Babg a 6: D sẽn na n zãms nebã Biiblã to-to tɩ b bɩ tẽebã pʋgẽ
Biiblã karen-biig sã n sok-d bũmbu
1 D sã n sɩng Biiblã zãmsg ne ned tɩ kẽngd taoor sõma-sõma, naoor wʋsgo, zemsame tɩ d sɩng ne sebrã pipi sak n tũ sags a taabã ball-ball n da loens gom-zutã ye. Rẽ sõngda karen-biigã t’a yẽbg a tẽebã bãngr hakɩkã zugu, la a bɩt n kẽngd taoore. (Kol. 1:9, 10) Baasg zãnga, zãmsgã wakate, Biiblã karen-biis kẽer mi n sokda sogsg yɛl toɛy-toɛy zutu. Sã n wa yaa woto d na n maana wãna?
2 Bãng-y sogsgã n welge: Naoor wʋsgo, d tõe n leoka sogsg nins sẽn tar loees ne zãmsg ning d sẽn maandã zĩig pʋgẽ. La sã n yaa sokr b sẽn na n wa leok sebr ning a sẽn zãmsdã pʋgẽ, d tõe n wilg-a lame bal t’a leoorã bee taoore. La a sokrã sã n pa tar loees ne zãmsgã gom-zugu, wall a sã n baoodẽ tɩ d vaees sɛb a taab pʋsẽ n bãng n leok tɩ zemse, yɩta sõma tɩ d leok-a zãmsgã poor wall wakat a to. Kẽer yãame tɩ b sã n gʋls karen-biigã sokre, kõt-a-la bas-m-yam tɩ b na n wa leok-a lame, la kɩtdame me tɩ b pa bʋdg n bas zãmsgã gom-zug ye.
3 Sɛb nins tõnd sẽn tikd n zãmsd nebã pʋsẽ, b wɛgsa Biiblã zãmsg wʋsg koɛɛg-koɛɛg bala. Sã n wa yaa toog ne ned d sẽn zãmsd Biiblã t’a sak n deeg bũmb Biiblã sẽn wilgdi, bɩ a sã n ket n tẽed bũmb tɩ yaool n yaa ziri, d maanda wãna? Sã n yaa woto, yɩta sõma tɩ d vaees sõsg a to sẽn wilgd Biiblã sẽn yet bũmb ning gom-zu-kãng wɛɛngẽ vẽenega. Karen-biigã sã n ket n pa rat n deeg bɩ y bas gom-zugã nindaar yĩng la y kẽng taoor ne a zãmsgã. (Zã 16:12) A sã n bãngd Biiblã n paasdẽ la a bɩt tẽebã wɛɛngẽ, a tõe n wa wʋma Biiblã zãms-kãng võore.
4 Tall-y sik-m-menga: B sã n sok-y bũmb tɩ y pa mi a leoorã takɩ bɩ y yõk y meng n da wa leok sẽn zems ne yãmb meng tagsg ye. (2 Tɩm. 2:15; 1 Pɩɛ. 4:11) Wilg-y tɩ y na n tɩ maana vaeesg n wa leok-a nindaare. Y tõe n kell n tũnuga ne segb kãng meng n wilg karen-biigã vaeesgã sẽn maand to-to. Wilg-y-yã bilf-bilf a sẽn tõe n tʋm ne vaeesgã tʋʋm-teed a Zeova siglgã sẽn kõ wã to-to. Woto, a wat n tõe n baoa a sogsgã leoor a toore.—Tʋʋ. 17:11.