Ned sã n ki, saagr beeme!

A Zezi kũumã ket tɩ rasem a wãna, bũmb n maan Betani sẽn yaa tẽn-bil sẽn be kilo a tãab zĩigẽ ne Zerizalɛmmã. (Zã 11:18) A Lazaar sẽn da yaa a Zezi zoa wã yika pa keeme, tɩ tũ ne a yõore. Yɩɩ sũ-sãang menga.

A Zezi sẽn wʋm a zoa wã kũumã, a yeela a karen-biisã t’a Lazaar gõeeme, la t’a na n tɩ nek-a lame. (Zã 11:11) La karen-biisã pa wʋm a Zezi gomdã võor ye. Rẽ n so t’a togs-b vẽeneg t’a “Lazaar kiime.”—Zã 11:14.

B sẽn mum a Lazaar tɩ rab-naasẽ la a Zezi ta Betani. A sẽn wa n belsd a Mart sẽn yaa kiidã tão wã, a Mart yeel-a-la woto: “Zu-soaba, yãmb sã n da beẽ ka, mam tão wã ra kõn ki ye.” (Zã 11:17, 21) La a Zezi leokame yaa: “Mam yaa vʋʋgr la vɩɩm. Ned ninga sẽn tẽed maam, baa yẽ sã n ki, a na paam vɩɩm.”—Zã 11:25.

Sẽn na yɩl n wilg tɩ pa gom-vɩɩdo, a Zezi kẽnga yaoogẽ wã, n zẽk a koɛɛg n yeel yaa: “Lazaare, yi!” (Zã 11:43) A Lazaar sɩd yiime, hal tɩ neb nins sẽn da be be wã yɛɛse.

A Zezi ra zoe n vʋʋga sẽn ta neb a yiibu. Wala makre, a Zairus bi-puglã. Nand t’a vʋʋg biigã, a yeelame t’a gõeeme.—Luk 8:52.

A Zezi sẽn wʋm a Lazaar kũumã, a yeelame t’a gõeeme. A Zairus bi-puglã me nengẽ, a yeelame t’a gõeeme. Dẽnd a Zezi maka kũumã ne gõeem. Makrã zemsame. Bõe yĩnga? Bala ned sã n gõe, a pa le mi bũmb ye. A soabã vʋʋsdame. A pa wʋmd toogo, a pa namsde. (Koɛɛg Soaba 9:5; ges-y zĩ-gũbrã sẽn yet tɩ: “Kũum yaa wa gõeem.”) Pipi kiris-nebã ra mii bũmb ning sẽn maand ned kũum poore. Sebr a ye [l’Encyclopédie de la religion et de l’éthique (angl.)] pʋgẽ, b yeela woto: “A Zezi karen-biisã ra miime tɩ ned sã n kell n tall a tẽeb n wa ki, yaa wa a sẽn gõe bala. B ra geta yaoogã wa vʋʋsg zĩiga.a”

D sẽn mi tɩ neb nins sẽn ki wã gõee yaadẽ, la tɩ b pa namsdã belsd-d lame. Woto kɩtame tɩ d mi bũmb ning sẽn maand ned kũum poore, tɩ d pa le zoet rabeem ye.

“NED SÃ N KI, A TÕE N LE VƲƲGAME BƖ?”

Tõnd sẽn tõe n gũs yʋng n paam n vʋʋsã noom-d lame. La ned baa a ye pa rat n gõe n pa nekdẽ ye. La rẽ yĩnga, saagr beeme tɩ neb nins sẽn be yaadẽ wã na n wa vʋʋga wa a Lazaar la a Zairus bi-puglã bɩ?

A Zoob toogã sẽn wa n sãag-a t’a tagsdẽ t’a na n kiime wã, a soka woto: “Ned sã n ki, a tõe n le vʋʋgame bɩ?”—Zoob 14:14.

A goma ne Wẽnnaam sẽn tõe fãa wã, n wẽneg n leok a sokrã. A yeela woto: “Yãmb sã n bool maam, mam na n sakame. La y na n nonga maam tɩ m yaa y nug-tʋʋmde.” (Zoob 14:15) A Zoob yamẽ, a ra miime t’a Zeova yãgdame tɩ wakat ning a sẽn na n bool yẽ sẽn yaa wẽn-sakdã ta, t’a paam n vʋʋg-a. La a Zoob sẽn da ratã yaa bũmb sẽn pa tõe n yɩ bɩ? Ayo.

A Zezi sẽn vʋʋg neb sẽn da ki wã wilgda vẽeneg tɩ Wẽnnaam kõ-a-la tõog t’a na n kɩt tɩ kũum sa. Biiblã meng wilgdame tɩ masã, a Zezi tara “kũum kʋɩlen-biisi.” (Wilgri 1:18) Dẽnd wa a sẽn da kɩt tɩ b lak a Lazaar yaoogã kugr t’a Lazaar yi wã, a na n kɩtame me tɩ yaadã pagse, tɩ sẽn ki-bã yi.

Biiblã zĩis wʋsgo, b gomda Wẽnnaam sẽn pʋlem t’a na n vʋʋga sẽn ki-bã yelle. Wala makre, malɛk n yeel a Daniɛll vẽeneg yaa: “Bɩ f kẽng n ta f tɛk raar n vʋʋse. La fo na n vʋʋgame n deeg f zĩig wakatã sɛɛb raare.” (Daniɛll 12:13) A Zezi yeela Sadiseẽ-rãmbã sẽn da yet tɩ kũum vʋʋgr ka be wã woto: “Yãmb bee tudgr pʋgẽ, tɩ bõe, yãmb ka mi Gʋlsg Sõamyã wala Wẽnnaam pãngã me ye.” (Matɩe 22:23, 29) Tʋm-tʋmd a Poll me ra yeelame: “Mam tara tẽeb kãng ne Wẽnnaam . . . tɩ kũum fãa na n vʋʋgame, nin-wẽnsã ne nin-tɩrsã fãa.”—Tʋʋma 24:15.

WAKAT BƲG LA SẼN KI-BÃ NA N VƲƲGE?

Wakat bʋg la nin-wẽnsã ne nin-tɩrsã na n vʋʋge? Malɛkã yeela nin-tɩrg a Daniɛll t’a na n vʋʋga “wakatã sɛɛb raare.” A Mart me ra tẽedame t’a ba-biig a Lazaar “na n vʋʋga kũum vʋʋgr wakat sẽn yaa yaoolem daarã.”—Zã 11:24.

Biiblã sõngda tõnd tɩ d bãng tɩ “yaoolem daarã” yaa Kirist sẽn na n dɩ naam yʋʋm tusrã sasa. A Poll yeelame: “Yaa tɩlae tɩ Kirist dɩ naam hal tɩ b ning b bɛɛbã fãa bãmb nao wã tẽngre. Yaoolem bɛyã sẽn na n sãam yaa kũum.” (1 Korẽnt dãmba 15:25, 26) Woto yaa bʋʋm sẽn sek d na pʋʋs tɩ Wẽnnaam Rĩungã wa, tɩ Wẽnnaam daabã maan tẽngã zugu.b

Wẽnnaam na n vʋʋga neb nins sẽn ki wã. A Zoob ra mii rẽ vẽenega. Wakatã sã n ta, Wẽnnaam na n sɩd kɩtame tɩ kũumã sa fasɩ. Ned baa a ye pa na n le sok tɩ ‘ned sã n ki saame bɩ?’