YÃMB RA MIIME BƖ?
Sodaas koabg naab tʋʋmd ra yaa bõe Rom sodaasã sʋka?
Sodaas koabg naab A Marcus Favonius Facilis
Biiblã babg ning b sẽn da gʋls ne gɛrkã pʋgẽ, b wae n gomda sodaas koabg nanambs yelle. Wala makre, soda-naab ning sẽn zĩnd a Zeezi kʋʋbẽ wã yɩɩ sodaas koabg naaba. A Korney sẽn yɩ pipi bu-zẽng ned sẽn lebg kiris-nedã me ra yaa sodaas koabg naaba. Sodaag ning sẽn da kɩt tɩ b sẽb tʋm-tʋmd a Poll n na n pãbã, n paas a Zulyuus sẽn tall a Poll n kẽng Rommã fãa ra yaa sodaas koabg nanambse.—Mark 15:39; Tʋʋmã 10:1; 22:25; 27:1.
Sodaas koabg naab ra wae n geta sodaas pis-nu n digd koabg yelle. A tʋʋmd ra yaa kibl a sodaasã, zãms-b zabre, ges b futã la b zab-teedã sã n yaa sõma, la a lʋɩ b taoor zabr sasa.
Naam buud toor-toor n da be soda-zaalg sẽn tõe n paame. La sodaas koabg naamã n yɩɩd b fãa. Sodaas koabg nanambsã ra yaa neb sẽn kaoos sodaarã pʋgẽ, la sẽn mi neb zãabo. Yaa bãmb maasem yĩng la Rom sodaasã sẽn da tũud b taoor dãmbã noyã, la b ra tõogd b bɛɛbã. Sebr a yembr yeelame tɩ Rom sodaasã sʋka, yaa sodaas koabg nanambsã n da wae n tar minim sodaarã wɛɛngẽ n yɩɩda, la tɩ b ra mii yɛl wʋsgo.
Zĩ-bʋs wɛɛngẽ la pĩnd wẽndẽ nin-getsã yaa toor ne rũndã-rũndã rãmbã?
Pĩnd wẽndẽ Ezɩptã nin-gɛtga
Pĩnd wẽndẽ nin-getsã ra yaa toor ne sẽn be-b rũndã-rũndã wã. Bala, b ra wae n maanda nin-getsã ne zũudu, sãnem wall bũmb a taab b sẽn maneg n du tɩ pɩnd hal sõma. Biiblã sẽn gom nin-gɛtg yell pipi yɩɩ kibar ning sẽn wilgd sɛk-roogã tiib sẽn yɩ to-to wã pʋgẽ. Sek-roogã n da yaa zĩig ning Israyɛll nebã sẽn da segd taab n waoogd Wẽnnaamã. Kibarã pʋgẽ, b wilgame tɩ pagb n kõ b nin-gets sẽn da maan ne zũudu, sẽn na n yɩl tɩ b tall n maan pekr laagã ne a naoorã. (Yikri 38:8) La wõnda b yẽnega nin-getsã n maan-ba.
Tẽn-vaeesdbã vaeesa zĩis kẽer Israyɛll la tẽn-kɩremsã, n bugs nin-gets sẽn da naag pagb nag-teedo. Nin-gets-kãens yaa gilsi, n tar gãts sẽn maan ne raado, kutu, wall ne wobg yẽnd b sẽn peese, n maneg tɩ wõnd paga. B ra pa nagsd nin-gɛtgã poor ye.
F sã n ges pĩnd wẽndẽ nin-gɛtg pʋgẽ, f pa ne f mengã sõma wa sẽn yaa to-to ne d sẽn tar-b rãmb rũndã-rũndã wã ye. Tõe tɩ yaa rẽ n kɩt tɩ tʋm-tʋmd a Poll yeel a tẽed-n-taasã woto: “Tõnd sẽn ne rũndã wã, yaa wa nin-gɛtg pʋgẽ, pulum-pulum.”—1 Korẽnt-rãmbã 13:12.