Modg-y n lebg n kẽnge!
1 “Ad sõasgã yɩɩ noogo! Dɩlla m tẽeg n lebg n tɩ ges-a.” Yãmb zoe n goma woto, tɩ kaoosg zugẽ bɩ y yĩm zĩig ning a soabã sẽn beẽ wã bɩ? Sã n yaa woto, bɩ y bãng tɩ ne manesem ning bal y sẽn tõe n bãng vẽeneg tɩ y na n lebg n kẽngame wã yaa y sẽn na n gʋls n bĩngi.
2 Gʋls-y n bĩngi: Y sã n sõs ne ned sẽn wilg ratem tɩ yɛlã ket n yaa vẽeneg y yamẽ wã, bɩ y rɩk sẽk bilf n gʋls yɛl nins sẽn zems sẽn tɩ loe ne nedã. Gʋls-y a soabã yʋʋr la yɛl nins sẽn na n sõng-y tɩ y bãng-a wã. Gʋls-y a adɛrsã, la y ra ning y yamẽ wã bal tɩ y na n bãngame ye, sɩd bao-y n bãng vẽeneg tɩ y sẽn gʋlsã zemsame. Gʋls-y gom-zug ning zug y sẽn sõsã, verse nins y sẽn karma, la sɛb nins y sẽn bas ne-a wã.
3 Yãmb sã n basa sʋkr ne nedã tɩ yaa nindaar gesgã la y na n leoke, bɩ y gʋls sʋkrã. Yãmb bãnga bũmb sẽn tɩ loe ne nedã, a zakã rãmb bɩ a tũudmã bɩ? Sã n yaa woto, bɩ y gʋls rẽ n bĩngi. Dẽ nindaar y sã n lebg n kẽng nedã nengẽ n gom yel-kãensã yelle, rẽ na n wilgame tɩ y mengã wilgda ratem ne nedã. Sẽn na n baase, gʋls-y daar la wakat ning y sẽn kẽng a soabã nengẽ pipi wã, la wakat ning y sẽn yeel tɩ y na n lebg n waame wã. Y sã n gʋls yɛlã sõma, na n tẽeg-y-la vẽenega, la yaa vẽeneg n yɩɩd me tɩ y ka na n yĩm y sẽn kãab tɩ y na n lebg n waame wã ye.—1 Tɩm. 1:12.
4 Y sã n wa gʋls yɛlã n sa fãa, bɩ y bĩng-b ne koe-moonegã tʋʋm-teed a taaba, wala y korgo, Biibli, Comment raisonner sebrã, bɩ ne sɛb a taaba, sẽn na yɩl tɩ wakat fãa bɩ a be yambẽ. Yɩta sõma n yɩɩd tɩ y gʋls sẽn ka-b yiyã zak-zak not rãmb sɛbẽ sẽn yaa toor ne b rãmb nins pʋsẽ y sẽn gʋlsd yɛl nins sẽn tɩ loe ne y lebg-n-tɩ-ges rãmbã. Yaa vẽeneg tɩ lebg-n-tɩ-ges not rãmb rɩkrã toor sẽn ka be, bũmb ning sẽn tar yõod n yɩɩd yaa y modg n lebg n kẽnge!
5 Tags-y nedã yelle: Y sã n wa segend koe-moonegã yĩng bɩ y ges y lebg-n-tɩ-ges rãmbã not rãmba. Tags-y ned kam fãa yell la y sẽn na n maan sõasgã to-to y sã n wa lebg n kẽngã. Tags-y y sẽn na n maan to-to n kɩt t’a soabã rat n maan yirẽ Biibl zãmsgo. Y sã n geel yɛla woto, y koe-noogã mooneg na n woma biis n yɩɩda, tɩ rẽ paas y mengã sũ-noogo.—Yel. 21:5a, NW.
6 Dẽ nindaar y sã n seg ned sẽn kelgd-y sõma, da tags-y tɩ y tõee nana-nana n tẽeg nedã yell ye. Walla tɩ yɩ woto, gʋls-y-yã, lebg-y n ges y sẽn gʋlsã, ket-y n tagsd nedã yelle, tɩ rẽ poor bɩ y sɩd lebg n kẽnge!