Yãmb sʋgsgã leoore

◼ D segd n togsa neda tɩ d sakda kũun bilf Sosiete wã tʋʋmd yĩng wakat fãa d sẽn lebg n kẽng a nengẽ bɩ?

Ayo. Yʋʋmd 1990 sig-noy kiuug D Rĩungã Ministɛɛrã sõasg gom-zug sẽn yɩ “D tʋm ne d sɛbã ne yamã” b sẽn yiis Etazĩni wã yeela woto: “Zĩis kẽere tõe n yaa toog tɩ d gom kũunã tõnd dũni gill tʋʋmdã yĩng yelle.” Yaa tɩlae tɩ d tags tɩ bɩ zĩ-kãngã wɛɛngẽ. D ratame tɩ neba bãng vẽeneg tɩ tõnd tʋʋmdã sɩd yaa Biibl zãmsg tʋʋmde, lakae pa leebg tʋʋmd ye. Tõnd ka maand kũun kosg ye.

Naoor wʋsgo, yaa sõma tɩ pipi d sẽn na n bas neb nins sẽn wilgd ratmã sɛbã bɩ d wilg tõnd tʋʋmdã sẽn paamd teelg to-to ne yamleoog kũunã maasem. D sã n ning d yamẽ tɩ yaa b rãmb nins sẽn wilgd ratmã la sẽn wilgd tɩ b tʋll n karmame wã bal la d na n basd sɛbã, dẽ, d na n nong n geta yellã nen-kãngã yell sõma.

Neb wʋsg sẽn wilgd ratem a woto rɩkda sard n maand kũun ne yamleoog d nindaar waoongã sasa. Neb a taab tõe n sʋka sebrã ligd sẽn yaa to-to. D tõe n togsa koɛɛg-koɛɛg bal tɩ tõnd tʋʋmdã ka leebgo, n wilg tɩ tõnd kãabda neb nins sẽn wilgd ratmã tõnd sɛbã tɩ ka tũ ne yaoob ye. D tõe n togs-b lame tɩ ned ning fãa sẽn tʋll n teel tʋʋmdã tõe n maana kũun bilf rẽ yĩnga. Wakat-wakate, sã n wõnda bũmb sẽn zemse, d tõe n goma Sosiete wã tʋʋmd teelg yelle, sã n yaa wala ned ning nengẽ tõnd sẽn debdã ka maand woto.

D segd n ninga d yamẽ vẽeneg tɩ baa tõnd sẽn kãabd neb nins sẽn wilgd ratmã tõnd sɛbã tɩ ka tũud ne yaoobã, depãens rãmb wʋsg la b maand n yiisd seb-kãensã la b pʋɩt-ba. D tara bas-yard tɩ Wẽnnaam vʋʋsem sõngã na n tusa A sõgen dãmbã la neb nins sẽn wilgd ratmã pʋʋgã pʋgẽ tɩ b maan yamleoog kũun tɩ b maan depãens kãens la dũni gill tʋʋmdã nens a taab fãa depãens rãmba.

◼ Ned kũun sã n yaa wʋsgo, d segd n gesame tɩ yaa tɩlae tɩ d paas-a sɛb a taab bɩ?

Ka tɩlae ye. Ka yɛsa, y le segd n tagsame tɩ bɩ, n ges ratem ning a soabã sẽn wilg ne sɛbã karengã. Nindaar lebg-n-tɩ-ges rãmbẽ wã, b tõe n basa sɛb sẽn pidsd neda ratem takɩ n ka gom kũuna yell ye. Nedã meng sã n dɩk sard n na n kãab kũun n paase, d tõe n saka rẽ ne sũ-noogo. Ning-y y yamẽ tɩ kũunã teenda tõnd tʋʋmdã nens toɛ-toɛya, meebã tʋʋma, misioneer dãmbã, la zall so-pakrã tʋʋmd sẽn naage, sɛbã d sẽn yiisdã sẽn yãk b toogo.

◼ Tõnd sã n ning kũun kũun-koglgẽ wã Sosiete wã dũni gill tʋʋmd yĩng d sã n wa reegd sɛbã, la d leb n talld kũuna d sẽn paamd pʋʋgã pʋgẽ n wat n lebsdẽ, woto pa rat n yeel tɩ d maanda kũun naoor a yiib sɛbã yĩng sɩda?

Ayo. Kũunã d sẽn ningd kogendẽ wã Sosiete wã dũni gill tʋʋmd yĩngã ka sɛbã yĩng bal ye. Koe-moondbã la neb nins sẽn wilgd ratem ne pʋ-peelem pʋʋgã pʋgẽ wã paamda sɛbã tɩ ka tũ ne yaoob ye. Kũun nins koe-moondbã sẽn maandã yaa sẽn na yɩl n sõng ne filiall dãmbã biru rãmba, Betɛllã zagse, misioneer dãmbã la ministɛɛrã lekoll dãmba, misioneer dãmbã, so-toak yel-gɛtbã, sɛbã pʋɩɩb nif zĩis zãabo. Sẽn paase yaa sẽn na yɩl n sõng ne tʋʋm wʋsg a taab sẽn yaa tɩlae sẽn na yɩl n pids tʋʋm nins fãa a Zezi sẽn bobl a karen-biisã tɩ b maanã. Sɛbã yiisg yaa woto babg sẽn yaa bilf bala.

Yaa rẽ n so tɩ d ka segd n yeel neb nins sẽn wilgd ratem ne pʋ-peelmã sẽn maand kũunã pʋʋgã pʋgẽ wã tɩ b kũunã yaa “sɛbã yĩngã.” Wala d sẽn togs-bã, b rãmb nins sẽn dat n karem tõnd sɛbã tõe n paam-b lame tɩ ka tũ ne b yao b yĩng ye. B na n dɩka kũun buud fãa neb a woto sẽn kõtã n maan depãens rãmb nins sẽn yaa tɩlae dũni gill tʋʋmdã yĩnga. Yaa woto me ne kũun nins koe-moondbã sẽn maandã.