Yãmb mii tɩbsg buud ning y sẽn na n yãk bɩ?

Dũniyã gill zugu, logtor yiy wʋsg pʋsẽ b maanda neb woperasɩõ rãmb n pa ningd zɩɩm ye. Yãmb mii tɩbsg toɛy-toɛy nins logtoɛɛmbã sẽn tõe n maan n pa tũnug ne zɩɩmã bɩ? Tõnd segd n bãnga tɩbsg kãens buudã, sẽn na yɩl n yãk d sẽn dat tɩ b tɩp-d to-to wã. Ges-y video ning gom-zug sẽn yaa: Pas de sang—la médicine relève le défi wã. Rẽ poore, bɩ y leok sogsg nins sẽn pʋgdã, la y pʋʋs a Zeova t’a sõng-y tɩ y tõog n tũ bũmb ning y sẽn bãngã.—Vẽnegre: Video wã sẽn tar zĩis b sẽn wilgd woperasɩõ rãmbã yĩnga, kom-bõoneg sã n na n naag n ges video wã, roagdbã segd n maana gũusg wʋsgo.

1) Bʋʋm kãseng bʋg yĩng la a Zeova Kaset rãmbã sẽn pa sakd tɩ b ning-b zɩɩmã? 2) Tɩbsg bʋg buud la a Zeova Kaset rãmbã rata? 3) Dʋrwa bʋg la bãad fãa tara? 4) Bõe yĩng tɩ yaa yam tʋʋmd tɩ d yãk tɩbsg buud nins sẽn pa tũud ne zɩɩmã? 5) Ned zɩɩm sã n daag wʋsgo, yɛl a yiib bʋs la logtoɛɛmbã segd n yɩ tao-tao n maane? 6) Yɛl a naas bʋs la b segd n maan n tõog n tɩp ned n pa ning-a zɩɩm? 7) Bõe la logtoɛɛmbã tõe n maane, n kɩt tɩ a) zɩɩm da raag wʋsg woperasɩõ sasa, b) tɩ globill ruuz rãmbã ra sa, d) tɩ yĩngã maand zɩɩmã n paasdẽ, la e) tɩ bãad lebs n paam zɩɩm wa a sẽn da tar pĩndã? 8) Bilg-y tɩbsg nins b sẽn boond tɩ a) emodilisɩõ wã, b) rekiperasɩõ de sã epãnse wã. 9) Tɩbsg sẽn pa tũud ne zɩɩmã wɛɛngẽ, bõe la yãmb segd n kos tɩ logtoɛɛmbã togs-yã? 10) Rẽ yĩnga b tõe n maana ned woperasɩõ sẽn yaa kɛgeng n pa ning-a zɩɩm bɩ? 11) Bõe la logtoɛɛmb kẽer sakd n maand masã tɩ yaa sõma?

Tɩbsg nins b sẽn wilg video kãngã pʋgẽ wã kẽer sakr bee ne ned kam fãa yam-yãkr la a sũur-kaseto. Rẽ yĩnga yãmb zoe n yãka tɩbsg ning buud y mensã la y kambã sẽn tõe n sakã bɩ? Yãmb pidsa y kart depeya (DPA) wã bɩ? Sẽn na yɩl n paam kibay a taab n paase, bɩ y ges “Karemdbã sogsgo,” yʋʋmd 2004, sigr kiuug rasem 15 Gũusg Gasgã ne farende, la yʋʋmd 2000, sɩpaolg kiuug pipi daar Gũusg Gasgã ne moorã pʋgẽ. Rẽ poore, vaees-y yʋʋmd 2006, sɩpaolg kiuugã Rĩungã tʋʋmd seb-paasdmã sẽn yet tɩ “Wãn to la mam tagsd ne tɩbsg buud toɛy-toɛy nins sẽn tũud ne m zɩɩmã, bɩ ne bõn-kɩds nins b sẽn yãkd zɩɩmã pʋgẽ wã?” n yãk tɩbsg nins y sẽn dat la y sẽn pa ratã fãa, n yaool n gʋls rẽ y kart depeya wã zugu. Y segd n kɩtame tɩ logtoɛɛmb nins sẽn na n tɩp yãmbã, la y zakã neb nins sẽn pa a Zeova Kaset rãmbã bãng yãmb sẽn yãk bũmb ning tɩbsgã wɛɛngẽ wã.