Ges-y koɛɛgã mooneg wa zu-zẽkr bũmbu
1. Wãn to la neb wʋsg get tõnd koɛɛgã moonego?
1 A Sʋɩtãan dũniyã pʋgẽ, neb wʋsg geta tõnd koɛɛgã mooneg wa “yalemdo.” (1 Kor. 1:18-21) D sã n pa gũusi, rẽ tõe n komsa d raoodo, tɩ kɩt tɩ d yẽesmã booge. (Yel. 24:10, MN; Ezai 5:20) Bõe yĩng tɩ d segd n ges tɩ d sẽn paam n yaa a Zeova Kaset rãmbã yaa zu-zẽkr bũmbu?—Ezai 43:10.
2. Bõe yĩng tɩ koɛɛgã mooneg yaa tʋʋmd sẽn yaa sõng Wẽnnaam nifẽ?
2 Tʋʋmd sẽn yaa sõng Wẽnnaam nifẽ: Tʋm-tʋmd a Poll wilgame tɩ koe-noogã mooneg yaa Wẽnnaam tʋʋmde, rat n yeel tɩ tʋʋmd sẽn yaa sõng Wẽnnaam nifẽ. (Rom 15:15, 16) Bõe yĩng tɩ yaa tʋʋmd sẽn yaa sõngo? Bala tõnd sẽn moond koɛɛgã, d yaa a Zeova “tʋmd-n-taase,” n sõngdẽ t’a yʋʋrã paamd waoogre. Sẽn paase, Biiblã wilgdame t’a Zeova yaa “sõngo.” (1 Kor. 3:9; Wil. 4:8) A Zeova geta koɛɛgã mooneg wa maoongo. Woto yĩnga, koɛɛgã mooneg yaa bũmb sẽn tar yõod wʋsg d Wẽnnaamã tũub pʋgẽ.—Heb. 13:15.
3. Bõe yĩng tɩ koe-noogã mooneg yaa zu-zẽkr bũmbu?
3 Koe-noogã moonegã yaa zu-zẽkr bũmbu, la pa nebã fãa n paam n moondẽ ye. Malɛgsã sã n da paamẽ tɩ Wẽnnaam bobl-b koɛɛgã moonego, b sũy ra na n yɩɩ noogo, la yaa vẽeneg tɩ b ra na n tʋma tʋʋmdã sõma. (1 Pɩɛ. 1:12) La a Zeova yãka tõndo, sẽn yaa ninsaalb sẽn pa zems zãng n yaa wala “yagd laasã,” n bobl tʋʋm-kãngã sẽn yaa zu-zẽkr tʋʋmdã.—2 Kor. 4:7.
4. Wãn to la d tõe n wilg tɩ d geta koɛɛgã mooneg wa zu-zẽkr bũmbu?
4 Tʋʋmd d sẽn segd n lʋɩɩs taoore: D sẽn get koɛɛgã mooneg wa zu-zẽkr bũmbã yĩnga, d tagsdame t’a bee “bũmb nins sẽn yaa sõma n yɩɩdã” sʋka. (Fil. 1:10) Rẽ n so tɩ d yãkd wakat takɩ semen fãa n moond koɛɛgã. Bal-tãood sã n paam tɩ b yãk-a t’a be ekip bedr pʋgẽ, b sã n na n tɩ tão ne ekip a to, a na n segla a meng sõma, la a na n modgdame n paasd a minimã wakat fãa. Tõnd me segd n segla d meng wakat fãa n yaool n yi koɛɛgã moonego, sẽn na yɩl n tõog n “togs sɩd koɛɛgã tɩrga.” D segdame me n modg tɩ d sẽn zãmsd nebã to-to wã sõmblem paase.—2 Tɩm. 2:15; 4:2.
5. Bõe yĩng tɩ d pa segd n koms raood koɛɛgã mooneg pʋgẽ?
5 Baa neb wʋsg sã n pa kelgd koɛɛgã, bɩ d ra bas tɩ rẽ koms d raood ye. D tẽeg tɩ neb wʋsg n be n dat tɩ d wat n moond-ba. La pa d sẽn na n tat nebã yamã n pak tõnd ye. Sẽn pak tõnd n yɩɩdã yaa a Zeova sẽn get koɛɛgã mooneg to-to wã, la d miime t’a sũur nooma ne d modgrã.—Ezai 52:7.