Nebã ket n teenda sõngr siglsã bɩ?
YƲƲMD 2001, bõn-bɩʋʋng kiuugã rasem 11, bi-beesã sẽn dɩk sɩls n tɩ wẽ Niuyork la Wasĩntonã poore, kũunã zãmã wã sẽn lagem n kõ sẽn na yɩl n sõng yel-beedã sẽn paam b rãmbã yɩɩ hal kẽengo. Sõngr sigls nins sẽn ges-b ligdã la kũunã buud toor-toor tigsg yellã paama sẽn yɩɩd dollar milyõ a 2 la pʋɩ-sʋka, nebã sẽn kõ tɩ b sõng zags nins yel-beedã sẽn paama neba. Sãoongã sẽn yɩ kãseng tɩ loog noorã sãama nebã sũyã, tɩ kɩt tɩ zĩig zãnga, b tʋlg ne b sũy fãa n kõ sõngre.
La baasgo, tao-tao bala, neb kẽer sũy sãamame, b sẽn wa n bãng tɩ sõngr sigls nins yʋy sẽn da yi wʋsgã wẽneg n soogda kũunã. Kɩbar sẽn wa n yi n wilgdẽ tɩ sõngr sigl-kãseng a ye ra geendame n na n dɩk ligd sẽn kolg Ero milyõ 512 pʋɩ-sʋk b sẽn kõ sõngrã yĩng n tʋm tʋʋm a taabã, nebã sũy sãama hal wʋsg tɩ b tʋ-b n kãas raado. Baa ne siglgã sẽn toeem yam la a kos sugrã, pag a ye sẽn yaa kiba-kɩt gʋlsame n wilg tɩ: “Yel-kãngã sãbsdbã getame tɩ yam toeeng kãngã pa tõe n kɩt tɩ b ye tall bas-yard ne-b” wa sẽn deng bõn-bɩʋʋng kiuugã rasem 11 yel-beedã ye. Yaa wãn to ne yãmb yẽ? Sẽn pa kaoos pʋgẽ bas-yard ning y sẽn da tar ne sõngr siglsã sɩnga boogr bɩ?
Kũun maaneg tara yõod bɩ, bɩ yaa laog sãoongo?
Naoor wʋsgo b nong n getame tɩ kõ sõngr siglsã kũun yaa bũmb sẽn zems pẽgre. La pa nebã fãa n tagsd woto ye. Sẽn yɩɩd yʋʋm 200 sẽn looge, Ãngeletɛɛr seb-gʋlsd a Samuel Johnson gʋlsa woto: “F tara hakɩk tɩ f sã n yaood tʋm-tʋmdb b tʋʋmd ligdi f maanda neere, n yɩɩd f sẽn na n kõ ligd woto bal tɩ sõngr daab yĩnga.” Rũndã-rũndã neb kẽer sɩd pa ye rat n kõ ye, la kɩbayã sẽn wilgd sõngr siglsã sẽn zãad ligdã la kũunã ne manesem wẽng ningã pʋs n pa kɩtd tɩ zãmã wã tall bas-yard ne-b ye. D ges makr a yiib sẽn zĩnd sẽn nan pa kaoose.
Sãn Frãnsisko soolmẽ wã, tũudum sõngr siglg taoor soab la b yiis a tʋʋmdẽ, a sẽn dɩk sõngrã ligd n tɩ maan a meng wopeere nagem yĩnga, la a yao a rɩɩb ligd sẽn ta dolaar 500 semen fãa sẽn na maan sẽn yɩɩd yʋʋm a yiibã yĩnga. Gãrãnd Bertayn, televiziõ ro-kãseng sẽn wilgd sõngrã yɛlã sigendb sũy sãamame, bala b mikame tɩ b sẽn kõ ligd sẽn yɩɩd milyaar a yoob tɩ b tɩ sõng kɩɩbsã Rumani tẽngã, yaa ro-yaals 12 bal la b me-yã, n yaool n pa wilg b sẽn dɩk dolaar milyõ rãmb ka tɛkã sẽn kellã n tʋm bũmb ning ye. Wa sẽn zemse, kɩba-kãensa buudã kɩtame masã tɩ kõtbã gũusd n yɩɩd ne b sẽn na n kõ tɩ ta zĩig ninga, la ned ning b sẽn kõtã.
Y na n kõome bɩ y pa na n kõ?
Pa yɩtẽ sõma tɩ d bas tɩ neb bɩ sigls a wãn bal tʋʋm yood yĩng kɩt tɩ d ye pa rat n tall nimbãan-zoeer n kʋm neb a taabã ye. Biiblã yeelame: “Tẽeb sẽn yaa sõama sẽn ka tar yell tõnd Ba a Wẽnnaam nifẽ yaa tɩ kẽng n sõng kɩɩbs ne pʋg-kõapa bãmb toog pʋgẽ.” (Zak 1:27) N-ye, kiris-ned fãa segd n gesa naong rãmbã la neb nins sẽn pa tar sõngrã yelle.
La baasgo, y tõe n sokda y meng woto: ‘Rẽ yĩnga m segd n ket n teenda sõngr siglsã bɩ, bɩ m na n tolg n sõngda nebã m toor masã?’ Yaa kũun manesem bʋg buud la Wẽnnaam baood tɩ d maane? Sõsg ning sẽn pʋgdã na n leoka sok-kãngã.