Reeg-y-b sõma!
1. Sasa bʋg la d na n paam n kõ kasetã, la bõe yĩnga?
1 Tẽegrã yaa sasa d sẽn paamd n tõe n kõ nebã kasetã. D saagdame tɩ rõandã, sãambã sẽn na n wa tẽegrã n kelg sõsg sẽn na n gom a Zeova la a Zezi nonglem kãsengã yellã na n yɩɩga milyõ piiga. (Zã 3:16; 15:13) B na n bãnga bark nins b sẽn tõe n wa paame, kũunã a Zeova sẽn kõ wã yĩnga. (Ezai 65:21-23) La pa sõsdã bal n na n paam n kõ kaset tẽegrã daar ye. Tõnd fãa sã n deeg sãambã sõma, d na n paam n kõo kasetã.—Rom 15:7.
2. Bõe la d tõe n maan n deeg sãambã sõma?
2 Wall tɩ y bao zĩig n zĩnd sɩɩ n gũudẽ tɩ sõsgã sɩngã, pʋʋs-y sãambã la y sõs ne-ba. B tõe n zoeta yãnde, wall b pa mi tẽegrã sẽn na n yɩ to-to ye. D sã n pʋʋs-b ne sũ-noog la d sõs ne-ba, na n kɩtame tɩ b yamã gãand bãane. Sẽn na yɩl n bãng ned sã n waa tẽegrã a sẽn paam boolgã seb-vãoogã yĩnga, y tõe n sok-a lame n ges sã n yaa a pipi waoong la woto, bɩ a sã n mii ned tigingã pʋgẽ. Y tõe n bõos-a lame t’a wa zĩnd ne yãmba, tɩ y naag taab n tũ vɛrse-rãmbã kareng y Biiblã pʋgẽ, la y yɩɩle. Sã n yaa Rĩung roogẽ la y maand tẽegrã, y tõe n tall-a lame n gilgi. Sõsgã poore, bɩ y yeel-a t’a sã n pa wʋm bũmb võore, y tõe n vẽneg-a lame. Sã n mik tɩ yãmb tigingã neb segd n yiime tɩ neb a taab kẽ, y tõe n yeel-a-la woto: “Tẽegrã yɩɩ yãmb noog bɩ? Yɛ la d tõe n yã taaba?” A sã n wilg-yã, bɩ y modg n kẽnge. Sẽn yɩɩd fãa, kãsem-dãmbã sã n yã d tẽed-n-taag sẽn maag tũudmã wɛɛngẽ sẽn wa tẽegrã, b segd n modgame n keng a raoodo.
3. Tẽegrã daare, bõe yĩng tɩ tar yõod tɩ d reeg sãambã sõma?
3 Tõnd sẽn yaa a Zeova nin-buiidã, d tara sũ-noogo, laafɩ la zems-n-taare, tɩ yaa wa d zoe n bee arzãnã pʋgẽ. Ne sãambã wʋsgo, na n yɩɩ pipi b sẽn yã rẽ. (Yɩɩl 29:11; Ezai 11:6-9; 65:13, 14) Tẽegrã poore, bõe n na n pa sãambã yamẽ? A leoorã bee ne tõnd sẽn na n deeg-b to-to.