D sẽn tõe n kell n tall d yẽesmã to-to
1 D sã n ges a Apolos sẽn tall yẽesem ning a koe-moonegã pʋgẽ wã, tõe tɩ tẽegd-d-la d kiris-nin-taas sẽn moond koɛɛgã ne yẽesem rũndã-rũndã me yelle. (Tʋʋ. 18:24-28) B sagenda tõnd fãa woto: “Bɩ y wɩnge, la y ra tʋm ne kʋɩɩng ye. Bɩ y wɩng n sak Zusoabã n maan bãmb tʋʋmd ne y sũyã fãa.” (Rom 12:11) Bõe n tõe n sõng-d tɩ d yɩ yẽeseng la d kell n tall d yẽesma kiris-ned tʋʋma pʋgẽ?
2 Bãngr paasda yẽesem: A Zezi sẽn wa n vẽneg a meng ne a karen-biis a yiib n ‘bilg-b Gʋlsg Sõamyã fãa võyã sẽn wilgd yẽ yellã’ poore, karen-biisã soka taab woto: “Tõnd ka paam sũ-noog kãsenga, bãmb sẽn gom ne tõnd sora zugã” sɩda? (Luk 24:27, 32) Woto me, tõnd sũyã pa lebgd noog wʋsg d sã n wa wʋm Wẽnnaam Gomdã gomd võor n paas sɩda? N-ye, bãngrã paasda tẽebo. Rom dãmba 10:17 wã sɩd yetame tɩ “kelgr wata ne tẽebo.” Tõnd sã n sɩd kɩs sɩd zãng-zãng ne a Zeova kãabsã, d pa na n tõog n sĩnd n pa gom bũmb nins d sẽn zãmsã yell ye.—Yɩɩl 145:7; Tʋʋ. 4:20.
3 D sã n dat tɩ d nonglma ne a Zeova wã paasdẽ, tɩ d yẽesmã a tʋʋmdã pʋgẽ wã me paasdẽ, d pa tõe n teeg bãngr ning d sẽn da zoe n paama bal ye. D segd n ket n paasda d sɩdã bãngrã, la d paasd nonglem ning d sẽn tar ne Zeova wã. Sã n pa rẽ, bilf-bilfu, Wẽnnaam raabã maaneg na n wa lebga minim zaalg ne-do. (Wil. 2:4) Wẽnnaam Gomdã wilgda tõnd vẽeneg tɩ yaa tɩlae tɩ d ket n ‘bɩt Wẽnnaam bãngr pʋgẽ.’—Kol. 1:9, 10.
4 D sẽn minim n zãmsd to-to wã: Yaa sõma tɩ d maag d yĩng n tags d sẽn zãmsd d meng to-to wã zugu. Wala makre, tõe tɩ d tõe n bãnga Gũusg Gasgã sogsg leoor n dẽeg la d leok tɩ yɩ sõma. La rẽ yĩnga d karemda Biiblã verse nins b sẽn sõdgã, la d tagsd n get d sẽn tõe n tũ zãmsgã to-to wã bɩ? Semen fãa Biiblã karengã pʋgẽ, rẽ yĩnga d modgdame tɩ sã n tõe bɩ d gẽes sɛb a taab pʋsẽ n wʋm yɛlã võore, la d bãng d sẽn tõe n tũ-b to-to wã n paas bɩ? (Yɩɩl 77:12, 13; Yel. 2:1-5) Ad sɩd tara yõod tɩ d bʋgsd Wẽnnaam Gomdã zug la d tũud-a sẽn yetã ne d sũur fãa. (1 Tɩm. 4:15, 16) D sã n zulugd d zãmsgã, na n kɩtame tɩ d sũyã pid ne Wẽnnaam bãngrã, la rẽ na n kõ-d-la pãng tɩ d “wɩng ne tʋʋm sõama maanego.”—Tɩt 2:14.