D lebg n tɩ ges neb nins fãa sẽn sak n kelgã
1 Tõnd sʋkã, neb wʋsg bãnga sɩdã, bala ned n yã tɩ tõnd nonga Rĩungã koɛɛg t’a modg n lebg n wa ges tõnd naoor wʋsg n maag a meng n sõng-do. Tõnd me segd n lebg n tɩ gesa neb nins fãa sẽn sak n kelg tõndã. Woto me naaga karen-biisã maaneg tʋʋmd b sẽn bobl-dã.—Mat. 28:19, 20.
2 D bao n bãng neb nins sẽn nong sɩdã: Baa ned sã n pa sak n deeg sebre, a manesmã, a koe-zomã la a goamã tõe n wilgame t’a nanda Rĩungã koɛɛga. Rẽ seka d na lebg n tɩ ges a soabã. Saam-biig a ye n lebg n tɩ ges ned a ye naoor a nu semen a nu pʋgẽ t’a pa tol n sak n deeg sebr ye. Naoor a yoob-n-soabã, raoã sak n deega sebr la a sak n na n sɩng Biiblã zãmsgo.
3 D sã n bãng tɩ ned nonga sɩdã, bɩ d lebg n tɩ ges-a tao-tao la d ra bas tɩ kaoos ye. D ra kõ “wẽng soabã” sor t’a võ sɩdã d sẽn bʋd nedã sũurẽ wã ye. (Mat. 13:19) D sã n yeel ned tɩ d na n lebg n wa ges-a-la wakat takɩ, bɩ d modg n lebg n tɩ ges-a.—Mat. 5:37.
4 Soayã noy moonego: Rẽ yĩngã yãmb modgdame n na n lebg n tɩ ges neb nins sẽn sak n kelg-y soayã noy moonegã sasa wall kaset sẽn pa yãk wakatã kũun sasa wã bɩ? Y sõsgã baasgẽ y tõe n yeela woto: “M sũur yɩɩ noog m sẽn paam n sõs ne-yã. Zĩ-bʋg la d tõe n seg taab n ye sõse?” Koe-moondb kẽer sã n mik tɩ zemsame, b kõta b kɛlgdã b telefõnnã nimero la b kos yẽ me rẽnda. Nebã sã n nong n yãt tõnd zĩig a ye sorã noor wakat fãa, b na n sakame n kõ b telefõnnã nimero bɩ b adɛrsã. Baa b sã n pa sak n kõ b nimero wã, y sã n le wa seg-b nin-daar sorã zugu, y tõe n sõng-b lame tɩ b bãng n paase.
5 D sã n sel zẽed n zãgsd koom la d get a yell sõma n wa ne a sẽn womd bi-sõma, kõt-d-la sũ-noogo. Woto me, d sã n lebg n tɩ ges nebã la d sõng-b tɩ b kẽng taoor tẽebã pʋgẽ d na n paama sũ-noog wʋsgo. (1 Kor. 3:6) Bɩ d modg n lebg n tɩ ges neb nins fãa sẽn sak n kelgã.