D paas d koe-moonegã minim: Ned sã n kelg sõma bɩ d gʋlse
Wẽnnaam vẽnega tʋm-tʋmd a Poll t’a sagl a Tɩmote, n yeel-a woto: “Gũus f meng ne koɛɛg ning fo sẽn zãmsd nebã.” (1 Tɩm. 4:16) Saglgã wilgdame tɩ d sɩng n moonda koɛɛgã hal sẽn kaoos tɩ yaa d sẽn nan sɩngd me, d tog n mao n paasa d koe-moonegã minim. Sẽn na yɩl n sõng-d tɩ d tõog n maan dẽ, sõss n na n yit Rĩungã Tʋʋmd pʋgẽ t’a gom-zugã yaa: “D paas d koe-moonegã minim.” Sõsg fãa na n goma bũmb takɩ sẽn tar yõod koe-moonegã wɛɛngẽ yelle, la a kõ-d sagls sẽn na n sõng-d tɩ d bãng n tũ. B sagenda koe-moondbã tɩ b modg n tũ saglsã kiuug fãa. Kiuugã kũum poore, tʋʋmdã tigsg a ye sasa, b na n kosa koe-moondbã tɩ b wilg saglsã sẽn naf-b to-to, la b togs kibay b sẽn tare. Ki-kãngã, b sagenda d fãa tɩ koe-moonegã sasa, ned sã n kelga sõma bɩ d gʋlse.
Gʋlsgã yõodo: Sẽn na yɩl n moon sõma, d pa segd n tek koɛɛgã taasg bal ye. Segdame me tɩ d kaagd sẽn kelg-b sõma wã, la d zãms-b Biiblã. Woto yaa wa d sẽn zãgsd bũmb ning d sẽn bʋd b sũyẽ wã koom. (Mat. 28:19, 20; 1 Kor. 3:6-9) Rẽ baoodame tɩ d lebg n tɩ kaag sẽn kelg-a wã, n tik d pipi sõsgã n gom bũmb sẽn pak-a yelle. Woto yĩnga, ned sã n kelg koɛɛgã sõma, d segd n gʋlsame.
Ad d sẽn tõe n maan dẽ to-to:
• Y sã n wa yit koe-moonegã, bɩ y sui sebr la bik sẽn na yɩl tɩ ned sã n kelg sõma bɩ y paam n gʋlse. Ra n gʋls-y yaar ye. Y sã n sõs ne ned n sa fãa bɩ y gʋlse.
• Gʋls-y bũmb ning fãa y sẽn mi kɛlgdã zugu. Wala makre, a yʋʋre, a adɛrse, la a telefõn nimero. Y sã n yã bũmb a mengã wall a zakã neb zug y sẽn tõe n tik n sõse, bɩ y gʋlse.
• Gʋls-y kibay kẽer yãmb sẽn gom bũmb ning yellã wɛɛngẽ. Y tõe n gʋlsa vɛrse ning y sẽn karme, nedã sẽn tẽede, la sebr ning y sẽn kõ-a. Gʋls-y kaagrã sẽn yɩ lɛɛr ninga, daar la kiuug ninga.
• Gʋls-y y sẽn na n gom bũmb ning yell nindaarã. Makre, y sõsgã sẽn na n tik bũmb ning zugã, la daar ning y sẽn pʋlem tɩ y na n waame wã.
• Kaagr fãa poor bɩ y gʋlse. Baa y sã n gʋls kibay wʋsgo, pa wẽng ye.
Mak-y woto ki-kãngã:
• Togs-y y tũud-n-taagã bũmb ning fãa y sẽn gʋlsde.