D teel taab n wa tõog n põs dũniyã sãoong sasa

1, 2. Wãn to la Wẽnnaam dat tɩ kom-bɩɩsã ne kãsembã tũ yẽ?

YÃMB sã n yaa bi-bɩɩg bɩ y bãng tɩ y tara yõod a Zeova siglgã pʋgẽ. Tẽns wʋsg pʋsẽ, neb nins sẽn deegd lisgã wʋsg yaa kom-bɩɩse. D sã n get kom-bɩɩs wʋsg woto fãa sẽn yãk yam n na n tũ a Zeova wã, kengda raoodo.

² Sãmbg sẽn kae, y nong n bee ne y kom-bɩ-taase. Sɩd me, d sã n be ne d zo-rãmba, noom-d lame. La a Zeova ratame tɩ kom-bɩɩsã la kãsemb nins sẽn tũud-a wã fãa zemsd taaba, baa b yɛlã sẽn yaa to-to. Tʋm-tʋmd a Poll yeelame tɩ Wẽnnaam “datame tɩ nebã fãa paam fãagr la b bãng sẽn yaa sɩda.” (1 Tɩm. 2:3, 4) Wilgr 7:9 yeelame tɩ wẽn-tũudbã yaa neb sẽn “yi soolem fãa, la buud fãa, la neb sẽn gomd goam toɛy-toɛyã fãa.”

3, 4. a) Rũndã-rũndã, kom-bɩɩs wʋsg manesem yaa wãna? b) Efɛɛz rãmb 4:25 pʋgẽ, bõe la a Poll yeel-yã?

³ Kom-bɩɩs nins sẽn tũud a Zeova wã yaa toor fasɩ ne b rãmb nins sẽn pa tũud-a wã. Ne kom-bɩɩs nins sẽn pa tũud a Zeova wã, yaa bãmb mensã yell bal n pak-ba. Sɩd me, bãngdb kẽer yetame tɩ rũndã-rũndã kom-bɩɩsã yaa ratem-m-ye rãmb n yɩɩd pĩndã. B no-goamã la b fu-yerdɩ wã wilgdame tɩ b pa nand kãsembã ye.

⁴ Zĩig zãnga, kom-bɩɩs wʋsg yaa woto. Rẽ n so tɩ yɩl n tõog n tũ a Zeova noyã n ta a yam pa nana ye. Baa pipi kiris-nebã wakatẽ, a Poll wa n mikame tɩ yaa tɩlae t’a sagl a tẽed-n-taasã tɩ b ra ‘sak sɩɩg ning sẽn tʋmd zãgsdbã fãa pʋsẽ wã’ ye. (Karm-y Efɛɛz rãmb 2:1-3.) Kom-bɩɩs nins sẽn pa sakd sɩ-kãngã, la sẽn naagd tigingã neb a taabã n tũud a Zeova wã zemsa ne pẽgre. B sẽn maan woto wã zemsa ne a Poll sẽn yeel bũmb ningã. A yeelame tɩ “tõnd fãa yaa yĩng a yembr wil ne taaba.” (Ef. 4:25) Dũni-kãngã saabã sẽn kolgdã, d segd n modgame tɩ tõnd ne d tẽed-n-taasã zemsd taab sõma. Bɩ d gom Biiblã kibay kẽer yelle. Yaa kibay sẽn na n sõng-d tɩ d bãng d sẽn segd n zemsd taabã võore.

B TEELA TAABA

5, 6. Yam bʋg la d tõe n dɩk a Lot ne a zakã rãmb kibarã pʋgẽ?

⁵ Pĩnd wẽndẽ, neb sẽn da tũud a Zeova n seg zu-loeese. A kogl-b lame, b sẽn teel taabã yĩnga. Rũndã-rũndã, neb nins sẽn tũud Wẽnnaamã fãa, kom-bɩɩs la kãsemb tõe n dɩka yam b kibayã pʋsẽ. Bɩ d gom bũmb ning sẽn paam a Lotã yelle.

⁶ A Zeova yãka yam n na n sãam Sodom tẽngã, t’a Lot ne a zakã rãmb yaool n vɩ be. Rẽ n so tɩ Wẽnnaam tʋm malɛgs tɩ b tɩ yeel a Lot rãmb tɩ b yi n zoe n keng tãensẽ wã. B yeela woto: “Zoe n põse.” (Sɩng. 19:12-22) A Lot ne a kom-pugli a yiibã kelga malɛgsã goamã. Zu-bʋko, neb b sẽn nong n pa maan woto. A Lot sẽn wa n tɩ yeel kom-bɩɩs nins sẽn da na n kẽ kãadem ne a kom-pugli wã tɩ b segd n yii tẽngã, b tagsame t’a yaa nin-kẽem sẽn gomd “kʋʋsem goama.” B sẽn pa kelgã tũu ne b yõore. (Sɩng. 19:14) Yaa a Lot ne a kom-pugli wã bal sẽn tũ taabã n põse.

7. Bõe la a Zeova maan n sõng neb nins sẽn naag taab n yi Eziptã?

⁷ Bɩ d gom kibar a to yelle. Israyɛll nebã sẽn wa n na n yi Eziptã, b pa weel taab sul-sul tɩ sull fãa rɩk sor ning a sẽn dat ye. Sẽn paase, a Moiiz sẽn wa n ‘tẽeg a nug mogrã zug’ t’a Zeova kɩt tɩ koomã welg zĩis a yiibã, a pa pasg n loog a ye, bɩ ne neb a wãn bal ye. Israyɛll nebã fãa tũ a Moiizi, t’a Zeova kogl-ba. (Yik. 14:21, 22, 29, 30) Baa neb sẽn pa Israyɛll neb n yãk yam n na n tũ a Zeova, n naag Israyɛll nebã tɩ b tũ taab n yi Ezipti. (Yik. 12:38) Kom-bɩɩs wall neb a taab ra pa na n sak n welg toore, n dɩk sor b sẽn dat ye. Neb sã n da maan woto, b pa na n paam t’a Zeova kogl-b ye.—1 Kor. 10:1.

8. A Zozafat wakatẽ wã, bõe la Wẽnnaam nin-buiidã naag taab n maane?

⁸ Rĩm a Zozafat wakatẽ wã, tãb-biis wʋsg n wa n na n zab ne Wẽnnaam nin-buiidã. (2 Kib. 20:1, 2) Israyɛll nebã sẽn wa yã bɛɛbã sẽn yaa wʋsg woto wã, bõe la b maan-yã? B teega a Zeova, n pʋʋs-a n kos sõngre. (Karm-y 2 Kibay 20:3, 4.) Israyɛll ned kam fãa ka pa a zĩigẽ n bao yellã tɩɩm ye. Biiblã yeelame: “Zida nebã fãa ne b kom-bõonegã ne b pagbã la b kambã me yaasa be Zu-soabã taoore.” (2 Kib. 20:13) Kom-bɩɩsã ne kãsembã fãa naaga taab n maan a Zeova sẽn yeel-b bũmb ningã, t’a fãag-b bɛɛbã nugẽ. (2 Kib. 20:20-27) B sẽn maan woto wã, b kõ a Zeova nin-buiidã mak-sõng b sẽn tõe n tũ zu-loees sasa.

9. Yam bʋg la d tõe n dɩk pipi kiris-nebã kibarã pʋgẽ?

⁹ Pipi kiris-nebã me ra naagda taab n tũud a Zeova ne yam a yembre. Wala makre, Biiblã wilgame tɩ zʋɩf-rãmb la bu-zẽms neb n lebg kiris-neba, la tɩ b fãa ra sakda tʋm-tʋmdbã zãmsgã, n da naagd taab n dɩtẽ la b pʋʋsdẽ. (Tʋʋ. 2:42) Yaa b sã n da wa nams-b la b manegd n teend taaba, bala wakat kãng la b rat taab sõngr n yɩɩda. (Tʋʋ. 4:23, 24) Y pa tagsd tɩ zu-loees sasa, d segd n teela taab sɩda?

D TEEND TAAB T’A ZEOVA DAARÃ KOLGDAME

10. Wakat bʋg la na n yɩ tɩlae tɩ d teel taaba?

¹⁰ Ka la bilfu, toog sẽn zɩ n zĩnd n na n paam ninsaalbã. No-rɛɛs a Zoɛll yeelame tɩ na n yɩɩ ‘libsg ne lik’ daare. (Zoɛll 2:1, 2; Sof. 1:14) Na n yɩɩ tɩlae tɩ Wẽnnaam nin-buiidã teel taab wakat kãnga. Tẽeg-y t’a Zezi yeelame tɩ “welgr sẽn be soolem ning fãa na sãame.”—Mat. 12:25.

11. Yam bʋg la Wẽnnaam nin-buiidã tõe n dɩk Yɩɩl Sõamyã 122:3, 4 sẽn yeel bũmb ningã pʋgẽ? (Ges-y sõsgã sɩngrẽ fotã.)

¹¹ Toogã sẽn watã sasa, d sɩd segd n zemsa taab la d teel taaba. D tõe n maka rẽ ne b sẽn da me Zerizalɛm dotã n pẽneg taab to-to wã. B ra me-b lame n yegl taaba, tɩ yɩɩl-gʋlsdã yeel tɩ Zerizalɛm “yaa tẽng sẽn me t’a bũmb fãa tong taaba.” Woto kɩtame tɩ tẽngã nebã ra tõe n sõng taab la b kogl taaba. Sẽn paase, tõe tɩ yɩɩl-gʋlsdã sã n da get rotã sẽn pẽ taab to-to wã, a tẽegda Israyɛll nebã sẽn mi n tigim taab n na n waoog a Zeova ne yam a yembrã. (Karm-y Yɩɩl Sõamyã 122:3, 4.) Tõnd me segd n teela taab rũndã-rũndã, la toog ning sẽn watã sasa.

12. A Goog sã n wa na n zab ne a Zeova nin-buiidã, bõe n na n sõng-d tɩ d põse?

¹² Bõe yĩng tɩ na n yɩ tɩlae tɩ d teel taab beoog sẽn wate? Ezekɩɛll sak 38 bãngr-gomdã wilgame tɩ ‘Magoog Googã’ na n wa zaba ne a Zeova nin-buiidã. Wakat kãnga, d pa segd n bas baa fʋɩ tɩ welg tõnd ye. Yaa vẽeneg tɩ d pa na n bao sõngr dũniyã pʋgẽ ye. D na n baoo d tẽed-n-taasã zĩigẽ. Yaa sɩd tɩ pa d sẽn na n be ne d tẽed-n-taasã yĩng bal la d na n põs ye. Tõnd ned kam fãa segd n teega a Zeova, la d sak a noyã. Woto, yẽ ne a Zezi na n kogl-d lame tɩ d põs n kẽ dũni-paalgã pʋgẽ. (Zoɛll 3:5; Mat. 28:20) La y tagsdame t’a Zeova na n fãaga neb nins sẽn na n lak n bas a nin-buiidã n maan b sẽn tagsd tɩ yaa sõma wã sɩda?—Mii. 2:12.

13. Yam bʋg la kom-bɩɩsã tõe n dɩk kibay nins yell d sẽn gomã pʋgẽ?

¹³ Y sã n yaa bi-bɩɩga, y pa tagsd tɩ yaa sõma tɩ y kell n pa ne y tẽed-n-taasã sɩda? Yɩta sõma tɩ y ra be ne y kom-bɩ-taasã bala, wall y wae n yaa y yembr ye. Ka la bilfu, na n yɩɩ tɩlae tɩ kom-bɩɩsã ne kãsembã fãa teel taaba. Yaa masã la d segd n modg tɩ tõnd ne d tẽed-n-taasã noom ne taaba, tɩ d naag taab n tũud a Zeova ne sũ-noogo. Beoog sẽn wate, zems-n-taar a woto na n yɩɩ tɩlae ne-do.

“TÕND FÃA YAA YĨNG A YEMBR WIL NE TAABA”

14, 15. a) Bõe yĩng t’a Zeova sõngd tõnd tɩ d tũud-a ne yam a yembre? b) Sagl-bʋg la a Zeova kõ tõnd n na n sõng-d tɩ d zemsd taaba?

¹⁴ A Zeova sõngda tõnd tɩ d tũud-a ne “yam a yembre.” (Sof. 3:8, 9) A sõngd-d lame tɩ d na n wa tõog n vɩɩmd wakat ning a sẽn na n kɩt tɩ ‘bũmb fãa sak Kiristã.’ (Karm-y Efɛɛz rãmb 1:9, 10.) A Zeova raabã yaa tɩ sẽn be-b yĩngrã ne sẽn be-b tẽngã zugã naag taab wa zak a ye neba, n tũ yẽnda wakat sẽn kõn sa yĩnga. Yaa vẽeneg t’a na n pidsa a raabã. Kom-bɩɩse, woto pa kɩt tɩ y rat n pa a Zeova siglgã pʋgẽ sɩda?

¹⁵ A Zeova sõngda tõnd tɩ d zemsd taab rũndã, sẽn na yɩl tɩ d wa vɩɩmd bãan pʋgẽ wakat sẽn kõn sa. A sagend-d-la wakat fãa tɩ d ‘ges taab yelle,’ tɩ d ‘nong taab wʋsgo,’ tɩ d ‘bels taaba,’ la d “sõng taab tɩ [d tẽebã] bɩ.” (1 Kor. 12:25; Rom 12:10; 1 Tes. 4:18; 5:11) A Zeova miime tɩ d sẽn yaa neb sẽn pa zems zãngã, tõe n yɩɩ toog tɩ d zemsd taab wakat fãa. Yaa rẽ la a sẽn sagend-d tɩ d ‘kõt taab sugrã.’—Ef. 4:32.

16, 17. a) Bõe yĩng tɩ d tigimd taaba? b) Mak-sõng bʋg la a Zezi kõ kom-bɩɩsã?

¹⁶ Bũmb a to a Zeova sẽn maan sẽn na yɩl tɩ d zemsd taab yaa a sẽn kɩt tɩ d mi n tigimd taabã. D wae n karemda Hebre dãmb 10:24, 25 sẽn yet bũmb ningã. Be, b yeelame tɩ tigissã yõod yaa d “tẽeg taab yelle, la d yik taab ratem tɩ maan nonglem la tʋʋm-sõma.” Tigissã yõod me yaa tɩ d tõog n keng taab raoodo, sẽn yɩɩd fãa d sẽn ne tɩ “daarã kolgdame wã.”

¹⁷ A Zezi kõo kom-bɩɩsã mak-sõngo. Bala, a ra nonga a Zeova nin-buiidã tigissã. A sẽn wa n tar yʋʋm 12, a tũ a roagdbã n kẽng tigis-kãseng wẽnd-doogẽ wã. A wa n menemame t’a roagdbã pa mi a sẽn beẽ ye. Yaa a sẽn da tɩ bao a kom-taas n deemdẽ bɩ? Ayo. A roagdbã sẽn wa n yã-a wã t’a bee wẽnd-doogã karen-saam-dãmb sʋka, tɩ b sõsd Gʋlsg Sõamyã zugu.—Luk 2:45-47.

18. Wãn to la pʋʋsgã tõe n paas tõnd ne d tẽed-n-taasã zems-n-taarã pãnga?

¹⁸ D sã n pʋʋsd d tẽed-n-taasã yĩng me, paasda d zems-n-taarã pãnga. D sã n kot a Zeova t’a sõng d tẽed-n-taasã b zu-loeesã pʋsẽ, tẽegd-d lame tɩ b yell pak-d lame. Pa kãsembã bal n tõe n nong b tẽed-n-taasã, n kengd b raood tigissã sasa la b pʋʋsd b yĩng ye. Kom-bɩɩse, y modgd n maanda rẽ sẽn na yɩl tɩ yãmb ne y tigingã neb zems-n-taarã pãng paasdẽ bɩ? Y sã n maand woto, y tõe n kɩsa sɩd tɩ dũni-kãngã sãoongã sasa, y na n põsame.

D SƖD “YAA WIL NE TAAB YĨNG A YEMBR PƲGẼ”

19-21. a) Kiba-bʋs n wilgd tɩ tõnd sɩd “yaa wil ne taab yĩng a yembr pʋgẽ”? b) Saam-bɩɩs kẽer manesem sẽn yɩ to-to sabab-wẽns sasa wã wilgda bõe?

¹⁹ Kibay wʋsg n wilgd tɩ rũndã-rũndã, a Zeova nin-buiidã sɩd “yaa wil ne taab yĩng a yembr pʋgẽ.” (Rom 12:5) Sabab-wẽng sã n mi n paam d tẽed-n-taasã tɩ b namsdẽ, b nimbãaneg tar-d lame tɩ d rat n sõng-ba. Wala makre, yʋʋmd 2011 yʋʋm-sar kiuugã pʋgẽ, sa-kẽeng n ni Filipin babg a ye b sẽn boond tɩ Mindanao. Yʋn-yend pʋgẽ, koomã kẽe rot tus pis-naas la zaka. D tẽed-n-taas wʋsg rot n naage. Saam-biis sẽn be tẽngã babs a taab n tool teed sẽn na yɩl n sõng b tẽed-n-taasã. Filipin filiyallã wilgame tɩ b maana woto tɩ sull ning sẽn get nebã sõngr yell sabab-wẽns wakatã nan pa sɩng a tʋʋmdã meng ye.

²⁰ Zapõ me, tẽn-digimdg ne sunami n zĩnd tẽngã yaanga, tɩ saam-biisã bõn bũmb wʋsgo. Kẽer bõna fãa. Wala makre, a Yoshiko roogã sãama zãnga. A zãra ne Rĩungã roog na maan kilo 40. A yeelame: “D wa n wʋmame tɩ tẽn-digimdgã vẽkembeoogo, tigims sull yel-gɛtã ne saam-biig a to n da wa n gẽesd tõndo, tɩ ling-du.” A paasame tɩ b tẽed-n-taasã sẽn keng b raood to-to la b bels-bã yɩɩ bãmb noog wʋsgo. Sẽn paase, b kõ-b-la waood futu, neooda, kord la fut a taaba. Sull ning sẽn wa n na n sõng-bã nin-yend yeela woto: “Saam-biis sẽn yi Zapõ ween-vɩɩs a naasã ra naaga taab n tʋmdẽ, n sõngd taaba. Saam-biis n yi hal Etazĩni n wa sõnge. D sẽn sok-b bõe yĩng tɩ b yi zĩig sẽn zãr woto n wa wã, b leokame: ‘Tõnd ne Zapõ saam-biisã yaa bũmb a yembre, tɩ d wa n na n sõng-ba.’ ” Y sẽn paam n be siglg pʋgẽ t’a nebã nong taab woto wã pa noom-y sɩda? Bãng-y tɩ d sẽn zemsd taabã nooma a Zeova n yɩɩda.

²¹ D sã n minim n teend taaba, na n sõng-d lame tɩ d sã n wa segd zu-loees bɩ d tõog n teel taaba. Baa d sã n wa pa le tar d saam-biis nins sẽn be tẽns a taabã kibare, d na n baoo d tigingã saam-biisã zĩigẽ. Saam-bi-poak a Fumiko sẽn be Zapõ wã paam n põsa sa-kẽenga. A yeelame: “Sɛɛbã ta n saame. D segd n ket n sõngda d tẽed-n-taasã, n gũud wakat ning sabab-wẽns sẽn pa na n le zĩndã.”

22. D sã n kell n pa ne Wẽnnaam nin-buiidã, wãn to la na n naf-do?

²² Bɩ y maan y sẽn tõe fãa tɩ yãmb ne y tẽed-n-taasã zemsd taaba, tɩ rẽ la y segend y meng n gũud a Zeova daarã. A Sʋɩtãan dũniyã sãoong sasa, a Zeova na n kogla a nin-buiidã wa a sẽn maan pĩnd wẽndẽ wã. (Ezai 52:9, 10) Y yaa bi-bɩɩg tɩ y yaa kãsma, yaa y sẽn na n kell n pa ne Wẽnnaam nin-buiidã bal la a na n fãag-y-yã. Bũmb a to sẽn tõe n sõng tõnd yaa d sẽn na n wilgdẽ tɩ d sũur nooma ne bũmb nins Wẽnnaam sẽn kõt-dã. Sõsg ning sẽn pʋgdã na n goma rẽ yelle.