D rata yãmb sõngrã
1 “Bark ne bũmb ning fãa y sẽn maand d fãa yĩngã. Bũmb ning y sẽn maanda sɩd nafda tõndo.” Gom-kãensa sɩd wilgda mi-beoog ning d sẽn tar ne tõnd kãsem dãmbã la d kãsemb sõngdbã. Wẽnnaam siglgã sẽn tar yalgr n paasdẽ wã yĩng kɩtame tɩ wakat fãa d rat rap sẽn bɩ tẽebã wɛɛngẽ, sẽn na yɩl tɩ b sõng tigims sõor sẽn kolg 100 000 sẽn be dũniyã gill zugã. Yãmb sã n yaa saam-biig sẽn yaa rao n deeg lisg bɩ y bãng tɩ d rata y sõngre.
2 Zu-noog tʋʋmdã baoobo: Y tõe n maana wãn n paam zu-noog tʋʋm n paase? (1 Tɩm. 3:1) Yaa y sẽn na n kõt mak-sõng y vɩɩmã nens fãa pʋsẽ. (1 Tɩm. 4:12; Tɩt 2:6-8; 1 Pɩɛ. 5:3) Kẽes-y y meng zãng moonegã tʋʋmd pʋgẽ, la y sõng neb a taabã tɩ bãmb me maan woto. (2 Tɩm. 4:5) Bao-y y tẽed-n-taasã neer ne y sũur fãa. (Rom 12:13) Yɩ-y ned sẽn zãmsd Wẽnnaam Gomdã sõma, la y bao minim nebã zãmsg wɛɛngẽ. (Tɩt 1:9; 1 Tɩm. 4:13) Kãsem dãmbã sã n kõ-y tʋʋm bɩ y modg sõma n maan-b neere. (1 Tɩm. 3:10) Yãmb sã n yaa zak soab bɩ y ‘ges y yir dãmbã yell neere.’—1 Tɩm. 3:4, 5, 12.
3 Ned sã n yaa kãsem soab bɩ kãsemb sõngda, a segd n tʋma sõma la a tall mong-m-meng yam. (1 Tɩm. 5:17) Woto yĩnga, y sã n wa baood n na n paam zu-noog tʋʋmd bɩ y modgd n sõngd neb a taabã ne sik-m-menga. (Mat. 20:25-28; Zã 13:3-5, 12-17) Bʋgs-y yam ning a Tɩmote sẽn da tarã zugu, la y bao n dɩk a togs-n-taare. (Fil. 2:20-22) Wala a Tɩmote, kɩt-y tɩ y yel-manesmã wilg tɩ y zemsa yãkr zu-noog tʋʋmd yĩnga. (Tʋʋ. 16:1, 2) Yãmb sã n mao n tall zʋg-sõma nins sẽn segdã sẽn na yɩl n wa tõog n pids zu-noog tʋʋm n paase, la y tũ sagls nins fãa neb a taab sẽn kõt-y sẽn na yɩl tɩ y maan tɩ yɩ sõma n paasã, ‘neba fãa na n yãame tɩ y bɩtame.’—1 Tɩm. 4:15.
4 Roagdba, zãms-y y kom-bõonegã neb sõngre: Kambã tõe n sɩnga pĩnd n zãmsd neb sõngr tɩ b ket n paoodẽ. Zãms-y-b tɩ b kelg neer tigissẽ wã, tɩ b bãng koɛɛgã moonego, la tɩ b kõ mak-sõng Rĩungã Roogẽ la lekollẽ wã. Kɩt-y tɩ b nong n sõngd neb a taabã, wala sõng n pɩɩs Rĩungã Roogo, sõng sẽn kʋʋl-bã, la maan yɛl a taaba. Sõng-y-b tɩ b bãng sũ-noog ning ned sẽn paamde, a sã n kõt neb a taab kũunã. (Tʋʋ. 20:35) Zãmsg a woto tõe n sõng-b lame tɩ b wa yɩ so-pakdba, kãsemb sõngdba, la kãsem dãmba.