Siglgã taoor lʋɩtb Sull koɛɛga

D koe-moond-taaga:

D sẽn paam n naag taab n tũud Wẽnnaam sɩd-sɩd a Zeova wã yaa zu-zẽkr tɛkẽ! Tõnd yaa a “tʋmd-n-taase,” t’a bobl-d a Rĩungã sẽn luglã koe-noog mooneg sẽn yaa tʋʋm-sõng sẽn fãagd yõyã. (1 Kor. 3:9; Mat. 28:19, 20) Yɩl tɩ d tõog n gãd taab nus n tʋm tʋʋm-kãngã dũniyã gill zug ne bãane, rẽnda d sigl bũmba fãa sõma.—1 Kor. 14:40.

Seb-kãngã na n sõng-f lame tɩ f bãng kiris-neb tigingã sẽn sigl to-to n tʋmd a tʋʋmã. A gomda tʋʋm nins f sẽn tõe n paam n tʋmã yelle, la bũmb nins f sẽn segd n maane, f sẽn yaa a Zeova Kaset soabã yĩnga. F sã n bãng tɩ f sẽn tõe n paam n tʋm tʋʋm ninsã yõod ka to, la f mao n maan f sẽn segd n maanã fãa neere, f ‘tẽebã pãng na n paasdame.’—Tʋʋ. 16:4, 5; Gal. 6:5.

Woto yĩnga, d sagend-f lame tɩ f maag f yĩng n vaees seb-kãngã neere. Ges f sẽn tõe n tũ bũmb ning f sẽn karem n bãngã to-to. Makre, f sã n lebga koe-moond sẽn nan pa reeg lisg sẽn pa kaoose, bõe la f tog n maan n tõog n deeg lisg n lebg a Zeova Kaset soaba? La f sã n deega lisgu, bõe la f tõe n maan n bɩɩs f tẽebã n paase, n tõog n tʋm a Zeova tʋʋmdã wʋsgo? (1 Tɩm. 4:15) Wãn to la f tõe n sõng tɩ laafɩ zĩnd tigingã pʋgẽ? (2 Kor. 13:11) F na n bãnga seb-kãngã sẽn leokd sogs-kãensã to-to.

F sã n yaa rao sẽn deeg lisgu, f tõe n bao n lebga kãsem-sõngda, n wa lebg kãsem-soaba. Nin-paalsã wʋsg sẽn kaoogd n wat Wẽnnaam siglgã pʋgẽ wã yĩnga, d rata rap sẽn na n lʋɩ b taoore. Seb-kãngã na n sõng-f lame tɩ f bãng f sẽn tõe n maan n wa paam n lebg kãsem-sõngd wall kãsem-soaba.—1 Tɩm. 3:1.

D pʋʋsda ne d sũur fãa tɩ seb-kãngã sõng-f tɩ f bãng tʋʋmd ning f sẽn tar a Zeova siglgã pʋgẽ wã, la a yõodã. Tõnd nonga yãmb ned kam fãa hal wʋsgo, la d pʋʋsdẽ tɩ f kell n zĩnd b rãmb nins sẽn tũud d saasẽ Ba a Zeova ne sũ-noogã sʋk wakat fãa.—Yɩɩn. 37:10, 11; Eza. 65:21-25.