Vẽnegr nins sẽn tɩ loe ne Wẽnnaam Rĩungã lebga yel-sɩda
“Yaa sõama yãmb sã n ges [bãngr-gomdã] wa yãmb sẽn get fɩtl sẽn yãgd lik zĩigẽ.”—2 PƖƐƐR 1:19.
1. Bõe ne bõe sẽn yaa lebend ne taab la d yãt dũniyã pʋgẽ rũndã-rũndã?
DŨNI kãngã bee gudgr woo gudgr pʋgẽ. Sẽn sɩng ne weoogã sãoong wʋsgã n tɩ ta terorismã sẽn be dũniyã gill zugã, wõnda ãdem-biisã zu-loees ka tɩɩm ye. Baa dũniyã tũudum toɛy-toɛyã pa tõog n sõng n gɩdg yel-kãensã ye. Togs sɩda, naoor wʋsgo, bãmb menga kɩtame tɩ nebã sẽn gãd b tagsa wã dem-dem tɩ sugr kaẽ wã, taab kisgrã, la tẽn-nonglmã sẽn wat ne welgr nebã sʋkã paasdẽ. N-ye, wala b sẽn deng n togsã, “lik” n lud “dũniyã.” (Ezai 60:2) La sasa kãng pʋgẽ me, neb milyõ rãmb n get beoog-daarã ne bas-m-yam. Bõe yĩnga? Yaa b sẽn kelgd Wẽnnaam bãngr-goamã wa “fɩtl sẽn yãgd lik zĩigẽ” wã yĩnga. B basdame tɩ Wẽnnaam “goama” bɩ a koɛɛgã sẽn be Biiblã pʋgẽ wã wilg-b sore.—2 Pɩɛɛr 1:19.
2. Sã n yaa ne a Daniɛll bãngr-gomd ning sẽn tɩ loe ne ‘sɛɛbã wakatã,’ ãnd dãmb bal la Wẽnnaam sõngd tɩ b wʋm tẽebã yɛl võore?
2 No-rɛɛs a Daniɛll gʋlsa ‘sɛɛbã wakat’ wɛɛngẽ n yeel woto: “Neb wʋsg na n kẽnga ka la ka, la bãngr na n paasa wʋsgo. Neb wʋsg na n manega b mens n yɩ yɩlma n pɩle. La nin-wẽnsa fãa ka na n bãng ye; bãmb na n kell n maana wẽnga. La yam dãmba na n bãngame.” (Daniɛll 12:4, 10) Yaa neb nins bal sẽn ‘kẽngd ka la ka’ ne pʋ-peelem Wẽnnaam Gomdã pʋgẽ wã, bɩ sẽn zãmsd-a neere, n sakd a noyã, la b maood n na n maan a raabã la Wẽnnaam sõngd tɩ b wʋmd tẽebã yɛl võore.—Matɩe 13:11-15; 1 Zã 5:20.
3. Yʋʋmd 1870 tɛka, sɩd-kãseng bʋg la pipi Biiblã zãmsdb bãng-yã?
3 Yʋʋmd 1870 wã tɛka, sẽn deng tɩ ‘yaoolem wakatã’ sɩnge, Wẽnnaam a Zeova sɩngame n paasd vẽenemã “saasẽ rĩungã yel-solgds” zutu. (2 Tɩmote 3:1-5; Matɩe 13:11, NW ) Rẽ wẽnde, sẽn yaa lebend ne zãma wã sẽn da tagsd to-to wã, Biiblã zãmsdb sull bãngame tɩ Kirist lebgrã ra na n yɩɩ lebgr ninsaal nif sẽn pa tõe n yã ye. B sã n da kõ a Zezi naam saasẽ wã n sa, a ra na n lebg n waame, sẽn dat n yeel t’a sẽn yaa rĩmã, a ra na n gesa tẽng zug yɛlã yelle. Yɛl wʋsg ninsaal nif sẽn tõe n yã n na n yɩ bãnd sẽn na n sõng a Zezi karen-biisã tɩ b bãng t’a belmã ninsaal nif sẽn pa ne wã sɩngame.—Matɩe 24:3-14.
Bũmb ning b sẽn kãab a Zezi tedgrã pʋgẽ wã paamda pidsgu
4. Wãn to la a Zeova paas a rũndã-rũndã sõgen dãmbã pãng tẽebã wɛɛngẽ?
4 Vẽnegr ning sẽn tɩ loe ne a Zezi tedgrã ra yaa Kirist sẽn be Rĩungã ziir pʋgẽ reng-n-lɛmbg sẽn yaa kãsenga. (Matɩe 17:1-9) Vẽneg-kãngã paasa a Pɩɛɛre, a Zak ne a Zã tẽebã pãng sasa ning neb wʋsg sẽn da bas a Zezi tũubu, a sẽn pa maan bũmb nins bãmb sẽn da tẽed t’a na n maaname wã yĩnga. Woto, saabã wakat kãngã, a Zeova paasa a rũndã-rũndã sõgen dãmbã me tẽebã pãnga, a sẽn kɩt tɩ vẽenem tar paasg vẽneg-kãseng kãngã la bãngr-goam a taab sẽn tɩ loe ne rẽ pidsgã zutã. Masã, bɩ d ges yel-kãens sẽn kengd tẽebã kẽere.
5. Ãnd n yɩ yibeoog ãdgã, la wakat bʋg la wãn to la a ‘puk-yã’?
5 Tʋm-tʋmd a Pɩɛɛr goma a Zezi tedgrã yell n gʋls woto: “Tõnd tara Wẽnnaam no-rɛɛsdba goama sẽn tar võor [bɩ bas-m-yam] n yɩɩda. Yaa sõama yãmb sã n ges bãmb wa yãmb sẽn get fɩtl sẽn yãgd lik zĩigẽ hal tɩ zĩiga yẽege tɩ yibeoog ãdg puk yãmb sũyã pʋsẽ.” (2 Pɩɛɛr 1:19) Makr wɛɛngẽ ‘yibeoog ãdgã’ yaa a Zezi Kirist sẽn paam ziirã. (Wilgri 22:16) A ‘puka’ yʋʋmd 1914, Wẽnnaam Rĩungã sẽn wa n lugl saasẽ, tɩ yɩ wakat paalg sɩngrã. (Wilgri 11:15) Vẽnegr ning sẽn tɩ loe ne a Zezi tedgrã pʋgẽ, a Moiiz ne a Eli pukame n yɛgl a Zezi n sõsd ne-a. Yaa ãnd dãmb la b makda?
6, 7. Ãnd dãmb la a Moiiz la a Eli makd a Zezi tedgrã pʋgẽ, la yel-kãsems bʋs la Gʋlsg Sõamyã wilgd neb nins b sẽn makdã wɛɛngẽ?
6 A Moiiz ne a Eli sẽn naag Kirist ziirã pʋgẽ wã yĩnga, kaset rãmb a yiib kãensã sẽn yaa wẽn-sakdbã segd n makda neb nins sẽn dɩt naam ne a Zezi a Rĩungã pʋgẽ wã. B sẽn yeel t’a Zezi tara na-rɩt-n-taasã zemsa ne vẽnegr ning no-rɛɛs a Daniɛll sẽn paamã, sẽn tɩ loe ne Mesi wã b sẽn kõ naamã. A Daniɛll yãa ned “sẽn wẽnd ninsaal” biig sẽn deegd naam sẽn na n kaoos “wakat fãa,” “wakat fãa naaba” sẽn yaa Wẽnnaam a Zeova wã nengẽ. La ges-y b sẽn wilg a Daniɛll bũmb ning rẽ poor bilfã. A gʋlsame: “B na n kõo Wẽnnaam Sẽn-ka-to neba [nin-sõmsã, NW ] soolma fãa sẽn be dũniyã zuga naam la a pãng tɩ b sooge.” (Daniɛll 7:13, 14, 27) N-ye, sẽn yɩɩd yʋʋm kobs-nu sẽn deng a Zezi tedgrã, Wẽnnaam wilgame tɩ ‘nin-sõms’ kẽer me na n paama Kirist naamã ziiri.
7 Nin-sõms nins a Daniɛll sẽn yã vẽnegrã pʋgẽ wã yaa ãnda rãmba? Yaa nin-kãens yell la tʋm-tʋmd a Poll sẽn gom n yeel tɩ: “Sɩɩg Sõng menga kɩta kaset ne tõnd sɩɩse tɩ tõnd yaa Wẽnnaam kamba. La tõnd sẽn yaa Wẽnnaam kamba, tõnd yaa neb nins Wẽnnaam sẽn bĩng b paoong b yĩnga, la tõnd yaa pʋɩt-n-taas ne Kirist, tõnd sã n paam pʋɩɩr ne bãmb namsgã, tõnd na n paama pʋɩɩr ne bãmb waoogra me.” (Rom dãmba 8:16, 17) Nin-sõmsã pa neb a taab n zʋʋg a Zezi karen-biis nins sẽn paam vʋʋsem sõng zaeebã ye. Wilgr sebrã pʋgẽ a Zezi yeelame: “Ned ninga sẽn na n tõoge, mam na kɩt tɩ yẽ zĩnd ne maam m geera zug wa mam me sẽn tõoge la m zao ne m Ba bãmb geera zugã.” Neb nins sẽn “tõoge,” la sẽn vʋʋgã sõorã sẽn yaa neb 144 000 na n dɩɩ naam tẽngã neb zut ne a Zezi.—Wilgri 3:21; 5:9, 10; 14:1, 3, 4; 1 Korẽnt dãmba 15:53.
8. Wãn to la a Zezi karen-biis nins sẽn paam vʋʋsem sõng zaeebã tʋm tʋʋmd sẽn wõnd a Moiiz la a Eli rẽndã, la rẽ woma bi-bʋse?
8 La bõe yĩng t’a Moiiz ne a Eli makd kiris-neb nins sẽn paam vʋʋsem sõng zaeebã? Yaa tɩ sul-kãngã neb sã n ket tẽng zug fãa, b maanda tʋʋmd sẽn wõnd a Moiiz la a Eli sẽn maan a soaba. Wala makre, b yaa a Zeova kaset rãmba, baa b sã n namsd-b b tẽebã yĩnga. (Ezai 43:10; Tʋʋma 8:1-8; Wilgri 11:2-12) Wala a Moiiz la a Eli, ne raoodo, b pukda ziri tũudmã bãongo, la b sagend pʋ-peelem dãmbã tɩ b sak Wẽnnaam ne b sũyã fãa. (Yikri 32:19, 20; Tõodo 4:22-24; 1 Rĩm dãmba 18:18-40) B tʋʋmdã woma biis bɩ? N-ye. B sẽn sõng n tigim sẽn zae-bã tɩ b sõorã pidã toor sẽn ka be, b sõngda ‘piis a taabã’ neb milyõ rãmbã, sẽn na yɩl tɩ b sak a Zezi Kirist.—Zã 10:16; Wilgri 7:4.
Kirist baasda a tõogrã
9. Wãn to la Wilgr 6:2 bilgd a Zezi sẽn yaa to-to rũndã-rũndã?
9 A Zezi pa leb n yaa ninsaal bal sẽn zao bõn-bil ye, masã a yaa Rĩm sẽn tar pãnga. B bilg-a lame t’a zao wed-moaaga, tɩ rẽ yaa goam sẽn makd zabr Biiblã pʋgẽ. (Yelbũna 21:31) Wilgri 6:2 yetame: “Mam gesame, la haya! mam yãa wed-pɛɛlga. La sẽn zao-a weefa tara tãpo, la b kõo yẽ maanfo, la a kẽngame, [n yaa tõogda, n na n tɩ baas a tõogrã, NW ].” Sẽn paase, yɩɩl gʋlsd a Davɩɩd gʋlsa woto a Zezi wɛɛngẽ: “[A Zeova] na n kɩtame tɩ y zĩnd Siõ n tẽeg y naam dasaar n dɩ naam y bɛɛba sʋka.”—Yɩɩl Sõamyã 110:2.
10. a) Wãn to la a Zezi sẽn zomb wed-moaagã n na n zab n tõogã sɩng ne ziiri? b) Kirist pipi tõogrã waa ne bõe dũniyã gill zugu?
10 A Zezi sẽn tõog-b rãmb pipi wã yɩ a bɛɛb nins sẽn tar pãng n yɩɩdã, a Sʋɩtãan ne a zĩn dãmbã. A rig-b lame n yiis saasẽ, n sik-b tẽngã zugu. Malɛg-wẽns kãensã sẽn mi tɩ b wakatã lebga bilfã yĩnga, b sikda b sũ-yikrã ãdem-biisã zutu, n wat ne yel-beedo. Wilgr sebrã maka to-kãens ne wed-rʋʋdb a tãab zoeese. (Wilgri 6:3-8; 12:7-12) Wala sẽn zems ne a Zezi bãngr-gomd ning sẽn tɩ loe ne ‘bãnd ninga sẽn na n wilg [a belmã,] la dũniyã sɛɛbã,’ wed-moosã zoees waa ne zaba, kom la bã-kʋʋdga. (Matɩe 24:3, 7; Luk 21:7-11) Wala rogem toog meng-mengã, sãmbg sẽn ka be, ‘to-kãensã’ wẽnem na n paasdame hal tɩ Kirist wa “baas a tõogrã” n sãam a Sʋɩtãan tẽng zug siglgã zãng fasɩ.a—Matɩe 24:8.
11. Wãn to la yɛlã sẽn yɩ to-to ne kiris-neb tigingã sɩngr n tõk masã wã wilgd tɩ Kirist yaa Rĩm sẽn dɩt naam?
11 A Zezi naamã yaa vẽeneg me ne a sẽn kogl kiris-neb tigingã, sẽn na yɩl t’a maan a tʋʋmd ning sẽn yaa moon Rĩungã koɛɛg dũniyã gill zugã. Baa ne Babilon Kãsengã sẽn yaa dũni gill ziri tũudmã kɩɩs-toaagã, la ne goosneema nins sẽn kis tõndã kɩɩsgã, moonegã tʋʋmd kẽngda taoore, la sẽn paase a leb n zãaga zĩig wʋsg rũndã-rũndã n yɩɩd a sẽn yɩ to-to zãmaan nins fãa sẽn loogã pʋgẽ. (Wilgri 17:5, 6) Ad woto sɩd yaa kaset sẽn tar pãng sẽn wilgd tɩ Kirist yaa Rĩma!—Yɩɩl Sõamyã 110:3.
12. Bõe yĩng tɩ neb wʋsg pa mi Kirist belmã a naamã pʋgẽ ninsaal nif sẽn pa ne wã?
12 Zu-bʋko, neb wʋsgo, baa neb milyõ rãmb sẽn yet tɩ b yaa kiris-neb pa mi tɩ yel-kãsems nins sẽn maand tẽngã zugã wilgda yɛl ninsaal nif sẽn pa ne ye. B pʋd n laada neb nins sẽn moond Wẽnnaam Rĩungã. (2 Pɩɛɛr 3:3, 4) Bõe yĩnga? Yaa a Sʋɩtãan sẽn lud b yamã yĩnga. (2 Korẽnt dãmba 4:3, 4) Sɩda, sẽn na maan yʋʋm kobs sẽn loog n ta masã, a Sʋɩtãan sɩngame n kẽesd kiris-neb ne yʋʋrã tẽebã lik pʋgẽ, tɩ rẽ kɩt tɩ b bas Rĩungã saagr sẽn tar yõod wʋsgã.
B basame n pa leb n tẽed Rĩungã waoong ye
13. Tẽeb likã waa ne bõe kiris-neb ne yʋʋrã zutu?
13 A Zezi reng n togsame tɩ sɩdã kɩɩsdb sẽn yaa wala nadens b sẽn bʋd ki sʋkã ra na n kẽe kiris-neb tigingã pʋgẽ n kẽes neb wʋsg weoogo. (Matɩe 13:24-30, 36-43; Tʋʋma 20:29-31; Ziid 4) Sẽn wa n beẽ-beẽ kiris-neb ne yʋʋr kãensã sak n maanda payẽ rãmb kibs rãmba, n tũud b rog-n-migsã, la b tẽed b zãmsgã hali n yeel meng tɩ bõn-kãens yaa “kiris-nebã” rẽnda. Wala makre, Nowɛllã sɩngr tɩ loee ne payẽ rãmb yel-maandɩ sẽn tɩ loe ne wẽnnaam dãmb a Methra la a Saturn balengo. La yaa bõe n tus kiris-neb ne yʋʋrã tɩ b sak kibs kãensã sẽn sɩd pa kiris-neb rẽndã? Bãngr sebr a yembr (Nouvelle Encyclopédie britannique [ãngil.], 1974) yeela woto: “B lugla Nowɛllã sẽn yaa a Zezi Kirist rogem kibsã, b sẽn wa n ye pa tẽed tɩ Kiristã waoong kolga wʋsgã yĩnga.”
14. Wãn to la a Orizɛn la a Ogistẽ zãmsgã golem sɩdã sẽn tɩ loe ne Rĩungã?
14 Ges-y gom-biig ning sẽn yaa “rĩungã” võor b sẽn golmã me. Sebr a yembr (Le Royaume de Dieu selon les interprétations au XX e siècle) yetame: “A Orizɛn [sẽn yaa yʋʋm kob-gĩnd a tãab-n-soab tũudum yel-mitã] waa ne toeengo, n kɩt tɩ kiris-nebã get ‘rĩungã’ masã wala Wẽnnaam sẽn dɩt naam ned sũur pʋgẽ.” Yaa bõe zug la a Orizɛn tik a zãmsgã? Pa Gʋlsg Sõamyã zut ye, la yaa “dũniyã neb zãmsg la b tagsg sẽn yaa toor ne a Zezi la a pipi karen-biisã tagsgã zugu.” A sebr ning gom-zug sẽn yaa Wẽnnaam galʋ-tẽngã (De Civitate Dei) pʋgẽ, a Ogistẽ sẽn yit Hippo (yʋʋmd 354-430) yeelame tɩ egiliizã meng yaa Wẽnnaam Rĩungã. Tags-kãngã sẽn pa tik Gʋlsg Sõamyã zugã kõo kiris-neb ne yʋʋr tũudmã bʋʋm tɩ b na n kẽ politikã pʋgẽ. La b rɩɩ naam n maan yʋʋm kobse, la naoor wʋsgo yaa ne toom.—Wilgri 17:5, 18.
15. Wãn to la Galat dãmba 6:7 paamd pidsg kiris-neb ne yʋʋr egiliiz rãmb wʋsg zutu?
15 La rũndã-rũndã, egiliiz rãmbã kẽebda b sẽn bʋde. (Galat dãmba 6:7) Wõnda bãmb wʋsg pãngã la b nebã sõor boogdame. Erope, d nee boog-kãng vẽenega. Sã n yaa ne zʋrnall a yembre (Christianity Today), “masã, Erop wẽnd-do-bɛdã pa pʋʋsg rot yɛs ye, b lebga rot sãamb sẽn wat n getẽ la b loogdẽ bala.” D nee manesem kãngã tẽns a taab pʋsẽ. Rẽ wilgda bõe ziri tũudmã wɛɛngẽ? A na n kell n menema a sẽn pa paamd teelg la a nebã sẽn tar sãeegrã yĩng bɩ? La rẽ na n wa ne bõe baleng hakɩkã zugu?
Segl-y y meng Wẽnnaam da-kãsengã yĩngã
16. Bõe yĩng tɩ nebã sẽn kisgd Babilon Kãsengã n paasdẽ wã tar võor wʋsgo?
16 Wala tãng sẽn yit bug-zõos la a fursd tompɛglem sẽn wilgd tɩ tãn-kãng rat n pusgame yɛsã, tẽns wʋsg pʋsẽ, nebã sẽn kisgd tũudmã n paasdẽ wã wilgdame tɩ ziri tũudmã na n menema ka la bilfu. Ka la bilfu, a Zeova na n kɩtame tɩ politik siglsã lagem taab n puk tẽebã wɛɛngẽ pʋg-yoodrã sẽn yaa Babilon Kãsengã bãong la b sãam-a. (Wilgri 17:15-17; 18:21) Kiris-neb hakɩkã segd n yɛɛsa yel-kãnga, n paas ‘to-kãsengã’ yɛl a taab nins sẽn na n pʋglã bɩ? (Matɩe 24:21) Ayo. B sɩd na n paama bʋʋm n kɩdem, Wẽnnaam sã n wa yik n na n zab ne nin-wẽnsã. (Wilgri 18:20; 19:1, 2) D rɩk makr ne Zerizalɛm la kiris-neb nins sẽn vɩɩmd be pipi yʋʋm kob-gĩndẽ wã.
17. Bõe yĩng t’a Zeova sõgen dãmb nins sẽn sakd-a wã tõe n tall bas-m-yam dũni kãngã saabã sẽn watã sasa?
17 Rom tãb-biisã sẽn da wa n gũbg Zerizalɛm yʋʋmd 66, pa ling kiris-neb nins sẽn gũusd tẽebã wɛɛngẽ wã, leb n pa yɛɛs-b me ye. B sẽn da zãmsd Wẽnnaam Gomdã neerã yĩnga, b ra miime tɩ ‘Zerizalɛm sãoongã kolgame.’ (Luk 21:20) B ra miime me tɩ Wẽnnaam da na n paka sor n kõ-b tɩ b põse. Wẽnnaam sẽn sɩd wa n pak sorã, kiris-nebã zoeeme n yi tẽngã. (Daniɛll 9:26; Matɩe 24:15-19; Luk 21:21) Woto, rũndã-rũndã me, neb nins sẽn mi Wẽnnaam la b sakd a Biriblã tõe n talla bas-m-yam dũni kãngã saabã sẽn watã sasa. (2 Tesalonik rãmba 1:6-9) Sɩda, to-kãsengã sã n wa, ne sũ-noogo, b na n ‘doogame n nak n ges yĩngri; tɩ bõe, b miime tɩ b fãagrã kolgame.’—Luk 21:28.
18. A Goog sẽn na n zab yaoolem zab-kãseng ning ne a Zeova sõgen dãmbã na n baasa ne bõe?
18 Babilon Kãsengã sãoong poore, a Goog sẽn yit Magoogã, sẽn yaa a Sʋɩtãanã na n yika yaoolem zab-kẽeng ne a Zeova Kaset rãmbã sẽn yaa laafɩ rãmbã. A Goog ne a tãb-biisã na n waame n “pid tẽngã” n tẽed tɩ b na n tõoga zabrã nana-nana. Ad sɩd yaa sũ-sãoong kãseng la b na n paame! (Ezekɩɛll 38:14-16, 18-23) Tʋm-tʋmd a Zã gʋlsame: “Dẽ, mam yãa [saas] sẽn pake, la haya! wed-pɛɛlg n be be. La sẽn zao-a yẽ wã boondame tɩ Tɩrlem la Sɩda. . . . La sʋʋg sẽn dɩt sẽn yit bãmb noorẽ wã wẽeda dũniyã soolem toɛy-toɛyã.” A soab ning sẽn yaa ‘rĩm dãmb Rĩm’ ninsaalbã nif sẽn pa ne wã na n fãaga a Zeova balemdb nins sẽn yaa sakdbã la a sãam b bɛɛbã fãa. (Wilgri 19:11-21) Ad woto sɩd na n yɩɩ a Zezi tedgrã pidsg zug tẽn-sʋka!
19. Kirist tõogr zãng-zãngã na n kɩtame t’a karen-biis hakɩkã maan bõe, la bõe la b segd n modg n maan masã?
19 Baraare, a Zezi na n ‘deega pẽgr neb nins sẽn na n tẽ wã sʋka.’ (2 Tesalonik rãmba 1:10) Yãmb ratame n zĩnd neb nins sẽn na n pẽg Wẽnnaam Biriblã tõogr ne waoogr kãsengã sʋk bɩ? Sã n yaa woto bɩ y ket n paasd y tẽebã pãng la “y segl tɩ Ninsaal Biiga wata wakat ninga yãmb sẽn ka tẽeda.”—Matɩe 24:43, 44.
Tall-y y yam-vẽenemã
20. a) Wãn to la d tõe n wilg d mi-beoog ne Wẽnnaam sẽn kõ-d ‘tʋm-tʋmd sẽn tũud sɩd la sẽn tar yama’? b) Sogs-bʋs la d segd n sok d mense?
20 ‘Tʋm-tʋmd sẽn tũud sɩd la sẽn tar yamã’ sagenda Wẽnnaam nin-buiidã wakat fãa tɩ b gũus tẽebã wɛɛngẽ la b kell n tall b yam-vẽenemã. (Matɩe 24:45, 46; 1 Tesalonik rãmba 5:6) Yãmb nanda tẽeg-kãensã b sẽn kõt wakat sẽn zems sasa wã bɩ? Yãmb tũnugda ne-b n yãkd yɛl nins sẽn segd n wa pipi y vɩɩmã pʋgẽ wã bɩ? Bõe yĩng tɩ y pa na n sok y meng woto: ‘Mam tẽeb nenemã yaa vẽenega, tɩ kɩtdẽ tɩ m ne Wẽnnaam Biriblã sẽn dɩt naam saasẽ wã bɩ? Mam ne-a lame t’a segl n saame n na n pids Wẽnnaam bʋ-kaoorã Babilon Kãsengã la a Sʋɩtãan siglgã babs a taabã sẽn ketã zut n sãam-b bɩ?’
21. Bõe yĩng tɩ neb kẽer bas tɩ b tẽebã nenem libsi, la bõe la b segd n maan ne yãgbo?
21 Kẽer sẽn lagem ne a Zeova nin-buiidã basame tɩ b tẽeb nenemã libsi. Rẽ wã yaa b sẽn pa tar maag-m-meng bɩ sũ-mar wa sẽn yɩ to-to ne a Zezi pipi karen-biis kẽerã bɩ? Yaa vɩɩmã yɩɩre, laogã nonglem bɩ namsgã b tẽebã yĩngã n kɩt tɩ b maag bɩ? (Matɩe 13:3-8, 18-23; Luk 21:34-36) Tõe tɩ kẽer yãame tɩ zãmsg ning ‘tʋm-tʋmd sẽn tũud sɩd la sẽn tar yamã’ sẽn kõ wã babs kẽer võor wʋmb yaa toogo. Yel-kãensã a yembr sã n paama yãmba, bɩ y zãms Wẽnnaam Gomdã ne yẽesem wʋsgo, la y pʋʋs a Zeova n leb n paam zood sẽn tar pãng wʋsg ne-a.—2 Pɩɛɛr 3:11-15.
22. Tõnd sẽn zãms yɛl a Zezi tedgrã pʋgẽ la bãngr-goam nins sẽn tɩ loe ne-a wã kɩtame tɩ yãmb rat n maan bõe?
22 B kɩtame t’a Zezi karen-biisã yã tedgrã sasa ning karen-biisã raood sẽn da rat kengrã. Rũndã-rũndã, d tara bũmb sẽn yaa kãseng wʋsg n yɩɩd rẽ sẽn na yɩl n kõ tõnd pãnga. Yaa vẽneg-kãng pidsgã sẽn yaa kãsengã, n paas bãngr-goam wʋsg sẽn tɩ loe ne-a wã. D sẽn tagsd yel-sɩd kãens sẽn be ziirã la b sẽn wilgd bũmb ning sẽn na n wa beoog-daarã zugã, tõnd me tõe n wilga d sẽn sɩd tagsd bũmb ning ne d sũy fãa wa tʋm-tʋmd a Zã, a sẽn wa n yeel tɩ: “Ãmina! Bɩ y wa, Zusoab a Zezi.”—Wilgri 22:20.
[Tẽngr note]
a Tẽn-kʋdem wẽndẽ gɛrk goamẽ wã, gom-biig ning b sẽn lebg tɩ ‘toogã’ rat n yeela sɩd-sɩd tɩ ‘rogem toogo.’ (Matɩe 24:8, Kãab-paalgã Koe-noogo) Rẽ wilgdame tɩ wala rogem toogo, dũniyã zu-loees sõore, b wẽnem la b kaoosgã na n talla paasgo, n wa baas ne to-kãsengã.
Y tẽrame bɩ?
• Yʋʋmd 1870 wã tɛka, bõe la Biiblã zãmsdb sull wa n wʋm Kirist lebgrã wɛɛngẽ?
• Wãn to la a Zezi tedgrã paam pidsgu?
• A Zezi sẽn zomb wed-moaag n na n tɩ tõog zabrã waa ne bõe dũniyã la kiris-neb tigingã zugu?
• Yaa bõe la tõnd segd n maan sẽn na yɩl n zĩnd neb nins sẽn na n põsã sʋka, a Zezi sã n wa na n baas a tõogrã?
[Foto rãmba, seb-neng a 8, 9]
B sẽn da wilg vẽnegr pʋgẽ wã lebga yel-sɩda
[Foto rãmba, seb-neng 10]
Yãmb mii bũmb ning sẽn maane, Kirist sẽn wa n sɩng a tõogrã bɩ?