Tʋʋmd Wẽnnaam sẽn teenda
1 Rũndã-rũndã Wẽnnaam sõgen dãmbã sʋka, neb sẽn karem n zãage, sẽn tar arzɛka, bɩ sẽn yaa nin-bɛd dũniyã pʋgẽ sõor paooda. Rẽ n sõ tɩ neb kẽer paoogd tõnd moonegã tʋʋmd wala a yaa bõn-yaalga. (Ezai 53:3) Ne rẽ fãa, Biiblã zãmsg tʋʋmd d sẽn maandã kõo neb milyõ rãmb belsg la saagr dũniyã gill zugu. Wãn to la nin-zaals bal tõog n maan bõn-kãsems woto? Yaa ne Wẽnnaam sõngr bala. (Mat. 28:19, 20; Tʋʋ. 1:8) Tʋm-tʋmd a Poll wilga woto: “[Wẽnnaam] yãka dũniyã bũmb nins sẽn ka pãngã n ning pãens rãmba yãnde.”—1 Kor. 1:26-29.
2 Tʋm-tʋmdbã la pipi kiris-neb a taabã ra yaa ‘nin-tals sẽn ka paam zãmsg’ ye. (Tʋʋ. 4:13) Baasg zãnga, b kell n kẽnga taoor ne b koe-noogã moonego, t’a Zeova ning b modgrã barka. Baa ne kɩɩsgã la yel-gɩdgdɩ a taabã, a Zeova ‘koɛɛgã ket n saagda ne pãng n tõogdẽ.’ Baa fɩ ra ka tõe n yals tʋʋmdã ye, Wẽnnaam sẽn da teend-a wã yĩnga. (Tʋʋ. 5:38, 39; 19:20) Yaa woto me tõnd wakatã. Baa nanambs sẽn tar pãng kɩɩsa tõnd tʋʋmdã ne b sũy fãa, la b ka tõog tɩ koe-noogã pa kell n saag ne pãng n tõog ye.—Ezai 54:17.
3 Yaa Wẽnnaam n so pẽgrã fãa: Rẽ yĩnga tõnd sẽn tar zu-noog n yaa Wẽnnaam sõgen dãmbã segd n kɩtame tɩ d wuk d mens bɩ? Abada! A Poll goma kiris-neb tʋʋmdã yell n yeele: “Tõnd tara paoong kãnga yagd laas pʋsẽ, tɩ pãng kãseng kãng na yɩ Wẽnnaam dẽnda, la ka tõnd dẽnd ye.” (2 Kor. 4:7) A Poll sak n deegame tɩ ra yaa ne Wẽnnaam pãng bal la a ra tõe n kẽng taoor ne tʋʋmdã.—Ef. 6:19, 20; Fil. 4:13.
4 Woto, tõnd me sak n deegame tɩ yaa ne “Wẽnnaam sõngr” bal la d maand moonegã tʋʋmde. (Tʋʋ. 26:22) Ne b sẽn moond dũniyã gill zug woto wã maasem, a Zeova tũnugda ne tõnd hal sõmb-sõmb n taasd tẽn-tẽnsã fãa keoogr sẽn wilgd tɩ ka la bilfu sãoong n wate. (Azze 2:7) Ad d sɩd paama waoogre, d sẽn paam n yaa “tʋmd-n-taas ne Wẽnnaam” tẽeb tigis-kãseng kãngã sasa wã!—1 Kor. 3:6-9.