Y pag bɩ y sɩd sã n zãmb-yã

NED pag bɩ a sɩd sã n zãmb-a, zabda hal wʋsgo. Yaa sɩd tɩ sẽn zãmb-a a to wã sã n tek yam n kos sugri, a pagã bɩ a sɩdã tõe n sak n kõo sugri, la b modg tɩ b kãadmã le yɩ sõma.a La baa sã n yaa woto, ned sã n bãng t’a sɩd bɩ a pag zãmb-a lame, zabda hal wʋsgo. Bõe la ned sẽn be yel-kãnga pʋgẽ tõe n maan n tõog n mao ne sũ-sãamsã?

BIIBLÃ VƐRSE-RÃMB SẼN TÕE N SÕNG-YÃ

Yaa sɩd tɩ yell a woto zabdame. La Biiblã goam belsa neb wʋsg b sẽn zãmbe. B bãngame tɩ Wẽnnaam nee b nintãma, la t’a kʋmd-b lame.—Malasɩ 2:13-16.

“Yɛl wʋsg sã n wa n be m pʋgẽ n namsd-ma, yãmb sẽn belsd maamã kõt-m-la sũ-noogo.”—Yɩɩn-sõamyã 94:19.

A Bill yeelame: “M sã n karem vɛrse-kãnga, m mamsda m yamẽ t’a Zeova wʋmda m toogã n belsd-ma, wa ba sẽn maand to-to ne a biiga.”

“Sẽn maan-a pʋ-peelem ne yãmba, yãmb maanda pʋ-peelem ne a soaba.”—Yɩɩn-sõamyã 18:26.

Na maan kiisi, a Carmen sɩdã pa maan pʋ-peelem ne-a ye. Ad a sẽn yeele: “Mam sɩdã ra zãmba maam. La m kɩsa sɩd t’a Zeova na n maana pʋ-peelem ne maam wakat fãa. A kõn tol n sãam m sũur ye.”

“Da maan-y yɩɩr baa fʋɩ poorẽ ye. La bũmb fãa pʋgẽ, bɩ y tũnug ne pʋʋsg la se-yõkr . . . n wilg Wẽnnaam bũmb nins y sẽn kotã, tɩ rẽ la Wẽnnaam laafɩ wã sẽn yɩɩd bũmb nins fãa ninsaalbã sẽn tõe n wʋm a võorã na n gũ yãmb sũyã.”—Filip rãmbã 4:6, 7.

A Sasha yeelame: “Mam karma vɛrse-kãensã naoor ka tɛka. M sẽn da pʋʋsd n pa basdẽ wã, Wẽnnaam kõo maam sũur pʋgẽ bãane.”

Neb nins fãa yell d sẽn gomã mi n komsa raoodo. La b ra kɩsa Wẽnnaam a Zeova sɩda, n karemd a Gomdã me n paamd pãnga. A Bill yeelame: “M sẽn teeg a Zeova wã, kɩtame tɩ baa yɛlã sã n wa pa lebd be, m miime tɩ m vɩɩmã tara võore. Baa ‘mam sã n kẽnd tãng long sẽn yaa lik bida pʋga,’ Wẽnnaam bee ne maam.”—Yɩɩn-sõamyã 23:4.