D segd n maana wakat a wãn n yaool n lebg n tɩ kaag neda?
1. Karen-biisã maaneg baoodame tɩ d maan bõe?
1 Karen-biisã maaneg baoodame tɩ d lebg n tɩ kaag ned ning fãa sẽn wilg t’a rat n bãnga yɛl a taab Wẽnnaam Rĩungã wɛɛngẽ n paasã. (Mat. 28:19, 20) Sẽn na yɩl n bãng wakat a wãn la d na n maan n yaool n lebg n tɩ kaag neda, bee ne tõnd sẽkã la a soabã me rẽnda. Bõe yĩng tɩ d pa segd n bas tɩ kaoos la d yaool n tɩ kaag ned d sẽn kõ kasetã?
2, 3. Bõe yĩng tɩ d segd n modg n lebg n kẽng tao-tao?
2 Bõe yĩng tɩ d pa segd n bas tɩ kaoose? Wẽnnaam Rĩungã koe-noogã mooneg saame la bala, tɩ dũniyã saab me ta n sa. (Mat. 24:14; 1 Pɩɛ. 4:7) La sẽn mik tɩ neb nins sẽn dat n bãng n paasã ket n tõe n wa paama fãagrã yĩnga, d segd n “nanga pãng wakat fãa” ne koɛɛgã moonego, la d kẽnd tao-tao n sõngd nin-kãensã.—2 Kor. 6:1, 2; 2 Tɩm. 4:2.
3 Ned sã n wʋm Rĩungã koɛɛgã, a Sʋɩtãan modgdame n na n kɩt tɩ ra wom biis ye. (Mark 4:14, 15) Neb nins sẽn wilgd tɩ b rat n bãng n paasame wã zags rãmba, b tʋmd-n-taase, la b neb a taab mi n yaand-b lame. D sã n lebg n tɩ kaag nin-kãensã tao-tao, d na n tõog n sõsa ne-b bũmb nins d sẽn da reng n goma zugu, tɩ neb a taab ra wa koms b raood ye.
4. Bõe la d tõe n maan tɩ sõng-d tɩ d tõog n lebg n tɩ kaag neda?
4 D rɩk sɛka: Y sã n sõs ne neda, yaa sõma tɩ y rɩk sɛk ne-a n lebg n tɩ kaag-a. Sok-y-yã sokr la y yeel-a tɩ y na n wa leoka nindaare. Y sã n gʋls sokrã, wakat ning y sẽn segd n lebg n kẽngã la yɛl a taaba, na n sõng-y-la wʋsgo. Sã n mikame tɩ y tara sẽka, y tõe n yeel-a lame tɩ y na n kẽngame la y lebg n wa, bɩ y na n lebg n waa beoogo. Sã n yaa wɩkɛn la y mik-a t’a yaool n tʋmd semennã pʋgẽ, a tõe n yeelame tɩ y lebg n wa wɩkɛn ning sẽn watã. Yãmb sã n dɩk sɛk ne-a bɩ y sɩd kẽnge.—Mat. 5:37.
5. D sã n kẽnd n kaagd nebã tao-tao, wãn to la tõe n sõng tõnd tɩ d maan karen-biis wa a Zezi sẽn yeelã?
5 Pa zaalem yĩng la d sẽn segd n lebg tao-tao n tɩ kaag neb nins sẽn wilg tɩ b rat n bãng n paasame wã ye. Woto yĩnga, y sã n moon ned bɩ y rɩk sɛk ne-a la y modg n lebg n tɩ kaag-a tao-tao, bala wakatã lebga bilfu. (1 Kor. 7:29) Tõnd sã n lebgd n kẽnd tao-tao n kaagd neb nins sẽn dat n bãng n paasã, d koɛɛgã mooneg na n woma biis wʋsgo.