D wilg tɩ nebã yell pak-d lame, n dengd n get-b ne waoogre
1 D sã n kõt kasetã zãma sʋk la zak-zaka, naoor wʋsgo, nand tɩ d sɩng goam ne neda, d rengd n gesa a soabã nenga. D sã n deng n ges ned nenga, tõe n kɩtame tɩ d bãng d waoongã sã n noom-a lame, la a sã n na n sak n kelg-d lame. Woto, nebã me sã n ges d nensã bala, b tõe n bãnga sã n yaa noog tɩ d wat b nengẽ. Pag a yembr tẽega Kaset soab sẽn da wa n kaag-a yell n yeel woto: “Mam sẽn ges a nengã bala, m bãngame t’a yaa nin-bʋgsga. Kɩtame tɩ m tʋlg n kelg-a.” Woto kɩtame tɩ pagã kelg koe-noogã.
2 D sã n wa moond soayã noy bɩ zãma zĩis a taaba, d sã n get nebã nense, na n sõng-d lame tɩ d tõog n sɩng sõsg ne-b nana-nana. Saam-biig a yembr maanda boto. Neb nins a sẽn segdã sã n ges a nengã, a laada ne-b la a wilg-b zʋrno rãmbã. A tũnugda ne manesem kãng n sõs ne neb wʋsg tɩ yɩ sõma la a pʋɩ sɛb wʋsgo.
3 Bao-y n bãng-y nebã tagsgo: D sã n get nebã nense, sõngd-d lame tɩ d bãng b sẽn tagsde. Wala makre, naoor wʋsgo, d sã n ges ned nenga, d tõe n bãnga sã n yaa toog ne-a t’a wʋm bũmb d sẽn yeel võore, bɩ a sã n pa rat n deeg tɩ yaa sɩda. D leb n tõe n gesa ned neng n bãng a sã n dat n wilg-d lame t’a tara tʋʋm wʋsg bɩ t’a yãgdame. Rẽ na n kɩtame tɩ d toeem d sõsgã wall d kʋʋg-a tɩ zems ne yɛlã. D sã n maand boto, d wilgdame tɩ nebã yell pak-d lame.
4 Gomd-y ne pʋ-peelem la ne kɩs-sɩda: Ne buud wʋsg neba, f sã n gomd ne ned la f get a nenga, wilgdame tɩ f sẽn yetã yaa sɩda. A Zezi karen-biisã sẽn da wa n sok-a tɩ ‘ãnda n tõe n paam fãagrã,’ ges-y-yã a sẽn leok-b ne manesem ninga. Biiblã yeela woto rẽ wɛɛngẽ: “A Zezi gesa bãmb n yeele: ‘Ned ka tõe bõn-kãens ye, la Wẽnnaam tõee bũmb fãa.’” (Mat. 19:25, 26) Sãmbg sẽn ka be, b sẽn ges a Zezi nengã n yã t’a kɩsa sɩd ne bũmb ning a sẽn yetã, kɩtame tɩ b sak n tẽ a goamã. Woto me tõnd sã n gomd ne nebã la d get b nensã, na n sõng-d lame tɩ d tõog n taas-b Rĩungã koɛɛg ne pʋ-peelem la ne kɩs-sɩda.—2 Kor. 2:17; 1 Tes. 1:5.