B bobla tõnd arzɛka
1 Wẽnnaam sẽn bobl tʋm-tʋmd a Poll koe-moonegã, a ra nanda rẽ wa arzɛka. (2 Kor. 4:7) A sak n tõoga toog la a nams sẽn na yɩl n tʋm tʋʋm-kãngã. A ra modgdame n moond ned ning fãa a sẽn paame. A leb n tũu soay la a kẽ batayo rãmb n kẽng zĩis sẽn zãrẽ, la a paama zu-loees so-tog-kãensã sasa. Wãn to la d tõe n dɩk a Poll togs-n-taar la d wilg tɩ d nanda d koe-moonegã? (Rom 11:13) Bõe n kɩt tɩ tõnd koe-moonegã yaa tʋʋmd sẽn pa tar mak-n-taaga?
2 Arzɛk sẽn tar yõod n yɩɩdã: Ninsaalbã sẽn baood arzɛk ningã nong n wata ne sũ-sãams wʋsg la pa nafd-b wakat fãa ye. La tõnd koe-moonegã nafda tõnd la neb a taabã wakat sẽn pa sate. (1 Tɩm. 4:16) A sõngda pʋ-peelem dãmbã tɩ b bãng a Zeova, n toeem b vɩɩmã la b paam saagr hakɩkã n na n vɩɩmd wakat sẽn-kõn-sa. (Rom 10:13-15) D sã n nand d koe-moonegã sõma, kɩtdame tɩ d wʋmd d vɩɩmã võore, n miẽ tɩ d tʋmda tʋʋmd sẽn sɩd tar yõodo, la d tar saagr beoog daar yĩnga.—1 Kor. 15:58.
3 D wilg tɩ d nanda d arzɛkã: Naoor wʋsgo ned sã n basd bũmb a taabã yell gesg tɩ yaa bũmb a ye yell bal n pak-a, wilgdame tɩ yaa bõn-kãng la a nand n yɩɩda. D sẽn tõe n dɩk d sẽkã la d pãngã n pẽg a Zeova wã sɩd yaa zu-noog menga! (Ef. 5:16, 17) Tõnd sẽn dɩkd d sẽkã n maand bũmb ningã wilgdame tɩ tõnd nanda tẽebã yɛl n yɩɩd laogã. Sẽn mik tɩ d sẽn tar bũmb ning n na n taas nebã tara yõod wʋsgã yĩnga, bɩ d moon-a ne yẽesem, la d segl d mens sẽn na yɩl n tõog n kõ kasetã zĩig fãa la wakat fãa.
4 Naoor wʋsgo nebã pa solgd bũmb b sẽn nand wʋsg ye, b basd-a lame tɩ neb a taabã tõe n gese. D sã n nand d koe-moonegã wa arzɛka, yaa rẽ n na n tall yõod n yɩɩd d vɩɩmã pʋgẽ. (Mat. 5:14-16) Tõnd sẽn yaa neb sẽn tar mi-beoog ne a Zeova wã yĩnga, bɩ d rɩk tʋm-tʋmd a Poll togs-n-tar wakat fãa n wilg tɩ d nanda d koe-moonegã ne d sũur fãa wa arzɛka.