D tũnugd ne jw.org n moond koɛɛgã: “Lebg a Zeova zoa”

Y sã n kẽ tõnd sɩtã zĩig ning b sẽn gʋls tɩ: “Sɛbã,” n ges nug-goabgã n kilik “video-rãmba,” y na n yãa gom-zug sẽn yaa: “Lebg a Zeova zoa.” Be, b wae n ningda video-rãmba, yɩɩla, la bũmb a taab kambã yĩnga. Yãmb zoe n tũnuga ne bõn-kãensã n moon koɛɛgã bɩ? Y sã n zãmsd ned Biiblã t’a tar kom-bõonego, y tõe n wilg-a-la zĩ-kãense. Woto tõe n kɩtame t’a pak tõnd sɩtã zĩis a taaba.

D sẽn wa n pʋɩt Rĩungã kibay N^o 38 soabã, saam-biig n seg paga, t’a reeg seb-vãoogã n tol n sɩng karengo. A ra tara kamb sẽn da rat n bãng sẽn be seb-vãoogã pʋgẽ wã. Saam-biigã sõsa ne-a bilfu, n wilg-a tõnd sɩtã adɛrs sẽn be seb-vãoogã poorã. Pagã sẽn da rat n bãng n paasã yĩnga, saam-biigã yiisa a portaablã n wilg yẽ ne a kambã a Kalɛɛb video wã.

Saam-bi-poak me n gom ne a tʋmd-n-taag sẽn tar kamb tõnd sɩtã yelle, n wilg-a bũmb nins sẽn be be n tõe n sõng zagsã rãmbã. Pagã tɩ paka tõnd sɩtã tɩ yẽ ne a kambã gese. Kaoosg zugẽ, a yeela saam-bi-poakã tɩ rẽ poore, a kambã yiime n gilgd zakã, n yɩɩnd yɩɩll a ye ne farende, t’a gom-zugã yaa: “ Prêche la parole. ” Yɩɩn-kãng bee “ Deviens l’ami de Jéhovah ” sõssã pʋgẽ.

Bao-y n bãng-y bũmb nins sẽn be sɩtã zĩ-kãngã sõma, tɩ y sã n tõe, bɩ y telesarz video-rãmbã, yɩɩlã, la bũmb a taab sẽn be be n ning y portaablã pʋgẽ. Woto, y na n tõog n tũnuga ne jw.org bab-kãngã n moon koɛɛgã. Hakɩka, tõnd sɩtã yaa tʋʋm-teoog sẽn sõngd tõnd tɩ d sakd Zu-soabã ne sik-m-menga!—Tʋʋ. 20:19.