Yãmb yaa Rĩungã koe-moond sẽn ka vaand bɩ?
1 Tõnd fãa maana sũ-noog d sẽn bãng tɩ Burkĩna Faso koe-moondbã sõor sẽn sãd to d sẽn zɩ n paama ra yaa koe-moondb 998 yʋʋmd 1999 sa-sik kiuugã. Ad wã sɩd yɩ modgr neb sẽn zems taab n dɩk sard kãn-kãe n maane! Kiis nins sẽn pʋglã, yɩɩ vẽeneg tɩ Kaset rãmb kãensã kẽer yɩɩ Rĩungã koe-moondb sẽn vaanda. Bala rẽ tɛka sõor sẽn pʋɩ tɩ zemsã kiuug fãa ket n ka ta 900 ye. Rẽ wilgdame tɩ pa koe-moondba fãa n kõ rapoor sẽn wilgd tɩ b moona koɛɛgã kiuug fãa ye. D tẽedame tɩ sagls nins sẽn pʋgdã na n sõng-y lame tɩ y welg yel-kãngã.
2 Tall-y naneb ne zu-noogã: Tõnd segd n talla naneb sõma ne zu-noog ning d sẽn tar n tõe n taas neb a taabã Rĩungã koe-noogã. Rẽ noogda a Zeova sũur la sõngd pʋ-peelem dãmbã tɩ b bãng vɩɩm sorã. (Yel. 27:11; 1 Tɩm. 4:16) D sã n kõt kasetã n ka vaandẽ, rẽ paasda d minima koe-moonegã pʋgẽ la a kõt-d sũ-noogo, la tar sũ-noog d sẽn mi tɩ d tʋma tʋʋmd sõma wã yĩnga.
3 Kõ-y y tʋʋmdã rapoore: Kẽer moondame n pa kõt b tʋʋmdã rapoor tao-tao ye. D ka segd abada n tags tɩ d modgrã ka zem fʋɩ n sek rapoor kɩsg ye. (Mak-y ne Mark 12:41-44.) Sẽn yaa a soab fãa rɩll d kõ d sẽn maanã rapoore! D sã n tar bũmb yir wala kalãndirie sẽn na yɩl n gʋls sẽk ning d sẽn dɩkd koe-moonegã pʋgẽ wã, rẽ na n tẽegda tõnd wakat fãa tɩ d kõ d rapoorã tao-tao kiuug fãa baasgẽ.
4 Kõ-y sẽn dat-b sõngrã sõngre: Tõe tɩ b segd n dɩka segls sẽn yaa sõma n yɩɩd tigingã pʋgẽ sẽn na yɩl n sõng sẽn dat-b sõngrã tɩ b tõog n kẽes b mens koe-moonegã pʋgẽ wakat fãa. Tigingã sekertɛɛr la sebr zãmsg taoor lʋɩtbã segd n dɩka segls tɩ koe-moondb sẽn tar minim kõ sõngre. Yãmb sã n tara kamb bɩ Biibl karen-biis a taab sẽn yaa koe-moondb sẽn ka reeg lisgu, bɩ y zãms-b tɩ b kõ b tʋʋmdã rapoor kiuug fãa.
5 Tẽeg-y ned vɩɩm kɩbar ning gom-zug sẽn yaa “M tara mi-beoog m sẽn tall yõ-wok a Zeova sõgenegã pʋgẽ wã,” sẽn be yʋʋmd 1997, zĩ-likr kiuug 1 daar Gũusg Gasgã (farende) pʋgẽ wã. Saam-bi-poak a Ottilie Mydland sẽn yit Norvɛɛzã lebga koe-noogã moond sẽn ka vaand sẽn deng a lisgã reegr yʋʋmd 1921 wã. Yʋʋm 76 loogr poore, a yʋʋm 99 zugu a yeelame: “M sũur yaa noog m sẽn ket n tõe n yɩ koe-moond sẽn ka vaandã.” Ad sɩd yaa manesem sẽn be rasãnd a Zeova sõgen dãmbã fãa sẽn segd n dɩk togs-n-taar ne!