SEBRÃ GOM-ZUG SÕSGÃ | NED SẼN KI TÕE N VƲƲGAME BƖ?
Sẽn ki-bã tɩ vɩɩ zĩig a to bɩ?
“Mam da tẽedame tɩ ned kũum poore, zĩis a tã n be a sẽn tõe n kẽnge: Arzãna, bug-tẽnga, wall pirgatoaare. Mam da tagsdame tɩ m sõmblmã pa sek m na kẽng arzãna, la tɩ m wẽnemã me pa sek m na kẽng bug-tẽng ye. Mam da pa mi pirgatoaarã sẽn wõnd bũmb ningã takɩ ye. M zɩ n yã vɛrse sẽn gomd a yell Biiblã pʋgẽ ye. Yaa nebã noorẽ bal la m wʋm tɩ b gomda.”—A Lionel.
“B wilga maam tɩ ned sã n ki, a rabda saasẽ, la mam da pa tẽed ye. Mam da tagsdame tɩ ned sã n ki saame, rat n yeel tɩ saagr pa le be ye.”—A Fernando.
Tõe tɩ y zoe n soka y meng woto: ‘Sẽn ki-bã tɩ vɩɩ zĩig a to bɩ? Tõnd neb nins sẽn maam kaalmã tɩ namsda zĩig a to bɩ? D na n le wa yã-b lame bɩ? Bõe n tõe n kɩt tɩ d kɩs sɩd tɩ d na n le yã-b lame?’ Bɩ d ges Biiblã sẽn sɩd yet bũmb ningã. Pipi, d na n bao n bãnga Biiblã sẽn bilgd kũum to-to wã. Rẽ poore, d na n yãame tɩ Biiblã wilgame tɩ koe-noog n be sẽn ki-bã yĩnga.
Ned sẽn ki mii bũmb bɩ?
BIIBLÃ SẼN YETE: “Nin-vɩɩs miime tɩ b na n kiime. La sẽn ki-bã ka leb n mi bũmbu, la b ka leb n paamd b tʋʋmd yaood ye. Bala, b ka leb n tẽr bãmb yell ye. Bũmb ning fo nug sẽn tõe n maan ne fo pãngã, bɩ f maan-a. Bala, tʋʋmde, tagsgo, la bãngr ne yam ka be kɩɩm-kulgu, zĩig ning fo sẽn dabdẽ wã ye.”a—Koɛɛg soaba 9:5, 10.
Koɛɛg-koɛɛga, Seollã yaa zĩig ning ned buud fãa sẽn debd a kũum poorã. La pa zĩig sɩd-sɩd ye. Seollã bilgda ned sẽn ki sẽn pa le mi baa fʋɩ, n pa tõe n maan bũmb me wã. Nin-tɩrg a Zoob sẽn yeel bũmb ningã wilgda rẽ. Daar-n-yɛnga, a bõna a paoongã fãa, t’a kambã me ki. A wa n lʋɩɩ bãaga, t’a yĩngã fãa lob noada. A pʋʋsa Wẽnnaam n kos t’a solg yẽ kɩɩm-kulgu, rat n yeel tɩ Seollã pʋgẽ. (Zoob 1:13-19; 2:7; 14:13) Vẽenega, a Zoob ra miime tɩ Seollã pa bugum yir ye. Bala, a ra pa na n sak n kos n kẽng bugmẽ, zĩig a sẽn na n maneg n nams ye. A Zoob ra miime t’a sã n kẽng Seollã pʋgẽ, a namsgã na n saame.
Bũmb a to me n tõe n sõng tɩ d bãng tɩ sẽn ki-bã pa le mi baa fʋɩ ye. Yaa d sẽn na n vaees Biiblã kibay nins sẽn gomd neb sẽn ki n lebg n vʋʋg yellã.—Ges-y zĩ-gũbr ning gom-zug sẽn yaa: “Kũ-rãmb a nii sẽn vʋʋg tɩ Biiblã gomd b yelle.”
Neb a nii wã ned baa a ye pa yeel tɩ yẽ ra tɩ bee zĩ-noogẽ, pa rẽ bɩ a ra tɩ namsdame ye. B sã n da tɩ zĩnda zĩis a woto pʋgẽ, b kõn wilg nebã sɩda? Sẽn paase, Wẽnnaam da kõn kɩtẽ tɩ b gʋls rẽ Biiblã pʋgẽ nebã fãa yĩng sɩda? Biiblã pʋgẽ, kibar ka be n wilgdẽ tɩ ned n vʋʋg n yeel tɩ yẽ ra tɩ bee zĩig a to ye. Neb a nii wã sẽn vʋʋgã pa gom zĩ-noog wall namsg zĩig yell ye. Bõe yĩnga? Bala, b ned kam fãa sẽn wa n ki wã, a ra pa le mi baa fʋɩ ye. Ra yaa wa a sẽn gõe. Sɩd me, Biiblã pʋgẽ, b wae n makda kũum ne gõeem. Wala makre, a Lazaar sẽn wa n ki wã, a Zeezi yeelame t’a gõeeme.—Zã 11:11-14.
La koe-no-bʋg n be sẽn ki-bã yĩnga? B tõe n wa vʋʋgame bɩ?
a Yaa ebre wã gom-bil ning sẽn yaa “Seollã” la b sẽn lebg ka tɩ “kɩɩm-kulgã.” A zemsa ne gɛrkã gom-bil ning sẽn yaa “hadɛsã.” Neb kẽer tẽedame tɩ ned kũum poore, a lebgda kɩɩma, n tɩ vɩ be. La pa woto la Biiblã yet ye. Sãnda me tẽedame tɩ bug-tẽng n be, tɩ neb be be n namsdẽ. La Biiblã pa yet woto ye.