D yɩ nimbãan-zoɛtba
1. Bõe la nebã rat rũndã-rũndã?
1 Rũndã-rũndã, neb wʋsg ratame tɩ b zoe b nimbãanega. Yɛlã sẽn tar kengr dũniyã zugã kɩtame tɩ nebã sũy sãam wʋsg tɩ b pa mi b sẽn na n maaneg ye. Neb milyõ rãmb n dat sõngre, la tõnd sẽn yaa a Zeova Kaset rãmbã, d segd n wilgame tɩ neb a taabã yell pak-d lame. (Mat. 22:39; Gal. 6:10) Wãn to la d tõe n wilg rẽ?
2. Wãn to la d tõe n wilg tɩ d zoeta nebã nimbãanega?
2 Koɛɛgã mooneg wilgdame tɩ d yaa nimbãan-zoɛtba: Yaa Wẽnnaam nengẽ bal la d tõe n paam belsg hakɩka. (2 Kor. 1:3, 4) A Zeova ratame tɩ tõnd rɩk yẽ togs-n-taare, n yɩ nimbãan-zoɛtba. Rẽ n so t’a kõ tõnd noor tɩ d kẽng nebã nengẽ n taas-b Rĩungã koe-noogã. (1 Pɩɛ. 3:8) Yaa ne koe-noogã mooneg la d tõe n bels “sũ-sãoong rãmbã,” bala Wẽnnaam Rĩungã bal la nebã namsgã tɩɩm. (Ezai 61:1) A Zeova sẽn zoet a nebã nimbãanegã yĩnga, ka la bilfu a na n menesa wẽnemã fãa, la a wa ne dũni paalga.—2 Pɩɛ. 3:13.
3. Wãn to la d tõe n wilg tɩ d geta nebã wa a Zezi sẽn get-b to-to wã?
3 D ges nebã wa a Zezi sẽn da get-b to-to wã: Baa a Zezi sã n da wa be neb wʋsg taoor n moondẽ, a pa get-b wa kʋʋng bal ye. A ra geta ned kam fãa wa ned sẽn dat tɩ b sõng-a t’a bãng Wẽnnaam. A ra neeme tɩ b yaa wa piis sẽn ka tar pe-kɩɩm ye. Nebã nimbãaneg ra tara a Zezi, tɩ kɩt t’a maagd a meng n zãmsd-ba. (Mark 6:34) Tõnd me sã n get nebã wa a Zezi sẽn get-b to-to wã, na n kɩtame tɩ d wilg tɩ ned kam fãa yell sɩd pak-d lame. D na n wilga rẽ ne d koe-zomã la d nen-wamdã. Koɛɛgã mooneg n na n pak tõnd n yɩɩda, la na n kɩtame tɩ d modgd n gomd tɩ zemsd ne ned fãa yell sẽn yaa a soaba.—1 Kor. 9:19-23.
4. Bõe yĩng tɩ d segd n yɩ nimbãan-zoɛtba?
4 Tõnd sẽn moond Rĩungã koɛɛgã n wilgdẽ tɩ nebã yell pak-d lame wã kɩtame tɩ neb kʋʋng sẽn yit tẽns toor-toor sakd n kelgdẽ. D sã n kell n wilg tɩ d yaa nimbãan-zoɛtba, d na n waooga d Wẽnnaam a Zeova sẽn yaa nimbãan-zoɛtã, la a sũur na n yɩɩ noog ne-do.—Kol. 3:12.