Ne sũ-noogo, d lagma ne a Zeova la ne a Biriblã
D na n maana bũmb ning sẽn tar-a yõod n yɩɩd yʋʋmdã pʋgẽ wã tʋʋlg kiuugã rasem 28
1 D sã n zĩnd Soaalã Zaabr Dɩɩbẽ yʋʋmd 2002, tʋʋlg kiuug rasem 28, wĩndgã lʋɩɩs poore, d wilgda ne sũ-noog tɩ d lagma ne Wẽnnaam a Zeova la ne a Zezi Kirista. Wakat kãngã sẽn ka wõnd a taabã sasa, kiris-neb nins sẽn zae ne vʋʋsem sõngã sẽn ket tẽng zugã, na n “paama lagem-n-taar” sẽn ka wõnd a taab ne b Rĩungã rogem-pʋɩɩr dɩt-n-taas a taaba, ne Ba wã, la ne a Biriblã. (1 Zã 1:3; Ef. 1:11, 12) ‘Piis a taaba’ sẽn yaa neb milyõ rãmbã na n bʋgsa zu-no-kãseng ning b sẽn tar n tõe n lagem ne a Zeova la ne a Biriblã, n tar yam a yembr ne bãmba, Wẽnnaam tʋʋmdã maaneg pʋgẽ wã zugu.—Zã 10:16.
2 B lagemda taab n tʋmd zems-n-taar sẽn tar pãng pʋgẽ: Wakat fãa a Zeova ne a Zezi lagma taab ne sũ-noogo. B zĩnda ne taab lagem-n-taar pʋgẽ wakat sẽn kaoos wʋsg tɩ b nan ka naan ninsaal ye. (Mii. 5:1) Rẽ kɩtame tɩ nonglem sẽn tar pãng be b yiibã sʋka. Bi-kãsengã sẽn da wa n deng n beẽ t’a nan ka lebg ninsaalã, b bilg-a-la wala yam sẽn yet woto: “Mam bee [a Zeova] sɛɛgẽ wa tʋʋm-mit n kõt bãmb sũ-noog raar fãa. La mam tara sũ-noog bãmb nengẽ wakat fãa.” (Yel. 8:30) Wẽnnaam Biriblã zĩnda ne nonglmã Yẽgr sẽn ya a Zeova wã n kaoos yʋʋm ka tɛka, tɩ rẽ tall pãn-tusdg sẽn yaa kãseng a zugu!—1 Zã 4:8.
3 A Zeova ra neeme tɩ ãdem-biisã rata fãagre. Yaa rẽ yĩng la a sẽn yãk a Biribl yendã a sẽn naanã sẽn da nong ninsaalbã wʋsgã t’a wa kõ maoong tɩ yɩ rondã. Yaa maoong kãng bal n kɩt tɩ d tar tẽeb ne fãagre. (Yel. 8:31) A Zeova ne a Biriblã lagma taab n pidsd raab a yembre. Woto me, nonglem sẽn tar pãng kɩtame tɩ d ket n lagemd ne bãmb la ne d taaba, n maand Wẽnnaam daabã ne sũ-noogo.
4 D wilg d mi-beoog ne d sũur fãa: D sã n zĩnd Tẽegrẽ wã n kelg neere, la ne waoogre, d tõe n wilgame tɩ d sɩd tara mi-beoog ne a Zeova, a nonglmã la a Biriblã maoong sẽn nafd tõndã yĩnga. B na n wilga bõn-kãensã be vẽenega: Mak-sõng ning a Zezi sẽn kõ n wilg nonglmã, a sẽn kell n sak a Zeova n tɩ tãag a kũum n kõ rondã, la a sẽn yaa Wẽnnaam Rĩungã Rĩm n dɩt naamã, n paas bark nins Rĩungã sẽn na n wa ne n kõ ãdem-biisã. B na n tẽeg-d lame me tɩ d segd n kell n talla tẽebo, la d kell n tũ Wẽnnaam daabã wala “tʋmd-n-taas sɩda pʋgẽ” ne yẽesem.—3 Zã 8; Zak 2:17.
5 D sõng neb a taabã tɩ b wa zĩnd Tẽegrẽ wã ne tõndo: Kãsem dãmbã sull segd n maana modgr wʋsg n tɩ keng Kaset rãmb nins sẽn be bãmb moonegã zĩigẽ n ka le moondẽ wã raoodo, tɩ b wa Kirist kũumã Tẽegrẽ. (Mat. 18:12, 13) Gʋls-y neb nins y sẽn segd n tɩ boolã yʋy sẽn na yɩl n da wa yĩm ned ba a yembr ye, la y tɩ bool-b y toore.
6 Yãmb mii neb a taab sẽn tõe n wa Tẽegrẽ wã bɩ? Deng-y n kẽng b nengẽ n tɩ kɩt tɩ b tall naneb ne Tẽegrã. Bool-y-b ne yamleoogo la y kɩt tɩ b bãng tɩ b sã n wa y sũur na n yɩɩ noogo. D maan d sẽn tõe fãa n bool d Biibl karen-biisã fãa la neb a taabã sẽn dat n bãng sɩdã, ne d roagdb la d mitins tɩ b wa maan bũmb ning sẽn tar-a yõod n yɩɩd yʋʋmdã pʋgẽ wã. Rondã ket n tõe n nafa ned ning fãa sẽn paam ‘Soaal a Zezi Kirista bãngr sẽn lʋɩ taoorã.’ (Fil. 3:8, Sebr Sõngo) Neb nins sẽn tẽed Kirist maoongã tõe n saagame tɩ b na n paama vɩɩm sẽn-kõn-sa—Zã 3:16.
7 Ra tol-y n tags tɩ Tẽegrã ka tõe n tall pãn-tusdg sẽn yaa kãseng pʋ-peelem dãmbã zut ye. Yʋʋm-bɩtẽ Papuazi Nuvɛll Gine, neb 11 sẽn nong sɩdã n tog sor mogr sẽn gudg zug ne kogl-bil lɛɛr 17, sẽn na yɩl n zĩnd Tẽegrẽ wã. Bõe yĩnga? B yeelame: “D ra ratame n maan Kiristã kũum Tẽegr ne d saam-biisã, woto ra seka d na maan so-toakã.” Tags-y yẽesem ning nin-kãensã sẽn nong sɩdã sẽn wilgã, la mi-beoog ning b sẽn talle, b sẽn tõog n zĩnd lagem-n-taar pʋgẽ ne a Zeova, ne a Biriblã, la ne saam-biisã yĩngã yelle!
8 Kãab-y neb nins sẽn dat n bãng n paasã Biibl zãmsgo. Sagl-y-b tɩ b wat tigissã n ka vaandẽ, la b togsd neb a taabã sɩdã b sẽn zãmsdã. Sõng-y-b tɩ b tũ Biiblã noy b vɩɩmã pʋgẽ n tõog n ‘kẽn vẽenema pʋgẽ’ la b ‘tũ sɩdã.’ (1 Zã 1:6, 7) Sõng-y-b tɩ b bao n paam zems-n-taar sẽn tar pãng ne a Zeova la b tall naneb n paas ne b sẽn paam n tõe n lagem ne neb a taabã n maan a raabã.
9 Ad yaa zu-noog sẽn yaa kãseng meng la d tara, d sẽn tõe n lagem taab ne sũ-noog n “maood ne tagsg a yembre Koe-nooga tẽeb yĩngã”! (Fil. 1:27, 28) Bɩ d gẽeg tũud-n-taar sẽn be yamleoog ning d sẽn na n paam tʋʋlg kiuug rasem 28 wã, n wilgd d mi-beoog wakat fãa ne a Zeova la ne a Biriblã!—Luk 22:19.