D modg n moon koɛɛgã n paase
1 Tʋm-tʋmd a Poll sagla kiris-nebã tɩ b tũ Wẽnnaam noyã la b “kell n maan woto daar fãa n paase.” (1 Tes. 4:1) Woto baoodame tɩ d maan bõe? Bũmb a ye d sẽn segd n maan yaa d modg n tʋm Wẽnnaam tʋʋmdã n paase, n baood wakat fãa n na n moon koɛɛgã sõma.—2 Tɩm. 4:5.
2 Bũmb ning sẽn kɩt tɩ d moond wʋsgã: Bũmb ning sẽn kɩt tɩ d rat n moon koɛɛgã n paasã yaa d sẽn dat n waoog d Naandã wʋsg n paasã. D ratame tɩ d tẽebã bɩ la d baood n na n moon koɛɛgã sõma n paase. D sã n moond koɛɛgã wakat fãa la d tar yam sõngo, na n sõng-d lame tɩ d tõog n wa paam n tʋm Wẽnnaam tʋʋm a taaba.—Yɩɩl 1:1, 2; Fil. 4:6; Heb. 10:24, 25.
3 D sã n dat n moon koɛɛgã n paase, d segd n modg n yɩɩ mong-m-meng soab la kõta. Rẽ baoodame tɩ d pʋʋs la d bʋgs a Zezi mak-sõngã zugu. (Mat. 20:28) A Zezi koɛɛgã mooneg sasa, a sẽn da sõngd nebã kɩtame t’a paam sũ-noog wʋsgo. (Tʋʋ. 20:35) D sã n wilgdẽ tɩ nebã yell pak-d lame la d maand d sẽn tõe fãa sẽn na yɩl n moon koɛɛgã n paase, d rɩkda a Zezi togs-n-taare.—Ezai 6:8.
4 Roagdbã mak-sõngo: Roagdbã tõe n sõnga b kambã b yãadem wakat tɩ b sã n wa bɩ, bɩ b rat n sõng neb a tãabã la b nong koɛɛgã moonego. Kambã geta b zakã rãmb yẽesem la b sẽn modgd to-to n moond koɛɛgã n paasdẽ wã. Saam-biig a ye ra naagda a yaab-raoog n tʋmd tigingã tʋʋm a sẽn wa n yaa biiga. A sẽn da ne a yaabã yẽesem la a sũ-noogã kɩtame t’a baood a sẽn na n maan to-to n sõng a saam-biisã. Masã a yaa kãsemb sõngda.
5 D rata saam-biis sẽn tõe n tʋk zɩɩb tigingã pʋgẽ: “Ned sã n dat n yɩ karen-saamba, a soab baooda tʋʋmd sẽn yaa neere.” (1 Tɩm. 3:1) Gom-kãensã sagenda saam-biisã tɩ b bao zu-noog tʋʋm a taab n paas a Zeova siglgã pʋgẽ. Woto maaneg pa baood tɩ d tall minim sẽn yɩɩd neb a taabã ye. Saam-biig sẽn baood zu-noog tʋʋm segd n deng n baoa Wẽnnaam Rĩungã la a moond koɛɛgã ne yẽesem. (Mat. 6:33; 2 Tɩm. 4:5.) A segd n modg n yɩɩ mak-sõng n kõ neb a taabã.
6 Dũniyã gill zugu: A Zeova kɩtame tɩ b tigimd nebã tao-tao. (Ezai 60:22) Neb nins fãa sẽn tũud a Zezi mak-sõngã segd n moona koɛɛgã n paas n yɩɩd pĩndã. Yʋʋmd 2006 rapoorã pʋgẽ, b wilgame tɩ neb 248327 n deeg lisgu. Woto wilgdame tɩ daar fãa sẽn ta neb 680 n deeg lisgu. Bɩ d fãa kell n modg n ges d sẽn tõe n maan to-to n moon koɛɛgã n paase.