Kãadem wʋsg sẽn sãamdã võore

“Fariziẽ rãmbã waa [a Zezi] nengẽ, n mak bãmb n yeele: ‘A zemsa [ne] tõog tɩ rao bas a pag bũmb fãa yĩng bɩ?’ ”—Matɩe 19:3.

A ZEZI wakatẽ wã, kẽer da tʋll n bãnga kãadem sã n tõe n kaoosame, pa rẽ bɩ a sã n segd n kaoosame. La a Zezi yeel-b-la woto: “Yãmb nan ka karem tɩ Naandã naana bãmb dao la pag hal sɩngrẽ, la tɩ bãmb yeelame tɩ ‘yaa woto yĩnga, dao na bas a ba ne a ma n zĩnd ne a paga, la bãmb b yiibã fãa na n yɩɩ yĩng a yembr’ bɩ? Woto yĩnga, bãmb ka leb n yaa yiib yɛs ye, b yaa yĩng a yembre. Dẽ yĩnga, bɩ ned da welg bũmb nins Wẽnnaam sẽn lagem ne taabã ye.”a (Matɩe 19:4-6) Vẽenega, Wẽnnaam datame tɩ neb sã n kẽ kãadem bɩ b zĩnd ne taab wakat fãa.

Rũndã-rũndã, tẽns wʋsg pʋsẽ, kãadem koabg zugu, sẽn na maan 40 bɩ sẽn yɩɩd rẽ wat n ‘welgame,’ n wa baas n kao. La rẽ yĩnga sagls nins Biiblã sẽn kõ kãadmã wɛɛngẽ wã tũub ket n tara yõod bɩ? Kãadem wʋsg sẽn kaoodã wilgdame tɩ yaa kãadmã meng n pa sõma bɩ?

D rɩk makr wa rao ne a pag sẽn na n tɩ ra mobilli, tɩ rao a to me ne a pag tɩ ra mobill kãng buudu. Pipi soabã ne a pagã geta b mobillã yell sõma la b kẽnd ne-a ne gũusgu. B mobillã pa sãamd ye. La yiib-n-soabã ne a pagã pa get b mobillã yelle, b pa kẽnd ne-a ne gũusg me ye. B mobillã wa n sãamame tɩ b rɩgl-a. Bõe yĩng tɩ baas woto? Yaa mobillã n pa sõma bɩ, bɩ yaa a zãadbã yelle? Yaa vẽeneg tɩ yaa raoã ne a pagã yelle.

Dẽnd kãadem wʋsg sẽn wat n kaoã pa wilgd tɩ yaa kãadmã meng n pa sõma ye. Neb milyõ rãmb sẽn kẽ kãadem tɩ b zĩid-n-taarã noomẽ wã sɩd wilgda rẽ. B kãadmã wata ne sũ-noog la zems-n-taar n kõt bãmb ne b zagsã rãmba, la b babgẽ wã neba. La kãadem yaa wa mobilli. Y sã n dat t’a kaoose, yaa tɩlae tɩ y get a yell sõma.

Y kãadmã kaoosame tɩ nan pa kaoos me, Biiblã tara sagls sẽn wilgd y sẽn tõe n maan to-to t’a kaoose, la y paas y zĩid-n-taarã sõmblem. Sõsg ning sẽn pʋgdã pʋgẽ, y na n yãa makr toor-toore.

[Tẽngr note]