Kom-dibli wã, y rat n wa paama tʋʋmd tigingã pʋgẽ bɩ?
1. Wakat bʋg la bi-bɩɩg tõe n sɩng saglg ning sẽn be 1 Tɩmote 3:1 pʋgẽ wã tũubu?
1 “Ned sã n dat n yɩ karen-saamba, a soab baooda tʋʋmd sẽn yaa neere.” (1 Tɩm. 3:1) Gom-kãensã Wẽnnaam sẽn vẽneg tɩ b gʋlsã sagenda saam-biisã tɩ b bao tʋʋm tigingã pʋgẽ. La rẽ yĩnga yaa y bɩʋʋng zugẽ la y segd n maan woto bɩ? Sɩd-sɩda, a neerã yaa y sẽn na n sɩng tɩ y ket n paoodẽ. Woto, b na n sõng-y lame tɩ y wa tõog n wilg y bɩʋʋngã zugẽ tɩ b tõe n yãk-y lame tɩ y yɩ kãsemb-sõngda. (1 Tɩm. 3:10) Y sã n yaa bi-bɩɩg sẽn deeg lisgu, wãn to la y tõe n segl y menga?
2. Wãn to la bi-bɩɩg tõe n wilg t’a sakd n mongd a meng a taabã neer yĩnga?
2 Mong-m-menga: Tẽeg-y tɩ y sẽn baoodã yaa tʋʋmd sẽn yaa sõma, pa yʋʋr ye. Woto yĩnga, modg-y n nong-y y tẽed-n-taasã sõngre. Bũmb a ye sẽn tõe n sõng-y tɩ y maan dẽ yaa y sẽn na n bʋgs a Zezi mak-sõngã zugu. (Mat. 20:28; Zã 4:6, 7; 13:4, 5) Kos-y-yã a Zeova t’a sõng-y tɩ y mao n nong y taabã sõngre. (1 Kor. 10:24) Rẽ yĩnga, yãmb nong n sõngda tigingã neb nins sẽn kʋʋlã wall koms-rãmbã bɩ? B sã n kos-y tɩ y võ mood Rĩungã roog samandẽ, tɩ y zãgs tɩɩsã wall y maan bũmb a to Rĩungã roog yɩlgr yĩnga, y sakdame bɩ? Wẽnnaam tʋʋmdã lekoll sasa, karen-biig ning sã n pa tõog n wa, y sakd n ledg-a lame bɩ? Y sã n maand woto fãa, y na n yãame tɩ y sẽn sõngd y taabã kõt-y-la sũ-noogo.—Tʋʋ. 20:35.
3. Bõe yĩng tɩ zood hakɩk ne Wẽnnaam yaa tɩlae, la wãn to la y tõe n bɩɩs-a?
3 Bao-y zood hakɩk ne Wẽnnaam: Tigingã ned sã n tar zood hakɩk ne Wẽnnaam, barkã yɩɩda minim la pãn-tõod nins fãa a sẽn tarã. Ned a woto geta yɛlã wa a Zeova la a Zezi sẽn get-b to-to wã. (1 Kor. 2:15, 16) A wilgda a vɩɩmã nens fãa pʋgẽ t’a tara zʋg-sõma nins Wẽnnaam vʋʋsem sõngã sẽn kõtã. (Gal. 5:22, 23) A yaa koe-moond sẽn tar yẽesem la sẽn lʋɩɩsd Wẽnnaam Rĩungã taoore. (Mat. 6:33) Y sã n dat n bɩɩs zʋg-sõma kãensã, rẽndame tɩ y zãmsd Wẽnnaam Gomdã sõma n pa vaandẽ ye. Baoodame me tɩ y karemd Gũusg Gasgã la Réveillez-vous ! fãa sẽn yi, tɩ y segend tigissã fãa la y ra vaand tigsg me ye. (Yɩɩl 1:1, 2; Heb. 10:24, 25) Tʋm-tʋmd a Poll sẽn wa n sagend bi-bɩɩg a Tɩmote t’a modg n bɩɩs a tẽebã, a yeel-a-la woto: “Gũus f meng ne koɛɛg ninga fo sẽn zãmsd nebã.” (1 Tɩm. 4:15, 16) Woto tẽegd-y lame tɩ b sã n kõ-y sõsg Wẽnnaam tʋʋmdã lekollẽ, y segd n modg n segla sõma. Y sã n na n yi koe-moonegã bɩ y reng n segl y menga, la y ra vaand yiib me ye. Yãk-y tʋʋmd Wẽnnaam tʋʋmã sʋk y sẽn dat n wa tʋme. Wala makre, y tõe n yɩɩ so-pakda, Betɛllẽ tʋm-tʋmda, pa rẽ bɩ y kẽng Biiblã zãmsg lekoll rakõapã yĩngã. Y sã n bao zood hakɩk ne Wẽnnaam, na n sõng-y lame tɩ y ‘lak ne yãadem datem wẽnsã.’—2 Tɩm. 2:22.
4. Pʋ-peelem yõod yaa bõe?
4 Yɩɩ-y pʋ-peelem dãmba: Pipi kiris-nebã wakate, b ra wa n yãka rap tɩ b na n pʋɩ b tẽed-n-taas nins sẽn da be raab pʋgẽ wã rɩɩbo. B yeelame tɩ sẽn pʋɩ-b rɩɩbã yɩɩ rap “sẽn tar kaset sõma,” tɩ wilgdẽ tɩ yɩɩ pʋ-peelem dãmba, la tɩ tʋm-tʋmdbã sẽn kõ-b tʋʋmdã ra basa b yam tɩ b na n tʋma sõma. Rẽ kɩtame tɩ bãmb mensã tõog n kell n ges yɛl a taab me sẽn da tar yõod yelle. (Tʋʋ. 6:1-4) Woto yĩnga, b sã n kõ-y tʋʋmd tigingã pʋgẽ bɩ y modg n tʋm ne y pãng tɛka. Rɩk-y-yã a Nowe naoore. Biiblã yeelame tɩ Wẽnnaam sẽn kos-a t’a ka koom koglgã, a maana bũmb nins fãa a sẽn yeel-a t’a maanã. (Sɩng. 6:22) Pʋ-peelem tara yõod wʋsg a Zeova nifẽ. Kiris-ned sã n tar pʋ-peelem, wilgdame t’a tẽebã tara pãnga.—1 Kor. 4:2. Ges-y zĩ-gũbr ning gom-zug sẽn yaa: “Rɩ-y kãsem-dãmb sõngr yõodo.”
5. Bõe yĩng tɩ kom-bɩɩsã segd n bao tʋʋm tigingã pʋgẽ?
5 Wa bãngr-goamã sẽn da pĩnd n togsã, a Zeova kɩtdame t’a nin-buiidã sõor fɩɩgd ne tʋʋlem. (Ezai 60:22) B magame n mik tɩ yaa neb tus kobs-yi la kobs nu n deegd lisg yʋʋmd fãa. Neb wʋsg woto sẽn sakd sɩdã yĩnga, b rata rap sẽn tar tẽeb sõma sẽn na n ges tigimsã neb yelle. Rũndã-rũndã, a Zeova nin-buiidã tʋʋm yaa wʋsg n yɩɩd pĩndã. (1 Kor. 15:58) Kom-bɩɩse, y maoodame n na n paam n tʋm tʋm-kãens bɩ? Y sã n maanda woto, y baooda tʋʋmd sẽn yaa neere.
[Zĩ-gũbri, seb-neng a 2]
Neb wʋsg sẽn sakd sɩdã yĩnga, b rata rap sẽn tar tẽeb sõma sẽn na n ges tigimsã neb yelle.
[Zĩ-gũbri, seb-neng a 3]
Rɩ-y kãsem-dãmbã sõngr yõodo
Kãsem-dãmbã sã n kõt kom-bɩɩs nins tẽeb sẽn bɩtã tʋʋm la b sagend-ba, nafd-b lame. Daar a yembre, tigsg poore, tigims sull yel-gɛt n da zĩ ɛstraadã zug n kengd koe-moond raoodo. A wa n yãa bi-bɩɩg a ye sẽn kolg n yasẽ, t’a sok-a a sã n dat n sõsa ne yẽ. Bi-bɩɩgã leokame tɩ b yãka yẽ tɩ tigsg fãa poore, a segd n pɩɩs ɛstraadã. A roagdbã ra zoe n dat n kulame, la a yãka yam n na n tʋm a tʋʋmdã n yaool n kuli. Yel-gɛtã sũur yɩɩ noog wʋsg t’a pẽge. A yeela woto: “Tiging-kãngã kãsem-dãmbã gũusdame tɩ b sã n yã bi-bɩɩg sẽn wɩngd ne Wẽnnaam tʋʋmã, bɩ b kõ-a tʋmd tigingã pʋgẽ. Rẽ n so tɩ mam sã n wa na n kaag tigingã bɩ b mi n tar bi-bɩɩg b sẽn dat tɩ lebg kãsem-sõngdã.”