Hal sẽn ta zĩ-bʋg la kiris-neb tũud-n-taarã tar yõodo?
1 “Ned sẽn ka baood a taab zĩigẽ kõn naf ye.” Gom-kãngã yʋʋm kob-gĩnd 17 soab gʋlsd a yembr sẽn togsã ka yeel bũmb a to n zʋʋg Biiblã sẽn zoe n yeel ninsaal tũud-n-taar daabã wɛɛngẽ wã ye. (Yel. 18:1) Tõnd kiris-neb tũud-n-taarã sɩd pidsda raab kãnga. Ne manesem sẽn nafd bʋse?
2 Koe-moonegã pʋgẽ: Pipi nafr yaa d saam-biisã sẽn kengd tõnd daood la b teend tõnd to-to koe-moonegã pʋgẽ wã. A Zezi tʋma a karen-biisã ‘yiib-yiib’ tɩ b tɩ moone. (Mark 6:7; Luk 10:1) Sẽn zems ne mak-kãnga, d sã n moond ne neb a taaba, d yãtame tɩ b sẽn yeel bũmb ning Koɛɛg Soaba 4:9, 10 pʋgẽ wã yaa sɩda. D sã n moond ne d saam-biisã, b tẽebã, b sakr yamã, la b nonglmã kõta tõnd raood la yẽesem n paasdẽ.
3 Sõngr d mengã yĩnga: Tõnd saam-biisã me leb n kõta tõnd raood la saglse, tɩ d tõe n mao ne weoogr la d yals kãn-kãe makr taoore. Tõnd tũud-n-taas sẽn yaa kiris-nebã tõe n tẽega tõnd verse rãmb sẽn gomd tõnd zu-loees yelle. B tõeeme meng n pʋʋs tõnd yĩnga, wa tõnd me sẽn pʋʋsd bãmb yĩngã. (2 Kor. 1:11) Sẽn paase, b mak-sõngã sɩd tusda tõnd tɩ d maan tʋʋm sõma, la kengd tõndo.
4 Tigissẽ wã: D sã n debd tigissã n ka vaandẽ, d paamda kiris-neb tũud-n-taarã barka. (Heb. 10:24, 25) Zãmsgã wʋsg d sẽn paamd tẽebã wɛɛngẽ be wã, la d mengã belem be wã pẽnegda tõnd ne d tẽed-n-taasã. Tigis-kãensã kõta tõnd sor tɩ d tõe n wʋm d saam-biisã la d saam-bi-pogsã sẽn zĩnded ɛstaraadã zug bɩ kɛlgdbã sʋk n wilgd b tẽebã. (Rom 1:12) Tõnd lagem-n-taarã pãng paasdame, d sã n sõsd ne taab sẽn deng tigissã la b poore. Woto yaa soay tõnd meng sẽn tar n tõe n togs yɛl tõnd meng sẽn vɩɩmde, sẽn kengd tẽebo. Tõnd sã n maand tũud-n-taar ne neb nins sẽn nong a Zeova, a Gomdã, a tʋʋmdã, la a nin-buiidã, manegda tõnd nedemdã.—Fil. 2:1, 2.
5 D rata d kiris-neb tũud-n-taasã. Bãmb sã n da ka beẽ, so-sẽk ning sẽn tar n debd vɩɩmẽ wã zug kẽnd yɩtẽ-la toog ne-d n yɩɩda. La b sẽn nong tõnd la b kengd d raoodã yĩngã, d tõeem n ket n nangd pãng n teesd a Zeova dũni paalgã sẽn yaa tɩrgã pʋgẽ.—Mat. 7:14.