Sig-noya

Wakat n zĩnd tɩ kom-kãseng zĩnd “dũniyã gill zugu.” Komã namsa pipi kiris-nebã me. Yaa vẽeneg tɩ zak sobend-dãmbã ra maanda yɩɩr ne b sẽn na n maan to-to n dɩlg b zakã rãmba. La kom-bɩɩs nins sẽn da magd n na n moon koɛɛgã sõma n paasã yẽ maana wãna? Tõe tɩ b ra sokda b mens b sã n pa segd n bas tɩ komã sa tɩ b yaool n maan dẽ! Sẽn yaa a soab fãa, b maaname tɩ zems ne yɛlã sẽn da yaa to-to wã. B ra moonda koɛɛgã, la b pʋɩt b sẽn tar bũmb ninsã ne b tẽed-n-taas nins sẽn be Zide wã ne sũ-noogo. (Tʋʋ. 11:29, 30) Neb nins sẽn paam sõngr wakat kãngã yãame tɩ yaa a Zeova n da sõngd-ba. (Mat. 6:31-33) Rẽ kɩtame tɩ b ra neẽ tɩ bãmb ne b tẽed-n-taas nins sẽn wa n sõng-bã zood paasame. Neb nins sẽn kõ b taabã ligdi, wall n sõng n tʋm tʋʋm kẽerã paama sũ-noog ning kũun sẽn wat ne wã.—Tʋʋ. 20:35. w23.04 16 s. 12-13

Wakat ninga, a Zeova tõe n leoka d pʋʋsgo, n kɩt tɩ neb sẽn pa tũud-a maan bũmb tɩ sõng-do. Wala makre, a kɩtame tɩ rĩm a Artazɛgzɛs kõ a Neemi sore, t’a leb Zerizalɛm n tɩ sõng tɩ b lebs n me tẽngã. (Nee. 2:3-6) Rũndã-rũndã me, a Zeova tõe n kɩtame tɩ neb sẽn pa tũud-a sõng-do, d sã n wa be raab pʋgẽ. Pa wakat fãa la a Zeova leokd d pʋʋsg tɩ yaa vẽeneg ye. La d saasẽ Ba wã sẽn leokd to-to wã kell n yaa bũmb ning d sẽn datã bal kɛpɩ sẽn na yɩl n kell n maan sɩd ne-a. Woto wã, bɩ y gũusd n get a Zeova sẽn leokd y pʋʋsg to-to. D mi n bao sẽk wakat-wakate, n tags n ges a Zeova sẽn leokd d pʋʋsg to-to. (Yɩɩn. 66:19, 20) Pa d sẽn na n pʋʋsd a Zeova wã bal n wilgd tɩ d tara tẽeb ye. D segdame me n sak a sẽn leokd d pʋʋsgã to-to wã, baa pa yɩ wa d sẽn da ratã.—Ebre. 11:6. w23.05 11 s. 13; 12 s. 15-16

D sẽn wa n dɩk d meng n kõ a Zeova wã, d pʋlem-a lame tɩ d na n waoogd-a-la wakat fãa la d maand a raabã. D segd n pidsa pʋlen-kãnga. Maan bũmb ning d sẽn pʋlem a Zeova wã yaa zɩɩbo, la pa zɩɩb sẽn yɩɩd d pãng ye. Bala a Zeova naana tõnd a raabã maaneg yĩnga. (Vẽn. 4:11) A naana tõnd tɩ d miẽ tɩ d segd n bao-a lame. A leb n naana tõnd a meng wõnego. Rẽ n so tɩ d tõe n bao a zoodo, la d paam sũ-noog a raabã maaneg pʋgẽ. Sẽn yɩɩd fãa, d sã n maand Wẽnnaam daabã la d tũud a Biigã, d na n ‘paama yolsgo.’ (Mat. 11:28-30) Woto wã, paasd-y y sẽn nong a Zeova to-to wã pãnga. Woto baoodame tɩ y bʋgsd bõn-sõma nins a sẽn maan n kõ-yã zugu, la bũmb nins a sẽn pʋlem t’a na n wa kõ-y lame wã me zugu. Y sẽn nong a Zeova to-to wã pãng sã n paasdẽ, na n yɩɩ nana tɩ y sak-a. (1 Zã 5:3) A Zeezi tõog n maana a Zeova raabã, bala a ra pʋʋsd-a lame n kot sõngre, la a tagsd keoorã yelle. (Ebre. 5:7; 12:2) Tõnd me tõe n maana wa a Zeezi, n pʋʋsd a Zeova n kot pãnga, la d kɩt tɩ d sẽn saagd n na n wa paam vɩɩm sẽn kõn sa wã yɩ vẽeneg d yamẽ. w23.08 27-28 s. a 4-5

Neb a taabã sã n maand sũ-mare, noom-d lame. Bõe yĩng tɩ yaa woto? D nanda neb nins sẽn tõe n gũ bũmb n pa yik b sũurã. D sã n tudg tɩ neb a taabã maan sũ-mar ne-do, noom-d lame. D sũur yaa noog me ne d Biibl karen-saambã, bala d sẽn wa n maood n na n wʋm Biiblã zãmsg ning võore, n sak n deeg wall d tũ wã, a maana sũ-mar ne-do. La sẽn yɩɩd fãa, d sũur yaa noog ne Wẽnnaam a Zeova sẽn maan sũ-mar ne-dã. Baa ne d sẽn nong neb a taabã sẽn maand sũ-marã, tõnd mengã tõe n getame tɩ pa wakat fãa la yaa nana tɩ d maan sũ-mar ye. Wala makre, y sã n tong n na n da bũmb tɩ nebã yaa wʋsg tɩ y yaool n yãgdẽ, tõe n yɩɩ toog tɩ y maan sũ-mare. Neb a taab sã n maan bũmb tɩ pa noom-do, tõe n yika d sũur wʋsgo. Wakat ninga, d tõe n getame tɩ yaa toog tɩ d gũ dũni-paalgã a Zeova sẽn pʋlmã. La yel-kãensã fãa wɛɛngẽ, d segd n bɩɩsa sũ-mar n paase. w23.08 20 s. a 1-2

A Zedeyõ saka a Zeova noorã, n kuils a tãb-biisã n kell bãmb b wãn bala. Tõe t’a soka a meng yaa: ‘Yaa tɩlɛ tɩ m maan woto bɩ? Na n yãka neng sɩda?’ Baasgo, a Zedeyõ sakame. Kãsem-dãmbã rɩkda a Zedeyõ togs-n-taar rũndã-rũndã, n sakd n toeemd yɛl kẽer tigingã pʋgẽ tɩ zemsd ne noy nins siglgã sẽn kõtã. (Ebre. 13:17) Baa ne tʋʋmdã sẽn da tõe n tũ ne a Zedeyõ yõor t’a ra yɛɛsdẽ wã, a kell n saka a Zeova. (Bʋ. 9:17) A Zeova sẽn keng a Zedeyõ raoodã poore, a kɩsa sɩd t’a na n sõng-a lame t’a kogl a nin-buiidã. Kãsem-dãmb nins sẽn be zĩis b sẽn gɩdg d tũudmã rɩkda a Zedeyõ togs-n-taare. B ket n lʋɩta taoor tigissã sasa la koɛɛgã mooneg sasa ne raoodo, baa ne b sẽn mi tɩ b tõe n yõk-b lame n kẽes bãens roogo, n fees-ba, n dig-b tʋʋma, wall n pãb-bã. To-kãsengã sasa, na n yɩɩ tɩlɛ tɩ kãsem-dãmbã tall raood n tũ noy nins b sẽn na n kõ-bã, baa sã n tõe n tũu ne b yõore. w23.06 5-6 s. 12-13

A Zeova kɩtame tɩ b gʋls bõn-sõma nins maan-kʋʋdb kãsem a Zehoyada sẽn maanã tõnd zãmsg yĩnga. (Rom. 15:4) Sẽn paase, a Zehoyada sẽn wa n ki wã, b waoog-a-la wʋsgo. “B mum-a-la a Davɩɩd tẽngẽ wã ne rĩm-dãmbã. Bala yẽ maana neer Israyɛlle, Wẽnnaam la a roogã wɛɛngẽ.” (2 Kib 24:15, 16) A Zehoyada kibarã tõe n sõnga tõnd fãa tɩ d maneg n zoe Wẽnnaam. Kãsem-dãmbã tõe n dɩka a Zehoyada togs-n-taare, b sẽn na n yaa gũusdba, la b kogend Wẽnnaam piisã ne b sũy fãa. (Tʋʋ. 20:28) A Zehoyada kibarã sõngda sẽn kʋʋl-bã tɩ b bãng tɩ b sã n zoet a Zeova la b maand sɩd ne-a, a tõe n tũnuga ne-b n pids a raabã. Kom-bɩɩsã tõe n dɩka yam a Zeova sẽn keo a Zehoyada to-to wã pʋgẽ. B tõe n dɩka a Zeova togs-n-taare, n waoogd neb nins sẽn ket n maand sɩd ne Wẽnnaamã, sẽn yɩɩd fãa, sẽn sɩng-b n tũud Wẽnnaam hal yʋʋm sẽn kaoosã. (Yel. 16:31) Bɩ d kell n teel “sẽn lʋɩt-b taoorã” ne d sũy fãa, n sakd-ba.—Ebre. 13:17. w23.06 17 s. 14-15

Tigissã sasa, tags-y neere, n bãng wakat ning y sẽn na n zẽk y nug n leoke. Y sã n wɩngd n zẽkd y nugã, tõe n yɩɩ wa y sẽn modgd sẽn lʋɩt-a taoorã t’a yãk yãmba, baa ne neb a taabã sẽn nan pa paam n leokã. Tõe n komsa neb a taabã raoodo, tɩ b pa le rat n zẽk b nugã ye. (Koɛ. 3:7) Neb wʋsg sã n zẽkd b nugã sõsg sasa, d tõeeme n pa paam n leok wʋsg wa d sẽn datã ye. Wakat ning menga, sẽn lʋɩt-a taoorã tõeeme n pa paam n yãk-d ye. Tõe n sãama d sũuri, la d pa segd n tags t’a sẽn pa yãk tõndã yaa pʋ-toog ye. (Koɛ. 7:9) Y sã n pa tõe n paam n leok naoor wʋsg wa y sẽn datã, y tõe n maaga y yĩng n kelg neb a taabã leoore, tɩ tigsgã poor bɩ y pẽg-ba. Y sẽn na n pẽg y tẽed-n-taasã na n kenga b raoodo, wa y sẽn da na n leok tigsgã sasa wã. w23.04 23-24 s. 14-16

Zãmsd-y Wẽnnaam Gomdã la y bʋgsd a zugu. Tɩɩg yẽg sã n sũd tẽngã sõma, a tara pãnga. Woto me, tõnd tẽebã sã n yẽbg Wẽnnaam Gomdã zug sõma, d na n tõog n yalsa kãn-kãe. Tɩɩg sã n bɩtẽ a yẽgã sũt n paasdame, la b yɛdgdẽ. D sã n karemd Biiblã la d bʋgsd a zugu, paasda d tẽebã pãnga, la kɩtdẽ tɩ d maneg n kɩs sɩd tɩ Wẽnnaam noyã la sõma n yɩɩda. (Kolo. 2:6, 7) Tags-y n ges-y-yã a Zeova noyã, a saglsã la a koglgã sẽn naf neb nins sẽn tũ-a pĩnd wẽndẽ wã to-to. Wala makre, Wẽnnaam sẽn wa n vẽneg a Ezekɩyɛll t’a yã wẽnd-doogã, a maaga a yĩng n ges malɛkã sẽn magd wẽnd-doogã to-to wã. Vẽnegrã a Ezekɩyɛll sẽn yã wã kenga a raoodo, la sõngd tõnd tɩ d bãng d sẽn tõe n tũ noy nins a Zeova sẽn gãneg tũudum hakɩɩkã wɛɛngẽ wã to-to. (Eze. 40:1-4; 43:10-12) Tõnd me sã n bao sẽk n zãms Wẽnnaam Gomdã yel-zulumsã la d tags b zugu, na n naf-d lame. D sũurã na n keemame tɩ d kɩs a Zeova sɩd zãng-zãnga.—Yɩɩn. 112:7. w23.07 18 s. 15-16

Biiblã gomda neb wʋsg sẽn kõ mak-sõng yelle, tɩ kom-bɩɩsã tõe n dɩk b togs-n-taare. Nin-kãens sẽn vɩɩmd pĩnd wẽndẽ wã ra nonga Wẽnnaam la b tʋm tʋʋm toor-toor n ges a nin-buiidã yelle. F leb n tõe n yãa rap sẽn kõt mak-sõng yãmb zakã pʋgẽ la tigingã pʋgẽ. (Ebre. 13:7) Sẽn paase, a Zeezi Kirist kõo mak-sõng sẽn ka to. (1 Pɩy. 2:21) F sã n wa zãmsd nin-kãens kibayã bɩ f tags b zʋg-sõma wã yelle. (Ebre. 12:1, 2) Rẽ poor bɩ f ges f sẽn tõe n dɩk b togs-n-taar to-to. Ned sẽn tagsd sõma pa yɩt tao-tao n maan bũmb ye. A maagda a yĩng n bao n wʋm yell vɩʋʋg n yaool n yãk yam. Woto wã, bɩ f modg n wa tagsd neer wakat fãa. Pipi, bao n bãng Biiblã saglsã, la f tags bũmb nins sẽn wilgd tɩ Biiblã saglsã yaa f neer yĩngã zugu. Rẽ poor bɩ f tikd bũmb nins f sẽn bãngã zugu, n yãkd yam sẽn noom a Zeova. (Yɩɩn. 119:9) Woto na n sõng-f lame tɩ f wa lebg rao tẽeb sẽn bɩ.—Yel. 2:11, 12; Ebre. 5:14. w23.12 24-25 s. a 4-5

Roagdbã tõe n sõnga b kambã tɩ b bãng b sẽn na n leok ne bʋgsem to-to, ned sã n wa sok-b sokr bũmb ning b sẽn tẽedã zugu. (Zak 3:13) Roagdb kẽer maanda mak-n-wilg b zak pʋgẽ Biibl zãmsgã sasa. B baood n bãnga sogsg nins b sẽn tõe n sok b kambã lekollẽ wã, n sõs rẽ zugu, n maan mak-n-wilgi, la b wilg b kambã b sẽn tõe n leok ne bʋgsem to-to. Y sã n wae n maand mak-n-wilgi, tõe n sõnga y kambã tɩ b kɩs sɩd ne b sẽn tẽed bũmb ninsã, la b bãng b sẽn na n wilg neb a taabã bõn-kãens to-to. Fiches de réflexion pour ados n be jw.org zĩig ning b sẽn gʋls tɩ “Sogsg kom-bɩɩsã sẽn sokde.” B maana bõn-kãens sẽn na yɩl n sõng kom-bɩɩsã tɩ b kɩs sɩd ne b sẽn tẽed bũmb ninsã, la sẽn na n sõng-b tɩ b segl b mens n leok sogsg ne b meng goama. Tõnd ne d zakã rãmb sã n naag taab n zãms bõn-kãense, tõe n sõnga d fãa tɩ d bãngd n gomd n teend d sẽn tẽed bũmb ninsã ne bʋgsem. w23.09 17 s. 10; 18 s. 15-16

Yãmb zoe n yãka bũmb y sẽn dat n wa maan a Zeova tũudmã yĩnga, tɩ yaa toog tɩ y pids rẽ bɩ? Sã n yaa woto, bãng-y tɩ y pa y yembr ye. Wala makre, saam-biig a ye yʋʋr sẽn boond t’a Filip yãka yam n na n paasd a pʋʋsgã sõmblem, la a pʋʋsd wakat fãa. La ra yaa toog ne-a t’a paamd sẽk n pʋʋsdẽ. A Erika ra yãka yam n na n kẽnd koɛɛgã mooneg tigissã, tɩ nan pa sɩng ye. Baasgo, koɛɛgã mooneg tigsg fãa la bal wakate, a tatame n mik tɩ zoe n sɩngame. Y sã n yãka bũmb n na n maan a Zeova tũudmã pʋgẽ, n ket n nan pa tõoge, bɩ y ra tags tɩ y ka võor ye. Baa yaa bũmb bilf la y yãk yam n na n maane, baooda sẽk la modgr wʋsgo. Y sẽn modgd n na n pids bũmb ning y sẽn yãk n na n maanã, wilgdame tɩ y sũur nooma ne y sẽn paam n yaa a Zeova zoa wã, la tɩ y tʋll n tũ-a-la wa y sẽn tõe tɛka. A Zeova sũur nooma ne y modgrã. Sɩd me, a pa baood tɩ y maan sẽn yɩɩd y pãng ye. (Yɩɩn. 103:14; Mis. 6:8) Dẽnd y segd n yãka yam n na n maan bũmb sẽn pa yɩɩd y pãnga, n zems ne y yɛlã sẽn yaa to-to wã. w23.05 26 s. a 1-2

Rabeem tõe n yõka ned sẽn tar daoodo, la a pa basd tɩ rẽ kɩt t’a pa maan sẽn yaa tɩrg ye. A Dãniyɛll ra yaa bi-bɩɩg sẽn tar daood wʋsgo. A zãmsa Wẽnnaam no-rɛɛsdbã sẽn gʋls bũmb ninsã, wala makre, no-rɛɛs a Zeremi sɛbã. Rẽ kɩtame t’a Dãniyɛll bãng tɩ Zʋɩf-rãmbã sẽn be Babilonnã yembdã ra na n saa ka la bilfu. (Dãn. 9:2) A Dãniyɛll sẽn yã Biiblã bãngr-gomdã sẽn pidsã kɩtame t’a maneg n kɩs a Zeova sɩda. Neb nins sẽn kɩs Wẽnnaam sɩdã tõe n talla raoodo. (Ges-y Rom dãmb 8:32, 37-39.) Sẽn tar yõod n yɩɩda, a Dãniyɛll ra wae n pʋʋsda a saasẽ Ba wã. (Dãn. 6:10) A vẽnega a yel-wẽnã n togs a Zeova, la a togs-a bũmb ning sẽn be a sũurẽ wã. A Dãniyɛll kosa sõngre. (Dãn. 9:4, 5, 19) A Dãniyɛll sẽn da yaa ninsaal wa tõndã, a pa rog ne raood ye. Yaa a sẽn da zãmsd Wẽnnaam Gomdã, n pʋʋsdẽ, la a kɩs a Zeova sɩdã n sõng-a t’a bɩɩs zʋg-sõng-kãngã. w23.08 3 s. a 4; 4 s. a 7

D sã n sakd nanambsã, nafda tõnd la neb a taabã. Wãn to? Bũmb a ye yaa tɩ d na n põsa sɩbgr ning kɩɩsdbã sẽn paamdã. (Rom. 13:1, 4) D sakrã tõe n kɩtame tɩ nanambsã pẽg a Zeova Kaset rãmbã. Wala makre, yʋʋm wʋsg sẽn looge, sodaas n da gẽesd tẽn-dãmbdb sẽn pa rat n yao lampo-rãmba, n tɩ kẽ Nizeriya Rĩung roog a ye pʋgẽ tigsg wakate. Sodaag ning sẽn da lʋɩ taoorã yeela sodaas a taabã tɩ b yi, la a paas yaa: “A Zeova Kaset rãmbã yaooda b lampo-rãmbã wakat fãa.” Y sã n sakd nanambsã noyã, na n kɩtame t’a Zeova Kaset rãmbã kell n tall yʋ-noogo, tɩ rẽ tõe n kogl d tẽed-n-taasã daar ninga. w23.10 9 s. 13

A Zeova Kaset rãmb kẽer sɩng n gũuda dũni-kãngã saabã hal daar zãra. Sã n yaa ne ninsaalbã, yaa wa a Zeova sẽn pʋlem bũmb ninsã kaoosda pidsgu. A Zeova miime tɩ pa nana ne a nin-buiidã ye. Rẽ n so t’a yeel no-rɛɛs a Habakuk yaa: “Fo sẽn na n yã bũmb ningã na n pidsa a wakate. A pidsgã wakat wata tao-tao. A pa na n vaal ye. Baa a sã n kaoosdame, bɩ f kell n gũ-a. Bala a na n pidsame n pa vaal ye. A na n pidsa a wakatã bal kɛpɩ.” (Hab. 2:3) Wẽnnaam sẽn yeel woto wã yaa sẽn na n keng a Habakuk a ye bal raood bɩ, bɩ a sẽn yeel bũmb ningã tõe n nafa tõnd me rũndã-rũndã? Wẽnnaam vẽnega tẽn-tʋmd a Poll t’a togs kiris-neb nins sẽn da gũud dũni-paalgã goam a woto buudu. (Ebre. 10:37) Baa sã n wõnda Wẽnnaam sẽn pʋlem t’a na n fãag-d lame wã kaoosda pidsgu, d kɩsa sɩd tɩ “na n pidsame n pa vaal ye. A na n pidsa a wakatã bal kɛpɩ.” w23.04 30 s. 16

Zu-bʋko, baa ne Israyɛll nebã sẽn da ne kasetã vẽenegã, wʋsg pa sak n deeg t’a Moyiiz ra gomda a Zeova yʋʋr yĩng ye. (Sõdb 14:10, 11) B zãgsa naoor wʋsg tɩ b kõn sak n deeg t’a Zeova tũnugda ne a Moyiiz n wilgd-b sor ye. Rẽ kɩtame t’a Zeova pa bas tɩ b kẽ kãabg tẽngẽ wã ye. (Sõd. 14:30) La Israyɛll neb kẽer n sak n tũ sorã a Zeova sẽn da wilgd-bã. Wala makre a Zeova yeelame yaa: “A Kalɛɛb . . . kell n tũu maam ne a sũur fãa.” (Sõdb 14:24) Wẽnnaam keoo a Kalɛɛbe, hal n kɩt t’a yãk zĩig ning a sẽn dat Kanaã soolmẽ wã. (Zoz. 14:12-14) Israyɛll neb nins sẽn paam n kẽ kãabg tẽngẽ wã me sak n tũu sor ning a Zeova sẽn da wilgd-bã tɩ yaa mak-sõngo. A Zozuwe sẽn wa n ledg a Moyiiz n lʋɩ Israyɛll nin-buiidã taoorã, “b waoog-a-la neer a yõor tɛka.” (Zoz. 4:14) Yaa rẽ yĩng la a Zeova sẽn ning-b barka, n kɩt tɩ b kẽ soolem ning a sẽn da pʋlem-bã pʋgẽ wã.—Zoz. 21:43, 44. w24.02 21 s. a 6-7

D tõe n gesa d sẽn nong d taabã to-to wã n bãng d sã n sɩd nonga Wẽnnaam, wa logtor sẽn tõe n ges d zɩɩmã sẽn kẽnd to-to wã n bãng bũmb kẽer d sũurã wɛɛngẽ wã. D sã n yã tɩ d sẽn nong d tẽed-n-taasã to-to wã booga bilfu, tõe n wilgame tɩ d sẽn nong Wẽnnaam to-to wã me boogdame. La d sã n wilgd wakat fãa tɩ d nonga d tẽed-n-taasã, wilgdame tɩ d sẽn nong Wẽnnaam to-to wã tara pãnga. D sẽn nong d tẽed-n-taasã to-to wã sã n boogdẽ, yaa yell meng-menga. Bõe yĩnga? Tõe n dat n yeelame tɩ tõnd ne a Zeova zoodã pãng boogame. Tẽn-tʋmd a Zã wilga rẽ vẽeneg n yeel yaa: “Ned ning sẽn pa nong a saam-biig a sẽn ne wã pa tõe n nong Wẽnnaam a sẽn pa ne wã ye.” (1 Zã 4:20) Rẽ wilgda tõnd bõe? Wilgdame tɩ yaa d sã n “nong taab” bal la d tat a Zeova yam.—1 Zã 4:7-9, 11. w23.11 8 s. a 3; 9 s. a 5-6

Rĩm a Zowas sẽn wa n ket n yaa bi-bilfã, a yãka yam sẽn yɩ sõma. A sẽn da pa tar ba wã, a ra tũuda sagls nins maan-kʋʋdb kãsem a Zehoyada sẽn maand sɩdã sẽn da kõt-a wã. Maan-kʋʋdã wuba a Zowas wa a bi-roaka. Rẽ kɩtame t’a Zowas yãk yam n tũ a Zeova, la a sõng nebã tɩ b maan dẽ. A kɩtame meng tɩ b lebs n maneg a Zeova roogã. (2 Kib 24:1, 2, 4, 13, 14) Yãmb roagdbã wall ned a to sã n zãmsd-y sẽn na yɩl tɩ y nong a Zeova la y tũud a noyã, b kõt-y-la kũun sẽn tar yõod wʋsgo. (Yel. 2:1, 10-12) Yãmb roagdbã tõe n tũnuga ne bũmb toor-toor n zãms-yã. Yãmb sã n tũud Biiblã saglsã b sẽn kõt yãmbã, na n yɩɩ y roagdbã noogo. Sẽn yɩɩd fãa Wẽnnaam sũur na n yɩɩ noogo, tɩ y zoodã me pãng paase. (Yel. 22:6; 23:15, 24) Woto pa kɩt tɩ y rat n dɩk a Zowas sẽn wa n yaa bilfã togs-n-taar sɩda? w23.09 8-9 s. a 3-5

A Zeova pʋlmame t’a na n kelga d pʋʋsgã. Tõnd Wẽnnaamã nonga tõnd d sẽn maand sɩd ne-a wã yĩnga. Rẽ n so t’a kelgd d pʋʋsgã wakat fãa. (Yɩɩn. 10:17; 37:28) La woto pa rat n yeel t’a na n kõ-d-la bũmb ning fãa d sẽn kos ye. Tõe tɩ na n yɩɩ tɩlɛ tɩ d gũ dũni-paalgã, n yaool n paam bũmb kẽer d sẽn kote. A Zeova geta d sẽn kot bũmb ninsã sã n zemsa ne a raabã. (Eza. 55:8, 9) Bũmb a ye a sẽn dat yaa dũniyã sẽn na n pid ne neb sẽn sakd a naamã ne sũ-noogo. La a Sʋɩtãan yeelame tɩ ninsaalbã sã n so b mens la sõma n yɩɩda. (Sɩng. 3:1-5) Sẽn na yɩl n wilg t’a Sʋɩtãan sẽn yeelã yaa ziri, a Zeova basame tɩ ninsaalb rɩt naam b taab zutu. Yaool n yaa ninsaalbã naamã n wat ne zu-loees nins d sẽn maood ne rũndã-rũndã wã wʋsgo. (Koɛ. 8:9) D miime t’a Zeova pa na n welg zu-loe-kãens fãa mas-masã ye. w23.11 21 s. a 4-5

A Zeova ra pʋlmame tɩ “buud wʋsg” na n paama bark a Abrahaam maasem yĩnga. La a Abrahaam wa n kolga yʋʋm koabga, t’a Saara kolg yʋʋm pis-wɛ tɩ biig ning Wẽnnaam sẽn pʋlmã ket n nan pa rog ye. Ninsaal nifẽ, a Abrahaam ne a Saara ra pa le tõe n paam biig ye. Ra pa nana ne a Abrahaam ye. Baasgo, “a ra kɩsa sɩd t’a na n yɩɩ buud wʋsg ba, baa sẽn da wõnd rẽ pa tõe wã.” (Rom. 4:18, 19) A sẽn da saagd bũmb ningã wa n pidsame. A wa n doga a Izaake, biig ning a sẽn da sɩng n gũud ne a sũur fãa wã. (Rom. 4:20-22) Tõnd me tõe n taa Wẽnnaam yam, n paam t’a geelg-d wa nin-tɩrse, la a bool-d t’a zo-rãmb wa a Abrahaam. Sɩd me, a Poll goma rẽ yell n yeel yaa: “Goam nins sẽn yeel tɩ ‘b geelga a [Abrahaam] tẽebã wa tɩrlem yẽ yĩngã’ pa gʋls yẽ yĩng bal ye. La yaa tõnd yĩng me. Wẽnnaam na n geelga tõnd tẽebã wa tɩrlem, d sẽn tẽed a sẽn vʋʋg tõnd Zu-soab a Zeezi n yiis kũ-rãmb sʋkã yĩnga.” (Rom. 4:23, 24) D segd n dɩka a Abrahaam togs-n-taar n tall tẽebo, n tʋm tɩ zems ne bũmb nins d sẽn tẽedã, la d kɩs sɩd t’a Zeova sẽn pʋlem bũmb ninsã na n pidsame. w23.12 7 s. 16-17

Y sã n wa maood ne zu-loɛɛg sẽn kɩt tɩ y maand rabeem, bɩ y tẽeg t’a Zeova mii y zu-loɛɛgã, la rẽ sẽn namsd yãmb to-to. Wala makre, pa b sẽn da namsd Israyɛll nebã Ezɩpt soolmẽ wã bal la a Zeova ra ne ye. A ra “mii toog ning b sẽn paamdã” me. (Yik. 3:7) La y sã n wa maood ne zu-loɛɛg sẽn kẽesd rabeem, y tõe n maanda sãmbs a Zeova sã n teend-y lame. Sã n wa yaa woto, bɩ y kos-a t’a sõng-y tɩ y yã a sẽn teend-y to-to. (2 Rĩm. 6:15-17) Rẽ poor bɩ y sok y meng yaa: ‘M pa kelg sõsg wall leoor tigsg sasa tɩ keng m raood sɩda? M pa karem sebre, n ges video wall m kelg yɩɩn-noog tɩ keng m raood sɩda? Ned pa togs maam gomd wall vɛrse tɩ yɩ-m noog sɩda?’ D tõe n yĩma d tẽed-n-taasã nonglmã, Biiblã la siglgã sẽn yiisd bũmb ninsã sẽn sõngd tõnd to-to wã nana-nana. La b yaa kũun sẽn yit a Zeova nengẽ. (Eza. 65:13; Mark 10:29, 30) B yaa kaset t’a Zeova geta y yelle. (Eza. 49:14-16) B leb n yaa kaset tɩ zemsame tɩ y kɩs-a sɩda. w24.01 4-5 s. a 9-10

Bilf nand t’a Zeezi leb saasẽ, a tẽega a karen-biisã tɩ b segd n moona koɛɛgã n gom yẽ yell “Zerizalɛm ne Zide soolmã fãa pʋgẽ la Samari, la hal n tãag dũniyã zĩig ning sẽn zãr n yɩɩdã.” (Tʋʋ. 1:8; Luk 24:46-48) Rẽ poor bilfu, Zʋɩf-rãmbã taoor dãmb yõka tẽn-tʋmdb a Pɩyɛɛr ne a Zã, n tall-b n kẽng Sãnedrẽ wã taoore. B yeela nin-kãensã sẽn maand sɩd ne Wẽnnaamã tɩ b bas koɛɛgã moonego, la b sõog-b nug menga. (Tʋʋ. 4:18, 21) A Pɩyɛɛr ne a Zã leok-b lame n yeel yaa: “Bɩ yãmb mens tags n ges sã n sakda Wẽnnaam nifẽ tɩ tõnd kelg yãmb n bas Wẽnnaam. La sã n yaa ne tõndo, tõnd pa tõe n bas n pa gom bũmb nins tõnd sẽn yã la d wʋmã yell ye.” (Tʋʋ. 4:19, 20) B sẽn wa n bas a Pɩyɛɛr ne a Zã wã, karen-biisã zẽka b koees n pʋʋs a Zeova, a raabã maaneg wɛɛngẽ. A Zeova leoka b sẽn pelg b pʋg n pʋʋs-a wã.—Tʋʋ. 4:31. w23.05 5 s. 11-12

A Zeova ne a Bi-nongrã zĩnda ne taab yʋʋm kõn bãng n sõde, tɩ b sẽn nong taab to-to wã pa tõe n bãng n bilg ye. B zoodã kaoos n yɩɩda zood buudã fãa. Rũndã daar vɛrse wã pʋgẽ, a Zeova wilga vẽeneg t’a nonga a Zeezi. A Zeova ra tõe n yeelame bal yaa: ‘Ad sẽn ta-a mam yamã.’ La a sẽn dat tɩ d bãng a sẽn nong a Zeezi to-to wã, a yeelame yaa: “Yãoã yaa mam Bi-ribla, mam sẽn nong a soabã.” A Zeova sũur da nooma ne a Zeezi, sẽn yɩɩd fãa, a sẽn sak n na n kõ a vɩɩmã yĩnga. (Efɛɛ. 1:7) A Zeezi ra kɩsa sɩd t’a Ba wã nong-a lame. A ra nee rẽ vẽenega. A yeela naoor wʋsg ne bas-m-yam t’a Ba wã nonga yẽ.—Zã 3:35; 10:17; 17:24. w24.01 28 s. a 8

Mams-y n ges-y ned y sẽn nong sẽn na n yeel bũmb sẽn pa sɩd y zugu. Yãmb miime tɩ yaa ziri. La neb kẽer n tẽeda. Sẽn yaa wẽng n yɩɩda, b yelgda zirẽ-kãng tɩ neb wʋsg tẽeda. Y tagsg na n yɩɩ wãna? Yaa vẽeneg tɩ y sũur na n sãama wʋsgo. Bɩ boe? Mak-kãngã tõe n sõng-d lame tɩ d bãng a Zeova tagsg sẽn yɩ a soab b sẽn wa n sãam a yʋʋrã. A Zeova malɛk a ye n gom ne d yaab a Awa, n dõd a Zeova. A Awa tẽe zirẽ-beedã. Rẽ kɩtame tɩ d yaab a Ãdem ne a Awa kɩɩs a Zeova. Rẽ n so tɩ ninsaalbã fãa lebg yel-wẽn-maandb la kiidba. (Sɩng. 3:1-6; Rom. 5:12) Yaa zirẽ-beed ning a Sʋɩtãan sẽn yelga n wa ne zu-loees nins fãa d sẽn ne rũndã-rũndã wã. Wala makre kũumã, zabã la namsgã. La rẽ yĩnga, a Zeova sũur sãamda ne b sẽn kãnd-a woto wã, la zu-loees nins rẽ sẽn wat ne wã bɩ? Yaa vẽenega. Baasgo, a Zeova pa lebg sũ-kẽk soab ye. Sɩd me, a ket n yaa “Wẽnnaam sẽn yaa sũ-noog soaba.”—1 Tɩm. 1:11. w24.02 8 s. a 1-2

Wãn to la y tõe n dɩk a Zozɛf togs-n-taar n kell maan sɩd ne Wẽnnaam? Y tõe n zoe n yãka y sẽn na n maan to-to makr taoore. Yɩt-y tao-tao n zãagd y meng ne bũmb ning fãa a Zeova sẽn kisi, la y ra tol n tags b yell ye. (Yɩɩn. 97:10; 119:165) Woto makr taoore, y pa na n maan yel-wẽnd ye. Tõe tɩ y kɩsa sɩd t’a Zeova Kaset rãmbã tũudmã la sɩda, la tɩ y rat n tũu a Zeova ne y sũur fãa. Baa ne rẽ, y ket n maanda sãmbs n pa rat n dɩk y meng n kõ a Zeova n deeg lisg ye. Sã n yaa rẽ, y tõe n dɩka rĩm a Davɩɩd togs-n-taare. Y tõe n pʋʋsa a Zeova n yeel yaa: “Mam Wẽnnaam, fees-y maam neer n bãng mam sũurã. Fees-y maam n bãng mam tagsa nins sẽn wat ne yɩɩrã. Ges-y bõn-wẽng sã n pa be mam pʋgẽ, la y wilg-m sor wakat sẽn kõn sa wã sor zugu.” (Yɩɩn. 139:23, 24) A Zeova ningda neb nins sẽn “baood-a ne b sũy fãa wã” barka. Yãmb sẽn modgd n na n wa rɩk y meng n kõ-a n deeg lisgã wilgdame tɩ y baood-a lame.—Ebre. 11:6. w24.03 6 s. 13-15

Maan-kʋʋdb kãsmã ra gomda nin-buiidã yʋʋr yĩng Wẽnnaam taoore. Israyɛll nebã pipi maan-kʋʋdb kãsem yɩɩ a Aarõ. Yaa a Zeova n yãk-a sɛk-roogã pakr daare. La tẽn-tʋmd a Poll goma rẽ yell n yeel yaa: “Yaa tɩlɛ tɩ neb wʋsg lebgd maan-kʋʋdb n pʋgend taaba, kũumã sẽn da kɩt tɩ b pa tõe n kell n yɩ maan-kʋʋdbã yĩnga.” (Ebre. 7:23-26) Maan-kʋʋdb kãsem-dãmbã sẽn da pa zems zãngã yĩnga, b ra segd n kõo maand b mens yel-wẽnã yĩnga. Woto kɩtame tɩ Israyɛll maan-kʋʋdbã ra ya toor fasɩ ne a Zeezi sẽn yaa maan-kʋʋdb kãsem sẽn ka to wã. A Zeezi Kirist sẽn yaa d maan-kʋʋdb kãsmã yaa “fũ-roog sɩd-sɩdã tʋm-tʋmda, fu-roog ning a Zeova sẽn tilgi, la sẽn pa ninsaal n tilgã.” (Ebre. 8:1, 2) A Poll yeelame “t’a Zeezi sẽn vɩ wakat fãa wã yĩnga, ned pa na n ledg-a n yɩ maan-kʋʋd ye.” A Poll paasame t’a Zeezi “pa tar rẽoko,” t’a “welga toor ne yel-wẽn-maandbã,” la t’a pa wa Israyɛll maan-kʋʋdb kãsem-dãmbã “sẽn segd n kõt maand daar fãa, b mens yel-wẽn yĩngã” ye. w23.10 26 s. a 8-9

“Pĩnd saasã” makda ninsaalbã goosneema-rãmbã sẽn be a Sʋɩtãan ne a zĩn-dãmbã nugẽ wã. (Mat. 4:8, 9; 1 Zã 5:19) Biiblã pʋgẽ b sã n gomd “tẽng” yelle, tõe n makda dũniyã nebã. (Sɩng. 11:1; Yɩɩn. 96:1) Dẽnd “pĩnd tẽngã” makda rũndã-rũndã dũniyã neb sẽn yaa nin-wẽnsã. A Zeova pa na n maneg “saasã” la “tẽngã” sẽn be rũndã-rũndã wã ye. A na n toeem-b-la zãng fasɩ. A na n ledg-b-la ne “sa-paalg la tẽn-paalga,” rat n yeel tɩ goosneema-paall n na n dɩ naam nin-tɩrs zutu. A Zeova na n kɩtame tɩ tẽngã la ninsaalbã zems zãnga, n lebg wa paalse. A Zeova na n kɩtame tɩ tẽngã gill lebg neer wa Edɛn zẽedã sẽn da yaa to-to wã, wa a Ezayi sẽn da pĩnd n togsã. A na n kɩtame tɩ tõnd me lebg paalse, rat n yeel t’a na n sãooga d bãasã fãa. Põya, zoens la wʋms na n paama laafɩ. Baa kũum meng na n vʋʋgame.—Eza. 25:8; 35:1-7. w23.11 4 s. a 9-10

“To-kãsengã” na n sɩnga zĩig pʋgẽ. (Mat. 24:21) La to-kãsengã na n yɩɩ toor ne sabab-wẽns a taabã, bala tõnd miime t’a watame. Na maan yʋʋm tus a yiib rũndã, a Zeezi sagla a karen-biisã tɩ b segl b mens n gũ ra-kãnga. D sã n segl d mense, na n yɩɩ nana tɩ d tõog n põs wakat kãng sẽn yaa toog sasa wã, la d sõng neb a taab me tɩ b põse. (Luk 21:36) Na n yɩɩ tɩlɛ tɩ d tõog toog n sak a Zeova, n kɩs sɩd t’a na n kogl-d lame. D saam-biis sã n bõn b teed kẽer wall b teedã fãa, d na n maana wãna? (Hab. 3:17, 18) Na n yɩɩ tɩlɛ tɩ d tall nimbãan-zoeere, n sõng-ba. Buud toɛy-toɛyã sẽn lagem taabã sã n wa yik n zabd ne tõndo, tɩ yaa tɩlɛ tɩ tõnd ne d tẽed-n-taasã naag taab zĩ-yɛng n kaoos bilfu, d manesem na n yɩɩ wãna? (Eze. 38:10-12) Na n yɩɩ tɩlɛ tɩ d tall nonglem sẽn tar pãnga, tɩ sõng-d tɩ d tõog toog wakat kãng sẽn na n yɩ toog wakatã. w23.07 2 s. a 2-3

Sẽn kẽ-b kãadmã tõe n dɩka a Akila ne a Pirsill togs-n-taare. Pĩnd wẽndẽ kiris-neb wʋsg ra nong-b lame. (Rom. 16:3, 4) B ra naagda taab n tʋmdẽ, n moond koɛɛgã, la b sõngd neb a taaba. (Tʋʋ. 18:2, 3, 24-26) Sɩd me Biiblã pʋgẽ, b pa pʋt a Akila yʋʋr n pa pʋd a Pirsill yʋʋr ye. Wãn to la sẽn kẽ-b kãadmã tõe n dɩk b togs-n-taare? Tags-y bũmb nins yãmb ned kam fãa sẽn tog n maanã yelle. Y tõe n naaga taab n maand bõn-kãens kẽer bɩ? Wala makre, a Akila ne a Pirsill ra naagda taab n moond koɛɛgã. Yãmb me wae n naagda taab n moond koɛɛgã bɩ? A Akila ne a Pirsill ra naagda taab n tʋmdẽ me. Tõe tɩ yãmb ne y pagã wall y sɩdã pa tʋmd tʋʋm-yɛng ye. La y tõe n naagda taab n tʋmd zakã tʋʋm bɩ? (Koɛ. 4:9) Y sã n naagd taab n tʋmd tʋʋm kẽere, y paamdame n sõngd taaba, la y paamd weer n sõsda. w23.05 22-23 s. 10-12

Rabeem mi n yõka d ned kam fãa. Rĩm a Sayull sẽn wa n baood a Davɩɩd n na n kʋ wã, a zoe n kẽnga Gat sẽn yaa Filisti nebã tẽngã. Pa yã n kaoos la Gat rĩm a Akis wʋm t’a Davɩɩd la gãndaoog ning b sẽn da yɩɩnd n pẽgda, a sẽn kʋ Filisti neb “tus-piig” yĩngã ye. A Davɩɩd sẽn bãng rẽ wã “rabeem kẽ-a-la wʋsgo.” (1 Sãm. 21:10-12) A ra yɛɛsda bũmb ning a Akis sẽn tõe n maan-a wã. Bõe n sõng a Davɩɩd t’a bãng a sẽn na n maanega, baa ne a sẽn da zoet rabeemã? Yɩɩn-sõamyã 56 pʋgẽ, a Davɩɩd togsa yellã sẽn nams-a to-to a sẽn wa n be Gatã. Yɩɩn-kãng pʋgẽ, a Davɩɩd wilga a sẽn da yɛɛsd to-to, la a wilg a sẽn maan to-to n tõog a rabeemã me. Rabeemã sẽn wa n tar a Davɩɩdã, a teega a Zeova. (Yɩɩn. 56:1-3, 11) A Davɩɩd ra bee bʋʋm la a sẽn teeg a Zeova wã. Ne a Zeova sõngre, a yãka yam n maan bũmb sẽn tõe n ling nebã. A maana wa a yaa gãeenga! A sẽn maanã yãka nenga. A Akis ra pa le get-a wa ned sẽn tõe n maan yell ye. A sẽn da rat bal yaa a Davɩɩd we n looge. Rẽ kɩtame t’a Davɩɩd paam n põse.—1 Sãm. 21:13–22:1. w24.01 2 s. a 1-3

Yaa ãnda rãmb yell la rũndã daar vɛrse wã gomda? Yaa sẽn paam-b vʋʋsem sõng zaeebã sẽn vʋʋg n be saasẽ wã. Rẽnd sẽn paam-b vʋʋsem sõng zaeeb n ket tẽngã zugã fãa sã n wa vʋʋg n kẽng saasẽ to-kãsengã sẽn wat n kolg saabã, bũmb nins b sẽn na n maan pipi wã sʋka, zabr n naage. B sã n wa vʋʋg n kẽng saasẽ, b na n naaga Kiristã ne a malɛg-sõamyã wã n zab ne Wẽnnaam bɛɛbã b yaoolem zabre. Tags-y n ges-y-yã. Rũndã-rũndã, kiris-neb nins sẽn paam vʋʋsem sõng zaeebã kẽer kʋʋlame, n pa le tar pãng ye. La b sã n wa vʋʋg n kẽng saasẽ b na n tara pãn-kãsenga, n lebg wa malɛgs n pa tõe n ki ye. B na n kɩtame tɩ b naag Rĩm a Zeezi Kirist sẽn yaa zabr gãndaoogã n zabe. Armagedõ zabrã poore, b na n naaga a Zeezi n sõng ninsaalbã tɩ b wa zems zãnga. Sãmbg sẽn kae, b sã n wa be saasẽ b na n tõog n sõnga b saam-biisã la b saam-bi-pogsã b sẽn nongã sẽn be tẽngã zugã, n yɩɩd b sẽn wa n yaa ninsaalb sẽn pa zems zãngã. w24.02 6-7 s. 15-16

Neb kẽer segl n saame n tõe n dɩk b mens n kõ a Zeova n deeg lisgu, la b yɛɛsda ne rẽ maanego. B tõe n sokda b mens yaa: ‘La m sã n wa maan yel-wẽn-kãseng tɩ b yiis-m tigingã pʋgẽ?’ Yãmb me sã n sokda y meng woto, bɩ y bas y yam t’a Zeova na n kõ-y-la bũmb nins fãa sẽn yaa tɩlɛ “sẽn na yɩl tɩ y sẽn kẽnd to-to wã waoogd-a.” (Kolo. 1:10) Sẽn paase, a na n kõ-y-la raood tɩ y maan sẽn yaa tɩrga. A sẽn sõngd neb wʋsg tɩ b maand sẽn yaa tɩrgã wilgdame t’a tõe n maana rẽ. (1 Kor. 10:13) Yaa woto yĩng la neb nins b sẽn yiisd tigingã pʋgẽ wã sõor sẽn pa waoogã. A Zeova sõngda neb nins sẽn tũud-a wã tɩ b maand sɩd ne-a. Ninsaalbã fãa sẽn pa zems zãngã yamã mi n bee wẽng maanego. (Zak 1:14) La makr taoore, yaa yãmb n yãkd y sẽn na n maanega. Sɩd-sɩda, yaa yãmb n yãkd y sẽn na n zã y meng to-to wã. Neb kẽer yetame tɩ yɛl sãnda taoore, f pa tõe n tõog f meng ye. La pa sɩd ye. Y tõe n maoo ne y tʋls-wẽnsã. w24.03 5 s. 11-12