Tũnugd-y ne jw.org sẽn yaa tõnd sɩtã n moond koɛɛgã

Tõnd sɩtã tõe n sõng-d lame tɩ d moon koe-noogã hal tɩ ta “dũniyã tɛk fãa.” (Tʋʋ. 1:8) D kɛlgdbã wʋsg pa mi tõnd sɩtã ye. Sã n pa b paamame tɩ koe-moond sõng-ba.

Tigims sull yel-gɛt a yembr telesarza video ning gom-zug sẽn yaa Bõe yĩng tɩ y tog n zãms Biiblã? tɩ be a portaablã pʋgẽ, t’a sã n paam segb fãa bɩ a wilgd nebã. Makre, a sã n wa moond koɛɛgã zak-zaka, a yeta woto: “Mam kaagda nebã n dat n sõng-b tɩ b bãng sogsg a tãab sẽn tar yõod leoore. Sogs-kãens la woto: Bõe yĩng tɩ dũniyã pid ne zu-loeese? Wãn to la Wẽnnaam na n welg zu-loeesã? La nananda, bõe n tõe n sõng-d tɩ d mao ne zu-loeesã? Video-kãngã leokda sogs-kãensã.” Rẽ poore, a ningda video wã la a gũusd kɛlgdã manesem sẽn na n yɩ to-to. Video wã goam kẽeda sũur hal wʋsgo, n kɩt tɩ ned sã n sɩng a gesgo, sã n pa sa, a pa basd ye. A soabã sã n ges n sa, yel-gɛtã yeta woto: “Wa y sẽn wʋmã, b yeelame tɩ y tõe n tũnuga ne ẽntɛrnetã n kos tɩ b wa zãms-y Biiblã. La mam sẽn zoe n be ka wã, y sã n data, m tõe n wilg-y-la d sẽn zãmsd Biiblã ne nebã to-to.” Kɛlgdã sã n sake, a yiisda Koe-noog sebrã n wilg-a d sẽn maand to-to wã. La kɛlgdã sã n pa tar sẽka, a rɩkda sɛk n lebg n wa wilg-a. A sã n kẽng kafe koosg zĩigẽ, a sɩngda sõsg ne ned noog-noogo, n paam n wilg yẽ soab me. Rẽ yĩnga yãmb tũnugda ne tõnd sɩtã n moond koɛɛgã bɩ?