Y sõngdame tɩ b tõe n paam mooneg tʋʋmd kɩbay sẽn zems takɩ bɩ?
1 Biiblã kɩbay wʋsg pʋsẽ, b togsa sõor takɩ sẽn na yɩl tɩ bũmb ning sẽn maanã yɩ vẽeneg neba yamẽ. Wala makre yaa ne neb 300 bal la a Zedeõ tõog Madiã tãb-sikã. (Bʋk. 7:7) A Zeova malɛkã kʋʋ Asiiri sodaas 185 000. Yʋʋmd 33 Pãntekotã raare, sẽn zems neb 3 000 n deeg lisgu, la rẽ poor bilfu tẽedbã sõor paasame n lebg 5 000. (Tʋʋ. 2:41; 4:4) Kɩba-kãensã wilgda vẽeneg tɩ Wẽnnaam pĩnd sõgen dãmbã ra modgda sõma n paamd kɩbaya fãa n maand gɛɛl sẽn yaa takɩ.
2 Rũndã-rũndã me, a Zeova siglgã leb n sagenda tõnd tɩ d wilg moonegã tʋʋmd sẽn yɩ to-to kiuug fãa. D sã n sakd n tũud sagl-kãens fãa, sõngdame tɩ b tõog n ges moonegã tʋʋmd yell sõma. Moonegã tʋʋmd kɩbay tõe n kɩtame tɩ b bãng tɩ koe-moonegã neng ning n dat tɩ b ges a yell n yɩɩda, bɩ tɩ zĩis kẽer n dat koe-moondb n yɩɩda. Moonegã tʋʋmd kɩbay tõe n sõnga tigingã kãsem dãmb tɩ b bãng neb nins sẽn tõe n paas b moonegã pãngã, la neb nins sẽn dat sõngrã. Sẽn paase, kɩbaya sẽn wilgd Rĩungã mooneg tʋʋmd sẽn kẽngd taoor to-to wã kengda d saam-biisã sẽn yaa kiris-nebã raood dũniyã gill zugu. Yãmb me maanda y sẽn segd n maanã sẽn na yɩl tɩ b paamd tʋʋmd kɩbay sẽn yaa takɩ bɩ?
3 Yãmb mengã sẽn segd n maane: Kiuugã kũumẽ, yãmb getame tɩ yaa toog ne-y tɩ y tẽeg bũmb nins y sẽn maan koe-moonegã pʋgẽ bɩ? Sã n yaa woto, wakat ning fãa y sẽn yi moonegã bɩ y gʋls y sẽn maan bũmb ningã. Koe-moondb kẽer gʋlsda rẽ kalãndirie bɩ karne pʋgẽ. Koe-moondb a taab zãada mooneg tʋʋmd kɩbay seb-vɩʋʋgo. Kiuugã kũumẽ bɩ y kɩs y sebr zãmsg yel-gɛtã y tʋʋmdã kɩbay sebr tao-tao. Y sã n dat me y leb n tõe n ninga y tʋʋmdã kɩbay sebr Rĩungã Roog tʋʋmdã kɩbay sɛb koglgẽ. Y sã n yĩmame n pa kɩs y tʋʋmdã kɩbay sebr tao-tao, bɩ y modg tao-tao tɩ y sebr zãmsg yel-gɛtã paam-a, n da yaas n gũ t’a wa y nengẽ tɩ y yaool n kɩs-a ye. Y sã n maand y sẽn tõe fãa n kɩt y tʋʋmdã kɩbay sɛbã, wilgdame tɩ y waoogda a Zeova seglsã, la y nonga saam-biis nins b sẽn yãk tɩ b tigis tʋʋmdã kɩbay sɛb n maan gɛɛlã.—Luk 16:10.
4 Sebr zãmsg yel-gɛtã tʋʋmde: Sebrã zãmsg yel-gɛtã sẽn yaa pe-kɩɩm sẽn gũusdã, a geta a sullã neb tʋʋmd sẽn yaa to-to kiuugã fãa pʋgẽ. (Yel. 27:23) A mii koe-moond fãa sã n moonda sõma ne sũ-noog n ka vaandẽ, la a modgd tao-tao n sõngd ned ning fãa sẽn maan kiuug tõr n ka moone. Naoor wʋsgo f sã n kõ a soabã saglga, bɩ f kos-a t’a wa yãag-f koe-moonegã pʋgẽ sekame.
5 Kiuugã baasgẽ, sebr zãmsg yel-gɛtã na n modgame n bãng a sullã neb fãa sã n kɩsa b tʋʋmdã kɩbay sɛba. Dẽ sekertɛɛrã na n tõogame n tool tʋʋmdã will tigingã mooneg tʋʋmd kɩbay sẽn yaa takɩ, tɩ kiuug ning sẽn pʋgdã rasem a yoob ka loog ye. Yaa sõma tɩ kiuugã sã n wa kolgd saab bɩ a maan sullã neb fãa tẽegre, la a tar tʋʋmd kɩbay seb-vɩɩd tɩ be sebrã zãmsg zĩigẽ. Neb sã n be be n yĩmd n pa kõt b tʋʋmd kɩbay sɛba, a tõe n maan-b-la tẽegr la a kõ-b sagls sẽn zemse.
6 D sã n kɩt d moonegã tʋʋmd kɩbay sɛb tao-tao, sõngdame tɩ d tõog n paam kɩbay sẽn zems takɩ, sẽn wilgd bũmb nins d sẽn tõog n maan moonegã pʋgẽ wã. Yãmb me na n maana y sẽn segd n maan n kɩs y moonegã tʋʋmd kɩbay sɛb tao-tao kiuug fãa bɩ?