A Zeova Kaset rãmbã tagsg yaa wãn ne kãadem kaoobo?
D tũuda Biiblã sẽn yet bũmb ning kãadmã la kãadmã kaoob wɛɛngẽ wã. Wẽnnaam lugla kãadem rao a ye la pag a ye sʋka, n dat tɩ b zĩnd ne taab b yõor tɛka. Biiblã wilgame tɩ yaa rao bɩ pag sã n yo la a to wã tar sor n tõe n kao kãadmã.—Matiye 19:5, 6, 9.
A Zeova Kaset rãmbã maanda bũmb n sõngd neb nins sẽn tar zu-loees b kãadmã pʋgẽ wã bɩ?
N-ye. Ad bũmb kẽer b sẽn maande:
Sɛba. Sɛbã b sẽn yiisd wakat fãa wã tõe n paasa kãadem pãnga, baa kãadem sẽn wõnd sãama zãnga. Wala makre, ges-y sõss nins gom-zut sẽn yaa: “Pids-y pʋleng ning y sẽn maan y kãadmã daarã,” “Y sẽn tõe n kõ sugr to-to,” la “Y sẽn tõe n maan n le kɩs taab sɩd y kãadmã pʋgẽ.”
Tigissã. D sõsda sagls nins Biiblã sẽn kõt kãadmã wɛɛngẽ wã zugu. D maanda woto d tigissã, la d tigis-kãsemsã sasa.
Kãsem-dãmbã. Tigingã kãsem-dãmb sõngda sẽn kẽ-b kãadmã tɩ zems ne b yɛlã sẽn yaa to-to wã. B wilgd-b-la sagls sẽn be Wẽnnaam Gomdã pʋgẽ, wala makre Efɛɛz rãmbã 5:22-25.
Tigingã kãsem-dãmb segd n kõo a Zeova Kaset soab sor t’a yaool n tõog n kao a kãadem bɩ?
Ayo. Baa b sã n wa kos kãsem-dãmbã tɩ b sõng neb sẽn segd zu-loees b kãadmã pʋgẽ, b pa tar sor n na n togs-b b sẽn segd n maan ye. (Galat-rãmbã 6:5) La ned sã n yãk yam n kao a kãadem t’a pagã bɩ a sɩdã yaool n pa yo, Biiblã pa kõt-a sor t’a tõe n kẽ kãadem ne ned a to ye.—1 Tɩmote 3:1, 5, 12.
A Zeova Kaset rãmbã tagsg yaa wãn ne neb sẽn kẽ kãadem sẽn welgd taaba?
Biiblã sagenda sẽn kẽ-b kãadmã tɩ b kell n zĩnd ne taaba, baa b sã n segda zu-loe-kɛgemse. (1 Korẽnt rãmbã 7:10-16) Sẽn kẽ-b kãadmã sã n pʋʋsd ne b sũur fãa, n tũud Biiblã saglsã la b wilgd taab nonglem, b na n tõog n welga zu-loees wʋsgo.—1 Korẽnt rãmbã 13:4-8; Galat-rãmbã 5:22.
Zu-loees nins b sẽn sõdg tẽngrã tõe n kɩtame tɩ kiris-ned yãk yam n na n welg ne a pag bɩ a sɩda:
Rao sã n zãgs t’a kõn ges a zak yelle.—1 Tɩmote 5:8.
Nin-yend sã n tar a to wã n pãbd hal tɩ tõe n tũ ne a yõore.—Yɩɩn-sõamyã 11:5.
Nin-yend sã n gɩdgd a to wã t’a pa tõe n tũ Wẽnnaam. Wala makre, pag bɩ sɩd tõe n modgda a to wã n dat t’a maan bũmb sẽn kɩɩsd Wẽnnaam noore. Sã n wa yaa woto, ned ning sẽn namsdã tõe n yãka yam n na n welg ne a to wã, sẽn mik tɩ yaa rẽ bal n tõe n sõng-a t’a kell n ‘sak Wẽnnaam, la pa ninsaalbã.’—Tʋʋma 5:29.