Yãmb dat n tʋmame n paas bɩ?
1 A Zezi maka Rĩungã ne arzɛk yõod b sẽn ka tõe n bãng n sɩfe. (Mat. 13:44-46) Rĩungã koɛɛg mooneg me yaa arzɛk sẽn tar yõod wʋsgo. Moonegã tʋʋmd segd n yɩɩ pipi tõnd vɩɩmã pʋgẽ, baa kẽes-m-meng zãng a pʋgẽ sã n baoodame tɩ d kɩɩs d meng raabo. (Mat. 6:19-21) Yãmb datame n tʋm n paas Rĩungã tʋʋm pʋsẽ bɩ?
2 Ges-y yel-kãensã sẽn tar yõodã: Yɛl kẽer la d segd n maan n tõog n tʋm n paas koe-moonegã pʋgẽ: 1) Rɩk sard kãn-kãe n ning Rĩungã yɛl pipi zĩigẽ d vɩɩmã pʋgẽ (Mat. 6:33); 2) Tẽeb tallg ne a Zeova, la a teegre (2 Kor. 4:1, 7); 3) Pʋʋs ne pʋ-peelem la ne pẽdgr n bao Wẽnnaam sõngre (Luk 11:8-10); 4) Kell n tall-y pʋʋsg la y tʋm tɩ zems ne bũmb ning y sẽn pʋʋsd n kotẽ wã.—Zak 2:14, 17.
3 Soay sẽn na yɩl n tʋm n paase: Tõnd fãa tõe n yãka bõn-datl ning sẽn yaa rɩk sẽk n moond kiuug fãa n ka vaandẽ wã. La yãmb zoe n baoome n na n tũnug ne sor buud fãa n kõ kaset ne manesem sẽn pa yãk wakat bɩ, n modgdẽ tɩ y sẽn moond to-to wã la y sẽn maand lebg-n-tɩ ges rãmbã to-to wã lebgd sõma n paasdẽ bɩ, la y modgd n maand yirẽ Biibl zãmsg ne neb tɩ kẽngd taoor bɩ? Y tõeeme n yɩ sõngr so-pakd bɩ wakat fãa so-pakda, bɩ y tɩ tʋm zĩig ning raab sẽn yaẽ kãseng n yɩɩdã bɩ? Yãmb sã n yaa saam-biig sẽn deeg lisgu, y tõeeme n bao n yɩ kãsemb sõngd bɩ kãsem soab bɩ? (1 Tɩm. 3:1, 10) Y tõeeme n paas y tʋʋma, n kos n maan Betɛll tʋʋmde, Wẽnnaam tʋʋmdã zãmsg lekolle, bɩ n kẽ Rĩungã Rot meeb tʋʋmdẽ bɩ?—Luk 10:2.
4 B rag n sagla saam-biig sẽn da tʋmd a nug-tʋʋmd wakat fãa la sẽn sãamd sẽk yĩn-wɩsgrã maaneg pʋgẽ t’a yɩ wakat fãa so-pakda. A sɩnga sõngr so-pakrã tʋʋmde, la rẽ poore a manesa a yɛlã n tõog n kẽ wakat fãa moonegã pʋgẽ. Rẽ poore, a wa n kẽnga Wẽnnaam tʋʋmdã zãmsg lekolle, tɩ rẽ segl-a t’a yaa tigims gĩnd yel-gɛt masã. A sũur nooma wʋsg a sẽn sak saglg ning b sẽn kõ-a wã. Sẽn paase, a kɩsa sɩd t’a sẽn tar sũ-noog n yɩɩdã, ya a sẽn yãk yam n na n tʋm n paas Rĩungã tʋʋmd pʋgẽ wã yĩnga.
5 A Zeova ningda neb nins sẽn kõt b mens tʋʋmdã yĩngã barka. (Ezai 6:8) Bɩ y ra bas tɩ bũmb ba a ye gɩdg-y tɩ y ra tʋm n paas Wẽnnaam tʋʋmdã pʋgẽ, n paam sũ-noog sẽn yaa kãseng n yɩɩd la tẽeb kengr ye.