D nanda zu-nood nins d sẽn tarã
1 Hal pĩnd n wa tãag masã, a Zeova kõo a nin-buiidã zu-nood toɛy-toɛya. A kõo nin-kãensã fãa zu-nood n pa ges b sã n yaa rao bɩ paga, biig bɩ kãsma, naong soab bɩ arzɛk soab ye. (Luk 1:41, 42; Tʋʋ. 7:46; Fil. 1:29) Zu-no-bʋs la a kõ tõnd rũndã-rũndã?
2 Zu-nood kẽere: D sẽn paamd t’a Zeova zãmsd tõndã yaa zu-noogo. (Mat. 13:11, 15) D sẽn kõt leoor tigissẽ wã n pẽgd a Zeova wã me yaa zu-noog d sẽn nande. (Yɩɩl 35:18) D sã n wa paam sor n na n kõ leoor tigissẽ wã, d leokda ne d sũur fãa. D sã n get tʋʋmd ning fãa d sẽn paam tigingã pʋgẽ wã me wa zu-noog tʋʋmde, d na n tʋm-a-la ne d pãngã fãa. Rẽ yĩnga wakat fãa d kẽesda d toog Rĩungã Roog pɩɩsg la a manegr sẽn yaa zu-noog tʋʋmdã pʋgẽ bɩ?
3 Baa neb milyõ rãmb sã n tagsdẽ tɩ Wẽnnaam pa kelgd b pʋʋsgã, tõnd yẽ paama zu-noog tɩ ãndũniyã fãa Naab sẽn ka to wã kelgd d pʋʋsgo. (Yel. 15:29) Yaa a Zeova meng n kelgd a nin-buiidã pʋʋsgo. (1 Pɩɛ. 3:12) A pa yãk wakat tõnd sẽn segd n pʋʋs-a ye. D sẽn paam n tõe n pʋʋs-a “wakat fãa” wã sɩd yaa zu-noog d sẽn nand wʋsgo!—Ef. 6:18.
4 D yaa Wẽnnaam tʋmd-n-taase: Tõnd sẽn yaa Wẽnnaam tʋmd-n-taas n moond Wẽnnaam Rĩungã koe-noogã me yaa zu-no-kãsenga. (1 Kor. 3:9) Yaa tʋʋmd sẽn kõt sũ-noog la kengd raoodo. (Zã 4:34) Pa tɩlae t’a Zeova yãk ninsaalb tɩ b moon koe-noogã ye. La a sẽn bobl tõnd tʋʋm-kãngã wã wilgdame t’a nong-d lame. (Luk 19:39, 40) La pa nebã fãa la a kõ zu-no-kãng ye. Yɛl kẽer n be tɩ neb nins sẽn moond koe-noogã segd n pidsi, la b kell n maand rẽ. (Ezai 52:11) Koe-noogã mooneg sẽn yaa zu-no-kãsengã, rẽ yĩnga d moond-a-la wakat fãa n wilgdẽ tɩ d nanda zu-no-kãng bɩ?
5 Zu-nood nins a Zeova sẽn kõ tõndã kɩtame tɩ d vɩɩmã tar võore. (Yel. 10:22) D ra tol n ges zu-no-kãens wa bũmb sẽn ka yõod ye! D sã n wilgdẽ tɩ d nanda zu-noog ning d sẽn paam n balemd Wẽnnaamã, d tata a yam. Yaa yẽ nengẽ la ‘bark sõma la kũun sõma fãa’ yita.—Zak 1:17.