D paas d koe-moonegã minim: D bao n lebg n wa kaag kɛlgdã

Lebg n tɩ kaag nebã yõodo: Ned sã n kelg koɛɛgã sõma n dat n bãng n paase, d tʋll n lebg n tɩ kaag-a-la wakat ning d sẽn tõe n mik-a yiri, n sõng-a t’a sak sɩdã. (1 Kor. 3:6) Naoor wʋsgo, rẽ baoodame tɩ d bãng d sẽn na n baas sõsg to-to, la d bao n bãng wakat ning d sẽn tõe n lebg n wa kaag-a. Sẽn paase, yɩta sõma tɩ d sok sokre, tɩ nindaar bɩ d sõs rẽ zugu. Woto na n kɩtame t’a soabã yãgd n dat tɩ d lebg n wa. D sokrã leoor sã n bee sebr ning d sẽn kõ-a wã pʋgẽ, tõe t’a na n deng n karm-a lame. D sã n deng n wilg bũmb ning zug d sẽn na n wa sõsã, kaagrã yɩta nana ne-do. Bala tõnd ne d kɛlgdã fãa zoe n mii bũmb ning yell d sẽn na n gomã. Rẽ, d sã n tɩ mik-a, d tõe n yeel-a lame tɩ d wa n na n leoka sokr ning d sẽn sok nindaarẽ wã, n kell n kẽng ne sõsgã.

Ad y sẽn tõe n maan dẽ to-to:

• Y sã n wa segend zak-zak koe-moonegã bɩ y bao sokr y sẽn tõe n sok n baas sõsga, n wa leok nindaare. Sokrã tõe n tika sebr ning y sẽn kõ y kɛlgdã, wall sebr d sẽn tar n zãmsd nebã Biiblã zugu, tɩ kaagrã sasa bɩ y tõe n wilg-a seb-kãnga.

• Y sã n sõs ne ned t’a kelg sõma, baasgẽ wã bɩ y wilg-a tɩ y tʋll n lebg n wa sõsa ne-a. Rẽ poor bɩ y sok-a sokr ning y sẽn seglã. Koe-moonegã zĩis kẽer nebã sẽk pa waoog ye. Woto kɩtame tɩ b pa wae n dat tɩ b lebg n wa kaag-b ye. Sã n yaa rẽ, ad y sẽn tõe n yeel kɛlgdã: “Nindaare, m sã n wa woto wẽnde, m na n mik-y-la yir bɩ? [Bas-y t’a leoke.] M na n lebg n waa a yopoe tɩ d rɩk minit a wãn bal n leok sok-kãngã . . . La m sã n wa tɩ y pa tar sẽk bɩ y togs-ma.”

• Y sã n dɩk sɛk ne ned n na n lebg n tɩ kaag-a bɩ y mao n kẽng lɛɛre. (Mat. 5:37) Kaagrã baasgẽ bɩ y leb n sok sokr a to n bao n le wa nindaare.

Mak-y woto ki-kãngã:

• Y sã n wa segend zak-zak koe-moonegã bɩ y bao sokr y sẽn tõe n sok n baas sõsga, n wa leok nindaare. Wilg-y koe-moondb a taab y sẽn segl y meng to-to.