D na n pʋɩya seb-vãad n bool nebã tɩ b wa a Zezi kũumã tẽegre!

D na n pʋɩya seb-vãad n bool nebã tɩ b wa a Zezi kũumã tẽegre!

1. Bõe la d na n maan tʋʋlg kiuug rasem 17 wã tɛka?

¹ Yʋʋmd fãa, d tẽegda a Zezi kũumã yelle, tɩ yaa kaset nebã fãa yĩnga. (1 Kor. 11:26) Rẽ n so tɩ d rat tɩ neb a taabã wa naag tõnd n kelg sõsgã, n bãng t’a Zeova sẽn kõ rondã wilgdame t’a nonga tõndo. (Zã 3:16) Yaa tʋʋlg kiuug rasem 17 sẽn yaa sibr daarã tɛk la d na n sɩng seb-vãadã pʋɩɩbo, n bool nebã tɩ b wa a Zezi kũumã tẽegrã. Yãmb magdame n na n kẽes y meng sõma tʋʋm-kãngã pʋgẽ bɩ?

2. D sã n na n kõ ned seb-vãoogã, bõe la d tõe n yeele?

² D sẽn tõe n yeele: Yɩta sõma tɩ d ra gomd wʋsg ye. Ad d sẽn tõe n yeele: “Tõnd dat n kõo yãmb seb-kãngã, n bool yãmb ne y zakã rãmb tʋʋl-nif kiuug rasem a 5 wã daare, tɩ y wa naag-d n maan bũmb d sẽn maand dũniyã gill zug yʋʋmd fãa. B na n talla Biiblã n sõs ne-do, tɩ d bãng a Zezi kũumã yõodo, la a sẽn maand bũmb ning masã. D wilga wakatã la zĩigã seb-vãoogã zugu.” D sã n yi sibrã ne hatã n pʋɩt seb-vãadã, sã n tõe bɩ d kell n kãabd periodik rãmbã me.

3. Bõe la d tõe n maan n tõog n bool neb wʋsgo?

³ D modg n bool neb wʋsgo: Tõnd daab yaa d bool neb wʋsg wa d sẽn tõe tɛka. Woto yĩnga, bɩ y bool y Biibl karen-biisã, neb nins y sẽn lebgd n tʋgd n kaagdẽ wã, y roagdbã, y tʋmd-n-taasã, y karen-bi-taasã, y yagsã la y mitinsã. Tigingã kãsem-dãmb na n wilga d sẽn na n maan to-to n tõog n pʋɩ seb-vãadã d moonegã zĩig fãa. Tõnd sẽn pʋɩt seb-vãadã yʋʋmd fãa n boond nebã, womda biisi. Rɩẽ, pag a ye n wa Tẽegrã, tɩ sãamb-rɛɛgdbã ned a ye bao n na n sõng-a t’a yã koe-moond ning sẽn bool-a wã. La pagã yeel-a lame t’a pa mi ned ka ye. La tɩ yaa baraar bal la ned da moond zak-zaka, n kõ yẽ boollã sebre.

4. Bõe n kɩt tɩ d tog n naag n pʋɩ seb-vãadã ne yẽesem?

⁴ Tõe tɩ nina y sẽn kõ boollã seb-vãoogã na n waame. Nebã sak n wa tɩ b pa wa me, yãmb modgrã zoe n yaa kaset y sẽn kõ-ba. Bala seb-vãadã na n sõng-b lame tɩ b bãng t’a Zezi lebga rĩma. Y sẽn na n kẽes y toog ne yẽesmã na n wilga y moonegã zĩigẽ nebã ne koe-moondb a taabã, la sẽn yɩɩd fãa a Zeova, tɩ y sũur yaa noog wʋsg ne rondã.—Kol. 3:15.