Rĩungã koɛɛg mooneg b sẽn bobl-dã yaa zu-no-kãsenga
1 A Zeova kõo tõnd bũmb nins sẽn zãad d vɩɩmã ne nonglem. Daar fãa, tẽngã zugu, yaa neb milyaar dãmb n dɩt bõn-kãens yõodo. (Mat. 5:45) La yaa neb bilf bal n paam zu-no-kãseng n moond Wẽnnaam Rĩungã koe-noogã, n wilgd b Naandã b mi-beoogo. (Mat. 24:14) Hal sẽn ta zĩ-bʋg la yãmb wilgd tɩ y nanda zu-no-kãngã sẽn yaa kãsengã?
2 Rĩungã koe-mooneg pẽgda Wẽnnaam la a wat ne saagr la sũur pʋgẽ bãan n kõt neb nins sũy sẽn sãamd rũndã-rũndã toodã yĩngã. (Heb. 13:15) Neb nins sẽn sakd koɛɛgã paamda vɩɩm sẽn-kõn-sa saagre. (Zã 17:3) Dũniyã pʋgẽ, tʋʋm-bʋg n tar nafa kãensã buudu? Tʋm-tʋmd a Poll wilga vẽeneg t’a nanda koe-moonegã a sẽn moon koɛɛgã to-to wã pʋgẽ. A ra get-a-la wa paoongo.—Tʋʋ. 20:20, 21, 24; 2 Kor. 4:1, 7.
3 D wilg tɩ d nanda d zu-no-kãsengã: Manesem a ye d sẽn tõe n tũnug n wilg tɩ d nanda koɛɛgã mooneg sẽn yaa zu-noog tʋʋmdã yaa d sẽn na n gũusd n get d tʋʋmdã sõmblem. Rẽ yĩnga d rɩkda sẽk n segend sõsg sẽn na yɩl tɩ kẽ d kɛlgdbã sũy bɩ? D tõe n maana bũmb n kɩt tɩ d sẽn tʋmd ne Gʋlsg Sõamyã to-to wã la d sẽn sõsd ne nebã sẽn na yɩl tɩ b tagsã yɩ sõma n paas bɩ? Rẽ yĩnga d moonda d moonegã zĩig fãa zãng bɩ? D tõe n sɩnga Biiblã zãmsg ne neb la d kell n kẽngd taoor ne rẽ maaneg bɩ? Wala pĩnd wẽndẽ la rũndã-rũndã kiris-nebã, d tʋmda tʋʋm-kãngã d sẽn mi t’a tara yõodã, la d sẽn nong d zu-noog tʋʋmdã yĩnga.—Mat. 25:14-23.
4 D sã n maooda ne kʋʋlmã zu-loeese, ka laafɩ wall yel-tood a taaba, d sẽn mi tɩ modgr ning d sẽn maand n moond koe-noogã ne yẽesmã tara yõod wʋsg Wẽnnaam nifẽ wã, kengda raoodo. Wẽnnaam Gomdã kõt-d-la bas-m-yam t’a Zeova nanda modgr ning d sẽn maand n balemd-a wã, baa modg-kãng sã n wõnd a paooda neb kẽer nifẽ.—Luk 21:1-4.
5 Rĩungã koɛɛg mooneg wata ne sũ-noog wʋsgo. Saam-bi-poak a ye sẽn tar yʋʋm 92 yeela woto: “Ad yaa zu-zẽkr bũmb n kõ maam, m sã n tẽeg m sẽn dɩk yʋʋm 80 n balem Wẽnnaamã. M pa maand m bãngẽ ye. M sã n da tõe n lebg n sɩnga m vɩɩmã, m da na n le maana boto, bala sɩd-sɩda, Wẽnnaam ‘nonglmã yaa neer n yɩɩd vɩɩm menga.’ ” (Yɩɩl 63:4) Bɩ tõnd me tall naneb ne Rĩungã koɛɛg mooneg sẽn yaa zu-no-kãseng Wẽnnaam sẽn kõ-dã.