Yʋʋm-sare

A Zeova tara pãng n tõe n vʋʋg sẽn ki-bã bɩ? N-ye! Yẽ la “Sẽn-tõe-a-fãa wã.” (Vẽn. 1:8) Dẽnd a tara pãng n tõe n tõog bɛ buud fãa, baa kũumã. (1 Kor. 15:26) Bũmb a to sẽn kɩt tɩ d miẽ tɩ Wẽnnaam tõe n vʋʋga sẽn ki-bã, yaa t’a pʋ-tẽerã ka koak ye. A boonda ãdg fãa ne a yʋʋre. (Eza. 40:26) Sẽn paase, a tẽra neb nins sẽn ki wã yelle. (Zoob 14:13; Luk 20:38) A tẽra bũmb fãa sẽn ki-bã zugu, wala makre, b zʋgã, b yel-manesmã, b yalẽ wã, b sẽn da maand bũmb nins b vɩɩmã pʋgẽ wã, b pʋ-tẽerã, la baa yel-bõonesã fãa. Yaa vẽeneg tɩ d tõe n tẽe a Zeova sẽn pʋlem t’a na n wa vʋʋga sẽn ki-bã, bala d miime t’a tʋll n maana woto, la t’a tara pãng la tõog n tõe n maan dẽ. Bũmb a to sẽn kɩt tɩ d tõe n tẽ kũum vʋʋgrã, yaa t’a Zeova zoe n vʋʋga neb sẽn ki. Pĩnd wẽndẽ wã, a kõo wẽn-sakdb a wãn tõogo, a Zeezi sẽn naage, tɩ b vʋʋg neb sẽn ki. w23.04 9-10 s. a 7-9

D sã n gomd ne gũusg la bʋgsem, neb a taabã na n dat n kelg-d lame, la b kell n sõs ne-do. La ned sã n dat n wẽ no-koɛɛma, wall a yaand tõndo, pa tɩlɛ tɩ d kell n sõs ne-a ye. (Yel. 26:4) La neb a woto pa wae ye. Wʋsgã na n dat n kelgame. Vẽenega, y sã n modg n lebg nin-bʋgsgo tara yõod wʋsgo. Ned sã n wa wẽed no-koeemd ne-yã, wall n dõt a Zeova Kaset rãmbã, bɩ y pʋʋs a Zeova n kos-a t’a kõ-y pãng tɩ y tõog n kell n gom ne bʋgsem. Tẽeg-y tɩ y sã n gomd ne bʋgsem, tõe n sõng-y lame tɩ y gil no-koɛɛma. Sẽn paase, y sẽn gomd ne bʋgsem la waoogrã tõe n kɩtame tɩ kɛlgdb kẽer toeem b tagsg sẽn yaa a soab ne tõndo, la ne Biiblã. “Segl-y y mens wakat fãa tɩ ned sã n sok yãmb y sẽn tẽed bũmb ningã võor bɩ y tõog n leok-a . . . ne bʋgsem la ne waoogr wʋsgo.” (1 Pɩy. 3:15) N-ye, bɩ y yɩ sũ-bʋgsem soaba, tɩ wilg tɩ y tara pãnga! w23.09 19 s. 18-19

D gom bũmb a naas sẽn wilgd tɩ ned maanda sũ-mar yelle. Pipi, ned sẽn yaa sũ-mar soab sũur pa yikd tao-tao ye. B sã n maan-a bũmb sẽn sãamd sũuri, a tõogda a meng n pa maan n lebs ye. Baa sã n wa pa nana ne-a, a pa yikd a sũur ne neb a taabã ye. (Yik. 34:6) Yiibu, sũ-mar soab tõe n maaga a yĩng n gũ bũmbu. Ned a woto sã n gũud bũmb tɩ wa kaoosd n yɩɩd a sẽn da tagsdã, a pa yikd a sũur ye. (Mat. 18:26, 27) Tãabo, sũ-mar soab pa yɩt yãg-yãg n maan bũmb ye. Ned sẽn yaa sũ-mar soab sã n wa segd n maan bũmb sẽn tar yõodo, a pa maand rẽ ne yãgb ye. A rengd n tagsa bũmb ning a sẽn segd n maanã zug tɩ bɩ. Rẽ poore, a baooda sẽk n maan bõn-kãng sõma. Naase, sũ-mar soab maooda ne zu-loees n pa yẽgemdẽ ye. A tagsda bõn-sõma nins a sẽn paamdã yelle, la a maand a sẽn tõe fãa n ket n tũud a Zeova ne sũ-noogo. (Kolo. 1:11) D sẽn yaa kiris-nebã, d segd n maanda sũ-mar bõn-kãensã a naasã fãa wɛɛngẽ. w23.08 20-21 s. a 3-6

Sẽn yɩɩd fãa, bũmb ning sẽn kɩt tɩ d segd n kogl d sũurã yaa t’a Zeova feesda d sũyã. Woto rat n yeelame t’a getame tɩ zʋʋg bũmb nins neb a taabã sẽn tõe n yã wã, la t’a nee bũmb ning sẽn sɩd be d sũurẽ wã. D sã n tagsd a saglsã sẽn tõe n sõng-d tɩ d wa paam vɩɩm sẽn kõn sa wã yell wakat fãa, a na n nong-d lame. (Zã 4:14) Woto, d pa na n bas t’a Sʋɩtãan ne a dũniyã sẽn yɛlgd ziri ningã kẽ d yamã ye. D leb n pa na n dɩk nin-wẽnsã togs-n-taar n tall manesem-wẽns ye. (1 Zã 5:18, 19) Tõnd ne a Zeova zoodã pãng sã n paasdẽ, d na n maneg n nong-a lame la d waoogd-a. D sẽn pa rat n maan bũmb n sãam d Ba wã sũurã yĩnga, d pʋd n pa rat n tags wẽng maaneg yell ye. Saam-bi-poak a ye sẽn be Korowasi t’a yʋʋr boondẽ t’a Marta paama makre, n da naan n yo. A yeelame: “Ra yaa toog ne-m tɩ m tags neere, la m tõog m meng n da maan sẽn yaa wẽng ye. La m sẽn da zoet a Zeova wã kogl-m lame.” Wãn to la a Zeova zoeesã sɩd tõe n kogl neda? A Marta yeelame t’a bʋgsa yoobã sẽn tõe n wa ne yɛl ninsã zugu. Tõnd me tõe n maana woto. w23.06 20-21 s. a 3-4

A Zeezi ra miime t’a Zeova raabã yaa t’a yʋʋrã paam waoogre, rat n yeel tɩ n wilg tɩ b sẽn dõt-a bũmb ninsã fãa yaa ziri. Rẽ n kɩt tɩ d Zu-soabã wilg a karen-biisã b sẽn segd n pʋʋs to-to, n yeel yaa: “Tõnd Ba sẽn be saasẽ, bɩ yãmb yʋʋr paam waoogre.” (Mat. 6:9) A Zeezi ra miime tɩ yaa bũmb sẽn pak bõn-naandsã fãa. Malɛk wall ninsaal kae n waoogd a Zeova yʋʋrã n ta a Zeezi ye. La b sẽn wa n yõk a Zeezi wã, bõe la a bɛɛbã rõd-a? B yeelame t’a yaa wẽn-tʋʋsa. Yaa vẽeneg t’a Zeezi sẽn kis yel-wẽnd ning n yɩɩd yaa ned sẽn na n tʋʋs a Ba wã, wall n sãam a yʋʋrã sẽn yaa sõngã. A sũur da sãama wʋsgo, a sẽn da mi tɩ b na n dõd-a-la yel-wẽn-kãng n kʋ-a wã. Tõe tɩ yaa rẽ n kɩt t’a ra be “sũ-sãan-kãseng pʋgẽ,” a yõkrã sẽn wa n kolgdẽ wã.—Luk 22:41-44. w24.02 11 s. 11

D vɩɩmã zoeesã pʋgẽ, d segd n nonga a Zeova ne a Zeezi n yɩɩd d sẽn nong neb nins sẽn kĩ ne tõndã. (Mat. 10:37) La pa rat n yeel tɩ d tõe n maana laas-laas ne bũmb nins d sẽn segd n maan zakã pʋgẽ wã ye. Sẽn na yɩl n ta Wẽnnaam ne Kiristã yam, ned fãa tog n maana bũmb ning a sẽn segd n maan zakã pʋgẽ wã. (1 Tɩm. 5:4, 8) D sã n maand woto d sũ-noogã paasdame. A Zeova miime tɩ sẽn na yɩl tɩ sũ-noog zĩnd zak pʋgẽ, pagã ne a sɩdã segd n nonga taab la b waoogd taaba, n nong b kambã la b wubd-b sõma, tɩ kambã me waoogd b roagdbã. (Efɛɛ. 5:33; 6:1, 4) Y sẽn yaa zakã ned ning fãa, kɩs-y sɩd ne yam ning sẽn be Biiblã pʋgẽ wã, la y ra teeg y tagsa wã, y buudã minimdã wall dũniyã bãngdbã goam ye. Zãms-y siglgã sɛbã sõma. B wilgda d sẽn tõe n tũ Biiblã saglsã to-to. w23.08 28 s. a 6-7

Saam-bi-poak segd n zãmsa bũmb kẽer maanego. Bũmb sãnda bi-pugl sẽn na n zãms a yãadmẽ wã na n kell n naf-a-la a vɩɩmã tõre. Wala makre, zãms kareng la gʋlsgo. Zĩis kẽere, b yetame tɩ pa tɩlɛ tɩ pag zãms kareng la gʋlsg ye. La rẽ yaool n tara yõod wʋsg ne kiris-ned buud fãa. (1 Tɩm. 4:13) Woto wã, ra bas tɩ bũmb gɩdg-f tɩ f pa zãms kareng la gʋlsg ye. Wãn to la rẽ na n naf-fo? Tõe n sõng-f lame tɩ f wa paam tʋʋma. Sẽn paase, na n yɩɩ nana ne-f tɩ f zãms Wẽnnaam Gomdã, la f rɩk-a n zãms neb a taaba. Sẽn yɩɩd fãa, f sẽn na n karemd Wẽnnaam Gomdã la f bʋgsd a zugã na n sõngame tɩ foo ne a Zeova zoodã pãng paase.—1 Tɩm. 4:15. w23.12 20 s. 10-11

D kos a Zeova sõngre, n tõog n yals kãn-kãe makr sasa. D sẽn yaa neb sẽn pa zems zãngã, d maooda wakat fãa sẽn na yɩl n da maan wẽng ye. A Sʋɩtãan maanda a sẽn tõe fãa, sẽn na yɩl tɩ d modgrã ra yãk neng ye. Bũmb a ye a Sʋɩtãan sẽn maande, yaa t’a tũnugda ne reem buud toor-toor sẽn pa sõma sẽn na yɩl n dẽgem d tagsa wã. Reem a woto tõe n kɩtame tɩ d yamã pid ne tagsa sẽn pa sõma. Yaa tagsa sẽn tõe n kɩt tɩ d pa le yaa yɩlem a Zeova nifẽ, la sẽn tõe n kɩt tɩ d maan yel-wẽn-kãsenga. (Mark 7:21-23; Zak 1:14, 15) D yamã sã n wa be sẽn yaa wẽng maanego, yaa tɩlɛ tɩ d paam a Zeova sõngr n tõog yals kãn-kãe. Pʋʋsg ning a Zeezi sẽn zãms a karen-biisã pʋgẽ, a yeel-b lame tɩ b sã n wa pʋʋsdẽ bɩ b kos yaa: “Ra bas-y tõnd tɩ d maan yel-wẽnd makr sasa ye. Fãag-y tõnd wẽng soabã nugẽ.” (Mat. 6:13) A Zeova tʋll n sõnga tõndo, la d segd n kos-a lame t’a sõng-do. Sẽn paase, d segd n modgame tɩ d manesmã zems ne d sẽn pʋʋs n kos bũmb ningã. w23.05 6-7 s. 15-17

Pag ne a sɩd sã n modgd n paasd bãmb ne b saasẽ Ba wã zoodã pãnga, b na n tũuda a saglsã. Rẽ na n sõng-b lame tɩ b tõog n mao ne zu-loeese, wall b gil zu-loees sẽn tõe n boog b nonglmã. Neb tẽeb sẽn tar pãng modgdame n dɩkd a Zeova togs-n-taare, n bɩɩsd zʋg-sõma toor-toor wala sõmblem, sũ-mare, la b yaa sug-kõatba. (Efɛɛ. 4:32–5:1) Pag ne a sɩd sã n bɩɩsd zʋg-sõma-kãensã, kɩtdame tɩ yaa nana tɩ b nonglmã pãng paasdẽ. Saam-bi-poak a ye yʋʋr sẽn boond t’a Lena sẽn kẽ kãadem sẽn yɩɩd yʋʋm 25 masã wã yeelame: “Yaa nana tɩ f nong ned tẽeb sẽn tar pãnga, la f waoog-a.” D gom Biiblã kibar a ye yelle. A Zeova sẽn wa n dat n yãk neb a Davɩɩd yagensã sʋk tɩ b yɩ Mesi wã roagdbã, a yãka a Zozɛf ne a Maari. Bõe yĩnga? B yiibã fãa ra tara zood sõma ne a Zeova. Sẽn paase, a Zeova ra miime tɩ b ra na n lʋɩɩsa yẽ raabã taoor b kãadmã pʋgẽ. w23.05 21 s. a 3-4

Baa tõnd taoor soab a Zeezi sẽn zems zãngã, neb nins a sẽn yãk tɩ b lʋɩt tõnd taoor tẽngã zugã pa zems zãng ye. Tõe n yɩɩ toog tɩ d sak-ba, sẽn yɩɩd fãa b sã n wa yeel tɩ d maan bũmb d sẽn pa nonge. Wakat n zĩnd tɩ tẽn-tʋmd a Pɩyɛɛr ra pa rat n sak noor b sẽn kõ-a ye. Malɛk n wa n yeel-a t’a wãb rũms a Moyiiz Tõogã sẽn da wilg tɩ yaa rẽgd t’a zãgse. Pa yɩ vugr ye. Yɩɩ hal naoor a tãabo! (Tʋʋ. 10:9-16) Bõe yĩng t’a zãgse? A ra pa wʋmd noorã võor ye. La Zerizalɛm tigingã kãsem-dãmb sẽn wa n yeel tẽn-tʋmd a Poll t’a tall rap a naas n kẽng wẽnd-doogẽ wã n tɩ yɩlg a meng wa Tõogã sẽn yetã tɩ wilg t’a tũuda a Moyiiz Tõogã, a sakame. A ra miime tɩ pa le yaa tɩlɛ tɩ kiris-nebã tũ a Moyiiz Tõogã ye. Sẽn paase, a ra pa maan bũmb sẽn yaa wẽng ye. Baa ne rẽ, a Poll “peega rapã vẽkembeoogã, n tɩ yɩlg a meng wa Tõogã sẽn wilgã ne bãmb me.” (Tʋʋ. 21:23, 24, 26) A Poll sakrã kɩtame tɩ zems-n-taar kell n zĩnd saam-biisã sʋka.—Rom. 14:19, 21. w23.10 10 s. 15-16

Tõe tɩ y pa na n tags tɩ sẽn na yɩl tɩ y zoodã tall pãnga, y segd n zoee taab ye. La ned sã n dat n paam zood sõma ne Wẽnnaam, a segd n ‘zoe-a’ lame. Baa d sẽn tũud a Zeova wã sẽn kaoos to-to fãa, d fãa segd n kell n zoe-a lame. La zoe Wẽnnaam rat n yeelame tɩ bõe? Ned sẽn zoet a Zeova wa sẽn segdã nong-a lame, n pa rat n maan bũmb sẽn na n sãam a sũur ye. A Zeezi ra tara “wẽn-zoeer” a woto buudu. (Ebre. 5:7) A ra pa zoet a Zeova tɩ loog noor ye. (Eza. 11:2, 3) A ra nonga a Zeova ne a sũur fãa, n dat n sakd-a. (Zã 14:21, 31) Tõnd me yaa wa a Zeezi, n waoogd a Zeova ne d sũur fãa la d zoet-a, bala a yaa nonglem, yam soaba, tɩrg la pãn-kãseng soaba. D miime me t’a Zeova nong-d lame, la tɩ d sã n sakd a saglsã noom-a lame. D manesmã tõe n sãama a Zeova sũur wall noog a sũuri.—Yɩɩn. 78:41; Yel. 27:11. w23.06 14 s. a 1-2; 15 s. a 5

A Ozɩyas sẽn wa n paam pãngã, a yĩmame tɩ yaa ne a Zeova sõngr la a sẽn tõog n maan bõn-kãsemsã. Yam-bʋg la d tõe n dɩk a kibarã pʋgẽ? D segd n tẽegdame tɩ yaa a Zeova n kõt tõnd bõn-sõma nins d sẽn tarã, la a sõngd tõnd tɩ d tʋmd a tʋʋmã. D pa segd n wukd d mens bũmb nins d sẽn tõogd n maandẽ wã yĩng ye. Yaa a Zeova la d segd n pẽg rẽ yĩnga. (1 Kor. 4:7) D segd n sika d meng n sak n deeg tɩ d yaa ned sẽn pa zems zãnga, n mi n dat saglse. Saam-biig sẽn tar yʋʋm pis-yoob la zak yeelame: “Ned sã n wilg-m tɩ m kongame, m pa yikd m sũur wall n koms raood ye. M sã n mi n tudg n maan bũmb tɩ b sagl-ma, m modgd n remsame la m ket n tũud a Zeova ne m sũur fãa.” D sã n sak a Zeova la d kell n yɩ sik-m-meng soaba, d vɩɩmã na n talla barka.—Yel. 22:4. w23.09 10 s. 10-11

Ra yaa tɩlɛ tɩ pipi kiris-nebã tõog toogo. B ra maooda ne zu-loees nins neb a taabã sẽn maood ne wã, la b ra segda zu-loees a taaba, b sẽn yaa kiris-nebã yĩnga. Zʋɩf-rãmbã tũudmã taoor dãmb la Rom nanambsã sẽn da namsd-bã sẽn yãk a toogo, wʋsg zak rãmb me ra namsd-b lame. (Mat. 10:21) B ra segdame me n modg n da sak sɩdã kɩɩsdbã zãmsg sẽn wat ne welsgã ye. (Tʋʋ. 20:29, 30) La kiris-nin-kãens kell n tõoga toog n maan sɩd ne a Zeova. (Vẽn. 2:3) Bõe la b maan-yã? B maaga b yĩng n tags pĩnd wẽndẽ neb sẽn tõog toog yelle, wala makre, a Zoobe. (Zak 5:10, 11) B pʋʋsame me n kos raoodo. (Tʋʋ. 4:29-31) Sẽn paase, b ra tẽegdame tɩ b sã n tõog toogo, a Zeova na n keo-b lame. (Tʋʋ. 5:41) Biiblã pʋgẽ la tõnd sɛbã pʋsẽ, kibay n be be n gomd neb sẽn tõog toog yelle. D sã n zãmsd kiba-kãens la d bʋgsd b zutu, tõnd me na n tõoga toogo. w23.07 3 s. a 5-6

A Zeova ne a Zeezi yam pa na n wa yi tõnd tɩ b raag-d bas ye. Tẽn-tʋmd a Pɩyɛɛr sẽn kɩɩs t’a pa mi a Zeezi wã poore, a ra segd n yãka yam sẽn tar yõod wʋsgo. A ra na n kell n yɩɩ Kiristã karen-biig bɩ, bɩ a na n komsa raood n base? A Zeezi kosa a Zeova t’a sõng a Pɩyɛɛr t’a tẽebã ra maag ye. A togsa a Pɩyɛɛr t’a pʋʋsa a yĩnga, la a wilg t’a kɩsa sɩd t’a Pɩyɛɛr na n wa tõog n kenga a saam-biisã raoodo. (Luk 22:31, 32) A Pɩyɛɛr sã n da tẽeg a Zeezi goamã, tog n da kengda a raoodo. Tõnd me sã n wa segd n yãk yam bũmb sẽn tar yõod wɛɛngẽ, a Zeova tõe n tũnuga ne kãsem-dãmbã sẽn get d yellã, n keng d raood tɩ d kell n maan sɩd ne-a. (Efɛɛ. 4:8, 11) A Zeova sẽn sõng a Pɩyɛɛr ne tẽn-tʋmdb a taabã tɩ b paam bũmb nins sẽn yaa tɩlɛ wã, tõnd me sã n lʋɩɩs a tʋʋmdã taoore, a na n gesame tɩ d paam bũmb nins sẽn yaa tɩlɛ ne-dã. w23.09 24-25 s. 14-15

A Zeova nee bõn-sõma nins d sẽn maand d taabã yĩngã, baa sã n yaa bilfu. A geta rẽ wa maoong sẽn tar yõod wʋsgo, la wa samd a sẽn na n yao. Y sã n da yaa kãsem-sõngd wall kãsem-soaba, tɩ b reeg y tʋʋmdã n bas-yã, a Zeova tẽra tʋʋm nins y sẽn tʋm pĩndã, la nonglem ning sẽn kɩt tɩ y tʋm tʋʋm-kãensã. (1 Kor. 15:58) A nee y sẽn ket n tar nonglem ningã me. A Zeova ratame tɩ d fãa maneg n nong yẽ la d nong d taabã. D sã n karemd a Zeova Gomdã la d bʋgsdẽ, la d pʋʋsd-a wakat fãa, d na n paasa d sẽn nong-a to-to wã pãnga. D sã n maand bũmb toor-toor n sõngd d tẽed-n-taasã, d na n maneg n nong-b lame. D nonglmã pãng sã n paasdẽ, d na n kolgda a Zeova la d tẽed-n-taasã n paasdẽ. Sẽn paase, d zoodã na n paa wakat sẽn kõn sa! w23.07 10 s. 11; 11 s. 13; 13 s. 18

Yaa kiris-ned fãa n segd n yãk a sẽn na n ges a laafɩ wã yell to-to. Noy takɩ pa be Biiblã pʋgẽ tɩbsgã wɛɛngẽ ye. La Biiblã wilgdame tɩ kiris-ned segd n zãaga a meng ne zɩɩm la zĩn-dãmb yɛla. (Tʋʋ. 15:20; Gal. 5:19, 20) Sẽn zʋʋg rẽ, ned fãa n yãkd tɩbsg ning a sẽn date. Baa d sã n kɩs sɩd tɩ tɩbsg ning yaa sõma n yɩɩda, d segd n sak n deegame tɩ d tẽed-n-taasã me tara sor n na n yãk tɩbsg ning b sẽn date. Rẽ wɛɛngẽ, d segd n ninga bũmb a naas d yamẽ: 1) Yaa Wẽnnaam Rĩungã bal n na n wa ne laafɩ hakɩɩka. (Eza. 33:24) 2) Kiris-ned fãa segd n kɩsa sɩd zãng ne bũmb ning sẽn yaa sõma ne-a n yɩɩdã. (Rom. 14:5) 3) D pa kaood d taabã bʋʋdo, wall d ningd kug-lakdg b taoor ye. (Rom. 14:13) 4) Kiris-nebã nonga b taabã, la b miẽ tɩ tigingã neb zems-n-taar n tar yõod n yɩɩd bãmb mengã raabo.—Rom. 14:15, 19, 20. w23.07 24 s. 15

Yãmb nonga a Zeova ne y sũur fãa bɩ? Sãmbg kae tɩ yaa woto ye. Hal pĩnd wẽndẽ n tãag masã, neb wʋsg tagsg yaa wa yãmba. (Yɩɩn. 104:33, 34) Wʋsg sak n monga b mens bũmb kẽer sẽn na yɩl n tũ a Zeova. Sõmb n da yaa woto ne neb nins b sẽn da boond tɩ Nazireyẽ-rãmb bɩ “ned b sẽn dɩk n kõ” pĩnd wẽndẽ Israyɛllã soolmẽ wã. Nazireyẽ-rãmbã ra yaa Israyɛll neb sẽn tar yẽesem, sẽn sak n mong b mens bũmb toor-toor a Zeova yĩnga. A Moyiiz Tõogã ra kõta pag bɩ rao sore, t’a tõe n pʋlem a Zeova n yãk yam n yɩ Nazireyẽ wakat takɩ yĩnga. (Sõdb 6:1, 2) Ned sã n da pʋlem woto, a ra segd n tũu noy sẽn da pa tɩlɛ tɩ Israyɛll neb a taabã tũ ye. Bõe n da tõe n kɩt tɩ Israyɛll ned yãk yam n lebg Nazireyẽ? Yaa vẽeneg tɩ yaa a sẽn nong a Zeova wʋsgo, la a sũur sẽn noom ne bõn-sõma nins a Zeova sẽn kõ-a wã yĩnga.—Tõo. 6:5; 16:17. w24.02 14 s. a 1-2

Biiblã pʋgẽ, b sã n gomd “maan-sɩd” yelle, bilgda nonglem sẽn tar pãng wʋsgo. Naoor wʋsgo, a bilgda a Zeova sẽn nong a nin-buiidã to-to wã. B mi n pʋda gom-bi-kãnga, tɩ bilgd Wẽnnaam nin-buiidã sẽn nong taab to-to wã me. (2 Sãm. 9:6, 7) D maan-sɩdã pãng tõe n paasda bilf-bilfu. D ges a Dãniyɛll sẽn maan to-to t’a maan-sɩdã pãng paase. A Dãniyɛll vɩɩmã tõre, bũmb toor-toor n maan tɩ yɩ tɩlɛ t’a wilg a sã n na n kell n maana sɩd ne a Zeova. Yaa a sẽn wa n tar yʋʋm 90 la zakã la a paam makr ning sẽn yaa kãseng n yɩɩdã. Naabã tʋm-tʋmdbã ra kisa a Dãniyɛlle, la b ra maand b toog kae ne Wẽnnaam ning a sẽn tũudã. Rẽ n so tɩ b maan sɩlem n na n kɩt tɩ b kʋ a Dãniyɛlle. B kɩtame tɩ rĩmã yiis noore, tɩ lebg tɩlɛ t’a Dãniyɛll wilg a sã n na n kell n maana sɩd ne Wẽnnaam, bɩ ne rĩmã. Bũmb ning a Dãniyɛll sẽn da segd n maan n wilg t’a bee rĩmã poorẽ, yaa a bas a Zeova pʋʋsg rasem 30. La a Dãniyɛll yãka yam n na n kell n maan sɩd ne a Zeova.—Dãn. 6:12-15, 20-22. w23.08 5 s. 10-12

A Zeova ratame tɩ d ket n wilgd d tẽed-n-taasã tɩ d nong-b lame. Ned sã n wa pa maan tõnd wa kiris-ned sẽn tog n maanã, d segd n kɩsa sɩd t’a pa maan ne pʋ-toogo, la t’a maoodame n na n maan sẽn yaa tɩrg a Zeova nifẽ. (Yel. 12:18) Wẽnnaam nonga neb nins sẽn maand sɩd ne-a wã, baa ne b sẽn pa zems zãngã. D sã n wa maan yel-wẽnde, a pa yɩt tao-tao n sãam d zoodã ye. A sũurã pa yikd ne tõnd n pa sigd me ye. (Yɩɩn. 103:9) D sũur yaa noog wʋsg d Ba wã sẽn kõt-d sugrã, tɩ d rat n dɩkd a togs-n-taar n kõt d taabã sugri. (Efɛɛ. 4:32–5:1) Tẽeg-y me tɩ saabã sẽn kolgdã, d segd n modgame tɩ tõnd ne d tẽed-n-taasã zemsd taab sõma. D miime tɩ b sẽn namsd tõnd d tũudmã yĩngã tõe n kengame. B tõe n yõk-d lame meng n kẽes bãens roog d tũudmã yĩnga. Yaa wakat a woto la d rat d tẽed-n-taasã sõngr n tɩ yɩɩda.—Yel. 17:17. w24.03 15-16 s. a 6-7

Biiblã pʋgẽ, b gomda kom-bɩɩs sẽn bao a Zeova zoodo, n ta a yam tɩ b vɩɩmã yɩ sõma yelle. Wala makre, a Davɩɩde. A sẽn wa n yaa bi-bɩɩgã, a yãka yam n tũ Wẽnnaam, n wa lebg rĩm sẽn kell n maan sɩd ne-a. (1 Rĩm. 3:6; 9:4, 5; 14:8) D sã n zams a Davɩɩd kibarã, a sẽn maan sɩd ne a Zeova to-to wã na n kenga d raoodo, tɩ tõnd me maan sɩd ne a Zeova. Y leb n tõe n zãmsa a Mark wall a Tɩmote kibarã. Y na n yãame tɩ b sɩnga a Zeova tũub hal b yãadmẽ, n kell n tũ-a ne b sũur fãa. B sẽn yãk yam n tũ a Zeova wã yɩ-a-la noogo. Y vɩɩmã sẽn na n wa yɩ to-to wã bee ne y sẽn vɩ to-to rũndã-rũndã wã. Y sã n teeg a Zeova n pa teeg y meng tagsgo, a na n sõng-y lame tɩ y yãkd yam sẽn yaa sõma. Y na n paama vɩɩm sẽn tar bark la sũ-noogo. Tẽeg-y t’a Zeova nanda bũmb nins y sẽn maand yẽ yĩngã. Bũmb pa be t’a yõodã yɩɩd d sẽn na n tũ d saasẽ Ba wã sẽn nong-dã ne d sũur fãa ye. w23.09 13 s. 18-19

Tẽn-tʋmd a Poll ra miime t’a tẽed-n-taasã pa zems zãng ye. Wala makre, a sẽn wa n lebg kiris-ned paalmã, tigingã neb kẽer da pa tẽed t’a sɩd lebga kiris-ned ye. (Tʋʋ. 9:26) Kaoosg zugẽ, sãnda n da wɩt-a n dat n sãam a yʋʋrã. (2 Kor. 10:10) A Poll yãa saam-biig a ye sẽn da lʋɩt taoor sẽn yãk yam n maan bũmb sẽn pa sõma, tɩ ra tõe n sãam neb kẽer tẽebo. (Gal. 2:11, 12) Sẽn paase, a Mark sẽn da yaa a Poll tũud-n-taagã maana bũmb n sãam a sũur wʋsgo. (Tʋʋ. 15:37, 38) A Poll ra tõe n basame tɩ bõn-kãensã a ye meng kɩt t’a lak a meng ne neb nins sẽn sãam a sũurã. Baasgo a ra ket n nanda a saam-biisã la a saam-bi-pogsã, n da ket n tũud a Zeova ne a sũur fãa me. Bõe n sõng a Poll t’a pa koms raoodo? A ra nonga a tẽed-n-taasã. A sẽn da nong a taabã sõng-a lame t’a zʋʋg b pãn-komsmã, n get b zʋg-sõma wã. Nonglmã sõnga a Poll t’a maan bũmb ning rũndã daar vɛrse wã sẽn yetã. w24.03 15 s. a 4-5

Biiblã tara kibay wʋsg sẽn wilgd tɩ sũ-bʋgsem yaa sõma wʋsgo. D gom a Izaak yelle. A sẽn wa n tɩ zĩnd Geraar sẽn pẽ Filisti soolmẽ wã, a yagsã sẽn yaa sũ-ki-nebã yẽda buls nins a ba wã tʋm-tʋmdbã sẽn da tu wã. A Izaak pa bao n na n zab n deeg bulsã ye. A yika ne a zakã rãmb n kẽng taoor bilfu, n tɩ tu buls a taaba. (Sɩng. 26:12-18) La Filisti nebã yeelame tɩ bul-kãens koomã me yaa bãmb n so. A Izaak pa zab ye. (Sɩng. 26:19-25) Bõe n sõng-a t’a kell n bʋk a menga, baa neb a taabã sẽn da baood a noorã? Sãmbg sẽn kae, a ra geta mak-sõng ning a ba wã ne a ma wã sẽn kõ wã. A ra nee a Abrahaam sẽn da baood laafɩ to-to wã, la a Saara sẽn da tar “laafɩ la bʋgsem yamã,” n dɩkd b togs-n-taare.—1 Pɩy. 3:4-6; Sɩng. 21:22-34. w23.09 15 s. a 4

A Zeova tʋma a Bi-kãsengã tẽngã zug t’a wa zãms nebã Rĩungã sẽn yaa a soaba, la a kõ a vɩɩmã tɩ yɩ maoong sẽn na yɩl tɩ ninsaalbã paam d meng ne yel-wẽndã la kũumã. Rẽ poore a Zeezi vʋʋgame n leb saasẽ, n tɩ lebg Wẽnnaam Rĩungã Rĩma. Biiblã gom-zugã yaa a Zeova yʋʋrã na paam waoogre, t’a raabã pids tẽngã zug ne a Rĩungã a sẽn bobl Kiristã maasem. Bũmb pa tõe n toeem a Zeova raabã ye. A pʋlmame tɩ bũmb fãa na n yɩɩ wa a sẽn yeelã. (Eza. 46:10, notã; Ebre. 6:17, 18) Tẽngã na n wa lebga arzãna, t’a Ãdem ne a Awa kamb la b yagens sẽn zems zãng la sẽn yaa nin-tɩrs vɩɩmd a zug “wakat sẽn kõn sa.” (Yɩɩn. 22:26) La pa woto bal la a Zeova rat n maan ye. A ratame tɩ malɛgsã sẽn be saasẽ wã ne ninsaalbã sẽn be tẽngã zugã fãa naag taab n waoogd-a. Dẽ, bõn-vɩɩsã fãa na n sakd-a lame la b teend a naamã. (Efɛɛ. 1:8-11) Y sũur pa noom ne bũmb nins fãa a Zeova sẽn maand sẽn na yɩl n pids a raabã sɩda? w23.10 20 s. a 7-8

Zʋɩf-rãmb nins sẽn yi Babilonnã sẽn ta Zerizalɛmmã, pa yã n kaoos la b seg zu-loees toor-toor ye. Wala makre, ra yaa toog tɩ b ges b zagsã rãmb yelle, tɩ tẽn-yagsã me ra gɩdgd b tʋʋmdã. Sẽn paase, gudgr n da be Pɛrs soolmẽ wã. Rẽ kɩtame tɩ kẽer da getẽ tɩ yaa toog tɩ b lʋɩɩs a Zeova roogã meeb taoore. Rẽ n so t’a Zeova tʋm no-rɛɛsdb a yiib sẽn na yɩl tɩ b sõng a nin-buiidã tɩ b le paam yẽesem. Yaa a Aaze ne a Zakari. (Aaze 1:1; Zaka. 1:1) No-rɛɛsdb a yiibã sẽn keng b raoodã woma biis sõma. La na maan yʋʋm 50 rẽ poore, Zʋɩf-rãmb nins sẽn yi Babilon n leb Zerizalɛmmã wa n dat n komsa raoodo. A Ɛsdras sẽn da yaa seb-gʋlsd sẽn mi Tõogã sõma wã yii Babilon n wa Zerizalɛm n na n keng Wẽnnaam nin-buiidã raoodo, sẽn na yɩl tɩ b lʋɩɩs tũudum hakɩɩkã taoore. (Ɛsd. 7:1, 6) A Aaze ne a Zakari bãngr-goamã sõnga Wẽnnaam nin-buiidã pĩnd wẽndẽ wã, tɩ b kell n teeg a Zeova b sẽn wa n gɩdgd b tʋʋmdã. B bãngr-goamã tõe n sõnga tõnd me rũndã-rũndã tɩ d kell n teeg a Zeova sẽn yaa zu-loɛɛg ning fãa taoore.—Yel. 22:19. w23.11 14-15 s. a 2-3

Wãn to la d tõe n wilg tɩ d nonga d tẽed-n-taasã? Bũmb a ye d sẽn tõe n maan yaa d sẽn na n belsd-ba. D sã n zoet taab nimbãanega, d na n tõog n ‘ket n belsda taaba.’ (1 Tes. 4:18) Bõe la d tõe n maan n ket n nong taab sõma? Yaa d sẽn na n maand d sẽn tõe fãa n kõt d taabã sugri. Bõe yĩng tɩ tar yõod wʋsg rũndã-rũndã tɩ d wilgdẽ tɩ d nonga taaba? Ges-y-yã a Pɩyɛɛr sẽn yeel bũmb ningã: “Bũmb fãa saab kolgame. Woto yĩnga, . . . bɩ y nong taab wʋsgo.” (1 Pɩy. 4:7, 8) Dũni-kãngã saabã sẽn kolgdã, bõe n tõe n maane? A Zeezi pĩnd n yeela a karen-biisã yaa: “Buud toɛy-toɛyã fãa na n kisga yãmb mam yʋʋrã yĩnga.” (Mat. 24:9) Sẽn na yɩl n kell n maan sɩd ne a Zeova baa ne b sẽn na n kisg-dã, yaa tɩlɛ tɩ d zemsd taaba. D sã n nong d tẽed-n-taasã, a Sʋɩtãan pa na n tol n tõog n welg tõnd ye. Bala “nonglem kɩtdame tɩ neb zemsd taab sõma.”—Fili. 2:1, 2. w23.11 13 s. 18-19

Sɩdã sẽn be Wẽnnaam Gomdã pʋgẽ wã tara pãng wʋsgo. D sã n gomd a Zeova yell ne nebã, la d sõngd-b tɩ b bãngd a sẽn sɩd yaa Wẽnnaam ning buudã, d yãta rẽ sẽn nafd-b to-to. Ziri nins a Sʋɩtãan sẽn yelgdã pa na n le lud b yamã ye. Sẽn paase, b na n bãnga d saasẽ Ba wã sẽn nong-dã zʋg-sõma wã. B sũur na n yɩɩ noog wʋsg ne a Zeova pãngã sẽn ka koakã. (Eza. 40:26) B na n kɩs-a-la sɩda, a tɩrlmã sẽn zems zãngã yĩnga. (Tõo. 32:4) A Zeova yam-kãsengã na n kɩtame tɩ b yamã vẽnege. (Eza. 55:9; Rom. 11:33) B na n bãngame t’a yaa nonglem, tɩ bels-ba. (1 Zã 4:8) B sẽn pẽnegd a Zeova n paasdẽ wã, b manegd n kɩsa sɩd tɩ b na n wa lebga a kamba, n vɩɩmd wakat sẽn kõn sa. D sẽn paam n tõe n sõng neb a taabã tɩ b pẽneg b saasẽ Ba wã yaa zu-zẽkr tɛkẽ! D sã n maand woto, a Zeova getame tɩ d yaa a “tʋmd-n-taase.”—1 Kor. 3:5. w24.02 12 s. 15

Yãmb sã n zãmsda Biiblã, wall y roagdbã yaa a Zeova Kaset rãmba, y magdame n na n wa reeg lisg bɩ? Sã n yaa woto yaa sõma wʋsgo. La nand tɩ y reeg lisgu, y segd n dɩka y meng n kõ a Zeova. Wãn to la ned rɩkd a meng n kõ a Zeova? Y pʋʋsda a Zeova, n pʋlm-a tɩ yaa yẽ a ye bal la y na n tũ, la tɩ y na n lʋɩɩsa a raabã taoore. Sɩd-sɩda y pʋlemda a Zeova tɩ y na n kell n nong-a-la “ne y sũurã fãa, ne y sɩɩgã fãa, ne y yamã fãa, la ne y pãngã fãa.” (Mark 12:30) Rɩk f meng n kõ a Zeova wã yaa yãmb ne yẽ sʋk bala. La lisgã reegrã yaa zãma sʋka. A wilgda neb a taabã tɩ y rɩka y meng n kõ a Zeova. Y sã n dɩk y meng n kõ a Zeova, pa reem bũmb ye. A Zeova ratame tɩ y pids bũmb ning y sẽn pʋlm-a wã. Yãmb me raabã segd n yɩɩ woto.—Koɛ. 5:4. w24.03 2 s. a 2; 3 s. a 5

Kãadem buud fãa tara zu-loeese. Biiblã yeela vẽeneg tɩ “neb nins sẽn kẽed kãadmã na n paama zu-loeese.” (1 Kor. 7:28) Bõe yĩnga? Bala pagã ne a sɩdã fãa yaa neb sẽn pa zems zãnga, n tar zʋg toor-toore, tɩ b ned kam fãa tar a sẽn nong la a sẽn pa nonge. B minimdã wall b sẽn wub-b to-to wã me tõe n yaa toor-toore. B kãadmã poore b nin-yɛng tõe n wa talla manesem sẽn wilgd t’a tara zʋg-wẽnga, t’a to wã ra pa miẽ ye. Bõn-kãensã a ye meng tõe n waa ne zu-loeese. Sã n wa yaa woto, wall tɩ b ned kam fãa sak n deeg t’a tara taal zu-loɛɛgã pʋgẽ n segd n bao a tɩɩmã, ned kam fãa ningda a to taale. B tõe n wa tagsdame meng tɩ yellã tɩɩm yaa b sẽn na n welg taab wall b kao kãadmã. La yellã tɩɩm yaa b sẽn na n welg taab wall b kao kãadmã sɩda? Ayo. A Zeova ratame tɩ ned sẽn kẽ kãadem tũ noy nins a sẽn gãneg kãadmã wɛɛngẽ wã, baa a to wã sã n kɩt tɩ yɛlã pa nana. w24.03 16 s. a 8; 17 s. 11

Baa y sẽn dɩk y meng n kõ a Zeova n deeg lisgã poore, y sẽn kell n paas y bãngrã la y tẽebã pãngã, y maneg n kɩsa sɩd ne y sẽn saagd n na n vɩɩmd wakat sẽn kõn sa tẽngã sẽn na n lebg arzãnã zugã. (Ebre. 5:13–6:1) Yaa vẽeneg tɩ y yãame tɩ Rom dãmb 5:2-4 sẽn yet bũmb ningã yaa sɩda. Y sega zu-loees buud toor-toore, la y tõoga toogo, n neẽ tɩ y tata Wẽnnaam yam. Y sẽn kɩs sɩd tɩ y tata Wẽnnaam yamã yĩnga, y tara bʋʋm-tɩrg n na n bas y yam tɩ y na n paama bũmb ning a sẽn pʋlmã. Y saagrã paama pãng n yɩɩd pĩndã. Maneg n lebga vẽeneg ne-yã. A toeema bũmb wʋsg y vɩɩmã nens fãa pʋgẽ. Wala makre, y manesem sẽn yaa a soab ne y zakã rãmba, y yam-yãkr toor-toorã, la y sẽn dɩkd y sẽkã n maand bũmb ninsã. Tẽn-tʋmd a Poll paasa bũmb a to sẽn tar yõod wʋsg saagrã wɛɛngẽ. Yaa bũmb y sẽn paamd y sẽn wat n kɩs sɩd tɩ y tata Wẽnnaam yam. A yeelame tɩ y bas y yam tɩ y sẽn saagd n na n wa paam bũmb ningã na n pidsame.—Rom. 15:13. w23.12 12-13 s. 16-19

D sã n wa maood ne zu-loe-kɛgenga, d sẽn get yɛlã to-to wã, d tagsa wã la d manesmã tõeeme n pa yɩ wa raasenkamã ye. Zu-loɛɛgã tõe n tar-d lame n lengdẽ, wa sobg sẽn lengd koom-koglgo. Woto wã, zu-loɛɛg sã n wa kɩt tɩ d pa mi d sẽn maandga, wãn to la a Zeova sõngd tõndo? A pʋlmame t’a na n sõng-d lame tɩ d ra maan yɩɩr tɩ loog ye. Sob-kãseng sã n yik mogrã zugu, tõe n kɩtame tɩ koom-koglg lengd goabg la rɩtgo, tɩ tõe n wa ne yelle. Sã n wa yaa woto, koom-kogend wʋsg tara bũmb b sẽn tõe n yiis koglgã goabg la rɩtgo. Bõn-kãens sõngdame tɩ koom-koglgã ra leng wʋsg ye. Woto, neb nins sẽn be koom-koglgã pʋgẽ wã paamda koglgo, tɩ so-toakã ra nams-b wʋsg me ye. La yaa koglgã sã n ket n kẽnd la bõn-kãens tar yõod n yɩɩda. Woto me, yaa d sã n ket n tũud a Zeova ne d sũur fãa zu-loees wakat la a na n sõng-d tɩ d ra maan yɩɩr tɩ loog ye. w24.01 22 s. a 7-8

Y sã n wa maand rabeem bɩ y sok y meng yaa: ‘Bõe la a Zeova zoe n maane?’ Tags-y bũmb nins a sẽn naanã yelle. Wala makre, “maag-y y yĩng n ges” a Zeova sẽn get liuuli wã la tɩ-puudã yell to-to, baa a sẽn pa naan-b a meng wõneg tɩ b tõe n waoog-a wã. D sã n maag d yĩng n bʋgs rẽ zugu, tõe n sõng-d lame tɩ d maneg n kɩs sɩd t’a Zeova na n gesa d yelle. (Mat. 6:25-32) Tags-y bũmb nins a Zeova sẽn maan n kõ neb sẽn tũ-a pĩnd wẽndẽ la rũndã-rũndã yelle. Y tõe n zãmsa ned sẽn zĩnd pĩnd wẽndẽ n tall tẽeb kibare, wall y karem ned sẽn tũud a Zeova rũndã-rũndã kibare. Sẽn paase, bʋgs-y-yã a Zeova sẽn zoe n sõng-y to-to wã zugu. Wala makre, a sẽn sõng-y to-to tɩ y bãng sɩdã, (Zã 6:44) a sẽn leok y pʋʋsg to-to, (1 Zã 5:14) la a Bi-nongrã maoongã sẽn nafd-y to-to beoog sẽn vẽeg fãa.—Efɛɛ. 1:7; Ebre. 4:14-16. w24.01 4 s. a 6; 7 s. 17