Lekoll sẽn sõngd tõnd tɩ d tũud d sẽn zãmsdã
1 D sã n wa vaeesd sõss nins sẽn be Wẽnnaam Tʋʋmdã lekoll zãmsg na-kẽndr b sẽn segl tɩ d na n tʋm ne yʋʋmd 2006 pʋgẽ wã zugu, d na n modgame n tũ Biiblã zãmsg d b balengã tʋʋmdẽ la d vɩɩmã pʋgẽ, sẽn na yɩl n dɩ zãmsgã nafa. D rɩkda sard ne d sũy fãa n na n tũ bũmb nins d sẽn zãmsdã.—Zã 13:17; Fil. 4:9.
2 Leoorã kũuni: Rõndã na-kẽndrã pʋgẽ, b paasa kɛlgdbã minit a ye tɩ b tõe n leok Biiblã zĩis nins sẽn tar pãngã wɛgsg poore. Woto rat n yeelame tɩ saam-biig ning sẽn wɛgsd bab-kãngã sẽn da tar minit a yoobã, masã lebga minit a nu. Neb nins sẽn zĩ b zĩisẽ n kõt leoorã me segd n gũusame n da rɩk sẽk wʋsg ye. D sã n dengd n segend d meng sõma, segõnd 30 bɩ sẽn pa ta rẽ seka leoor sẽn yaa sõma kũuni. Minit a nu wã b sẽn kõ kɛlgdbã segd n seka neb piig bɩ sẽn pa ta rẽ na kõ leoor sẽn yaa sõma.
3 Sõss sẽn pid ne saglse: Biiblã zĩis nins sẽn tar pãngã wɛgsg la zãmsg sõsgã segd n gom n tadga zĩis nins d sẽn tõe n tũ koe-moonegã pʋgẽ la d vɩɩmã pʋgẽ wã zutu. Sõsd pa segd n kɩt t’a kɛlgdbã tʋlg n maan bũmb bal ye. A segdame me n wilg bũmb ning b sẽn tog n maanã, b sẽn tog n maan-a to-to wã, la a yõodã. A tõe n yeela woto: “Ad d sẽn tõe n tũ verse kãngã to-to,” bɩ: “Koe-moonegã pʋgẽ, d tõe n tʋma ne verse kãensã woto.” Kãsem dãmbã la kãsemb sõngdbã sẽn mi tigingã sõma wã, b segd n modgdame n wilgd d sẽn tõe n tũ zãmsgã to-to wã takɩ.
4 Sẽn na yɩl n wilg d sẽn tõe n tũ zãmsgã to-to, yɩta sõma tɩ d kõt makr sẽn yit Biiblã pʋgẽ. Sõsd sã n dɩk makr sẽn be Biiblã pʋgẽ, a tõe n paasame tɩ: “Yãmb me tõe n wa bee yell a woto buud taoore.” A segd n modgame tɩ makr nins a sẽn dɩkd Biiblã pʋgẽ wa zems ne yɛlã sẽn yaa to-to zĩ-kãensã, Biiblã tõr sẽn yetã, la a leb n zems ne “tʋm-tʋmd sẽn tũud sɩd la sẽn tar yamã” sɛb sẽn yetã.—Mat. 24:45.
5 Yam yaa tõog n dɩk bãngrã la f sẽn wʋmd yɛlã võor to-to wã n tʋm sõma. “Yam yɩɩda bũmba fãa.” (Yel. 4:7) D sẽn ket n baood yam ning sẽn zemsã ne Wẽnnaam Tʋʋmdã lekoll maasmã, bɩ d mao me n bãng d sẽn tõe n taas yam kãng neb a taab to-to.