SOGSG BIIBLÃ SẼN LEOKDE
Tũudum fãa tata Wẽnnaam yam bɩ?
Y sã n wae n kelgda kibayã radio wã wall televiziõ wã, tõe tɩ y miime tɩ neb n tʋmd tʋʋm-beed tũudmã yʋʋr yĩnga. La pa tũudum fãa n yit Wẽnnaam nengẽ ye. (Matɩe 7:15) Biiblã wilgame me tɩ nebã wʋsg bee lik pʋgẽ.—Karm-y 1 Zã 5:19.
La Wẽnnaam mii neb nins sẽn nong tɩrlem la sɩdã. (Zã 4:23) A sagenda nin-kãens tɩ b zãms Biiblã sẽn yaa a Gomdã n bãng sɩdã.—Karm-y 1 Tɩmote 2:3-5.
Wãn to la y tõe n bãng tũudum hakɩkã neb n bake?
Wẽnnaam a Zeova tigimda neb sẽn yit tũudum toɛy-toɛy pʋsẽ n zãmsd-b sɩdã, la a sagend-b tɩ b nong taaba. (Miise 4:2, 3) Rẽnd yaa tũudum hakɩkã neb manesem sẽn yaa to-to ne taabã la y tõe n tik n bãng-b n welge.—Karm-y Zã 13:35.
Wẽnnaam a Zeova tigimda neb buud fãa tũudum hakɩkã pʋgẽ.—Yɩɩl Sõamyã 133:1
Tũudum hakɩkã neb sẽn tẽed bũmb ninsã tika Biiblã zugu. B tũuda a noyã b vɩɩmã nens fãa pʋgẽ. (2 Tɩmote 3:16) B wilgda nebã Wẽnnaam yʋʋrã. (Yɩɩl Sõamyã 83:19) B moondame me tɩ yaa Wẽnnaam Rĩungã bal n tar ninsaalbã zu-loees tɩɩm. (Daniɛll 2:44) B rɩkda a Zezi togs-n-taar n maand b taabã neere, tɩ b ‘vẽenem yãgd’ nebã sʋka. (Matɩe 5:16) Rẽnd d tõe n bãnga kiris-neb hakɩkã, bala yaa bãmb n kẽnd zak-zak n taasd nebã Wẽnnaam Rĩungã koe-noogã.—Karm-y Matɩe 24:14; Tʋʋm 5:42; 20:20.