“D kɩs kasetã sõma”
1. Mak-sõng bʋg la tʋm-tʋmd a Poll kõ koe-moonegã wɛɛngẽ?
1 Tʋm-tʋmd a Poll sagla a Tɩmote t’a ‘maan a tʋʋmdã neere.’ (2 Tɩm. 4:5) A Poll ra maanda a tʋʋmdã neere, rẽ n so t’a tõog n sagl a Tɩmote woto wã. Sɩd me, yʋʋmd 47 soabã n tãag yʋʋmd 56 sasa, a ra zoe n toga soay naoor a tãabo, sẽn na yɩl n kɩs kasetã. Tʋʋm sebrã pʋgẽ, b goma a Poll yell naoor wʋsgo, n yeel t’a ‘kɩsa kasetã’ sõma. (Tʋʋ. 23:11; 28:23) Wãn to la tõnd me tõe n maan woto rũndã-rũndã?
2. D sã n wa moond zak-zaka, wãn to d tõe n kɩs kasetã sõma?
2 Zak-zaka: Sẽn na yɩl n tõog n paam zak-sobend dãmb nins sẽn nan pa wʋm koe-noogã n moone, d tõe n toeema d zak-zak moonegã wakate. Tõe tɩ yaa zaabr bɩ wɩkɛn dãmbã la zak-sobend dãmb kẽer be yiri. D sã n wa moond zak-zaka, zak fãa pʋgẽ bɩ d modg n paam ned n sõs ne, la d kẽnd d sẽn pa mik-b rãmbã nengẽ n yɩlemdẽ. La yaa wãn to yẽ, d sã n kẽnd ned nengẽ n ket n pa mikd-a? Tõe tɩ y sã n gʋls-a lɛtr wall y bao a telefõn nimero n bool-a, na n woma biisi.
3. Segb bʋs la yãmb tar n tõe n kɩs kasetã zãma sʋka, la zĩig fãa?
3 Zãma sʋka, la segb buud fãa d sẽn paame: Rũndã-rũndã, a Zeova Kaset rãmbã sõngda neb nins fãa sẽn datã tɩ b paamd yam hakɩkã. B mi n maanda rẽ “sor zug” wall “raas pʋsẽ,” bɩ zĩis a taab neb sẽn beẽ. (Yel. 1:20, 21) Daar fãa, sẽn yaa zĩig ning la wakat ning fãa, d wilgdame tɩ d miime tɩ d segd n kɩsa kasetã bɩ? Rẽ yĩnga, b tõe n yeelame tɩ tõnd ‘wɩngda wʋsg ne koɛɛgã togsg’ bɩ? (Tʋʋ. 18:5, MN) Sã n yaa woto, tõnd sɩd ‘kɩta kasetã’ sõma, n wilgdẽ tɩ d tʋmda tʋʋmd ning b sẽn bobl-dã neere.—Tʋʋ. 10:42; 17:17; 20:20, 21, 24.
4. Wãn to la pʋʋsgã ne bʋgsgã tõe n sõng-d tɩ d kɩs kasetã sõma?
4 La wakat kẽere, pãn-komslem bɩ yãnd yĩnga, d toeeme n pa le kɩt kasetã ye. Vẽenega, a Zeova wʋmda tõnd zu-loɛɛgã võore. (Yɩɩl 103:14) Baasgo, d sã n wa segd zu-loees a woto, bɩ d pʋʋs-a n kos raood n tõog n kɩs kasetã. (Tʋʋ. 4:29, 31) Sẽn paase, d Biiblã zãmsg la a bʋgsgã sasa, bɩ d bao n bãng d sẽn tõe n nand koe-noogã sẽn tar yõod n yɩɩd bũmb fãa wã n paase. (Fil. 3:8) Woto na n sõngame tɩ d kɩs kasetã ne yẽesem.
5. Wãn to la d tõe n sõng t’a Zoɛll bãngr-gomdã paam pidsgu?
5 A Zoɛll bãngr-gomdã wilgame tɩ nand t’a Zeova ra-kãsengã sẽn sek rabeemã ta, Wẽnnaam nin-buiidã ned kam fãa na n moonda koɛɛgã n pa basdẽ tɩ bũmb tiis-a ye. (Zoɛll 2:2, 7-9) Bɩ tõnd fãa modg n kẽes d toog sõma tʋʋm-kãngã d sẽn ka na n tol n le tʋma pʋgẽ.