Sigri

A Zeova ninga pipi kiris-nebã barka, bala b kell n tʋma b tʋʋmã tɩ zems ne b yɛlã sẽn da yaa to-to wã. B ra wae n namsda pipi kiris-nebã b tũudmã yĩnga. Mi n yaa sasa b sẽn pa tẽed menga. D gom bũmb ning sẽn paam a Barnabaas ne tẽn-tʋmd a Pollã yelle, b sẽn wa n moond Listr tẽngã. Sɩngrẽ wã, nebã reeg-b-la neer n sak n kelg b koɛɛgã. La rẽ poor bilfu, bɛɛb n “tõg kʋʋngã,” tɩ neb kẽer sẽn da kelg a Poll lob-a kuga, n da tẽed t’a kiime. (Tʋʋ. 14:19) La a Barnabaas ne a Poll kẽnga zĩig a to n da ket n moond koɛɛgã. Baasa wãna? B sõnga “neb wʋsg tɩ b lebg karen-biisi.” B goamã ne b mak-sõngã me kenga b tẽed-n-taasã raoodo. (Tʋʋ. 14:21, 22) A Barnabaas ne a Poll sẽn pa koms raood n bas baa ne b sẽn da namsd-b koɛɛgã mooneg yĩngã, nafa neb wʋsgo. Tõnd me sã n ket n tʋmd tʋʋmd ning a Zeova sẽn yeel tɩ d tʋmã n pa koms raood n base, a na n ning-d-la barka. w23.04 16-17 s. 13-14

A Davɩɩd vɩɩmã tõre, a zaba ne bɛɛb sẽn da yaa nin-toose, la a ra nong n pʋʋsd a Zeova n kot sõngre. A Davɩɩd ra kɩsa sɩd t’a Zeova kelgda a pʋʋsgo, la a leokdẽ. Yãmb me tõe n kɩsa sɩd woto. Biiblã wilgdame tɩ d tõe n kɩsa sɩda, t’a Zeova tõe n kõ-d-la yam la pãng sẽn sek d na tõog toog zu-loees sasa. A tõe n tũnuga ne d tẽed-n-taasã, wall neb sẽn nan pa tũud-a, tɩ b maan bũmb ning n sõng tõndo. Baa sẽn pa wakat fãa la a Zeova leokd d pʋʋsg tɩ yɩ wa d sẽn tẽedã, d kɩsa sɩd t’a leokdame. A na n kõ-d-la bũmb nins sẽn yaa tɩlɛ ne-dã, la tɩ zems a wakat me. Rẽ wã, bɩ y ket n pʋʋsdẽ, n tall tẽebo, la y kɩs sɩd t’a Zeova na n gesa y yell rũndã-rũndã, la t’a na n ‘kõo bõn-vɩɩg buudã fãa a sẽn dat tɩ seke,’ dũni-paalgã sẽn watã pʋgẽ.—Yɩɩn. 145:16. w23.05 8 s. a 4; 13 s. 17-18

Yɩta sõma tɩ y tagsd bark nins y sẽn na n paame, y sã n tõog n pids y raabã. Bark bʋg yell la yãmb tõe n tagse? Y sã n yãka yam n na n karemd Biiblã, wall n na n wɩngd ne pʋʋsgo, bɩ y tags rẽ sẽn na n kɩt tɩ yãmb ne a Zeova zoodã pãng paasã zugu. (Yɩɩn. 145:18, 19) Y sã n yãka yam n na n bɩɩs zʋg-sõngo, bɩ y tags rẽ sẽn na n paas yãmb ne y taabã zood to-to wã zugu. (Kolo. 3:14) Y tõe n gʋlsa bũmb ning sẽn kɩt tɩ y yãk yam n na n maan bũmb kẽer a Zeova yĩngã. Wakat fãa bɩ y lebgd n get bũmb nins y sẽn gʋlsã. Sẽn paase, nong-y n be-y ne neb nins sẽn tõe n keng y raoodã. (Yel. 13:20) Yaa vẽeneg tɩ ray kẽere, d pa tar yẽesem n na n maan bũmb sãnda ye. Woto rat n yeelame tɩ d pa tõe n pids d raabã bɩ? Ayo. D rɩk makre: Sobg tõe n tusa koom-koglgo, t’a ta a sẽn dabdẽ wã. La sobgã pãng mi n boogame, bɩ n pʋd n kae ye. Woto rat n yeelame tɩ koom-koglgã pa na n le tõog n yẽrg bɩ? Ayo. Baa tõnd sã n pa tar yẽesem wʋsgo, d ket n tõe n pidsa d raabã. Yaa sɩd tɩ pa na n yɩ nana ye. La y sã n tõog n maane, y sũur na n yɩɩ noogo. w23.05 27-28 s. a 5-8

D sã n miẽ tɩ d yam-yãkr waa ne d zu-loeese, tõe n kɩtame tɩ d kos d yel-wẽnã sugri, n dems yɛlã, la d modg n da le maan a buud ye. D sã n maan woto, tõe n sõng-d lame tɩ d kell n zoe vɩɩmã zoeese. Y sã n yãk yam sẽn pa sõma, bõe la y tõe n maane? Ra n bao-y n na n wilg tɩ y tara bʋʋm, wall y ningd neb a taabã taal ye. Sak-y n deeg-y tɩ y kongame, la y maan y sẽn tõe fãa n dems yɛlã. Y sã n ningd y meng taal bũmb y sẽn maan tɩ pa sõma yĩnga, bɩ y sik y meng n pʋʋs a Zeova, n sak tɩ y kongame la y kos-a sugri. (Yɩɩn. 25:11; 51:3, 4) Kos-y neb nins y sẽn beegã me sugri, tɩ sã n yaa tɩlɛ bɩ y kos kãsem-dãmbã sõngre. (Zak 5:14, 15) Rɩk-y yam y kongrã pʋgẽ, la y modg n da le maan a buud ye. Y sã n maan woto, y tõe n basa y yam t’a Zeova na n zoee y nimbãanega, n sõng-yã.—Yɩɩn. 103:8-13. w23.08 28-29 s. a 8-9

A Zehoyada sõnga rĩm a Zowas sẽn na yɩl t’a yɩ rĩm-sõngo. Rẽ n so t’a ra maand sẽn noom a Zeova, a sẽn wa n yaa bi-bɩɩgã. La a Zehoyada kũumã poore, a Zowas kelga nanambs nins sẽn da yaa wẽn-kɩɩsdbã. (2 Kib 24:4, 17, 18) Rẽ sãama a Zeova sũur wʋsgo, t’a ra “tʋmd no-rɛɛsdb n na n kɩt tɩ b lebg n wa a nengẽ . . . , la b pa sak n kelg ye.” B zãgsame meng n pa kelg a Zehoyada biig a Zakari ye. A Zakari ra pa a Zeova no-rɛɛs la maan-kʋʋd bal ye. A ra yaa a Zowas pʋgdb biig me. Baasgo, a Zowas kɩtame tɩ b kʋ a Zakari. (2 Kib 22:11; 24:19-22) A Zowas pa zoe a Zeova wa sẽn segdã ye. A Zeova ra yeelame yaa: “Ned ning sẽn paoogd maam, mam na n paoog-a lame.” (1 Sãm. 2:30) Siiri tãb-biis sõor sẽn pa waoog n tõog a Zowas “tãb-biis kʋʋngã,” la b “pogl-a wʋsgo.” (2 Kib 24:24, 25) A Zowas mengã tʋm-tʋmdb n kʋ-a a sẽn kʋ a Zakari wã yĩnga. w23.06 18-19 s. 16-17

Tẽn-tʋmd a Poll zĩnda Efɛɛz n kaoos bilfu, n da moond koe-noogã la a zãmsd nebã. (Tʋʋ. 19:1, 8-10; 20:20, 21) A ra nonga a tẽed-n-taasã wʋsgo, n da rat n sõng-b tɩ b kell n maan sɩd ne a Zeova. Wakat n zĩnd tɩ Efɛɛz neb nins a Poll sẽn gʋls a lɛtrã ra bee ziri tũudmã pʋgẽ, n tẽed bũmb toor-toor sẽn pa sɩda. Efɛɛz neb wʋsg ra nonga yoob la tʋʋm-dẽgdo. Tẽngã reemã zĩisẽ, b ra wae n gomda gom-dẽgdo, la baa tũudmã tig sasa. (Efɛɛ. 5:3) Efɛɛz neb wʋsg ra “basa b mens n na n tʋm nin-yoolem tʋʋma,” rat n yeel tɩ b ra “maanda wẽng buud fãa n pa ningd b mens taal ye.” (Efɛɛ. 4:17-19) Nand tɩ Efɛɛz kiris-nebã bãng sẽn yaa sõma la sẽn yaa wẽng n bakã, b sũur-kasetã ra pa ningd-b taal ye. Yaa rẽ yĩng la a Poll sẽn yeel tɩ b “yamã bee lik pʋgẽ, tɩ b zãr ne vɩɩmã sẽn yit Wẽnnaam nengẽ wã.” La Efɛɛz neb kẽer pa kell n pa likã pʋgẽ ye. w24.03 20 s. a 2, 4; 21 s. a 5-6

B sẽn yãk a Zedeyõ t’a lebg bʋ-kaoodã, ra na n yɩɩ tɩlɛ t’a tall pãnga. B sẽn wa n zab ne Madiyã nebã ne yʋng tɩ b zoe wã, a Zedeyõ rig-b-la Zizreyɛll longã n tãag Zʋrdẽ kʋɩlgã. (Bʋ. 7:22) A Zedeyõ sẽn ta Zʋrdẽ kʋɩlgã noorã, a teka be bɩ? Ayo! Baa ne b sẽn da ya wã, a Zedeyõ ne a tãb-biis kobs-tã wã pasga kʋɩlgã n kell n dig Madiyã nebã. B wa n yõk-b lame, n zab ne-b n tõoge. (Bʋ. 8:4-12) A Zedeyõ ra kɩsa sɩd t’a Zeova na n kõ-a-la pãnga, la sɩd yɩɩ woto. (Bʋ. 6:14, 34) Daar a ye, a Zedeyõ ne a tãb-biisã zoee ne nao n dig Madiyã rĩm-dãmb a yiib sẽn da zao yʋgma. (Bʋ. 8:12, 21) Ne a Zeova sõngre, b tõoga b bɛɛbã. Kãsem-dãmbã me tõe n teega a Zeova, soab ning sẽn ‘pa yaade, la a pãng sẽn pa boogd me wã.’ B sã n wa rat pãnga, a na n kõ-b lame.—Eza. 40:28, 29. w23.06 6 s. 14, 16

Tõnd me tõe n talla sũur sẽn keeme, sẽn yaa yell ning fãa taoore. Bɩ d kell n teeg a Zeova. D ges a Barak sẽn tõog zabrã to-to, a sẽn kɩs sɩd ne noor ning a Zeova sẽn kõ-a wã yĩnga. Baa gãong wall kãnd sẽn da pa be soolmã fãa pʋgẽ wã, a Zeova yeel-a lame t’a tɩ zab ne Kanaã soda-naab a Sisera ne a nebã sẽn da tar zab-teed wʋsgã. (Bʋ. 5:8) No-rɛɛs-poak a Deboora yeela a Barak t’a sig longẽ wã n zab ne a Sisera sẽn da tar saar-dãmb kobs-wɛ wã. Baa tẽn-nabrã zug zabr sẽn da yaa nana ne saar-dãmbã n yɩɩdã, a Barak sakame. Sodaasã sẽn wa n sigd Taboor tãngã, a Zeova kɩtame tɩ sa-kẽeng sɩng niibu. A Sisera saar-dãmbã sũda bɛgdã, t’a Zeova kɩt t’a Barak tõog zabrã. (Bʋ. 4:1-7, 10, 13-16) Tõnd me sã n teeg a Zeova la d kɩs sɩd ne noy nins a sẽn tũnugd ne a siglgã n kõt tõndã, a na n sõng-d lame tɩ d tõog n yals kãn-kãe. w23.07 19 s. 17-18

Sẽn na yɩl n wa paam fãagre, yaa tɩlɛ tɩ d tall sũ-mare. Tõnd me segd n talla sũ-mar wa pĩnd wẽndẽ wẽn-sakdbã, n gũ tɩ Wẽnnaam wa pids a pʋlemsã. (Ebre. 6:11, 12) Biiblã maka tõnd ne ka-koaada. (Zak 5:7, 8) Ka-koaad tõe n tʋma wʋsg n bʋd kood la a zãgs koom, la a pa mi wakat ning takɩ koodã sẽn na n bɩ wã ye. Rẽ n so t’a maag a yĩng n gũudẽ, n kɩs sɩd t’a na n wa kẽeba koodo. Woto me, d tʋmda tũudmã tʋʋm wʋsgo, baa ne d sẽn pa mi “Zu-soabã sẽn wat daar ningã.” (Mat. 24:42) D maaga d yĩng n gũudẽ, n kɩs sɩd tɩ wakatã sã n ta, a Zeova na n pidsa a pʋlemsã fãa. D sã n pa sũ-mar soaba, d yamã tõe n wa yii ne gũubã, tɩ d zãagd d meng ne a Zeova bilf-bilfu. Tõe n wa lebga bũmb ning sẽn na n kõ tõnd sũ-noog zĩig pʋgẽ wã n pak tõnd n yɩɩda. La d sã n tar sũ-mare, d tõe n tõoga toog n tãag saabã, n paam fãagre.—Mis. 7:7. w23.08 22 s. a 7

D sã n mak Dãniyɛll 2:41-43 bãngr-gomdã ne Dãniyɛll sebrã la Vẽnegr sebrã bãngr-goam a taaba, d tõe n yeelame tɩ naoã makda Gãrãnd Bertayn ne Etazĩni sẽn naag taab n yaa dũni gill pãn-soaad rũndã-rũndã wã. A Dãniyɛll goma dũni gill pãn-soaad-kãng yelle, n yeel tɩ “rĩungã zĩis kẽer na n talla pãnga, tɩ zĩis sãnda pa tar pãng ye.” Bõe yĩng tɩ zĩis sãnda pa tar pãnga? Bala nin-buiidã b sẽn mak ne yagdã kɩtame t’a pa tõe n tʋm ne pãng wa kut ye. A Dãniyɛll sẽn bilg bõn-naandgã to-to wã tõe n sõnga tõnd tɩ d bãng bũmb wʋsg sẽn tar yõodo. Pipi, Gãrãnd Bertayn ne Etazĩni sẽn naag taab n yaa dũni gill pãn-soaadã wilgame t’a tara pãnga. Wala makre, Gãrãnd Bertayn ne Etazĩni naaga tẽns nins sẽn tõog dũni gill pipi zabrã la yiib-n-soabã. La dũni gill pãn-soaad-kãng nin-buiidã sẽn wẽneg n zabd taab la b zabd ne goosneema wã booga a pãngã, n na n ket n boogd a pãngã. Yiibu, Gãrãnd Bertayn ne Etazĩni sẽn naag taab n yaa dũni gill pãn-soaadã n na n yɩ yaoolem pãn-soaad sẽn na n dɩ naam nand tɩ Wẽnnaam Rĩungã wa sãam ninsaalbã goosneema-rãmbã fãa. w23.08 10-11 s. 12-13

Wakat ninga, zu-loees nins a Davɩɩd sẽn da paamdã kɩtame t’a maand yɩɩr wʋsgo. (Yɩɩn. 18:4, 5) La a Zeova sẽn da get a yell ne nonglmã ra kõt-a-la pãnga. A Zeova ra tallda a zoa wã sẽn koms raoodã n kẽnd “yam-maas zĩigẽ” la “vʋʋsg zĩig sẽn tar koom wʋsgo.” Rẽ ra kõta a Davɩɩd pãnga, t’a ket n tũud a Zeova ne sũ-noogo. (Yɩɩn. 18:28-32; 23:2) Rũndã-rũndã me, “yaa a Zeova maan-neerã yĩng la tõnd sẽn pa sa wã,” baa d sẽn maood ne zu-loe-kɛgemsã. (Wiis. 3:22; Kolo. 1:11) A Davɩɩd vɩɩmã ra wae n bee yell pʋgẽ. Sẽn paase, a ra tara bɛɛb sẽn tar pãng wʋsgo. La a Zeova sẽn da nong-a wã kɩtame t’a yam gãe bãane. Yell buud fãa pʋgẽ, a Davɩɩd ra neeme t’a Zeova bee ne-a tɩ ra kengd a raoodo. Rẽ n so t’a tõog n yeel yaa: “[A Zeova] fãaga maam ne bũmb nins fãa sẽn da kẽesd-m rabeemã.” (Yɩɩn. 34:4) A Davɩɩd ra mi n maana rabeem wʋsgo, la a sẽn da kɩs sɩd t’a Zeova nong-a lame wã ra boogda a rabeemã. w24.01 30 s. 15-17

Rɩk-y yam a Zowas yam-yãkr nins sẽn pa yɩ sõma wã pʋgẽ. A Zehoyada kũumã poore, a Zowas baoo zo-wẽnse. (2 Kib 24:17, 18) A yãka yam n kelg Zida nanambs nins sẽn pa nong a Zeova wã. Y na n sak n deegame t’a Zowas ra tog n zãaga a meng ne nin-kãensã sẽn tʋmd tʋʋm-wẽnsã. La a yãka yam n kelg b sagl-wẽnsã. A Zakari sẽn yaa a Zowas pʋgdb biigã sẽn bao n na n sagl-a wã, a kɩtame tɩ b kʋ-a. (2 Kib 24:20, 21; Mat. 23:35) Sɩd yaa wẽnem la yalemd tɛkẽ! A Zowas vɩɩmã sɩnga sõma, la bʋko a wa n lebga wẽn-kɩɩs la nin-kʋʋda. Sẽn na n baase, yẽ meng tʋm-tʋmdbã n wẽneg n kʋ-a. (2 Kib 24:22-25) A Zowas sã n da kell n kelg a Zeova la neb nins sẽn nong a Zeova wã, a vɩɩmã ra pa na n baas woto ye. w23.09 9 s. a 6

A Zeezi ra miime t’a Pɩyɛɛr tõe n kell n yɩɩ ned sẽn maand sɩda. Rẽ n so t’a yeel a Pɩyɛɛr t’a “ra le maan rabeem ye.” A Zeezi sẽn kɩs a Pɩyɛɛr sɩdã naf-a-la wʋsgo. Rẽ tɛka, a Pɩyɛɛr ne a ba-biig a Ãndere basa b zĩmã yõgbo, n tũud Mesi wã n moond koɛɛgã. Rẽ kɩtame t’a Zeova ning-b bark wʋsgo. (Mark 1:16-18) A Pɩyɛɛr sẽn tũ Kiristã a bãnga bũmb wʋsgo. A yãa a Zeezi sẽn sãoog bãase, n dig zĩn-dãmb la a vʋʋg kũum menga. (Mat. 8:14-17; Mark 5:37, 41, 42) Sẽn paase, a Pɩyɛɛr paama vẽnegre, n yã ziir ning a Zeezi sẽn na n paam Wẽnnaam Rĩungã pʋgẽ wã. A Pɩyɛɛr pa tol n yĩm rẽ ye. (Mark 9:1-8; 2 Pɩy. 1:16-18) Vẽenega, a sã n da pa tũ a Zeezi, a ra pa na n yã bõn-kãens ye. A sũur tog n yɩɩ noogo, a sẽn pa bas t’a tags-kɛgã kɩt t’a kong bark-kãensa wã. w23.09 21 s. a 4-5

Tẽn-tʋmd a Pɩyɛɛr pipi lɛtrã pʋgẽ, a yeelame tɩ d “nong taab wʋsgo.” Nonglem a woto pa lut yel-wẽn bilf bal ye. A “luta yel-wẽn wʋsgo.” (1 Pɩy. 4:8) Tõe t’a Pɩyɛɛr tẽega a Zeezi sẽn sõng-a t’a bãng bũmb ning sugrã kũun wɛɛngẽ yʋʋm wʋsg sẽn loogã. Wakat kãnga, tõe t’a Pɩyɛɛr tagsame t’a sẽn yeel t’a na n kõo a saam-biig sugr “hal naoor a yopoe” wã wilgdame t’a yaa sug-kõata. La a Zeezi wilga a Pɩyɛɛr ne tõnd fãa tɩ d segd n kõo taab sugr “hal naoor pis-yopoe la a yopoe,” rat n yeel tɩ pa tar tɛk ye. (Mat. 18:21) Y sã n getẽ tɩ sagl-kãngã tũub yaa toogo, bɩ y ra koms raood ye. Neb nins sẽn tũud a Zeova wã sẽn pa zems zãngã yĩng kɩtame tɩ wakat ninga, yaa toog tɩ b kõ sugri. Bũmb ning sẽn tar yõod masã yaa y maan bũmb ning fãa y sẽn segd n maanã sẽn na yɩl n kõ y saam-biigã sugri, la y modg tɩ laafɩ le zĩnd y sʋka. w23.09 29 s. 12

A Zonas sẽn wa n be zĩnfã pʋgẽ wã, a kɩsa sɩd t’a Zeova na n kelga a pʋʋsgã, la t’a na n sõng-a lame. Zĩnfã wa n tɩ wʋka a Zonas tẽn-koɛɛngẽ wã. Rẽ poore, a sakame n na n tʋm tʋʋmd ning a Zeova sẽn kõ-a wã. (Zon. 2:10–3:4) Zu-loees sasa, yãmb mi n maanda yɩɩr wʋsg hal n pa mi y sẽn na n pʋʋs a Zeova n yeel bũmb ning bɩ? Wall y mi n komsa raood hal n pa tõe n zãms Biiblã bɩ? Tẽeg-y t’a Zeova wʋmda y yɛlã võor sõma. Rẽnd baa y sã n pʋʋs n pa kos bũmb wʋsgo, y tõe n basa y yam t’a na n kõ-y-la bũmb ning sẽn yaa tɩlɛ ne-yã. (Efɛɛ. 3:20) Bãaga, yaams wall sũ-sãams sã n kɩt tɩ kareng la zãmsg yaa toog ne-yã, y tõe n kelga Biiblã wall siglgã sɛbã b sẽn karem tɩ b rɩkã. Y tõe n kelga d yɩɩll wall y ges video sẽn be jw.org pʋgẽ tɩ sõng-y me. Sẽn na yɩl t’a Zeova kõ-y raoodo y segd n pʋʋsd-a lame, la y baood y pʋʋsgã leoor Biiblã pʋgẽ la bũmb nins a Zeova siglgã sẽn yiisdã pʋgẽ. w23.10 13 s. a 6; 14 s. a 9

Sɛk-roogã ne wẽnd-dotã b sẽn wa n me Zerizalɛmmã pʋsã ra wõnda taaba. B fãa ra tara ro-pʋs a yiibu: Yaa “Zĩ-sõngã” la “Zĩ-sõng sẽn yɩɩdã.” Fu-lilldg n da be ro-pʋs a yiibã sʋka. (Ebre. 9:2-5; Yik. 26:31-33) Zĩ-sõngã pʋgẽ, sãnem fɩtl-doagendg n da be be n paas wisd yõogr tẽn-kugri, la taabl b sẽn dogend burã b sẽn dɩk n kõ Wẽnnaamã. Yaa “maan-kʋʋdb nins b sẽn da zae kaamã” bal n da tar sor n na n kẽ Zĩ-sõngã pʋgẽ n tʋm b tʋʋmã. (Sõd. 3:3, 7, 10) Zĩ-sõng sẽn yɩɩdã pʋgẽ, kaoolã koglg b sẽn da maan ne sãnemã n da be be. A makda a Zeova sẽn be a nin-buiidã sʋkã. (Yik. 25:21, 22) Yaa maan-kʋʋdb kãsmã bal n da tar sor n tõe n lak fu-lilldgã n kẽ Zĩ-sõng sẽn yɩɩdã pʋgẽ vugr yʋʋmd fãa, Paasg daarã daare. (Maan. 16:2, 17) A ra kẽeda be ne rũms zɩɩm, n maan paasg yẽ mengã yel-wẽn yĩnga, la buudã tõr yel-wẽn yĩnga. A Zeova wa n wilga fu-roogã teedã sẽn makd bũmb ninsã.—Ebre. 9:6-7. w23.10 27 s. 12

Wẽnnaam Gomdã pʋgẽ, b yeta tõnd n yɩlemdẽ tɩ d “nong taaba.” (Zã 15:12; Rom. 13:8; 1 Tes. 4:9; 1 Pɩy. 1:22; 1 Zã 4:11) La nonglem yita sũur pʋgẽ, tɩ ned yaool n pa tõe n bãng sẽn be d sũurẽ ye. Woto wã d maanda wãn tɩ neb a taabã yã tɩ d nong-b lame? Yaa ne d no-goamã, la ne d tʋʋm-tʋmdɩ wã. Bũmb toor-toor la d tõe n maan n wilg d tẽed-n-taasã tɩ d nong-b lame. Ad vɛrse-rãmb a wãn d sẽn tõe n tũ: “Togsd-y taab sɩda.” (Zaka. 8:16) ‘Kell-y n zĩnd-y ne taab ne laafɩ.’ (Mark 9:50) “Yɩt-y pipi n waoogd taaba.” (Rom. 12:10) “Bɩ y reegd taab sõma.” (Rom. 15:7) “Bɩ y . . . kõt taab sugri.” (Kolo. 3:13) “Bɩ y ket n tʋkd taab zɩɩbo.” (Gal. 6:2) “Bɩ y ket n belsd taaba.” (1 Tes. 4:18) “Bɩ y ket n . . . paasd taab tẽeb pãnga.” (1 Tes. 5:11) ‘Pʋʋsd-y taab yĩnga.’—Zak 5:16. w23.11 9 s. a 7-8

Beoog sẽn vẽeg fãa d yãkda yam bũmb toor-toor wɛɛngẽ, tɩ baoodẽ tɩ d tall tẽeb sẽn tar pãnga. Wala makre, d yãkda yam tũud-n-taarã wɛɛngẽ, pemsmã kokre, karengã, kãadmã, kambã wubr la d nug-tʋʋmã wɛɛngẽ. Yɩta sõma tɩ d sok d meng yaa: ‘Mam sẽn yãkd yam n na n maan bũmb ninsã wilgdame tɩ m kɩsa sɩd tɩ dũni-kãngã pa na n pa wakat fãa, la tɩ ka la bilfu, Wẽnnaam na n ledg-a-la ne dũni-paalg bɩ, bɩ m sẽn yãkd yam n na n maan bũmb ninsã yaa wa neb nins sẽn tagsd tɩ ned sã n ki saame wã?’ (Mat. 6:19, 20; Luk 12:16-21) D sã n maneg n kɩs sɩd tɩ dũni-paalgã ta n saame, na n sõng-d lame tɩ d yam-yãkr fãa yɩ sõma. Wakat ninga d maooda ne zu-loeese, tɩ baoodẽ tɩ d tall tẽeb sẽn tar pãnga. Tõe tɩ b namsd-d-la d tũudmã yĩnga, wall d bẽeda bã-kɛgenga, bɩ n maood ne zu-loɛɛg a to sẽn tõe n koms d raoodo. Sɩngrẽ wã, d tõe n tagsame tɩ d tõe n maoo ne d zu-loɛɛgã n tõoge. La sã n wa kaoosdẽ tɩ zu-loɛɛgã pa satẽ, wat n yɩɩ tɩlɛ tɩ d tall tẽeb sẽn tar pãnga, n tõog toog n ket n tũud a Zeova ne sũ-noogo.—1 Pɩy. 1:6, 7. w23.04 27 s. a 4-5

A Zeova ratame tɩ d tʋm tɩ zems d sẽn kosã. Wala makre, saam-biig tõe n kosa a Zeova t’a sõng-a t’a paam sor a tʋʋmã zĩigẽ n kẽng rasem a tãab tigis-kãsenga. Wãn to la a Zeova tõe n leok a pʋʋsgã? A tõe n sõnga saam-biigã t’a paam daoodo, n tɩ gom ne a tʋʋmdã taoor soaba. La yaa tɩlɛ tɩ saam-biigã kẽng tʋʋmdã taoor soab nengẽ n tɩ gom ne-a. Tõe tɩ na n yɩɩ tɩlɛ t’a kos n yɩlme. Tõe meng t’a na n kosa a tʋmd-n-taag t’a reeg a zĩig n tʋme, tɩ yẽ me wa reeg-a n tʋm daar a to, wall a sak tɩ b ra yao-a ye. A Zeova ratame tɩ d pʋʋs d zu-loɛɛgã yĩng n yɩlme. A Zeezi wilgame tɩ pa d pʋʋsg fãa la a Zeova na n leok zĩig pʋgẽ ye. (Luk 11:9) Woto wã, ra koms-y raood n bas ye! Pelg-y y pʋg n pʋʋse, la y pʋʋs n yɩlme. (Luk 18:1-7) D sã n maand woto, d wilgda a Zeova tɩ d sɩd rata bũmb ning d sẽn kotã. D wilgdame me tɩ d kɩsa sɩd t’a tõe n sõng-d lame. w23.11 22 s. 10-11

A Zeova pʋlma a zoa a Abrahaam tɩ buud fãa na n paama bark a yagensã maasem yĩnga. (Sɩng. 15:5; 22:18) A Abrahaam sẽn da tẽed Wẽnnaam ne a sũur fãa wã yĩnga, a ra kɩsa sɩd tɩ bũmb nins a sẽn pʋlmã na n pidsame. La a Abrahaam wa n taa yʋʋm koabga, t’a pagã ta yʋʋm pis-wɛ, tɩ yẽ ne a pagã sẽn maand sɩdã ket n pa tar biig ye. (Sɩng. 21:1-7) Baa ne rẽ, Biiblã yeelame yaa: “A [Abrahaam] ra kɩsa sɩd t’a na n yɩɩ buud wʋsg ba, baa sẽn da wõnd rẽ pa tõe wã. A ra tẽeda bũmb ning b sẽn yeel-a wã.” (Rom. 4:18) D miime t’a Abrahaam sẽn da saagd n na n paam bũmb ningã pidsame. A roga a Izaak sẽn yaa biig ning a sẽn da sɩng n gũud hal daar zãrã. Bõe n kɩt t’a Abrahaam ra kɩs sɩd tɩ Wẽnnaam na n pidsa a pʋlengã? A Abrahaam ne a Zeova zoodã sẽn da tar pãngã yĩnga, a ra “kɩsa sɩd zãng-zãng tɩ Wẽnnaam tõe n pidsa bũmb ning a sẽn pʋlmã.” (Rom. 4:21) A Abrahaam ra tata a Zeova yam, t’a yeel t’a yaa tɩrg a tẽebã yĩnga.—Zak 2:23. w23.12 8 s. a 1-2

Bi-bɩɩg b sẽn tõe n teeg maagda a yĩng n tʋmd tʋʋm nins b sẽn kõt-a wã sõma. D gom a Zeezi sẽn kõ mak-sõng sẽn ka to wã yelle. A zɩ n maan laas-laas ne tʋʋmde, wall a maan a toog kae ne tʋʋmd b sẽn kõ-a ye. A tʋma tʋʋm nins fãa a Zeova sẽn kõ-a wã, baa sã n wa pa nana. A ra nonga nebã, sẽn yɩɩd fãa a karen-biisã, n sak n kõ a vɩɩmã b yĩnga. (Zã 13:1) Rɩk a Zeezi togs-n-taare, n tʋm tʋʋmd ning fãa b sẽn kõ foo ne f sũur fãa. F sã n pa mi f sẽn na n tʋm tʋʋmd to-to, bɩ f sik f meng n kos saam-biig tẽeb sẽn bɩ sõngre. Ra tʋmd tʋʋmã f we n tʋm bal ye. (Rom. 12:11) Tʋmd tʋʋmã sõma wa f tʋmda “a Zeova yĩnga, la pa ninsaalb yĩng ye.” (Kolo. 3:23) La tẽeg tɩ f pa zems zãng ye. Woto wã, yɩ sik-m-meng soaba, tɩ f sã n tudg bɩ f sak n deege.—Yel. 11:2. w23.12 26 s. a 8

D sẽn deeg lisg n lebg a Zeova zakã nedã noom-d-la wʋsgo. Neb nins sẽn deeg lisgã na n sak n deegame tɩ yɩɩn-gʋlsd a Davɩɩd sẽn yeelã yaa sɩda. A yeelame: “Sũ-noog soab la ned ning yãmb [a Zeova] sẽn yãke, n tall-a n kolg y meng sẽn na yɩl t’a zĩnd y samanã pʋsẽ wã.” (Yɩɩn. 65:4) A Zeova pa talld ned yaar n wa a samanã pʋsẽ ye. Yaa neb nins sẽn wilgd tɩ b sɩd rata a zoodã la a yãkda. (Zak 4:8) Y sã n dɩk y meng n kõ a Zeova n deeg lisgu, y tõe n basa y yam tɩ y lisgã poore a na n kɩtame tɩ “bark sig yãmb zut hal tɩ bũmb pa paoog-y” ye. (Mal. 3:10; Zer. 17:8) Lisgã yaa sɩngr bala. Y na n dat n maana y sẽn tõe fãa n pids bũmb ning y sẽn pʋlem Wẽnnaam n dɩk y meng n kõ-a wã, baa makr taoore, wall y sã n wa maood ne zu-loeese. (Koɛ. 5:4, 5) Y sẽn yaa a Zeezi karen-biigã, y na n maana y sẽn tõe fãa n tũ a naoã neere, la y tũ bũmb nins fãa a sẽn zãms a karen-biisã.—Mat. 28:19, 20; 1 Pɩy. 2:21. w24.03 8 s. a 1-3

La yãmb ne y pagã wall y sɩdã sã n mi n be ne taab tɩ pa yãkd nenga? Bõe la y tõe n maan tɩ sõng-yã. D gom raad bugum yelle. A pa tiigd n yãng a toor ye. D segd n deng n ninga ra-zeremse, n yaool n wa paasd ra-giisi. Woto me, daar fãa y tõe n baoo sẽk bilf n zĩnd ne taaba. Modg-y n maand-y bũmb yãmb y yiibã fãa sẽn nonge. (Zak 3:18) Y sã n sɩng bilf-bilfu, y nonglmã pãng me na n paasdame. Kãadem pʋgẽ, waoog taabã tara yõod wʋsgo. Yaa wa pemsem sẽn kɩtd tɩ bugum wit sõma wã. Pemsem sã n kae, bugum kiida tao-tao. Woto me, neb sẽn kẽ kãadem sã n pa waoogd taaba, b nonglmã me tõe n booga tʋʋl-tʋʋlle. La pag ne a sɩd sã n modgd n waoogd taaba, sõngdame tɩ b nonglmã wit wa bugum. Sɩd me, tẽeg-y tɩ pa yãmb sẽn get tɩ y waoogda y pagã wall y sɩdã bal n pak ye. Yaa yẽ sã n sɩd neeme tɩ y waoogd-a lame wã n tar yõod n yɩɩda. w23.05 22 s. a 9; 24 s. 14-15

Biiblã pʋgẽ, neb sẽn da tũud Wẽnnaam ne b sũy fãa yeelame tɩ wakat n zĩnd tɩ b maan yɩɩre, la b ra rigd rabeem b bɛɛbã yĩng wall zu-loees a taab yĩnga. (Yɩɩn. 18:4; 55:1, 5) Tõnd me tõe n paama namsg d tũudmã yĩnga. Tõe n yɩɩ d karen-bi-taase, d tʋmd-n-taase, d zakã neb wall tẽngã taoor dãmb n namsd tõndo. Bãag tõe n wa kɩtame tɩ d yɛɛsd d na n kiime. Yell a woto taoore, d tõe n wa tagsdame tɩ d yaa wa biig b sẽn daag n base. Wakat kãnga, bõe la a Zeova maand n sõngd tõndo? A belsda tõnd la a kɩtdẽ tɩ d yamã gãe bãane. Rẽ wã, baood-y sẽk n pẽnegd a Zeova, rat n yeel tɩ n pʋʋsd-a la y karemd a Gomdã. (Yɩɩn. 77:1, 12-14) Woto y sã n wa maand yɩɩre, pipi bũmb y sẽn na n maan yaa bao y saasẽ Ba wã sõngre. Togs-y-yã a Zeova bũmb ning sẽn kẽesd-y rabeemã, la bũmb ning sẽn kɩt tɩ y maand yɩɩrã. Rẽ poor bɩ y karem a Gomdã tɩ rẽ la y na n paam t’a bels-yã.—Yɩɩn. 119:28. w24.01 24-25 s. 14-16

Y sã n yãka bũmb n na n maan a Zeova tũudmã pʋgẽ, tara yõod tɩ y tʋlg n maan rẽ ne y sũur fãa. Ned sã n tʋll n maan bũmb ne a sũur fãa, a modgda wʋsg sẽn na yɩl n maan bõn-kãnga. Sẽn paase, d sã n tʋll n maan bũmb ne d sũur fãa, d sɩd tõogdame. Dẽnd bõe la y tõe n maane, tɩ y sã n yãk yam n na n maan bũmb bɩ y tʋlg n maan dẽ ne y sũur fãa? Pʋʋs-y-yã a Zeova t’a sõng-y tɩ y tʋlg ne y sũur fãa n maan y sẽn datã. A Zeova tõe n sõng-y-la ne a vʋʋsem sõngã maasem, tɩ y tʋlg ne y sũur fãa n pids y raabã. Wakat kẽere, d yãkda yam n na n maan bũmb ninga, bala d miime tɩ d segd n maana bõn-kãnga, la tɩ yaa bõn-sõngo. La tõe tɩ d pa tolg n tar yẽesem n na n maan dẽ ye. Tags-y bũmb nins a Zeova sẽn zoe n maan n kõ-yã yelle. (Yɩɩn. 143:5) Tẽn-tʋmd a Poll bʋgsa bark nins a Zeova sẽn kõ-a wã yelle, tɩ kɩt t’a tʋlg ne a sũur fãa n tʋm wʋsg a Zeova yĩnga. (1 Kor. 15:9, 10; 1 Tɩm. 1:12-14) Woto me, y sã n bʋgsd bũmb nins a Zeova sẽn zoe n maan n kõ-yã zugu, y na n tʋlga ne y sũur fãa n pids y raabã.—Yɩɩn. 116:12. w23.05 27 s. a 3-5

D sã n pẽgd d saasẽ Ba wã yʋʋre, noom-a lame. (Yɩɩn. 119:108) La woto rat n yeelame tɩ Wẽnnaam Sẽn-tõe-a-fãa wã yaa wa ninsaalbã sẽn pa zems zãngã sẽn dat pẽgre, rẽ sẽn kengd b raoodã yĩng bɩ? Ayo. D sã n pẽgd d saasẽ Ba wã, d sõngd n wilgdame tɩ gomd a Sʋɩtãan sẽn togs ninsaalbã zug n yaa ziri. A Sʋɩtãan yeelame tɩ ninsaal baa a ye pa na n gom n teel Wẽnnaam ne a sũur fãa ye. A yeelame tɩ tõnd ned baa a ye pa na n kell n maan sɩd ne a Zeova namsg taoor ye. A paasame tɩ ninsaalbã fãa na n kɩɩsa Wẽnnaam, b sã n wa getẽ tɩ rẽ na n naf-b lame. (Zoob 1:9-11; 2:4) La a Zoob maana sɩd ne a Zeova, n wilg t’a Sʋɩtãan yaa pʋ-yagda. Yãmb me na n kell n maana sɩd ne Wẽnnaam bɩ? Tõnd ned kam fãa tõe n yãka yam n teel d Ba wã, la d tũ-a ne d sũur fãa, tɩ kɩt t’a sũur yɩ noogo. (Yel. 27:11) D sẽn paam n tõe n maan woto wã yaa zu-zẽkr tɛkẽ! w24.02 8-9 s. a 3-5

A Moyiiz ne a Zozuwe kũumã poore, a Zeova tũnuga ne bʋ-kaoodb n wilg a nin-buiidã sore. Rẽ poore, rĩm-dãmbã wakatẽ, a Zeova yãka no-rɛɛsdb tɩ b ra wilgd a nin-buiidã sore. Rĩm-dãmb nins sẽn da maand sɩdã tũu sagls nins no-rɛɛsdbã sẽn da kõt-bã. Wala makre, rĩm a Davɩɩd sika a meng n sak no-rɛɛs a Natã kiblgã. (2 Sãm. 12:7, 13; 1 Kib 17:3, 4) Rĩm a Zozafat kelga no-rɛɛs a Yahaziyɛll saglsã, la a sagl nin-buiidã tɩ b “tẽ [Wẽnnaam] no-rɛɛsdbã.” (2 Kib 20:14, 15) Rĩm a Ezekɩyaas sẽn wa n segd zu-loe-kɛgemsã, a kosa no-rɛɛs a Ezayi sõngre. (Eza. 37:1-6) Rĩm-dãmbã sã n da tũud sor ning a Zeova sẽn wilgd-bã, b ra paamda barka, tɩ nin-buiidã me paamd koglgo. (2 Kib 20:29, 30; 32:22) Ra yaa vẽeneg t’a Zeova tũnugda ne a no-rɛɛsdbã n wilgd a nin-buiidã sore. w24.02 21 s. a 8

A Sʋɩtãan ratame tɩ d yõg zood ne neb sẽn na n kɩt tɩ yɩ toog tɩ d kell n tũ a Zeova noyã. Rũndã-rũndã, pa neb nins d sẽn wae n be ne wã bal la d sõsd ne ye. D tõe n tũnugda ne rezo sosiyo-rãmbã n sõsd ne neba. D segd n modgame n da wa tagsd tɩ yoob pa wẽnga, wa dũniyã nebã sẽn tagsdã ye. D miime tɩ yaa wẽnga. (Efɛɛ. 4:19, 20) La d segd n soka d meng yaa: ‘M modgdame tɩ sã n pa wa n yaa tɩlɛ bɩ m da wae n be ne m tʋmd-n-taase, m karen-bi-taase, wall neb a taab sẽn pa tũud a Zeova noyã sẽn yaa tɩrsã bɩ? M tũuda a Zeova noyã ne raoodo, baa neb kẽer sẽn get tɩ m sẽn maand woto wã m yaa dem-demã bɩ?’ Baa tigingã pʋgẽ, d pa segd n yõg zood ne ned yaare, wa 2 Tɩmote 2:20-22 sẽn wilgdã. D miime tɩ kẽer tõeeme n pa sõng-d tɩ d kell n maan sɩd ne a Zeova ye. w24.03 22-23 s. 11-12

Yãmb zoe n mamsa a Zeova sẽn yaa to-to wã y yamẽ bɩ? Baa d sẽn pa tõe n yã a Zeova ne nifã, Biiblã tũnuga ne bũmb toor-toor n bilg a sẽn yaa to-to wã. Wala makre, Biiblã yeelame t’a Zeova yaa “wĩntoog la gãongo,” la t’a yaa “wa bugum sẽn dɩte.” (Yɩɩn. 84:11; Ebre. 12:29) Biibl-gʋlsd a ye bilga a Zeova sẽn yaa to-to wã n yeel t’a yaa wa bũmb sẽn pɩnda, n zao safɩɩr kugr geer zugu, tɩ saag-gomtɩʋʋg sẽn pɩnd gũbg-a. (Eze. 1:26-28) D sẽn pa tõe n yã a Zeova ne nifã, tõe n yɩɩ toog tɩ d sak n deeg t’a nong-d lame. Neb kẽer tõe n tagsdame t’a Zeova pa tol n tõe n nong-ba, yel-beed sẽn paam-b pĩnd yĩnga. A Zeova wʋmda nin-kãens sẽn tagsd woto wã võore, la a mi rẽ sẽn namsd-b to-to wã me. Sẽn na yɩl n sõng tõndo, a Zeova wilga a sẽn yaa Wẽnnaam ning buudã a Gomdã pʋgẽ. Gom-bil ning b sẽn tõe n tall n bilg a Zeova sẽn yaa to-to wã tɩ zems n yɩɩd yaa nonglem. (1 Zã 4:8) A Zeova yaa nonglem. A sẽn maand fãa yaa ne nonglem. Wẽnnaam nonglmã yaa kãsenga, hal tɩ baa neb nins sẽn pa nong-a wã tõe n dɩ a nonglmã yõodo.—Mat. 5:44, 45. w24.01 26 s. a 1-3

A Zeova yãka a Moyiiz t’a lʋɩ Israyɛll nebã taoor n tall-b n yɩ Ezɩpti, n kɩt tɩ sawadg be b taoor wĩndga, tɩ bugum be b taoor yʋngo. (Yik. 13:21) A Moyiiz pʋga sawadgã ne bugmã tɩ b tall yẽ ne Israyɛll nebã n kẽng Mog-miuugẽ wã. Ezɩpt nebã pʋgla nin-buiidã n tɩ paam-b Mog-miuugẽ wã, tɩ b tags tɩ b pa tar b sẽn kẽedẽ, tɩ rabeem yõk-ba. La ra pa tudgr ye. Yaa a Zeova n yãk yam n tũnug ne a Moyiiz n tall a nin-buiidã n kẽng be. (Yik. 14:2) Rẽ poore, Wẽnnaam maana yel-solem-kãseng n fãag-ba. (Yik. 14:26-28) Yʋʋm 40 pʋgẽ, a Moyiiz kell n pʋga sawadgã ne bugmã, n wilg Wẽnnaam nin-buiidã sor we-raoogẽ wã. (Yik. 33:7, 9, 10) A Zeova ra paada sawadgẽ wã n gomd ne a Moyiizi, t’a rɩkd n taasd nin-buiidã. Israyɛll nebã ra tõe n yãa vẽeneg t’a Zeova ra tũnugda ne a Moyiiz n wilgd-b sore. w24.02 21 s. a 4-5