Tʋʋl-nifu

Pĩnd wẽndẽ wã, a Zeova nin-buiidã kẽer maoo ne zu-loees b sẽn da pa tẽede. Wala makre, a Zakoobe. A ba wã ra yeel-a lame t’a kẽng a Laban sẽn yaa a roagd n tũud Wẽnnaamã nengẽ, n tɩ peeg a bi-pugl a ye n maan a paga. A leb n yeela a Zakoob t’a Zeova na n ning-a-la bark wʋsgo. (Sɩng. 28:1-4) A Zakoob sɩd maana wa a ba wã sẽn yeelã. A yii Kanaã, n tog sor n kẽng a Laban yirã. A Laban ra tara kom-pugli a yiibu. A Leya ne a Rasɛlle. A Zakoob yamã kẽe a Laban bi-pugl a Rasɛll sẽn da yaa yaoã, n sak n na n tʋm yʋʋm a yopoe n kõ a Rasɛll ba wã, n yaool n paam n kẽ kãadem ne-a. (Sɩng. 29:18) La yɛlã pa yɩ wa a Zakoob sẽn da tẽedã ye. A Laban zãmb-a lame, n dɩk a Leya sẽn yaa a bi-pugl kãsengã n kõ-a. Rasem a yopoe poore, a Laban sakame t’a Zakoob na n kẽ kãadem ne a Rasɛlle. La a yeela a Zakoob t’a segd n deng n tʋma yʋʋm a yopoe n paase. (Sɩng. 29:26, 27) A Laban leb n zãmba a Zakoob a sẽn wa n tʋmd ne-a wã. Yaa hal yʋʋm pisi la a Laban sẽn zãmb a Zakoobã!—Sɩng. 31:41, 42. w23.04 15 s. a 5

D sã n wa rat n bãng d sẽn na n maaneg yell taoor la belsgo, ãnd n tõe n sõng-do? D mii sẽn tõe n sõng-a tõndã. D tõe n pʋʋsa Wẽnnaam a Zeova. A Zeova mengã yetame tɩ d maan woto. A ratame tɩ d ‘pʋʋsd-a wakat fãa.’ (1 Tes. 5:17) D tõe n basa d yam n pʋʋs-a n kos sõngre, d vɩɩmã nens fãa pʋgẽ. (Yel. 3:5, 6) Wẽnnaam a Zeova sẽn yaa kõatã, a pa yãk sõor takɩ d sẽn tog n pʋʋs-a ye. A Zeezi ra miime tɩ pʋʋsgã tara yõod wʋsg a Zeova nifẽ. Yʋʋm wʋsg nand t’a wa tẽngã zugu, a yãa a Ba wã sẽn leok pagb la rap sẽn yaa wẽn-zoɛtb pʋʋsgo. Wala makre, a Zeezi ra bee ne a Ba wã, a sẽn wa n leok a Anne, a Davɩɩde, a Eli la neb a taab sẽn pelg b pʋg n pʋʋs-a wã. (1 Sãm. 1:10, 11, 20; 1 Rĩm. 19:4-6; Yɩɩn. 32:5) Yaa rẽ yĩng la a Zeezi sẽn yeel a karen-biisã tɩ b pʋʋsd wakat fãa, la ne bas-m-yamã.—Mat. 7:7-11. w23.05 2 s. a 1, 3

Maan-kʋʋdb kãsem a Zehoyada ra zoeta a Zeova. Rẽ yɩɩ vẽenega, a Zezabɛll bi-pugl a Atali sẽn wa n deeg Zida naamã ne pãngã. A ra yaa nin-wẽng sẽn dat naam ne a sũur fãa, hal n bao n na n kʋ rĩmã kambã sẽn yaa yẽ meng yagensã fãa. (2 Kib 22:10, 11) Kom-kãens sʋka, biig a ye yʋʋr sẽn boond t’a Zowas bal n põse, bala a Zehoyada pag a Zosebat fãag-a lame. A Zosebat ne a sɩdã baoo zĩig n solg biigã, n ges a yelle. B sẽn maan woto wã kɩtame tɩ naamã kell n pa a Davɩɩd pendẽ wã. A Zehoyada maana sɩd ne a Zeova, n pa zoe a Atali ye. A Zowas sẽn wa n tar yʋʋm a yopoe wã, a Zehoyada le wilgame t’a maanda sɩd ne a Zeova. A maana bũmb toor-toor sẽn na yɩl t’a Zowas lebg rĩma. A Zowas n da tar sor n na n deeg a Davɩɩd naamã. La a Zehoyada magbã sã n da pa zemse, yaa vẽeneg tɩ b ra na n kʋ-a lame. La ne a Zeova sõngre, yãka nenga. w23.06 17 s. 12-13

Rĩm a Nebukadnezaar ra tõe n tagsame t’a Dãniyɛll yaa tõata, n kɩt tɩ b kʋ-a. La a Dãniyɛll talla raoodo, n taas-a koɛɛgã. Tõe tɩ bõe n sõng a Dãniyɛll t’a tall raood a vɩɩmã tõre? Yaa vẽeneg t’a Dãniyɛll sẽn wa n yaa bi-bɩɩgã, a ba wã ne a ma wã kõ-a-la mak-sõngo. (Tõo. 6:6-9) Pa tõod piigã bal la a Dãniyɛll ra mi ye. A ra mii bũmb wʋsg Israyɛll nebã sẽn da tõe n dɩ la b sẽn da pa segd n dɩ wã wɛɛngẽ. (Maan. 11:4-8; Dãn. 1:8, 11-13) A Dãniyɛll ra mii Wẽnnaam nin-buiidã kʋdemdã yɛl me, la bũmb ning sẽn paam-b wakat ning fãa b sẽn pa sak a Zeova noyã. (Dãn. 9:10, 11) A Dãniyɛll sẽn seg zu-loees ninsã kɩtame t’a kɩs sɩd tɩ sẽn wa n yaa a soab fãa, a Zeova ne a malɛgsã sẽn tar pãngã na n sõng-a lame.—Dãn. 2:19-24; 10:12, 18, 19. w23.08 3 s. a 5-6

A Rebeka ra yaa pag sẽn tar yam. A vɩɩmã tõre, a bãng n yãka yam bũmb kẽer sẽn da pa nana wɛɛngẽ. (Sɩng. 24:58; 27:5-17) Baasgo, a ra mii neb waoogre, la a ra sakd saglse. (Sɩng. 24:17, 18, 65) Yãmb sã n yaa sik-m-meng soab wa a Rebeka, n teend neb nins a Zeova sẽn yãk tɩ b lʋɩt taoorã, y kõta y zakã rãmb la tigingã neb fãa mak-sõngo. Kiris-neb nins tẽeb sẽn bɩ wã fãa segd n yɩɩ sik-m-mens rãmba. A Ɛstɛɛr ra yaa pag sẽn yaa sik-m-meng soaba, la sẽn da tũud a Zeova ne a sũur fãa. A sẽn da yaa sik-m-meng soabã yĩnga, baa a sẽn wa n lebg rĩm-poakã a pa wuk a meng ye. A sak n tũu a Mardose yʋʋm sẽn da yɩɩd-a wã saglse. A Mardose ra yaa a ba wã ba-biig biiga. (Ɛst. 2:10, 20, 22) Fo-me sã n baood sagl-sõma la f tũudẽ, f tõogd n talla sik-m-meng a woto. (Tɩt 2:3-5) Bũmb a to me n wilgd t’a Ɛstɛɛr ra yaa sik-m-meng soaba. A “ra yaa neer wʋsgo,” la a ra pa tikd rẽ n maand wilg-m-meng ye.—Ɛst. 2:7, 15. w23.12 19-20 s. a 6-8

A Zeova pa rat tɩ d ning d meng taal tɩ loog noor ye. D sã n pelg d pʋg n togs d yel-wẽndã, n tek yam n kos sugr la d modgd sẽn na yɩl n da le maan a buudu, d tõe n basa d yam t’a Zeova kõ-d-la sugri. (Tʋʋ. 3:19) D sã n maan bõn-kãensã fãa, a Zeova pa rat tɩ d ket n ningd d meng taal ye. A mii rẽ sẽn tõe n nams tõnd to-to. (Yɩɩn. 31:10) D sũ-sãangã sã n loog nugu, tõe n kɩtame tɩ d bas vɩɩmã zoeese. (2 Kor. 2:7) Y sã n ket n ningd y meng taale, bɩ y tags “sugr hakɩɩkã” Wẽnnaam sẽn kõtã yelle. (Yɩɩn. 130:4) A sã n kõ neb nins sẽn tek yam n kos sugr ne b sũur fãa wã sugri, a yetame yaa: “M pa na n le tẽeg b yel-wẽndã yell ye.” (Zer. 31:34) Woto rat n yeelame t’a Zeova pa na n le ning-y taal yel-wẽn y sẽn maan pĩnd yĩng ye. Ra sãam-y y sũur wʋsgo, y pĩnd yel-wẽnd sẽn kɩt tɩ y pa le tõe n maan bũmb kẽer a Zeova tũubã pʋgẽ yĩng ye. A Zeova pa le tagsd y yel-wẽnã yell ye. Yãmb me pa segd n tagsd b yell ye. w23.08 30-31 s. 14-15

Koronavirisã bã-loangdgã sasa, neb kẽer sẽn da kelgd kibay sẽn pa sɩdã ra maanda yɩɩr wʋsgo, la a Zeova Kaset rãmbã sẽn kelg sagls nins siglgã sẽn kõtã yam ra gãee bãane. (Mat. 24:45) D pa segd n yĩm “bũmb nins sẽn tar yõod n yɩɩdã” yell ye. (Fili. 1:9, 10) D sã n bas tɩ bũmb tiis-du, sãamda d sẽkã la d pãngã, tɩ d pa tõe n maan bũmb nins sẽn tar yõod n yɩɩdã ye. D sã n bas tɩ bũmb nins d sẽn minim n maandẽ wã wa pak tõnd n yɩɩda, wala makre, rɩɩbo, rãamã yũubu, pemsmã kokr la d nug-tʋʋmdã, b na n tiis-d lame. (Luk 21:34, 35) Sẽn paase, beoog sẽn vẽeg fãa d wʋmda kibay sẽn gomd neb sẽn wilgd b sũ-sãams yelle, la politikã no-koɛɛma. D pa segd n bas tɩ no-koɛɛm a woto wa tiis-d ye. Sã n pa rẽ d tõe n wa kẽesa d toog yel-kãensã pʋsẽ, baa yaa d sũurã pʋgẽ. A Sʋɩtãan tũnugda ne bũmb toor-toore, n dat tɩ yɩ toog tɩ d kell n maan sẽn yaa tɩrga. w23.07 16-17 s. 12-13

Sã n yaa ne a Zeova Kaset rãmbã, a Zeezi kũumã tẽegr n yaa daar ning sẽn tar yõod n yɩɩd yʋʋmdã pʋgẽ. Yaa Tẽegrã bal la a Zeezi yeel a karen-biisã tɩ b maand yʋʋmd fãa. (Luk 22:19, 20) A tẽegda tõnd bũmb nins d sẽn tõe n maan n wilg tɩ d sũur yaa noog ne a Zeezi maoongã. (2 Kor. 5:14, 15) Leb n yaa segb tõnd ne d tẽed-n-taasã sẽn paam n na n ‘keng taab raoodo.’ (Rom. 1:12) Sẽn paase, neb wʋsg sã n kelg Tẽegrã sõsgã, la b yã saam-biisã manesem sẽn yaa to-to wã kɩtdame tɩ b rat n zãms Biiblã. D gũuda Tẽegrã daar ne yãgb me, bala a sõngda tõnd ne d tẽed-n-taasã sẽn be dũniyã gill zugã tɩ d tũud a Zeova ne yam a yembre. Rẽ fãa kɩtame tɩ Tẽegrã tar yõod wʋsg ne tõndo. w24.01 8 s. a 1-3

D sã n bʋgsd bũmb ning a Zeova ne a Zeezi sẽn maanã zugu, d na n maneg n neeme tɩ b nonga tõnd ned kam fãa wʋsgo. (Gal. 2:20) A Zeova kɩtame t’a Zeezi ki tõnd yĩnga, a sẽn nong tõndã yĩnga. A Zeova rɩka a Zeezi sẽn yaa soab ning a sẽn nong n yɩɩdã n kõ n na n wilg t’a nonga tõndo. A basame t’a Biigã nams la a ki tõnd yĩnga. A Zeova pa nong tõnd bal ye. A yet-d lame me t’a nong-d-la wʋsgo. (Zer. 31:3) A Zeova taka tõnd tɩ d wa a nengẽ, a sẽn nong-dã yĩnga. (Ges-y Tõod 7:7, 8.) Bũmb wall ned kae n tõe n welg tõnd ne Wẽnnaam nonglmã ye. (Rom. 8:38, 39) Yãmb tagsg yaa wãn ne nonglem-kãnga? w24.01 28 s. 10-11

Kiris-neb nins sẽn paam vʋʋsem sõng zaeebã sũur nooma ne b sẽn saagd n na n wa vɩɩmd saasẽ wã. Saam-biig a Frederick Franz sẽn yaa b nin-yendã pelga a pʋg n yeel yaa: “D sẽn saagd n na n wa paam bũmb ningã pidsg yaa waaziba. Bãg-bilã neb 144000 ned kam fãa na n paama bũmb ning Wẽnnaam sẽn pʋlem-dã. D keoorã na n yɩɩ sõma n yɩɩd d sẽn tagsdã hal zĩig sẽn zãre.” Saam-biig a Franz yeela yʋʋmd 1991 wã yaa: “D ket n nanda bũmb ning d sẽn saagd n na n wa paamã wʋsgo. D sẽn gũud n kaoosdẽ wã, kɩtame tɩ d maneg n nand-a. Yaa bũmb sẽn sek d na gũ. . . . Masã, m sũur nooma ne d sẽn saagd n na n wa paam bũmb ningã n yɩɩd pĩndã.” D saagd n na n wa tɩ vɩɩmda saasẽ wakat sẽn kõn sa tɩ yaa tẽngã zug me, d sẽn saagd n na n wa paam bũmb ningã bee rasãnde, tɩ d tõe n maan sũ-noogo. Sẽn paase, d tõe n modgame n maneg n kɩs sɩd ne bõn-kãnga. w23.12 9 s. a 6; 10 s. a 8

Zũud tẽn-kugr n da be pĩnd wẽndẽ sɛk-roogã rignoorẽ, tɩ b maand rũms maand a zug n kõt a Zeova. (Yik. 27:1, 2; 40:29) La maan-kãens ra pa tõe n kɩt tɩ nin-buiidã paam b yel-wẽnã sugr zãng ye. (Ebre. 10:1-3) Rũms maandã b sẽn da kõt sɛk-roogẽ wã n yɩlemdẽ wã makda maoong ning sẽn na n wa kɩt tɩ ãdem-biisã paam b yel-wẽnã sugr zãng-zãngã. A Zeezi ra miime t’a Zeova kɩtame t’a wa tẽngã zugu, n na n kõ a vɩɩmã tɩ yɩ maoong ãdem-biisã yĩnga. (Mat. 20:28) Dẽnd a Zeezi lisgã sasa, a wilgame t’a sakame n na n maan a Zeova raabã. (Zã 6:38; Gal. 1:4) A Zeezi kõo a vɩɩmã “vugr wakat fãa yĩnga,” n na n lud ned ning fãa sẽn tẽed Kiristã yel-wẽnã wakat fãa yĩnga.—Ebre. 10:5-7, 10. w23.10 26-27 s. 10-11

Tõnd da pa tõe n maan baa fʋɩ d toor n fãag d meng ne yel-wẽndã la kũumã ye. (Yɩɩn. 49:7, 8) A Zeova maana bũmb toor-toor sẽn na yɩl t’a Zeezi kõ a vɩɩmã n fãag tõndo. Pa yɩ nana ne a Zeova la a Zeezi fãa ye. D sã n bʋgsd bũmb nins a Zeova ne a Zeezi sẽn mong b mens tõnd yĩngã zugu, d sũur na n maneg n yɩɩ noog ne a Zeezi maoongã. A Ãdem sẽn maan yel-wẽndã, a bõna vɩɩm sẽn kõn sa wã. La pa rẽ bal ye. A kɩtame t’a kambã me bõn vɩɩm sẽn kõn sa wã. A Zeezi kõo a vɩɩmã sẽn zems zãngã tɩ yɩ maoongo, sẽn na n yɩl n lebs n da bũmb ning a Ãdem sẽn bõnã. A Zeezi sẽn wa n be tẽngã zugã, “a pa tol n maan yel-wẽnde, la b pa wʋm zãmb goam a noorẽ me ye.” (1 Pɩy. 2:22) A Zeezi kũumã sasa t’a zemsa zãng wa a Ãdem sẽn da yaa to-to nand t’a maan yel-wẽndã.—1 Kor. 15:45; 1 Tɩm. 2:6. w24.01 10 s. a 5-6

A Zeezi vʋʋgrã poore, a kẽe wẽnd-doog ning sẽn pa ninsaalb nus n me wã Zĩ-sõng sẽn yɩɩdã pʋgẽ. D nee vẽeneg t’a Zeova sẽn tik a Zeezi Kirist maoongã la a maan-kʋʋrã zug n sigl yɛlã to-to tũudum hakɩɩkã wɛɛngẽ wã n yaa sõma n yɩɩda. Israyɛll maan-kʋʋdb kãsmã ra kẽeda Zĩ-sõng sẽn yɩɩdã sẽn yaa ninsaalb n maanã pʋgẽ ne rũms zɩɩm. La a Zeezi “kẽe saasẽ meng” sẽn yaa Zĩ-sõng sẽn ka to wã pʋgẽ, n yals a Zeova taoore. Be, a wilga a vɩɩmã sẽn zems zãngã a sẽn kõ tɩ yɩ maoong tõnd yĩngã, “n na n yiis yel-wẽnã ne a meng maoongã maasem.” (Ebre. 9:24-26) D saagd n na n tɩ vɩɩmda saasẽ tɩ yaa tẽngã zug me, d fãa tõe n waooga a Zeova a roog ning sẽn pa ninsaalb nus me wã pʋgẽ. w23.10 28 s. 13-14

Tags-y n ges-y-yã a Zeezi sẽn maand bũmb nins tõnd yĩng saasẽ, a sẽn yaa d Rĩm la maan-kʋʋdb kãsem sẽn yaa nimbãan-zoɛtã. Ne yẽ maasem, d tõe n tũnuga ne pʋʋsgã n “kolg Wẽnnaam bark geerã” n kos t’a zoe d nimbãanega, la d kos sõngr “d sẽn wat n dat sõngr wakate.” (Ebre. 4:14, 15) D pa segd n bas baa daar-n-yɛng n pa tags bũmb nins a Zeova ne a Zeezi sẽn maan tõnd yĩnga, la b sẽn ket n maandẽ wã yell ye. B sẽn wilgd to-to tɩ b nonga tõndã segd n yɩ-d-la noog wʋsgo, la kɩt tɩ d tall yẽesem a Zeova tũudmã pʋgẽ. (2 Kor. 5:14, 15) Bũmb a ye d sẽn tõe n maan n wilg tɩ d sũur noomame yaa d sẽn na n maan d sẽn tõe fãa n sõng neb a taabã tɩ b lebg a Zeova Kaset rãmb la a Zeezi karen-biisi. (Mat. 28:19, 20) Yɩɩ woto la tẽn-tʋmd a Poll maan-yã. A ra miime t’a Zeova raabã “yaa tɩ nebã buud fãa paam fãagre, la b paam bãngr hakɩɩk sɩdã zugu.”—1 Tɩm. 2:3, 4. w23.10 22-23 s. 13-14

D wʋsg sã n wa moond koɛɛgã, d nong n karemda Biiblã vɛrse-kãensã sẽn wilgd vɩɩmã sẽn na n yɩ to-to arzãnã pʋgẽ wã. Bõe n tõe n sõng tõnd mengã la neb a taabã tɩ d kɩs sɩd tɩ bark nins yell b sẽn gomd Vẽnegr 21:3, 4 na n pidsame? A Zeova pa pʋlem pʋlen-no-kãensã bal ye. A wilga bũmb toor-toor sẽn tõe n kɩt tɩ d bas d yam tɩ na n pidsame. Vɛrse nins sẽn pʋgdã wilgda bũmb ning sẽn kɩt tɩ d tõe n kɩs sɩd t’a Zeova sẽn pʋlem arzãnã wɛɛngẽ wã na n pidsame. Be, b yeelame yaa: “Sẽn zao-a geerã yeelame: ‘Ade! Mam maanda bũmbã fãa paalse.’ A paasame: ‘Gʋlse, bala gom-kãensã yaa sɩda, n yaa goam b sẽn tõe n tẽ.’ A le yeela maam yaa: ‘Gom-kãensã pidsame! Mam yaa Alfa la Omega, rat n yeel tɩ sɩngrã la baasgã.’”—Vẽn. 21:5, 6a. w23.11 3 s. a 3-5

Saam-biig sẽn yaa bi-bɩɩg sẽn tõe n maan tɩ wilg t’a tagsda neer wakat fãa, yaa a sẽn na n yãkd yam sẽn yaa sõma fu-yerdɩ wã la zugã manegr wɛɛngẽ. Naoor wʋsgo, neb nins sẽn yiisd futã la zutã manegr modɛll-paalã, la sẽn maand-b bõn-kãens piblisite wã yaa neb sẽn maand b toog kae ne a Zeova noyã, wall neb sẽn nong yoobo. Rẽ n so tɩ fut nins b sẽn wae n yiisdẽ wã sẽbgd yĩnga, wall rao sã n ning bɩ kɩt t’a wõnd paga. Bi-bɩɩg tẽeb sẽn bɩ sã n wa na n yãk fuug a sẽn na n yeelge, a na n tũu Biiblã saglsã, la a rɩk neb nins sẽn kõt mak-sõng tigingã pʋgẽ wã togs-n-taare. A tõe n soka a meng yaa: ‘M yam-yãkr toor-toorã wilgdame tɩ m yamã vẽename, la tɩ m waoogda m taabã bɩ? Mam sẽn yer fut ninsã kɩtdame tɩ neb a taabã ne vẽeneg tɩ m yaa wẽn-tũud bɩ?’ (1 Kor. 10:31-33) Bi-bɩɩg sẽn tagsd neer wakat fãa na n paamame t’a tẽed-n-taasã nand-a, la pa rẽ bal ye. A saasẽ Ba wã me na n nand-a lame. w23.12 26 s. a 7

Pĩndã, “goabg rĩmã” namsa a Zeova nin-buiidã b tũudmã yĩnga. (Dãn. 11:40) Wala makre, yʋʋmd 1900 wã loogr poor bilfu, b kẽesa d tẽed-n-taas wʋsg bãens roogo, b sẽn zãgs tɩ b kõn kẽes b toog politikã yɛlẽ wã yĩnga. B leb n diga a Zeova Kaset rãmb kamb b lekol-dãmbẽ, b sẽn pa rat n kẽes b toog politikã yɛlẽ wã yĩnga. La yʋʋmã noorã, a Zeova Kaset rãmb nins sẽn be “goabg rĩmã” soolmẽ wã paamda makr buud toor-toor sẽn kɩtd tɩ yaa toog ne-b tɩ b kell n zĩnd Wẽnnaam Rĩungã poorẽ. Wala makre, naamã baoob sasa, kiris-ned tõe n wa rat n teela politik sull ninga, wall ned sẽn baood naamã. Baa ne a sẽn pa na n tɩ votã, a tõe n wa tagsdame tɩ politik sull ning sãoo a to. La d sã n pa rat n kẽes d toog politikã yɛlẽ, d segd n gũusa ne d sẽn maand bũmb ninsã, la ne d tagsa wã me.—Zã 15:18, 19. w23.08 12 s. 17

D sẽn zoet vɩɩmã zoeesã, d segd n ‘modgame tɩ d sẽn zoet to-to wã kɩt tɩ d wa paam keoorã.’ (1 Kor. 9:24) A Zeezi yeelame tɩ “yão-beedã, rã-yũurã la yɩɩr ne vɩɩmã yɛlã” tõe n wa pak-d lame tɩ loog noore. (Luk 21:34) Vɛrse-kãngã la vɛrse a taab tõe n sõng-y lame tɩ y bãng bũmb kẽer y sẽn segd n demse, n tõog n zoe vɩɩmã zoeese. D tõe n basa d yam tɩ d na n zoee vɩɩmã zoees n baase, bala a Zeova na n kõ-d-la pãnga. (Eza. 40:29-31) Woto wã, kell-y n zoe-y ne yẽesem. D maan wa tẽn-tʋmd a Poll sẽn zoe ne a pãng fãa sẽn na yɩl n paam keoorã sẽn da be a taoorã. (Fili. 3:13, 14) Ned pa tõe n deeg y zĩig n zoe zoeesã ye. La ne a Zeova sõngre, y na n tõogame. A Zeova tõe n sõng-y lame tɩ y tʋk y zɩɩbã, la y lob bũmb nins sẽn pa tɩlɛ wã. A Zeova sã n be ne-yã, y na n tõog n zoee zoeesã n baase. w23.08 31 s. 16-17

A Zeezi sẽn wa n tar yʋʋm piig la a yiibã, a roagdbã loog n bas-a-la Zerizalɛm. (Luk 2:46-52) Tigrã poore, nand t’a Zozɛf ne a Maari lebg n kuili, bãmb n da segd n ges b kambã fãa sã n bee ne-ba. A Zozɛf ne a Maari sẽn wa n yã a Zeezi wã, a Maari ning-a-la taal a sẽn pa Zerizalɛmmã yĩnga. A Zeezi ra tõe n yeelame tɩ pa zems tɩ b ning-a taal ye. Baasgo, a maaga a yĩng n leok a roagdbã ne waoogre. La a Maari ne a Zozɛf ra ‘pa wʋmd bũmb ning a sẽn yeel-bã võor ye.’ Baa ne rẽ a Zeezi “kell n sak-b lame.” Kom-bɩɩse, yaa toog tɩ y sak y roagdbã b sã n wa tudgi, wall b sã n wa pa wʋmd y yell võor bɩ? Bõe n tõe n sõng-yã? Tags-y n ges-y rẽ sẽn na n noog a Zeova sũur to-to. Biiblã yeelame tɩ y sã n sakd y roagdbã, “rẽ nooma Zu-soabã.” (Kolo. 3:20) Bãng-y tɩ y roagdbã sã n wa pa wʋmd y yell võore, wall b lugl noy sẽn yaa dem-deme, a Zeova miime. La y sã n sak n tũ, y noogda a sũuri. w23.10 7 s. a 5-6

Y karen-bi-taag tõe n yeelame t’a Zeova Kaset rãmbã segd n toeema b tagsg sẽn yaa to-to rao ne rao wall pag ne pag sẽn kẽed ne taabã wɛɛngẽ wã. D tõe n wilg-a lame tɩ d sakame tɩ ned fãa tara sor n na n yãk a toorẽ yam. (1 Pɩy. 2:17) Rẽ poore, d tõe n wilg-a-la Biiblã noyã tũub sẽn nafd ned to-to. Ned sã n kɩɩs tõnd goama, d pa segd n yɩ tao-tao n tags tɩ d mii a sẽn tẽed bũmb ningã ye. Wala makre, y karen-bi-taag sã n yeel tɩ yaa neb nins yam sẽn pa waoogã n tẽed Wẽnnaam, y manesem na n yɩɩ wãna? Y na n tagsame t’a kɩsa sɩd tɩ bũmb fãa wa n bee woto bal tɩ pa tũ ne Naand sababo, la t’a mii siãnsã bãngdb sẽn yet bũmb ning rẽ wɛɛngẽ wã sõma bɩ? Tõe t’a goma woto bala, n pa reng n tags rẽ zug sõma ye. Tõe tɩ y na n wilg-a-la bũmb sẽn be jw.org pʋgẽ n gomd naanegã yelle. Tõe tɩ rẽ poor bɩ a wa rat n gom sõsg wall video a sẽn yã jw.org pʋgẽ yelle. Hakɩɩka, d sã n leok ne waoogre, tõe n kɩtame t’a wa rat n bãng Biiblã sẽn yet bũmb ningã. w23.09 17 s. 12-13

D tõe n basa d yam tɩ baa d sã n tudgi, a Zeova na n sakame tɩ d ket n tʋmd a tʋʋmã, la a ning-d barka. La rẽ yaa d sẽn na n maan d sẽn tõe fãa n dems yɛlã la d kell n teeg-a (Yel. 28:13) A Sãmsõ ra yaa ned sẽn pa zems zãnga. La baa a sẽn tudg a Dalila wɛɛngẽ wã, a pa bas a Zeova tũub ye. A Zeova me pa raag-a n bas ye. A le tũnuga ne a Sãmsõ n maan bõn-kãsenga. A Zeova ket n getame t’a yaa ned sẽn tall tẽeb sõma. A kɩtame tɩ b gʋls a Sãmsõ yʋʋrã n naag neb nins sẽn maan sɩd ne-a wã Ebre-rãmb sak 11 wã pʋgẽ. D sẽn mi tɩ d saasẽ Ba wã nonga tõnd woto, n tʋll ne a sũur fãa n kõ-d pãngã, sẽn yɩɩd fãa d sã n wa maood ne zu-loeesã kengda d raoodo. Bɩ tõnd me pʋʋs a Zeova wa a Sãmsõ, n yeel-a yaa: “M kot-y lame tɩ y tẽeg m yelle. M bõos tɩ y kõ-m pãnga.”—Bʋ. 16:28. w23.09 7 s. 18-19

D sẽn ning a Zeova daarã d yamẽ wã kɩtame tɩ d rat n maan d sẽn tõe fãa n moon neb a taabã koe-noogã. Baa ne rẽ, d mi n yɛɛsdame n pa rat n moon ye. Bõe yĩnga? Tõe n yɩɩ ninsaal zoees yĩnga. A buud paama a Pɩyɛɛre. A Zeezi yõkrã yʋngo, a Pɩyɛɛr pa tõog n wilg t’a yaa a Zeezi karen-biig ye. A kɩɩsa naoor wʋsg meng t’a pa mi-a ye. (Mat. 26:69-75) La a Pɩyɛɛr wa n tõoga a rabeemã, n yeel a lɛtrã pʋgẽ yaa: “Ra zoe-y bũmb ning neb a taabã sẽn zoetã, la y ra maan yɩɩr me ye.” (1 Pɩy. 3:14) A Pɩyɛɛr goamã wilgdame tɩ d tõe n tõoga ninsaal zoeesã. Bõe n tõe n sõng-d tɩ d bas ninsaal zoeese? A Pɩyɛɛr yeelame: “Bɩ y sak n deeg y sũyã pʋsẽ tɩ Kiristã yaa Zu-soaba, la t’a yaa sõngo.” (1 Pɩy. 3:15) Woto baoodame tɩ d bʋgsd Kirist Zeezi sẽn yaa tõnd Zu-soab la d Rĩmã naamã la a pãngã sẽn ta zĩig ningã zugu. w23.09 27-28 s. a 6-8

D segd n kell n modgame n da wa lebg “tʋʋm nins sẽn pa womd biisã sẽn yaa lik tʋʋmã” yembs ye. (Efɛɛ. 5:11) Kibay n wilgd tɩ ned sã n get yoob yɛla, n kelgd gom-dẽgd wall a gomd goam a woto buudu, yɩta nana t’a tʋm tʋʋm-dẽgdo. (Sɩng. 3:6; Zak 1:14, 15) A Sʋɩtãan dũniyã nebã rat n belga tõnd tɩ d tẽ tɩ bũmb nins a Zeova sẽn yeel tɩ yaa rẽgdã pa wẽng ye. (2 Pɩy. 2:19) A Sʋɩtãan sɩng n maoodame n dat n kẽes nebã moogo, tɩ kɩt tɩ b pa le mi sẽn yaa sõma la wẽng n bak ye. (Eza. 5:20; 2 Kor. 4:4) Dẽnd pa lingr la filim-dãmb wʋsgo, bũmb wʋsg b sẽn wilgd teleẽ wã la ẽntɛrnetẽ wã sẽn pa zems ne a Zeova noyã sẽn yaa tɩrsã ye. A Sʋɩtãan ratame tɩ d tẽ tɩ tʋʋm-yoodã la tʋʋm-dẽgdã sẽn wae dũni-kãngã pʋgẽ wã pa wẽng ye.—Efɛɛ. 5:6. w24.03 22 s. a 8-10

Sɛk-roogã ra yaa fu-roogo, tɩ Israyɛll nebã sã n da na n yik n toeem zĩig bɩ b siig-a n tall n looge. B waooga Wẽnnaam sɛk-ro-kãng pʋgẽ n kaoos yʋʋm 500 n tãag b sẽn wa n me wẽnd-doog Zerizalɛmmã. (Yik. 25:8, 9; Sõd. 9:22) Yaa sɛk-roogã pʋgẽ la Israyɛll nebã ra tõe n kõ Wẽnnaam maand la b waoog-a. (Yik. 29:43-46) La sɛk-roogã ra makda bũmb sẽn yaa kãseng n yɩɩd rẽ. A ra yaa ‘saasẽ bũmb toor-toorã maasem.’ Makda a Zeova ro-kãsengã sẽn pa ninsaalb nus n me wã. Tẽn-tʋmd a Poll yeelame tɩ “fu-ro-kãng [bɩ sɛk-roogã] yaa bũmb nins sẽn be masã wã mamsgo.” (Ebre. 9:9) Dẽnd a sẽn wa n gʋlsd Ebre-rãmb sebrã tɩ wẽnd-doog ning sẽn pa ninsaalb nus n me wã zoe n beeme. Yɩɩ yʋʋmd 29 wã la b tilg-a. Yʋʋm-kãnga, a Zeezi reega lisgu, n lebg a Zeova maan-kʋʋdb kãsem sẽn ka to, wẽnd-doog ning sẽn pa ninsaalb nus n me wã pʋgẽ.—Ebre. 4:14; Tʋʋ. 10:37, 38. w23.10 25-26 s. a 6-7

Yɛlã sã n wa pa nana ne tõndo, d sã n dat n kell n tũ a Zeova ne sũ-noogo, d pa segd n yɩ dem-dem ye. D segd n sakd n toeemdame tɩ zemsd ne d yɛlã sẽn yaa to-to wã, ne neb a taabã tagsa wã, la b yam-yãkr toor-toorã. D sẽn tũud a Zeova wã, d pa rat n yɩ dem-dem ye. D ratame n yɩ sik-m-mens rãmb la nimbãan-zoɛtba. B boonda a Zeova tɩ “Pĩig kugri,” bala a yasa kãn-kãe n pa vigsdẽ ye. (Tõo. 32:4) La a pa dem-dem me ye. Dũniyã yɛlã sẽn toeemdã, a Zeova me toeemda bũmb kẽere, sẽn na yɩl t’a raabã tõog n pidsi. A Zeova naana ninsaal a meng wõnego, t’a tõe n tõog toogo, baa yɛlã sã n wa toeeme. A kõ-d-la sagls sẽn be Biiblã pʋgẽ sẽn tõe n sõng-d tɩ d bãng n yãk yam, d sẽn wa n be zu-loɛɛg ning fãa taoore. A Zeova mengã mak-sõngã la sagl nins a sẽn kõt tõndã wilgdame tɩ baa a sẽn yaa wa “Pĩig kugrã,” a pa dem-dem ye. w23.07 20 s. a 1-3

Biiblã pʋgẽ, a Zeova wilgame t’a yaa wa pag sẽn nong a kamba. (Eza. 66:12, 13) Mams-y n ges-y pag sẽn get a biig yell ne nonglem to-to. D sã n wa maood ne zu-loɛɛga, d tõe n teega a Zeova a nonglmã yĩnga. Baa d sã n wa maan bũmb sẽn pa sõma, a pa raagd-d n bas ye. (Yɩɩn. 103:8) Israyɛll nebã sãama a Zeova sũur naoor wʋsgo. La b sẽn wa n tek yam n kos sugrã, a wilg-b lame t’a ket n nong-b lame. A yeela Israyɛll buudã yaa: “Fo tara yõod mam nifẽ. Mam zẽka fo zug la m nong foom.” (Eza. 43:4, 5) Wẽnnaam nonglmã pa toeem ye. Baa d sã n wa maan yel-wẽn-kãsenga, d sã n tek yam n kos sugr n lebg n wa a Zeova nengẽ, d na n yãame t’a ket n nong-d lame. A pʋlmame t’a ‘na n kõ-d-la sugr wʋsgo.’ (Eza. 55:7) Biiblã yeelame tɩ rẽ poore, d paamda ‘yolsg sẽn yit a Zeova meng nengẽ.’—Tʋʋ. 3:19. w24.01 27 s. a 4-5

D sã n wa seg zu-loɛɛga, a Zeova tõe n sõng-d lame. Wala makre, d sã n wa na n kos d tʋʋmdã taoor soab sor n kẽng tigis-kãsenga, wall t’a boog d tʋʋmã sẽn na yɩl tɩ d tõogd n kẽnd tigissã n pa vaandẽ, yaa segb d sẽn paam n tõe n yã t’a Zeova bee ne-do. A tõe n sakame hal tɩ ling-du. Rẽ na n kɩtame tɩ d maneg n kɩs a Zeova sɩda. A Ɛsdras sika a meng n kos a Zeova sõngre. A sã n wa yã tɩ tʋʋmã rat n yɩɩga a pãng fãa, a sikda a meng n pʋʋs a Zeova n kos sõngre. (Ɛsd. 8:21-23; 9:3-5) A Ɛsdras sẽn da maand woto wã kɩtame tɩ neb nins sẽn da be ne-a wã teel-a la b tall a tẽebã buudu. (Ɛsd. 10:1-4) D sã n wa maand yɩɩr wʋsg d sẽn na n maan to-to n paam bũmb nins sẽn yaa tɩlɛ ne-dã wɛɛngẽ, wall d sẽn na n maan to-to n kogl d zakã rãmbã wɛɛngẽ, d segd n basa d yam n pʋʋs a Zeova. w23.11 18 s. 15-17

A Zeova pa yeel tɩ d sã n dat n ta a yam, d segd n maana bũmb ning a Abrahaam sẽn maanã takɩ ye. Sɩd me, bũmb toor-toor la d tõe n maane, n wilg ne d tʋʋmã tɩ d tara tẽebo. D tõe n deega neb nins sẽn nan wa tõnd tigingã pʋgẽ wã sãando, d tõe n sõnga d tẽed-n-taas nins sẽn dat sõngrã, la d maan d zakã rãmb neere. Woto fãa yaa bũmb sẽn tat Wẽnnaam yam, t’a na n ning barka. (Rom. 15:7; 1 Tɩm. 5:4, 8; 1 Zã 3:18) Sẽn yɩɩd fãa, tʋʋm-sõng sẽn wilgd tɩ d tara tẽebo, yaa d sẽn na n moond koɛɛgã ne yẽesem. (1 Tɩm. 4:16) Tõnd ned kam fãa tõe n wilga ne a tʋʋm-tʋmdɩ t’a kɩsa sɩd tɩ bũmb nins fãa a Zeova sẽn pʋlmã na n pidsame, la t’a noyã n yaa sõma n yɩɩda. D sã n maand woto, d tõe n basa d yam tɩ Wẽnnaam na n geelg-d-la wa nin-tɩrse, la a bool-d t’a zo-rãmba. w23.12 2 s. a 3; 6 s. 15

Rĩm a Davɩɩd sẽn wa n kolg kũumã, a yeela a Salomo rũndã daar vɛrse wã goamã. (1 Rĩm. 2:1, 3) Kiris-neb nins sẽn yaa rapã fãa segd n tũu sagl-kãngã rũndã-rũndã. Sẽn na yɩl n tõog n maan dẽ, b segd n tũu Wẽnnaam noyã la Biiblã saglsã b vɩɩmã nens fãa pʋgẽ. (Luk 2:52) Bõe yĩng tɩ tar yõod tɩ saam-biis nins sẽn yaa kom-bɩɩsã modg n wa lebg rap tẽeb sẽn bɩ? Rap nins sẽn yaa kiris-nebã tara tʋʋm sẽn tar yõod wʋsg b sẽn segd n tʋm zakã pʋgẽ la tigingã pʋgẽ. Yaa vẽeneg tɩ yãmb a saam-biis nins sẽn yaa kom-bɩɩsã mi n tagsda tʋʋm nins y sẽn tõe n wa tʋm beoog-daarã yelle. Tõe tɩ f yãka yam n na n wa kẽes f meng zãng a Zeova tʋʋmdã pʋgẽ, wall f lebg kãsem-sõngd bɩ kãsem-soab tigingã pʋgẽ. Tõe me tɩ f na n wa rat n kẽe kãadem la f rog kamba. (Efɛɛ. 6:4; 1 Tɩm. 3:1) Sẽn na yɩl n wa tõog n maan dẽ, yaa tɩlɛ tɩ f yɩ kiris-ned tẽeb sẽn bɩ. w23.12 24 s. a 1-2

A Zeova ninga a nin-buiidã a sẽn nong wʋsgã kãsem-dãmbã nugẽ, n dat tɩ b ges b yelle. Nin-kãensã sẽn yaa wẽn-zoɛtbã sũur nooma wʋsg a Zeova sẽn yãk-b tɩ b get b tẽed-n-taasã yellã, n tʋmd wʋsg n na n yɩ ‘rũm-kɩɩmb sẽn sɩd kɩɩmd-ba.’ (Zer. 23:4; 1 Pɩy. 5:2) D sẽn tar nin-kãensã tigingã pʋgẽ wã noom-d-la wʋsgo! Kãsem-dãmbã tõe n dɩka yam bʋ-kaood a Zedeyõ mak-sõngã pʋgẽ. (Ebre. 6:12) A ra kogenda Wẽnnaam nin-buiidã la a get b yelle. (Bʋ. 2:16; 1 Kib 17:6) B yãka kãsem-dãmbã tɩ b ges Wẽnnaam nin-buiidã yell toog wakate, wa a Zedeyõ. (Tʋʋ. 20:28; 2 Tɩm. 3:1) D tõe n dɩka yam a Zedeyõ sik-m-mengã la a sakrã pʋgẽ. Yɩɩ tɩlɛ t’a tõog toog n tʋm a tʋʋmdã. D yaa kãsem-soab tɩ d pa kãsem-soaba, d tõe n wilgame tɩ d sũur nooma ne kãsem-dãmbã. D tõe n teela nin-kãensã sẽn tʋmd wʋsg tigingã yĩngã.—Ebre. 13:17. w23.06 2 s. a 1; 3 s. a 3