoe n soka y meng sogs-kãensã bɩ? Sã n yaa woto, bɩ y ra koms raood ye. Neb wʋsg sẽn da tũud a Zeova ne b sũy fãa talla tagsa a woto buudu.—Yɩɩn. 22:1, 2; Hab. 1:2, 3. w23.04 14 s. a 1-2

D sã n wa be makr taoore, d yɩta tao-tao n zãag d mens ne tagsa la manesem sẽn tõe n sãam tõnd ne Wẽnnaam zoodã. A Zeova ratame tɩ d sak-a ne d sũur fãa. (Rom. 6:17) Noy nins a sẽn kõt tõndã yaa tõnd neer yĩng wakat fãa. D pa tõe n toeem a noyã me ye. (Eza. 48:17, 18; 1 Kor. 6:9, 10) A Sʋɩtãan mi n tũnuga ne neb tɩ b nams tõnd ne b no-goam la ne nen-kɛglem tʋʋma, n dat tɩ d bas a Zeova tũubu. A raabã yaa a “wãb” tõndo, rat n yeel tɩ n sãam tõnd ne a Zeova zoodã. (1 Pɩy. 5:8) B namsa pipi kiris-nebã, n pãb-b la b kʋ kẽere, b sẽn yãk yam n kell yals kãn-kãe wã yĩnga. (Tʋʋ. 5:27, 28, 40; 7:54-60) Rũndã-rũndã, a Sʋɩtãan ket n tũnugda ne neb tɩ b namsd tõnd d tũudmã yĩnga. B sẽn namsd d tẽed-n-taasã ne nams-toaag Risi la tẽns a taab pʋsẽ wã, n paas bɛɛbã sẽn namsd d ned kam fãa wã wilgda rẽ vẽenega. A Sʋɩtãan sẽn kɩtd tɩ b namsd tõndã sẽn yãk a toogo, a tũnugda ne “sɩlem-tʋʋma.”—Efɛɛ. 6:11. w23.07 15-16 s. a 6-9

Y sẽn wɩngd ne Wẽnnaam Gomdã zãmsgã, y sẽn nong a Zeova to-to wã pãng paasdame. Nonglem-kãng kɩtame tɩ y sɩng bũmb ning y sẽn zãmsdã tũubu. Y tikda Biiblã saglsã n yãkd yam sẽn yaa sõma. Y toeemda y manesmã la y tʋʋm-tʋmdɩ wã, y sẽn dat n ta Wẽnnaam yamã yĩnga. Y modgdame n dɩkd y Ba sẽn be saasẽ wã togs-n-taare, wa biig sẽn dɩkd a ba sẽn nong-a togs-n-taar to-to wã. (Efɛɛ. 5:1, 2) D tõe n soka d meng yaa: ‘Mam sẽn nong a Zeova to-to masã wã pãng yɩɩda m sẽn wa n lebg kiris-ned paalmã bɩ? Mam lisgã tɛka, mam tagsa wã la m manesmã maneg n wõnda a Zeova rẽndã bɩ? Sẽn yɩɩd fãa, m wilgda m tẽed-n-taasã tɩ m nong-b-la wa a Zeova bɩ?’ ‘Nonglem ning yãmb sẽn da tar sɩngrẽ wã’ sã n booga bilfu, bɩ y ra koms raood ye. A buud paama pipi kiris-neb kẽere. A Zeezi pa raag-b n base, a pa na n daag tõnd me n bas ye. (Vẽn. 2:4, 7) A miime tɩ d tõe n le paama nonglem ning d sẽn da tare, d sẽn wa n bãng sɩdã paalmã. w23.07 8 s. a 2-3

Tẽn-tʋmd a Pɩyɛɛr maana yel-wẽn toor-toore. Pipi, a Pɩyɛɛr teega a meng tɩ looge, n wuk a meng n yeel tɩ baa tẽn-tʋmdb a taabã fãa sã n bas a Zeezi, yẽ na n kell n maana sɩd ne-a. (Mark 14:27-29) Yiibu, a Zeezi kos-a-la naoor wʋsg t’a gũ t’a pa tõog n gũ ye. (Mark 14:32, 37-41) Rẽ poore, neb kʋʋngã sẽn wa n na n yõk a Zeezi wã, a Pɩyɛɛr zoeeme n bas-a. (Mark 14:50) Sẽn na n baase, a Pɩyɛɛr kɩɩsa naoor a tãab t’a pa mi a Zeezi, hal n wẽene. (Mark 14:66-71) A Pɩyɛɛr sẽn wa n bãng t’a maana yel-wẽn-kãsengã, a manesem yɩɩ wãna? A yãba ne sũ-sãang wʋsgo. (Mark 14:72) A Zeezi pa ning-a taal a kongrã yĩng ye. A pʋd n yeela a Pɩyɛɛr sẽn yaa a zoa wã t’a na n kõ-a-la tʋʋm n paase. (Zã 21:15-17) A Pɩyɛɛr da miime t’a maana yel-wẽn-kãsenga, la a pa koms raood n bas sẽn yaa sõma maaneg ye. Bõe yĩnga? A ra kɩsa sɩd t’a Zu-soab a Zeezi ra ket n nong-a lame. Yam-bʋg la d tõe n dɩk a Pɩyɛɛr kibarã pʋgẽ? A Zeova ratame tɩ d bas d yam t’a nong-d lame, la t’a kõta sugr wʋsgo.—Rom. 8:38, 39. w24.03 18-19 s. 13-15

Ned sã n yo, a tõe n ninga a meng yãnde, tõe n kɩtame t’a tagsdẽ t’a ka võore, a tõe n dɩka pʋg tɩ pa tũ ne a raabo, wall a wã a zakã. Vẽenega, d sã n zãag d meng ne pʋg-yalmã ‘roogã’ yaa yam bũmbu. Neb nins sẽn yoodã sẽn sãamd bãmb ne a Zeova zoodã sẽn yãk a toogo, b wʋsg lʋɩta bãas n kiid pẽba. (Yel. 7:23) Yel-bũn sak a 9 vɛrse 18 wã baasgẽ b yeelame yaa: “Neb nins sẽn sig pagã yirã bee Yaoogã zĩ-zulumsẽ.” La bõe yĩng tɩ neb wʋsg sakd pagã boollã sẽn wat ne yɛl wʋsgã? (Yel. 9:13-18) Bũmb sẽn wae d sẽn segd n zãag d mens ne yaa yoobã yɛl gesgo. Neb kẽer tagsdame tɩ yoob yɛl gesg pa wẽng ye. La rẽ tõe n wãa neda, n kɩt t’a pa le nand a meng la neb a taabã, t’a basg me yaa toogo. F sã n ges yoob yɛla paada f yamẽ, tɩ yɩl n yĩm b yell yaa toogo. Sẽn yɩɩd fãa, yoobã yɛl gesg pa kʋʋd tʋls-wẽnsã ye. A kɩtdame tɩ b paamd pãnga. (Kolo. 3:5; Zak 1:14, 15) Sɩd me, neb wʋsg sẽn ges yoobã yɛl wa n baas n yoome. w23.06 23 s. 10-11

Baa ne tẽns a taab sẽn mi n zabd ne Gãrãnd Bertayn la Etazĩni wã, b pa na n tõog n ledg-b n lebg dũni gill pãn-soaad ye. D mii rẽ, bala “kugrã” sẽn makd Wẽnnaam Rĩungã na n wãa bõn-naandgã naoã sẽn makd Gãrãnd Bertayn la Etazĩni sẽn naag taabã. (Dãn. 2:34, 35, 44, 45) Yãmb kɩsa sɩd t’a Dãniyɛll bãngr-gomdã sẽn gomd naoã sẽn maan ne kut la yagd yellã pidsdame bɩ? Sã n yaa woto, y sẽn vɩ to-to wã segd n wilgda rẽ. Y pa na n baood arzɛgs wʋsg dũni-kãngã pʋgẽ, bala y miime tɩ ka la bilfu b na n sãam-a lame. (Luk 12:16-21; 1 Zã 2:15-17) Y sã n wʋm bãngr-gom-kãngã võore, na n sõng-y lame me tɩ y neẽ tɩ koɛɛgã moonegã la nebã zãmsgã tara yõod wʋsgo. (Mat. 6:33; 28:18-20) Y sã n zãms bãngr-gom-kãngã poor bɩ y sok y meng yaa: ‘Mam yam-yãkr toor-toorã wilgdame tɩ m kɩsa sɩd tɩ ka la bilfu, Wẽnnaam Rĩungã na n sãama ninsaalbã goosneema-rãmbã fãa bɩ?’ w23.08 11 s. 13-14

Sik-y y meng n sak n deeg tɩ y yʋʋmã, y laafɩ wã, la y yɛlã sẽn yaa to-to wã tõe n kɩtame tɩ y pa le tõe n maan wa pĩndã ye. Y yʋʋmã wall y laafɩ wã sã n wa kɩt tɩ y pa le tõe n maan bũmb kẽere, bɩ y rɩk a Barzɩlayi togs-n-taare, n da sak n deeg tʋʋmd y sẽn pa na n tõog ye. (2 Sãm. 19:35, 36) Y tõe n maana wa a Moyiiz me n sak tɩ b sõng-yã, tɩ sã n tõe bɩ y boog y tʋʋmã n kõ neb a taaba. (Yik. 18:21, 22) Y sã n tall sik-m-meng a woto, na n sõng-y lame tɩ y ra wa baood bũmb y sẽn pa tõe n paame, tɩ wa ne yaams ye. D pa segd me n ningd d meng tall neb a taab yam-yãkr sẽn pa zems yĩng ye. D pa tõe n yãk yam n kõ ned ye. D leb pa tõe n gɩdg tɩ zu-loees ra paam ned sẽn yãk yam sẽn pa sõma ye. Wala makre, biig tõe n yãka yam n bas a Zeova tũubu. Yam-yãkr a woto tõe n sãama a roagdbã sũur wʋsgo. La roagdb nins sẽn ningd b meng taal b kamb sẽn yãk yam sẽn pa sõma yĩngã tʋka zɩɩb sẽn zɩs wʋsgo. Pa zɩɩb a Zeova sẽn dat tɩ b tʋk ye. w23.08 29 s. 11-12

A Sãmsõ ra yaa ned sẽn pa zems zãng wa tõndo. Wakat ninga, a yãka yam sẽn pa yɩ sõma. Sẽn yɩɩd fãa, a wa n yãka yam n maan bũmb sẽn wa ne zu-loees wʋsgo. A Sãmsõ sẽn yɩ bʋ-kaood n kaoos bilf poore, a “yamã kẽe pag a yembr sẽn da be Sorɛk longã pʋgẽ. A yʋʋr la a Dalila.” Sẽn deng rẽ, a Sãmsõ ra rat n kẽe kãadem ne Filisti paga. “Yaa a Zeova n da rat t’a maan woto. Bala a da baooda weer n na n zab ne Filisti nebã.” Rẽ poore, a Sãmsõ wa n kẽnga Gaaza sẽn yaa Filisti nebã tẽngã, n tɩ gãand pʋg-yoodr a ye roogẽ. Daar-n-kãnga, Wẽnnaam kõo a Sãmsõ pãng t’a vigs tẽngã rignoorã kʋɩlense, tɩ tẽngã pa le tar koglg sõma ye. (Bʋ. 14:1-4; 16:1-3) La tõe t’a Dalila nengẽ wã ra yaa toore, bala wõnda a ra yaa Israyɛll neda. A Dalila reega ligd wʋsg Filisti nebã nengẽ n na n zãmb a Sãmsõ. w23.09 5 s. 12-13

Yam-vẽenem tõe n sõnga tõnd tɩ d yɩ sũ-bʋgsem soaba. B sã n wa wẽed no-koeemd ne ned sẽn yaa yam-vẽenem soaba, a yõkda a menga. D rɩk makre: Yãmb sã n yã galaas-kẽeng sẽn be koomẽ, sẽn be pʋgẽ wã yɩɩda sẽn be yɩngã hal zĩig sẽn zãre. Woto me, ned sã n sok-d sokre, naoor wʋsgo d pa mi bũmb ning sẽn kɩt t’a sok sokrã ye. Dẽnd nand tɩ d leok sokrã, yɩta sõma tɩ d tẽeg tɩ tõe tɩ d pa mi bũmb ning sẽn kɩt t’a sok sokrã ye. (Yel. 16:23) D gom a Zedeyõ sẽn leok Efrayim nebã to-to wã yelle. B sũyã yika ne a Zedeyõ, bala sɩngrẽ wã, a pa bool-b tɩ b naag-a n tɩ zab ne Israyɛll bɛɛbã ye. Pʋd n yaa bõe n kɩt tɩ b sũyã yikã? Tõe tɩ b tagsame t’a paoog-b lame bɩ? Sẽn yaa a soab fãa, a Zedeyõ talla yam n wilg t’a wʋmda b tagsgã võore, la a leok ne bʋgsem. Biiblã yeelame t’a sẽn gom ne bãmb woto wã, “b sũyã sigame.”—Bʋ. 8:1-3. w23.09 16 s. a 8-9

A Zeova ne a Zeezi n yaa ba ne a bɩɩg ning sẽn nong taab n tɩ yɩɩdã. A Zeova sẽn wa n getẽ tɩ b yaand a Biigã, n pa tẽed-a la b namsd-a wã, sãmbg kae tɩ sãama a sũur wʋsg ye. Roagd buud fãa biig sẽn zoe n maan kaalem mii rẽ sẽn sãamd sũur to-to. D kɩsa sɩd ne d sũur fãa tɩ sẽn ki-bã na n wa vʋʋgame. La baa ne rẽ, d ned sã n maan kaalem, d sũur sãamda wʋsgo. Rẽ sõngda tõnd tɩ d bãng a Zeova sũurã sẽn segd n sãam to-to yʋʋmd 33 soabã a sẽn wa n get a Bi-nongrã sẽn namsd hal n wa ki wã. (Mat. 3:17) Nand tɩ Tẽegrã daar ta, y zak pʋgẽ Biibl zãmsgã sasa wall y meng Biibl zãmsgã sasa, y tõe n zãmsa bũmb toor-toor a Zeezi maoongã zugu. Tẽegrã daare, bɩ y modg n ges daarã vɛrse b sẽn wɛgsã. D sã n segl d sũurã a Zeezi kũumã tẽegr yĩnga, d na n tõog n sõnga neb a taabã tɩ bãmb me rɩ a yõodo.—Ɛsd. 7:10. w24.01 11 s. 10-12

Bũmb a ye d sẽn tõe n maan n paam t’a Zeova kõ-d pãnga, yaa d sẽn na n pʋʋsd-a. A Zeova tõe n leoka d pʋʋsgã, n kõ-d “pãng ning sẽn yɩɩd ninsaal rẽndã.” (2 Kor. 4:7) D leb n tõe n paama pãnga, d sã n karemd a Gomdã la d bʋgsdẽ. (Yɩɩn. 86:11) Koɛɛg ning a Zeova sẽn taas tõnd tɩ be Biiblã pʋgẽ wã “tara pãnga.” (Ebre. 4:12) Y sã n pʋʋsd a Zeova la y karemd a Gomdã y na n paama raood n tõog toogo, n kell n tall sũ-noogo, wall y tõog n tʋm tʋʋmd sẽn pa nana. D ges a Zeova sẽn kõ no-rɛɛs a Zonas raood to-to. A Zonas ra yɛɛsdame n pa rat n kẽng zĩig ning a Zeova sẽn tʋm-a wã ye. Rẽ n so t’a kẽ koom-koglg n na n kẽng zĩig a to. Rẽ kɩtame tɩ yẽ ne neb nins sẽn da be koom-koglgã pʋgẽ ne-a wã naan n ki sob-kãseng yĩnga. Koom-koglgã pʋgẽ tʋm-tʋmdbã sẽn lob a Zonas koomẽ wã, zĩm-bedr n vel-a, t’a be zĩig sẽn kẽesd rabeem pʋgẽ. Bõe la a Zonas maan n paam daoodo, a sẽn wa n yaa a yembr zĩnfã pʋgẽ wã? A pʋʋsa a Zeova.—Zon. 2:1, 2, 7. w23.10 13 s. a 4-6

Baa tẽn-tʋmd a Pɩyɛɛr sẽn gʋls a lɛta wã pipi kiris-nebã yĩngã, a Zeova kɩtame tɩ b naag-b a Gomdã pʋgẽ. Rẽ n so tɩ tõnd me tõe n dɩ lɛt-kãens yõodo. (Rom. 15:4) Rũndã-rũndã, neb wʋsg pa tẽed Biiblã bãngr-goamã ye. Kɩɩsdbã tõe n yaand-d lame, bala yʋʋm wʋsg la woto d sẽn gũud saabã ne d sũur fãa. Neb kẽer yetame tɩ saabã pa na n tol n wa ye. (2 Pɩy. 3:3, 4) D tʋmd-n-taaga, d zakã ned wall ned d sẽn seg koɛɛgã mooneg sasa sã n yeel woto, tõe n komsa d tẽebã. A Pɩyɛɛr wilga bũmb sẽn tõe n sõng-do. Neb kẽer tõe n getame t’a Zeova maasa ne dũni-kãngã sãoongo. A Pɩyɛɛr goamã tõe n sõnga tõndo, bala tẽegda tõnd t’a Zeova sẽn get wakatã to-to wã yaa toor fasɩ ne ninsaalbã. (2 Pɩy. 3:8, 9) Ne a Zeova, yʋʋm tusr yaa wa daar a ye. A Zeova maanda sũ-mare, n pa rat tɩ ned baa a ye sãam ye. La daar ning a sẽn yãkã sã n ta, dũni-kãngã na n saame. w23.09 26-27 s. a 2-5

Bõe yĩng tɩ tẽn-tʋmd a Poll gʋls lɛtr n tool kiris-neb nins sẽn da yaa Ebre-rãmb n be Zide wã? Tõe tɩ yaa bʋʋm-kãsems a yiib yĩnga. Pipi, yaa sẽn na n keng b raoodo. Nand tɩ b wʋsg lebg kiris-neba, b ra bee Zʋɩf-rãmbã tũudum pʋgẽ. Tõe tɩ tũudum-kãng taoor dãmbã ra yaand-b lame, b sẽn lebg kiris-nebã yĩnga. Bõe yĩnga? Bala kiris-nebã ra pa tar wẽnd-doog n kẽnd n pʋʋsdẽ, b ra pa tar tẽn-kugr n maand maand n kõt Wẽnnaam, la b ra pa tar maan-kʋʋdb me ye. Woto ra tõe n komsa Kirist karen-biisã raoodo, la kɩt tɩ b tẽebã pãng booge. (Ebre. 3:12, 14) Tõe tɩ b sʋkã kẽer yamã ra bee b leb Zʋɩf-rãmbã tũudmẽ. Yiibu, a Poll yeela kiris-neb nins sẽn da yaa Ebre-rãmbã tɩ b pa modgd n na n wʋm zãms-paalã wall zãmsg nins sẽn yaa toogã võor ye. Rẽ la a sẽn bool tɩ “rɩɩb sẽn yaa taokã” sẽn be Wẽnnaam Gomdã pʋgẽ wã. (Ebre. 5:11-14) Sɩd me, b sʋkã kẽer ra ket n gãda a Moyiiz Tõogã kãn-kãe. w23.10 24-25 s. a 3-4

Pagb kẽer yãka yam n pa na n kẽ kãadem ye. (Mat. 19:10-12) Bãng-y t’a Zeova ne a Zeezi nanda kiris-neb nins sẽn pa kẽ kãadmã. Dũniyã gill zugu, saam-bi-pogs sẽn pa kẽ kãadem nafda b tigimsã neba. B sẽn nong neb a taabã la b get b yellã yĩnga, b lebga wa b ba-bi-pogs la b ma-rãmba. (Mark 10:29, 30) Sãnda kẽesa b meng zãng Wẽnnaam tʋʋmdã pʋgẽ. Saam-bi-pogsã tʋmda wʋsg koɛɛgã mooneg pʋgẽ. (Yɩɩn. 68:11) Fo tõe n wa kẽesa f meng zãng Wẽnnaam tʋʋmdã pʋgẽ bɩ? Wala makre, n yɩ so-pakda, n sõngd n met siglgã roto, wall f yɩ Betɛllẽ tʋm-tʋmd bɩ? Pʋʋs bũmb ning f sẽn dat n wa maanã yĩnga. Sõs ne neb sẽn tõog n maan bũmb ning f sẽn magd n na n wa maanã, n bao n bãng fo-me sẽn tõe n maan dẽ to-to. Rẽ poor bɩ f mag n ges f sẽn na n maan dẽ to-to. F sã n tõog n kẽes f meng zãng a Zeova tʋʋmdã pʋgẽ, na n paka sor tɩ f tõog n maan bũmb wʋsgo. w23.12 22 s. 16-17

To-kãsengã sẽn kolgdã, d neeme tɩ tara yõod wʋsg tɩ d sak a Zeova noorã n moon koɛɛgã. La d sã n tar ligd zu-loeese, wall b sã n gɩdg koɛɛgã mooneg d sẽn beẽ wã, d tõe n getame tɩ yaa toog tɩ d lʋɩɩs koe-moonegã taoore. Bõe n tõe n sõng-d tɩ d lʋɩɩs Wẽnnaam Rĩungã yɛl taoore? Yaa d sẽn na n kell n bas d yam t’a “Zeova sẽn yaa tãb-biis naabã” bee ne-do. D sã n kell n lʋɩɩs Wẽnnaam Rĩungã yɛl taoore, a na n teel-d lame. Dẽnd d pa segd n zoe rabeem ye. (Aaze 2:4) A Zeova ratame tɩ d lʋɩɩs tʋʋmd ning sẽn fãagd yõyã taoore. Tʋʋm-kãng yaa sõng nebã tɩ b lebg a Zeezi karen-biisi. A Aaze sagla Wẽnnaam nin-buiidã tɩ b lebs n sɩng Wẽnnaam tʋʋmdã ne yẽesem, tɩ yaa wa b le yẽbga wẽnd-doogã. A Zeova pʋlmame tɩ b sã n maan woto a na n ning-b-la barka. (Aaze 2:18, 19) Tõnd me tõe n kɩsa sɩd tɩ d sã n lʋɩɩs tʋʋmd ning a Zeova sẽn kõ-dã taoore, a na n ninga d modgrã barka. w23.11 16 s. a 8; 17 s. 11

Lɛtr ning tẽn-tʋmd a Poll sẽn gʋls n tool Rom kiris-nebã pʋgẽ, a yeelame tɩ ninsaalbã fãa yaa yel-wẽn-maandba. Woto wã, d maanda wãn n ta Wẽnnaam yam, t’a geelg-d wa nin-tɩrse, wall ned sẽn pa tar taale? Sẽn na yɩl n sõng kiris-nebã tɩ b paam sok-kãngã leoore, a Poll goma a Abrahaam mak-sõngã yelle. Yaa a Abrahaam sẽn wa n be Kanaã tẽngẽ wã la a Zeova yeel t’a yaa tɩrga. Bõe yĩng t’a Zeova yeel t’a yaa tɩrga? Yɩɩ a Abrahaam sẽn da tũud a Moyiiz Tõogã sõma yĩng bɩ? Yaa vẽeneg tɩ pa woto ye. (Rom. 4:13) A Zeova sẽn yeel t’a Abrahaam yaa nin-tɩrgã, yɩɩ yʋʋm kobs-naas la zak poor la a yaool n kõ Israyɛll nebã Tõogã. Woto wã, bõe la a Zeova tik n yeel t’a Abrahaam yaa nin-tɩrga? A Zeova barkã yĩnga, a yeelame t’a Abrahaam yaa nin-tɩrg a tẽebã yĩnga.—Rom. 4:2-4. w23.12 3 s. a 4-5

Baraar yʋng bal no-rɛɛs a Natã sẽn togs rĩmã gom-kãensa wã, a Zeova togsa a Natã tɩ pa a Davɩɩd n na n me wẽnd-doogã ye. (1 Kib 17:3, 4, 11, 12) A Davɩɩd sẽn wʋm dẽ wã, a manesem yɩɩ wãna? A tigsa ligd la teed buud toor-toor a biig a Salomo sẽn na n wa tall n me roogã. (1 Kib 29:1-5) A Zeova sẽn togs a Davɩɩd tɩ pa yẽ n na n me wẽnd-doogã, rẽ poor bala a maana kaool ne-a. A pʋlma a Davɩɩd t’a yageng n na n dɩ naam wakat sẽn kõn sa. (2 Sãm. 7:16) Dũni-paalgã pʋgẽ, a Zeezi naamã sẽn na n kaoos yʋʋm tusrã sasa, a Davɩɩd sũur na n yɩɩ noog wʋsgo, a sã n bãng tɩ Rĩmã sẽn yaa a Zeezi Kiristã yaa yẽ yagenga! Kiba-kãngã sõngda tõnd tɩ d bãng tɩ baa d sã n pa tõog n maan bũmb kẽer d sẽn da rat n maan a Zeova tũudmã pʋgẽ, d Wẽnnaamã tõe n ning-d-la bark tɩ yɩɩg d sẽn da tẽedã. w23.04 16 s. a 8-10

Y sã n wa maand rabeem, Biiblã babs kẽer kareng tõe n sõng-y-la wʋsg tɩ y yamã gãand bãane. Wala makre, y tõe n paama goam sẽn kengd raood Zoob sebrã pʋgẽ, Yɩɩn-sõamyã la Yel-bũn sɛbã pʋsẽ, la a Zeezi goam nins sẽn be Matiye sak a 6 pʋgẽ. Y sã n pʋʋsd a Zeova la y karemd a Gomdã, y na n yãame t’a belsd-y lame. D tõe n basa d yam tɩ yel-pakr sasa, a Zeova na n sõng-d lame. A pa na n tol n daag-d n bas ye. (Yɩɩn. 23:4) A Zeova pʋlmame t’a na n kogl-d lame, n sõng-d tɩ d ra maan yɩɩr tɩ looge, n teel-d la a bels-do. Ezayi 26:3 goma a Zeova yell n yeel yaa: “Yãmb na n kogla neb nins sẽn dell yãmb zãng-zãngã. Yãmb na n kɩtame tɩ b paam bãan wakat fãa, bala yaa yãmb la bãmb teeg-yã.” Woto wã, teeg-y-yã a Zeova, la y maan y sẽn tõe fãa n paam t’a sõng-yã. Y sã n maand woto y na n paamda raoodo, baa zu-loe-kɛgems sasa. w24.01 25 s. 16-17

Gom-kãensã Wẽnnaam sẽn vẽneg tɩ b gʋlsã pidsda rũndã-rũndã. Ad goam a taab me sẽn pidsd rũndã-rũndã tɩ kengd raoodo: “Fo kom-dibli wã fãa na n paama zãmsg a Zeova nengẽ, la fo kom-dibli wã bãanã na n yɩɩ wʋsgo. B na n vigla foom kãn-kãe tɩrlem pʋgẽ. . . . Fo pa na n yɛɛs bũmb baa fʋɩ ye. Bũmb me kõn kẽes-f rabeem ye. Bala bũmb a woto kõn kolg foom ye.” (Eza. 54:13, 14) Baa a Sʋɩtãan sẽn yaa “dũni-kãngã wẽnnaamã” meng pa tõe n gɩdg a Zeova nin-buiidã tɩ b pa wilg nebã a Zeova sẽn yaa Wẽnnaam ning buudã ye. (2 Kor. 4:4) B lebs n lugla tũudum hakɩɩkã, t’a pa na n tol n le kalem ne sɩdã kɩɩsdb ye. A na n kell n paa wakat fãa yĩnga. Zab-teoog ning fãa b sẽn na n maan n zab ne tõnd pa na n tõog ye! w24.02 4 s. 10

D sẽn yaa kiris-nebã, d pa reemd ne bũmb ning d sẽn pʋlem a Zeova n dɩk d meng n kõ-a wã ye. D sã n wa na n yãk yam d zakã rãmb wɛɛngẽ wall d maan bũmbu, d tẽegda rẽ. D maanda bũmb nins Biiblã sẽn yeel tɩ d segd n maana d zakã rãmb yĩngã ne d sũur fãa, la d pa na n saag n lʋɩɩs d zakã rãmb raab taoore, n lebs a Zeova raabã poorẽ ye. (Mat. 10:35, 36; 1 Tɩm. 5:8) Wakat ninga d segd n yãka yam sẽn pa noom d zakã rãmba, d sẽn dat n noog a Zeova sũurã yĩnga. Yẽ n lugl zaka, n dat tɩ d paam sũ-noog d zakã pʋgẽ. (Efɛɛ. 3:14, 15) D sã n dat n sɩd paam sũ-noogo, d segd n maanda yɛlã wa a Zeova sẽn datã. Bas-y y yam t’a Zeova sũur nooma y sẽn mongd y meng bũmb toor-toor a tũudmã yĩngã, la y get y zakã rãmb yelle, n wilgdẽ tɩ y nong-b lame la y waoogd-bã.—Rom. 12:10. w24.02 18 s. 11, 13