Tʋʋlgo

Dũni-paalgã nan pa wa ye. La tags-y bũmb nins sẽn zoe n be wã yelle. Wala makre, ãdsã, tɩɩsã, rũmsã la ninsaalbã. Ned kae n na n maand sãmbs ne bõn-kãensã belem ye. La wakat n zĩnd tɩ b yaool n da kae ye. Yaa a Zeova sẽn naan-bã yĩng n kɩt tɩ b beẽ. (Sɩng. 1:1, 26, 27) Tõnd Wẽnnaamã pʋlmame me t’a na n waa ne dũni-paalga. A na n pidsa a pʋlengã. Dũni-paalgã pʋgẽ, ninsaalbã na n vɩɩmda wakat sẽn kõn sa ne laafɩ hakɩɩka. Wakat ning Wẽnnaam sẽn yãkã sã n ta, dũni-paalgã na n waame, n yaa vẽeneg wa bũmb nins d sẽn ne rũndã-rũndã wã. (Eza. 65:17; Vẽn. 21:3, 4) Nananda, tũnugd-y ne segb buud fãa y sẽn paamd n kengd y tẽebã. Wilgd-y wakat fãa tɩ y sũur nooma ne a Zeezi sẽn ki tɩ yɩ maoongã. Tagsd-y-yã a Zeova pãn-kãsengã yelle. Wɩngd-y ne bũmb nins sẽn paasd yãmb ne a Zeova zoodã pãngã. Y sã n maand woto, y na n naaga “neb nins sẽn tall tẽeb la b maan sũ-mar n paam pʋlemsã.”—Ebre. 6:11, 12. w23.04 31 s. 18-19

A Zeezi zẽka a neng yĩngri, n pʋʋs nebã sʋka. A ra ratame tɩ bũmb ning yẽ sẽn na n maan rẽ poorã yɩ a Zeova waoogr yĩnga. Rẽ poore a zẽka a koɛɛg n yeel yaa: “Lazaare, wa yi!” (Zã 11:43) La a Lazaar sɩd yii yaoogẽ wã! A Zeezi maana bũmb neb kẽer sẽn da tagsd tɩ pa tõe ye. Kiba-kãngã sõngda tõnd tɩ d maneg n tẽ kũum vʋʋgrã. Wãn to? Tẽeg-y bũmb ning a Zeezi sẽn pʋlem a Martã. A yeelame: “Fo tãoã na n vʋʋgame.” (Zã 11:23) A Zeezi me tʋllame n pids a sẽn pʋlem bũmb ningã wa a Ba wã, la a tar tõog me n tõe n maan dẽ. A Zeezi sẽn daag nintãmã wilgdame t’a yãgda ne a sũur fãa n na n menes kũumã, la sũ-sãams nins fãa rẽ sẽn wat ne wã. A Lazaar sẽn yi yaoogẽ wã, wilgdame t’a Zeezi tara tõog n na n vʋʋg kũum. Tẽeg-y-yã a sẽn da yeel a Mart bũmb ningã, tɩ be rũndã daarã vɛrse pʋgẽ wã. D tara bʋʋm sẽn sek d na tẽ tɩ Wẽnnaam sẽn pʋlem tɩ sẽn ki-bã na n vʋʋgame wã na n pidsame. w23.04 11-12 s. 15-16

D sã n bãngd a Zeova raabã n paasdẽ, d tõe n gesame tɩ d segd n toeema bũmb nins d sẽn togsd-a d pʋʋsg pʋgẽ wã. D tẽeg t’a Zeova na n pidsa a raabã, la tɩ na n zemsa wakat ning a sẽn yãkã bal kɛpɩ. A raab yaa a menes bũmb nins fãa sẽn kɩt tɩ ninsaalbã namsd rũndã-rũndã wã. Wala makre, sabab-wẽnsã, bãasã la kũumã. A Zeova na n tũnuga ne a Rĩungã n pids a raabã. (Dãn. 2:44; Vẽn. 21:3, 4) La nananda, a basame t’a Sʋɩtãan so dũniyã. (Zã 12:31; Vẽn. 12:9) A Zeova sã n kɩt tɩ ninsaalbã zu-loeesã sa masã, yaa wa a Sʋɩtãan rɩta a naamã sõma dũniyã zugu. Dẽnd baa d sẽn gũud a Zeova sẽn na n wa pids a pʋlemsã, pa rat n yeel t’a pa maand bũmb n sõngd-d ye. A Zeova na n sõnga tõndo. w23.05 8 s. a 4; 9-10 s. a 7-8

Wãn to la d tõe n sõng neb a taabã tɩ b rɩ Tẽegrã yõodo? Pipi bũmb d sẽn tõe n maan yaa d sẽn na n bool-ba. D na n boola neb nins d sẽn segd koɛɛgã mooneg zĩigẽ wã. Sẽn paase, d na n baoo sebr n gʋls neb a taab d sẽn dat n bool yʋya. Tõe n yaa d roagdba, d tʋmd-n-taase, d karen-bi-taase, la neb a taaba. Baa d sã n pa tar boollã seb-vãad wʋsgo, d tõe n toola nebã lɩyẽ tɩ b kẽ ẽntɛrnetẽ wã n paame. Neb wʋsg tõe n sak n waame hal tɩ ling-du. (Koɛ. 11:6) Tẽeg-y tɩ neb nins d sẽn boondã tõe n tara sogsgo, sẽn yɩɩd fãa, b sã n nan pa wa d tigsga. Yɩta sõma tɩ d tags sogsg kẽer b sẽn tõe n sok yelle, la d sẽn na n leok to-to. Tẽegrã poore, neb nins sẽn dat n bãng n paasã na n tara sogsg a taaba. Nand tɩ Tẽegrã ta, Tẽegrã sasa la a loogr poore, d na n maana d sẽn tõe fãa n sõng neb nins “sẽn tar yam ning sẽn zemsã” tɩ b rɩ Tẽegrã yõodo.—Tʋʋ. 13:48. w24.01 12 s. 13, 15; 13 s. 16

Biiblã gomda kũum vʋʋgr a nii sẽn zĩnd tẽngã zug yelle. Maag-y y yĩng n karem kiba-kãense. Y sã n wa karemdẽ, bao-y n bãng-y yam ning y sẽn tõe n dɩk kibarã pʋgẽ. Tags-y n ges-y kibar fãa sẽn wilgd to-to tɩ Wẽnnaam tʋll n vʋʋga sẽn ki-bã, la t’a tara tõog n tõe n maan dẽ. Sẽn yɩɩd fãa, tags-y kũum vʋʋgr ning sẽn tar yõod n yɩɩdã yelle, rat n yeel t’a Zeezi vʋʋgrã. Tẽeg-y tɩ yɩɩ neb kobs n maan kaset ne a Zeezi vʋʋgrã, tɩ rẽ yaa bũmb sẽn tõe n paas d tẽebã pãnga. (1 Kor. 15:3-6, 20-22) D sũur yaa noog wʋsg ne a Zeova sẽn pʋlem tɩ sẽn ki-bã na n vʋʋgame wã. D tõe n basa d yam tɩ pʋlengã na n pidsame, bala a Zeova tʋll n maana woto, la a tar tõog n na n maan dẽ. Bɩ d modg n ket n tẽed pʋlen-kãngã sẽn tar yõod wʋsgã. D sã n maan woto, d na n paam n pẽnega tõnd Wẽnnaamã, soab ning sẽn pʋlemd tõnd ned kam fãa tɩ: ‘Fo nebã na n vʋʋgame’ wã.—Zã 11:23. w23.04 8 s. a 2; 12 s. 17; 13 s. 20

Ned sẽn yaa sik-m-meng soab waoogda a taabã, la a getẽ tɩ b yɩɩda yẽ. (Fili. 2:3) Naoor wʋsgo, ned sẽn yaa sik-m-meng soab sakd n deegame tɩ pa bũmbã fãa la a tõe n maan ye. A Zedeyõ ra yaa sik-m-meng soaba, n sak n deeg tɩ pa bũmbã fãa la a tõe n maan ye. Wẽnnaam malɛkã sẽn wa n yeel a Zedeyõ tɩ yẽ la b yãk t’a na n fãag Israyɛll nebã Madiyã nebã sẽn da tar pãng wʋsgã nugẽ wã, a sẽn da yaa sik-m-meng soabã a yeelame yaa: “Tõnd roogã rãmb n yaa bilf n yɩɩd Manase buudã sʋka, la maam n yaa m ba wã zakã rãmb yao-zʋʋga.” (Bʋ. 6:15) A ra getame t’a pa tõe tʋʋmdã, la a Zeova ra miime t’a na n tõogame. Ne a Zeova sõngre, a Zedeyõ tõog n tʋma a tʋʋmdã sõma. Kãsem-dãmbã modgda wʋsg n wilgdẽ tɩ b yaa sik-m-mens rãmb bũmb fãa pʋgẽ, la b sak n deeg tɩ pa bũmbã fãa la b tõe n maan ye. (Tʋʋ. 20:18, 19) B pa wukd b mens bũmb nins b sẽn tõogd n maandẽ wã yĩng ye. B sẽn mi n kongdẽ wã me pa kɩt tɩ b getẽ tɩ b ka yõod ye. w23.06 3 s. a 4-5

Yagengã sẽn na n beds a Sʋɩtãan zugã na n yɩɩ ka la yʋʋm tusr la zaka. (Vẽn. 20:7-10) La Biiblã wilgdame tɩ bõn-kãsems n na n deng n maane. Pipi, buud toɛy-toɛyã na n yeelame tɩ “laafɩ la bãane!” (1 Tes. 5:2, 3) “Zĩig pʋgẽ,” to-kãsengã na n sɩnga wakat ning buud toɛy-toɛyã sẽn na n yik n zab ne ziri tũudmã fãa wã. (Vẽn. 17:16) Rẽ poore a Zeezi na n kaoo ãdem-biisã bʋʋdo, n welg piisã ne bʋʋsã. (Mat. 25:31-33, 46) La wakat kãnga, a Sʋɩtãan pa na n kalemd a nus n zĩẽ ye. A sẽn kis Wẽnnaam nin-buiidã ne a sũur fãa wã yĩnga, a na n kɩtame tɩ buud toɛy-toɛy sẽn lagem taaba, tɩ Biiblã boondẽ tɩ Goog sẽn yit Magoog soolmẽ wã yik n na n zab ne tũudum hakɩɩkã nebã. (Eze. 38:2, 10, 11) Wakat kãnga, b na n tigma sẽn paam-b vʋʋsem sõngã zaeeb n ket tẽngã zugã saasẽ, tɩ b naag Kiristã ne a tãb-biisã sẽn be saasẽ wã n zab Armagedõ zabrã sasa. Rẽ n na n yɩ to-kãsengã baasgo. (Mat. 24:31; Vẽn. 16:14, 16) Yaa rẽ poor la Kiristã naamã sẽn na n kaoos yʋʋm tusrã na n sɩnge.—Vẽn. 20:6. w23.10 20-21 s. a 9-10

Rũndã-rũndã, a Zeova Kaset rãmb wʋsg vɩɩ tẽns b sẽn gɩdg d tũudmã pʋgẽ. D tẽed-n-ta-kãens d sẽn nong wʋsgã waoogda tẽngã taoor dãmb wa sẽn segdã. La b maanda wa a Abdiyaase, n kõt a Zeova bũmb ning sẽn yaa yẽ rẽndã, rat n yeel tɩ b sakda yẽ a ye tãa. (Mat. 22:21) B sakda Wẽnnaam la pa ninsaalbã, tɩ wilgdẽ tɩ b yaa wẽn-zoɛtba. (Tʋʋ. 5:29) Rẽ n so tɩ b ket n moond koɛɛgã, la b soosd n tigimd taaba. (Mat. 10:16, 28) B modgdame sẽn na yɩl tɩ b tẽed-n-taasã paamd bũmb nins sẽn na n keng b tẽebã. D gom saam-biig a ye yʋʋr sẽn boond t’a Ãari yelle. A bee Afirik tẽng a ye b sẽn da gɩdg d tũudmã pʋgẽ. Gɩdgrã sasa, a Ãari saka ne yamleoog n na n gilgd n kõt a tẽed-n-taasã siglgã sɛba. Ad a sẽn yeele: “M yaa yãn-zoɛta. . . . A Zeova . . . n kõ-m raood tɩ m tõog n maan dẽ.” Y tagsdame tɩ y tõe n talla raood wa a Ãari bɩ? Y sã n zoet a Zeova wa sẽn segdã, yãmb me na n paama raood a woto. w23.06 16 s. a 9, 11

A Ãdem ne a Awa sẽn wa n kɩɩs a Zeova wã, ra yaa wa a Sʋɩtãan toeema a Zeova raabã sẽn yaa tẽngã na pid ne neb sẽn zems zãng la sẽn yaa sakdbã. Tõe t’a Sʋɩtãan tagsame t’a Zeova pa na n tõog n pids a raabã ye. Bũmb a ye a Zeova sẽn da tõe n maan yaa a kʋ a Ãdem ne a Awa, la a lebs n naan pag ne rao sẽn zems zãnga, sẽn na yɩl n pids a raabã ne ninsaalbã. La a sã n da maan woto, a Sʋɩtãan ra na n yeelame t’a Zeova yaa pʋ-yagda. Bõe yĩnga? Bala Sɩngr 1:28 wã pʋgẽ, a Zeova yeela a Ãdem ne a Awa tɩ b kambã la b yagensã na n pida tẽngã. Tõe me t’a Sʋɩtãan tagsame t’a Zeova na n basame t’a Ãdem ne a Awa kell n dog kamb sẽn pa na n tol n wa zems zãng ye. (Koɛ. 7:20; Rom. 3:23) Woto, yaa vẽeneg t’a Sʋɩtãan na n yeelame t’a Zeova pa tõe n pids a pʋleng ye. Bõe yĩnga? Bala rẽ ra na n kɩtame tɩ Wẽnnaam daabã sẽn yaa tɩ tẽngã lebg arzãna, n pid ne a Ãdem la a Awa yagens sẽn zems zãng la sẽn yaa sakdbã pa tol n pids ye. w23.11 6 s. 15-16

A Zeova tũnugda ne a Gomdã la a siglgã n kõt-d noy sẽn yaa vẽenese. D pa tar bũmb d sẽn na n tik n paas noy a taab ye. (Yel. 3:5-7) Rẽ n so tɩ d pa maand bũmb sẽn zʋʋg bũmb ning sẽn gʋls Biiblã pʋgẽ wã, wall n lugund noy yɛl nins sẽn yaa ned kam fãa n yãkdã wɛɛngẽ, n dat tɩ d tẽed-n-taasã tũ ye. A Sʋɩtãan tũnugda ne “belgr gom-vɩɩd” la “dũniyã bũmb toor-toorã,” n na n welg nebã la a kẽes-b moogo. (Kolo. 2:8) Wala makre pipi kiris-nebã wakatẽ, a tũnuga ne ninsaalbã filozofi-rãmba, Zʋɩf-rãmbã zãmsg toor-toor sẽn pa tik Biiblã zugu, la neb kẽer sẽn da yet tɩ yaa tɩlɛ tɩ kiris-nebã tũ a Moyiiz Tõogã. Bõn-kãensã yaa belgre, bala ra kɩtame tɩ nebã zãagd ne a Zeova sẽn yaa soab ning nengẽ yam hakɩɩkã sẽn yitã. Rũndã-rũndã, a Sʋɩtãan tũnugda ne kiba-kɩtb kẽer la rezo sosiyo-rãmbã n yelgd kibay sẽn pa tar tikri, la kibay sẽn yaa ziri politikã taoor dãmb sẽn wat ne. w23.07 16 s. 11-12

A Zeova sẽn welg a Sʋɩtãan ne a Ãdem la a Awa kɩɩsgã to-to wã yɩɩga a Sʋɩtãan sẽn da tõe n mamsã. A Zeova basame t’a Ãdem ne a Awa rog kamba, sẽn na yɩl n wilg t’a yaa sɩd soaba, la t’a pa pʋ-yagd ye. A wilgame tɩ bũmb pa tõe n kɩt t’a sẽn yeel pa pids ye. A pa toeem a raabã ye. A yãka “yageng” sẽn na n fãag a Ãdem ne a Awa kamb la b yagens nins sẽn na n yɩ sakdbã. (Sɩng. 3:15; 22:18) A Zeova sẽn kɩt t’a Zeezi wa ki tɩ yɩ maoongã segd n linga a Sʋɩtãan wʋsgo. Bõe yĩnga? Bala a Zeova sẽn maan bũmb ningã tika nonglem-kãseng zugu. (Mat. 20:28; Zã 3:16) A Sʋɩtãan sẽn yaa rat-m-ye soabã pa tar zʋg-kãng ye. A Zeezi sẽn ki tɩ yɩ maoongã na n waa ne bark-bʋse? Kiristã naam sẽn na n kaoos yʋʋm tusrã poore, a Ãdem ne a Awa yagens sẽn zems zãng la sẽn yaa sakdb n na n soog tẽngã sẽn na n lebg arzãnã, wa a Zeova sẽn da rat sɩngrẽ wã. w23.11 6 s. 17

D sakda a Zeova noorã vɩɩmã la zɩɩmã sẽn yaa sõamyã wɛɛngẽ. Bõe yĩnga? Bala a Zeova yeelame tɩ zɩɩmã makda vɩɩmã sẽn yaa kũun sẽn yaa sõma wʋsg a sẽn kõ-dã. (Maan. 17:14) A Zeova sẽn wa n kõ ninsaalbã sor pipi tɩ b tõe n wãb rũng nemdã, a yeel-b lame tɩ b ra rɩ zɩɩm ye. (Sɩng. 9:4) A sẽn wa n na n kõ Israyɛll nebã a Moyiiz Tõogã, a lebs n togsa no-kãnga. (Maan. 17:10) Sẽn paase, a kɩtame tɩ pipi kiris-nebã taoor lʋɩtb sullã yeel kiris-nebã fãa tɩ b segd n “laka b mens . . . ne zɩɩm.” (Tʋʋ. 15:28, 29) D sã n na n yãk yam tɩbsgã wɛɛngẽ, d tũuda no-kãngã n pa reemd ne-a ye. Sẽn paase, d sakda a Zeova noyã, n zãagd d mens ne yoobo. Tẽn-tʋmd a Poll sagl-d lame tɩ d kʋ d yĩngã wila, rat n yeel tɩ d maan d sẽn tõe fãa n zãag d mens ne bũmb ning fãa sẽn tõe n wa ne tʋls-wẽnse. D pa na n sak n ges bũmbu, wall d maan bũmb sẽn tõe n wa kɩt tɩ d yo ye.—Kolo. 3:5; Zoob 31:1. w23.07 15 s. a 5-6

Tõe t’a A Sãmsõ sẽn da nong a Dalila wʋsgã luda a yamã, t’a pa ne a sẽn da rat n maanã ye. Sẽn yaa a soab fãa, a Dalila pẽdg-a-la naoor wʋsg sẽn na yɩl t’a togs-a a pãngã sẽn yitẽ, t’a wa kong n togs-a. Zu-bʋko, a Sãmsõ sẽn maan woto wã yɩɩ sabab t’a pãngã sa, t’a Zeova me sũur sãam ne-a wakat bilfu. (Bʋ. 16:16-20) A Sãmsõ sẽn kɩs a Dalila sɩd n yɩɩd a Zeova wã, kɩtame t’a paam zu-loe-kɛgemse. Filisti nebã yõk-a lame n leo a ninã. B tɩ pag-a-la bãens roog Gaaza. B kɩtame t’a lebg yamb n da werd zom. Rẽ poore Filisti nebã tall-a lame n kẽng tigr b sẽn da maand zĩigẽ, n na n paoog-a. B maana maand wʋsg n kõ b wẽn-faoog a Dagõ, tɩ yaa wa yẽ n sõng-b tɩ b yõk a Sãmsõ. B kɩtame tɩ b tɩ tall a Sãmsõ bãensã roogẽ n wa, tɩ b “yaal-a.”—Bʋ. 16:21-25. w23.09 5-6 s. 13-14

Tõe tɩ d tʋmd-n-taag wall d karen-bi-taag sok-d-la d tagsg sẽn yaa a soab ne Biiblã noor ninga. D na n maana d sẽn tõe fãa n gom n teel d sẽn tẽed bũmb ninsã la d ra paoog d kɛlgdã me ye. (1 Pɩy. 3:15) D pa segd n tags t’a soka sokrã a sẽn dat n wẽ no-koɛɛm ne tõnd yĩng ye. D segd n gesame t’a sokrã tõe n sõnga tõnd tɩ d bãng bũmb ning sẽn tar yõod ne-a wã. Sẽn yaa bũmb ning fãa n kɩt tɩ ned sok sokre, d segd n leok-a-la ne bʋgsem. Dẽ, tõnd leoorã tõe n sõnga a soabã t’a toeem a tagsgã. Wala makre, d tʋmd-n-taag sã n sok-d yaa: Bõe yĩng tɩ yãmb pa maand rogem daar tẽegr kibsa? D tõe n soka d meng yaa: A pa baood n na n bãng tõnd sã n tara sor n na n noog d yõor sɩda? D sã n pẽg d tʋmd-n-taagã a sẽn wilg t’a tʋmd-n-taasã yell pak-a lame wã, tõe n booga a yɩɩrã. Rẽ tõe n paka sor tɩ d gom bũmb ning Biiblã sẽn yet rogem daar tẽegr kibs-rãmbã wɛɛngẽ wã yell noog-noogo. w23.09 17 s. 10-11

D paamame n tõe n moon neb buud fãa koɛɛgã yaoolem wakatã, tɩ yaa zu-zẽkre. Tẽn-tʋmd a Pɩyɛɛr sagl-d lame tɩ d ‘ning a Zeova daarã d yamẽ.’ (2 Pɩy. 3:11, 12) Wãn to la d tõe n maan dẽ? Yɩta sõma tɩ d bʋgsd bark nins d sẽn na n paam dũni-paalgã pʋgẽ wã zugu. Sã n tõe bɩ d maand rẽ daar fãa. Mams-y y yamẽ y sẽn be dũni-paalgã pʋgẽ n vʋʋsd pems-noogo, n dɩt rɩɩb sẽn kõt laafɩ, tɩ y neb nins sẽn maan kaalmã vʋʋgdẽ tɩ y reegd-ba, la y wilgd neb nins sẽn vɩɩmd pĩnd wẽndẽ wã Biiblã bãngr-goamã sẽn pids to-to. Rẽ na n sõng-y lame tɩ y maan sũ-mar n gũ saabã, la y kell n kɩs sɩd tɩ yaa yaoolem wakatã la woto. Tõnd “sẽn pĩnd n bãng bõn-kãensa” beoog-daarã wɛɛngẽ wã, d pa na n bas tɩ zirẽ-be-karen-saam-dãmbã kɩt tɩ d “menem” ye. w23.09 27 s. a 5-6

Rũndã-rũndã, kom-bɩɩs wʋsg yaa “ba-rãmb la ma-rãmb kɩɩsdba.” (2 Tɩm. 3:1, 2) Bõe yĩng tɩ kom-bɩɩsã wʋsg yaa kɩɩsdba? Kẽer getame tɩ b roagdbã yaa pʋ-lik rãmba. Roagdbã mi n datame tɩ b kambã maan bũmb bãmb mengã sẽn pa maande. Kamb kẽer getame tɩ b roagdbã sagls pa zems ne b wakatã, tɩ b tũub yaa toogo, wall tɩ yaa dem-dem wʋsgo. Fo sã n yaa bi-bɩɩga, fo-me tagsg yaa woto bɩ? Neb wʋsg getame tɩ yaa toog tɩ b tũ noor ning a Zeova sẽn kõ rũndã daar vɛrse wã pʋgẽ wã. Bõe n tõe n sõng-y tɩ y maan dẽ? Y tõe n zãmsa sakr soab ning sẽn kõ mak-sõng sẽn ka to rẽ wɛɛngẽ wã nengẽ. Yaa a Zeezi. (1 Pɩy. 2:21-24) A ra yaa ned sẽn zems zãnga, t’a roagdbã pa zems zãng ye. La a Zeezi ra waoogda a roagdbã baa b sã n mi n konge, wall b pa wʋm a manesem ning võore. (Yik. 20:12) w23.10 7 s. a 4-5

Tẽn-tʋmd a Poll bilgame t’a Moyiiz Tõogã sẽn yeel tɩ b maand maand ninsã pa yẽesd yel-wẽnã zãng ye. Rẽ n so tɩ b ‘lebs Tõogã kɛɛnga.’ Rẽ poore, a Poll zãms-b-la bũmb kẽer võor wʋmb sẽn yaa toogo. A tẽega a tẽed-n-taasã bũmb nins d sẽn saagd n na n wa paam a Zeezi maoongã maasem yĩng tɩ “yaa sõma n yɩɩda.” Rẽ sɩd tõe n sõng-b lame tɩ b “pẽneg Wẽnnaam.” (Ebre. 7:19) A Poll yeela kiris-neb nins sẽn yaa Zʋɩf-rãmbã tɩ b sẽn tũud a Zeova masã wã yaa sõma n yɩɩd b sẽn da tũud-a to-to pĩndã. Zʋɩf-rãmbã sẽn da tũud Tõogã n waoogd Wẽnnaam to-to wã ra yaa “bũmb nins sẽn watã maasem, la bũmbã meng-mengã yaa Kiristã.” (Kolo. 2:17) Bũmb maasem bɩ a sulunsuk wilgda bũmbã sẽn yaa to-to wã, la pa bũmbã meng-meng ye. Woto me, pĩnd wẽndẽ Zʋɩf-rãmbã sẽn da waoogd Wẽnnaam to-to wã yaa bũmb sẽn da wat maasem. D segd n bao n bãnga bũmb nins fãa a Zeova sẽn maan tɩ d tõe n paam d yel-wẽnã sugrã võore, sẽn na yɩl n tõog n tũ-a wa sẽn segde. w23.10 25 s. a 4-5

Dãniyɛll sak 11 wã pʋgẽ, b gomda rĩm-dãmb a yiib bɩ politik pãn-soaadb a yiib yelle, n wilg tɩ b zabda taab n dat n soog dũniyã. D sã n dɩk bãngr-gom-kãng n mak ne Biiblã bãngr-goam a taaba, d tõe n yeelame tɩ “rɩtg rĩmã” yaa Risi ne a poorẽ dãmbã, tɩ “goabg rĩmã” yaa Gãrãnd Bertayn ne Etazĩni sẽn naag taab n yaa dũni gill pãn-soaadã. “Rɩtg rĩmã” namsda Wẽnnaam nin-buiidã sẽn be a soolmẽ wã b tũudmã yĩnga. B pãba a Zeova Kaset rãmb kẽere, n kẽes-b bãens roog b tũudmã yĩnga. “Rɩtg rĩmã” sẽn maand bũmb ninsã pa kẽesd d tẽed-n-taasã rabeem ye. Pʋd n paasda b tẽebã pãnga. Bõe yĩnga? Bala d tẽed-n-taasã miime tɩ b sẽn namsd Wẽnnaam nin-buiidã pidsda bãngr-goam a Dãniyɛll sẽn togse. (Dãn. 11:41) D sẽn mi rẽ wã tõe n sõnga tõnd tɩ d tẽebã pãng paase, la d kell n maan sɩd ne a Zeova. w23.08 11 s. 15-16

A Zeova sẽn nong tõndã yĩnga, a mii bũmb nins sẽn namsd tõndo, la a tʋll n kogl-do. Bũmb sã n namsd tõndo, namsda yẽ me. Rẽ n so tɩ d tõe n pʋʋs-a n yeel yaa: “Kogl-y maam wa y nin-beelle.” (Yɩɩn. 17:8) Nifr yaa yĩngã will sẽn zoet toogo, la sẽn tar yõod wʋsgo. Rẽnd a Zeova sẽn mak tõnd ne a nin-beellã, yaa wa a sẽn yeel yaa: ‘Ned ning fãa sẽn maan yãmb a mam nin-buiidã wẽnga, yaa bũmb sẽn tar yõod wʋsg ne maam la a sẽn maan wẽngã.’ A Zeova ratame tɩ d ned kam fãa bas a yam t’a nong-a lame. La a miime tɩ zu-loees kẽer d sẽn seg pĩndã tõe n kɩtame tɩ d maand sãmbs a sã n sɩd nong-d lame. D leb n tõe n maooda ne zu-loees rũndã-rũndã, tɩ kɩt tɩ d sãmbd a Zeova sã n nong-d lame. Bõe n tõe n kɩt tɩ d kɩs sɩd t’a Zeova nong-d lame? Yaa d sẽn na n bao n bãng a Zeova sẽn wilgd to-to t’a nonga a Zeezi, sẽn paam-b vʋʋsem sõng zaeebã, la tõnd fãa. w24.01 27 s. a 6-7

A Ɛsdras yãa a Zeova sẽn sõng a nin-buiidã to-to toog wakate. Yʋʋm wʋsg sẽn deng rẽ, rat n yeel tɩ yʋʋmd 484 S.D.Z.R., tõe t’a Ɛsdras ra bee Babilonne, rĩm a Asuerus sẽn wa yiis noor n yeel tɩ b menes Zʋɩf-rãmbã Pɛrs soolmẽ wã. (Ɛst. 3:7, 13-15) A Ɛsdras vɩɩmã ra bee yell pʋgẽ. Rẽ kɩtame tɩ Zʋɩf-rãmbã sẽn be ‘soolmã zĩis fãa’ wã loe noor la b yãbe, tɩ wilgdẽ tɩ b pʋʋsda a Zeova n kot sõngre. (Ɛst. 4:3) Mams-y n ges-y-yã a Ɛsdras ne Zʋɩf-rãmb a taabã sũur sẽn yɩ noog to-to, yɛlã sẽn toeem tɩ yaa neb nins sẽn da magd n na n menes Zʋɩf-rãmbã la b wẽneg n kʋ wã! (Ɛst. 9:1, 2) Tõe tɩ bũmb ning a Ɛsdras sẽn bãng zu-loe-kãens sasa wã sõng-a lame t’a segl a meng zu-loees a taab yĩnga, la kɩt t’a maneg n kɩs sɩd t’a Zeova tõe n kogla a nin-buiidã. w23.11 17 s. 12-13

Bũmb ning yell tẽn-tʋmd a Poll sẽn da gomd n tɩ yɩɩdã, yaa ‘tõogã sẽn dat tɩ d tʋm tʋʋm ninsã,’ rat n yeel t’a Moyiiz Tõogã Wẽnnaam sẽn kõ Sinayi tãngã zugã. (Rom. 3:21, 28) Wõnda a Poll wakatẽ wã, kiris-neb kẽer sẽn yaa Zʋɩf-rãmb ra ket n tẽedame tɩ yaa tɩlɛ tɩ b tũ a Moyiiz Tõogã. Rẽ n so t’a Poll tũnug ne a Abrahaam kibarã n wilg tɩ sẽn na yɩl n yɩ tɩrg Wẽnnaam nifẽ, pa tũud ne ‘tõogã sẽn dat tɩ d tʋm tʋʋm ninsã’ ye. Tũuda ne tẽebo. Woto kengda d raoodo, bala d tõe n basa d yam tɩ d sã n tẽed Wẽnnaam ne Kiristã, d tõe n taa Wẽnnaam yam. “Tʋʋm” nins yell b sẽn gom Zak sak a 2 pʋgẽ wã pa tʋʋm nins a Poll sẽn gomã, rat n yeel tɩ ‘tõogã sẽn dat tɩ d tʋm tʋʋm ninsã’ ye. A Zak gomda tʋʋm nins kiris-nebã sẽn tʋmd daar fãa wã yelle. (Zak 2:24) Tʋʋm-kãens wilgda kiris-ned sã n sɩd tẽeda Wẽnnaam bɩ a pa tẽeda. w23.12 3 s. a 8; 4-5 s. 10-11

Saam-bi-poak sã n wa rat n kẽ kãadem, yɩta sõma t’a maag a meng n bao sɩd-sõngo. Tẽeg tɩ rao ning f sẽn na n kẽ kãadem ne wã na n lebga f zu-soaba. (Rom. 7:2; Efɛɛ. 5:33) Woto wã, sok f meng yaa: ‘Yaa kiris-ned tẽeb sẽn bɩ sɩda? A lʋɩɩsda tũudmã yɛl taoor bɩ? A yãkda yam sẽn yaa sõma bɩ? A sakd n deega a kongr bɩ? A nanda pagbã bɩ? A na n tõog n sõng-m lame tɩ m kell n tall zood sõma ne a Zeova, n ges m yell la a yɩ m zoa hakɩɩk sɩda?’ La yaa vẽeneg tɩ f sã n dat n wa paam sɩd-sõngo, f segd n yɩɩ pʋg-sõngo. Pʋg-sõng yaa a sɩdã “sõangd sẽn zems ne-a.” (Sɩng. 2:18) Sẽn paase a sẽn nong a Zeova wã yĩnga, a modgdame t’a sɩdã tar yʋ-noogo. (Yel. 31:11, 12; 1 Tɩm. 3:11) F tõe n segla f meng n wa yɩ pʋg-sõngo, f sẽn na n modg n nong a Zeova, la f sõngd neb a taabã yãmb zakẽ wã la tigingã pʋgẽ. w23.12 22-23 s. 18-19

A Zeova pʋlmame t’a na n kõo tõnd yam, tɩ d bãng n yãk yam bũmb toor-toor wɛɛngẽ. Sẽn yɩɩd fãa, d sã n wa na n yãk yam d vɩɩmã wɛɛngẽ. Sẽn paase, a kõt-d-la pãng tɩ d tõog toogo. Wa a Zeova sẽn maan to-to ne tẽn-tʋmd a Pollã, a na n kõo tõnd pãng tɩ d tõog n mao ne d zu-loeesã. (Fili. 4:13) A tũnugda ne d tẽed-n-taasã me n sõngd tõndo. Yʋng ning b sẽn yõk a Zeezi wã, a pʋʋsa ne a sũur fãa. A kosa a Zeova t’a ra bas tɩ nebã tags t’a yaa wẽn-tʋʋsa, la b ning-a taal rẽ yĩng ye. La a Zeova pa maan wa a Zeezi sẽn kosã ye. A tʋma malɛk sẽn da be saasẽ, t’a wa keng a raoodo. (Luk 22:42, 43) A Zeova me tõe n tũnuga ne d tẽed-n-taag sẽn na n bool tõndo, wall sẽn na n wa kaag tõndo, n keng d raoodo. D ned kam fãa tõe n baoo segb n gom “gom-noog” ne d tẽed-n-taaga.—Yel. 12:25. w23.05 10-11 s. a 9-11

Nand tɩ neb nins sẽn pa le wat tigissã wa Tẽegrã, b tõe n da yɛɛsdame tɩ b pa na n deeg-b neer ye. Ra sok-y-b sogsg sẽn na n ning-b yãnde, wall y gom goam sẽn tõe n sãam b sũur ye. Nin-kãens yaa d tẽed-n-taase. D sã n paam tɩ b na n le naag-d n tũ a Zeova, yɩt-d-la noogo. (Yɩɩn. 119:176; Tʋʋ. 20:35) D sũur nooma a Zeezi sẽn yeel tɩ d tẽegd a kũumã yʋʋmd fãa wã. D wʋmda rẽ sẽn tar yõod wʋsgã võore. D sã n kẽng Tẽegrã, nafda tõnd mengã la neb a taabã wʋsgo. (Eza. 48:17, 18) Kɩtdame tɩ d sẽn nong a Zeova ne a Zeezi to-to wã paase. D wilgdame tɩ d sũur nooma ne bũmb nins b sẽn maan tõnd yĩngã. Paasda tõnd ne d tẽed-n-taasã zems-n-taarã pãnga. Sẽn paase, d tõogd n sõnga neb a taabã tɩ b bãng b sẽn tõe n maan to-to n paam bark nins a Zeezi maoongã sẽn kɩt tɩ d tõe n paamã. Bɩ d maan d sẽn tõe n fãa n segl d mens rõandã Tẽegrã sẽn yaa daar ning sẽn tar yõod n yɩɩd yʋʋmdã pʋgẽ wã yĩnga. w24.01 14 s. 18-19

Wãn to la a Zeova wilgd-d sore? Pipi, a tũnugda ne Biiblã sẽn yaa a Gomdã, la a tũnugd ne ninsaalb me. Wala makre, a tũnugda ne “tʋm-tʋmd sẽn tũud sɩd la sẽn tar yamã” n kõt tõnd bũmb toor-toor sẽn kengd d tẽebã, tɩ sõngd-d tɩ d bãngd n yãkd yam. (Mat. 24:45) Sẽn paase, a Zeova tũnugda ne rap sẽn tar minim n wilgd-d sore. Wala makre, tigims sull yel-gɛtbã la kãsem-dãmbã kengda d raoodo, la b kõt-d sagls sẽn tõe n sõng-d tɩ d mao ne zu-loeese. D sẽn paam t’a Zeova wilgd-d sor yaoolem wakatã sẽn pa nana wã, pa noom-d wʋsg sɩda? Sõngda tõnd tɩ d ket n tat a yam, la d kẽnd vɩɩmã sor zugu. Baa ne rẽ, wakat ninga d tõe n getame tɩ sor ning a Zeova sẽn wilgd tõndã tũub yaa toogo, sẽn yɩɩd fãa a sã n wa tũnugd ne rap sẽn pa zems zãng n na n wilg-d sore. Sã n wa yaa woto, d segd n modg n tẽegame tɩ yaa a Zeova n wilgd a nin-buiidã sore, la tɩ d sã n tũ sor ning a sẽn wilgd tõndã d na n paama barka. w24.02 20 s. a 2-3

D sã n maagd d yĩng n zãmsd Wẽnnaam Gomdã, d sẽn nong-a to-to wã pãng na n paasdame. Y sã n wa karemd Biiblã, bɩ y bao n bãng y sẽn karemdã sẽn sõngd yãmb tɩ y bãng bũmb ning a Zeova zugu. Sok-y y meng yaa: ‘Wãn to la kiba-kãngã wilgd t’a Zeova nong-m lame? Bõe n be kibarã pʋgẽ n wilgdẽ tɩ m segd n nonga a Zeova?’ Bũmb a to d sẽn tõe n maan n paas d sẽn nong a Zeova to-to wã pãnga, yaa d sẽn na n pelgd d pʋg n pʋʋsd-a wakat fãa. (Yɩɩn. 25:4, 5) Woto, a Zeova na n leokda d pʋʋsgã. (1 Zã 3:21, 22) D segd n modgame me tɩ d sẽn nong d taabã to-to wã pãng paasdẽ. Tẽn-tʋmd a Poll sẽn lebg kiris-nedã yʋʋm a wãn poore, a bãnga bi-bɩɩg a ye yʋʋr sẽn boond t’a Tɩmote. A Tɩmote ra nonga a Zeova la nebã. A Poll yeela Filip kiris-nebã yaa: “Mam pa tar ned a to sẽn tar yam-sõng wa [a Tɩmote] sẽn na n ges yãmb yell sõma ye.” (Fili. 2:20) A Poll da nee vẽeneg t’a Tɩmote nonga saam-biisã la saam-bi-pogsã wʋsgo. Sãmbg sẽn kae, tigims nins a Tɩmote sẽn da kaagdã neb ra gũuda a waoongã ne yãgbo.—1 Kor. 4:17. w23.07 9 s. a 7-10

Nand tɩ Israyɛll nebã kẽ kãabg tẽngã pʋgẽ, a Moyiiz kiime. Nin-kãngã sẽn da maand sɩdã kũum poore, a Zeova basa a nin-buiidã sõngr bɩ? Ayo. B sẽn wa n maand sɩd ne a Zeova wã, a Zeova ra geta b yelle. Nand t’a Moyiiz ki, a Zeova yeel-a lame t’a yãk a Zozuwe t’a lʋɩ nin-buiidã taoore. Sẽn deng rẽ, a Moyiiz zãmsa a Zozuwe bũmb toor-toor yʋʋm wʋsg pʋgẽ. (Yik. 33:11; Tõo. 34:9) Sẽn paase, rap wʋsg sẽn da tar minim n da sõngd n get nin-buiidã yelle. Yaa neb tusr-tusr nanambse, neb koabg-koabg nanambse, neb pis-nu-nu nanambse, la baa neb piig-piig nanambse. (Tõo. 1:15) Wẽnnaam nin-buiidã ra paamdame tɩ b get b yell sõma. Yɩɩ woto me a Eli wakatẽ wã. Yʋʋm wʋsg pʋgẽ, a ra lʋɩta taoor tũudum hakɩɩkã wɛɛngẽ, n sõngd Israyɛll nebã. La wakat wa n taame t’a Zeova na n dɩk-a n kẽng Zida sẽn da be goabgã, n tɩ kõ-a tʋʋmd a to. (2 Rĩm. 2:1; 2 Kib 21:12) Woto wã, neb nins sẽn da maand sɩd ne Wẽnnaam Israyɛll buud piigã rĩungã pʋgẽ wã pa na n le paam sõngr bɩ? Pa woto ye. Sẽn deng rẽ, a Eli zãmsa a Eliize bũmb toor-toor yʋʋm wʋsg pʋgẽ. A Zeova kell n pidsa a raabã, la a ges neb nins sẽn maand sɩd ne-a wã yelle. w24.02 5 s. 12

Efɛɛz kiris-nebã saka a Zeova Gomdã sẽn yaa wa vẽenem sẽn wilgd-b sorã. (Yɩɩn. 119:105) Efɛɛz nin-kãens basa ziri tũudmã yel-maandɩ wã la b tʋʋm-dẽgdã. B lebga “Wẽnnaam togs-n-taase,” la b maand b sẽn tõe fãa n na n tũ a Zeova sẽn na yɩl n ta a yam. (Efɛɛ. 5:1) Nand tɩ d bãng sɩdã, tõnd me ra bee lik pʋgẽ tũudmã wɛɛngẽ la d tʋmd tʋʋm-dẽgdo. Tõnd sʋkã kẽer da maanda ziri tũudmã tiga, tɩ sãnda ra yaa yoaadba. La d sẽn wa n bãng noy nins a Zeova sẽn gãneg sõma la wẽngã wɛɛngẽ wã, d toeemame. D modgame n vɩ tɩ zemsd ne noy nins a sẽn gãnegã masã. Rẽ kɩtame tɩ d paam bark buud toor-toore. (Eza. 48:17) La pa wakat fãa la yaa nana tɩ d zãag d meng ne likã, n “kell n kẽn wa vẽenem kamb” ye. w24.03 21 s. a 6-7

Y tõe n getame tɩ y pa segl y meng n sa n na n dɩk y meng n kõ a Zeova n deeg lisg ye. Tõe tɩ bũmb kẽer la y segd n toeem sẽn na yɩl tɩ y vɩɩmã zems ne a Zeova noyã, wall tõe tɩ y segd n paasa y tẽebã pãnga. (Kolo. 2:6, 7) Biibl karen-biisã bɩʋʋng tʋʋlem pa yembr ye. Sẽn paase, b pa yãk yʋʋm takɩ tɩ kom-bɩɩsã sã n ta rẽ bɩ b segd n dɩk b mens n kõ Wẽnnaam n deeg lisg ye. Tikd-y bũmb nins y sẽn tõogd n maandẽ wã, n get y bɩʋʋngã sẽn yaa to-to, la y ra mak y meng ne ned a to ye. (Gal. 6:4, 5) Baa y sã n getẽ tɩ y nan pa segl y meng n sa n na n dɩk y meng n kõ a Zeova, bɩ y ket n modgdẽ sẽn na yɩl n wa maan dẽ. Kos-y-yã a Zeova t’a sõng-y tɩ y toeem bũmb nins fãa y sẽn segd n toeemã. (Fili. 2:13) Y tõe n basa y yam t’a na n kelga y pʋʋsgã, la t’a na n deegame.—1 Zã 5:14. w24.03 5 s. a 9-10

Daar a ye, bũmb n wa n maan t’a Saara sũur sãame. La a pelga a pʋg n togs a Abrahaam a sẽn tagsde, hal n ning-a taale. A Abrahaam ra miime t’a Saara yaa pag sẽn sakd a sɩda, la a teend-a. A maaga a yĩng n kelg-a, la a bao n na n welg yellã. (Sɩng. 16:5, 6) Yam-bʋg la d tõe n dɩk b kibarã pʋgẽ? Pʋg-sɩdba, yaa yãmb n tog n yãkd yam bũmb toor-toor wɛɛngẽ y zakã rãmb yĩnga. (1 Kor. 11:3) La sẽn na yɩl n wilg tɩ y nonga y pagã, y segd n maagda y yĩng n kelg-a n bao n bãng a tagsgo, n yaool n bãng n yãk yam. Sẽn yɩɩd fãa, sã n yaa yell sẽn pak-a wɛɛngẽ. (1 Kor. 13:4, 5) Daar a to me, neb n tiig n wa n na n kaag-ba, t’a Abrahaam yãk yam n na n maan bũmb n deeg-b sãando. A kosa a Saara t’a bas a sẽn da maandã, la a yik n maan bur wʋsgo. (Sɩng. 18:6) A Saara yɩɩ tao-tao n maan a Abrahaam sẽn kos-a wã. Pagba, y tõe n dɩka a Saara togs-n-taar n teend y sɩdbã, b yam-yãkr fãa pʋgẽ. Y sã n maand woto, y paasda y kãadmã pãnga.—1 Pɩy. 3:5, 6. w23.05 24-25 s. 16-17

B sẽn wa n yãk a Zedeyõ t’a lebg bʋ-kaoodã, ra yaa tɩlɛ t’a yɩ sakda, la a tall raoodo. B kõ-a-la tʋʋmd sẽn da pa nana. A ra segd n sãama tẽn-kugrã a ba wã sẽn da maan n pʋʋsd wẽn-faoog a Baallã. (Bʋ. 6:25, 26) Rẽ poore, a sẽn wa n yãk a tãb-biisã, a Zeova yeel-a-la hal naoor a yiib fãa t’a boog b sõorã. (Bʋ. 7:2-7) Sẽn na n baase, a Zeova yeel-a lame t’a tɩ zab ne a bɛɛbã ne yʋn-sʋka. (Bʋ. 7:9-11) Kãsem-dãmbã segd n yɩɩ neb sẽn “sakd nana.” Kãsem-soab sẽn yaa sakd sikda a meng n tũud Gʋls-sõamyã sẽn yet bũmb ningã, la Wẽnnaam siglgã noyã. Woto, a kõta neb a taabã mak-sõngo. La baasgo, tõe n wa yɩɩ toog ne-a t’a yɩ sakda. Wala makre, tõe n yɩɩ toog ne-a t’a sak n tũ noy nins b sẽn kõt-a wã. Wakat ninga, a tõe n sokda a meng no-kãensã sã n zemsame. B tõe n wa kos-a lame me t’a tʋm tʋʋmd sẽn tõe n kɩt t’a paam yell ne tẽngã taoor dãmba. Sã n wa yaa woto, wãn to la kãsem-soab tõe n dɩk a Zedeyõ togs-n-taar sakrã wɛɛngẽ? Kelgd-y saglsã neere, la y tũudẽ. w23.06 4-5 s. a 9-11