Tall-y b tẽebã buudu
1. Zĩ-likr kiuugã rasem 19 semennã, seb-bʋg la d na n sɩng zãmsg tigingã pʋgẽ?
1 Yʋʋmd 2015 zĩ-likr kiuugã rasem 19 semennã, d na n sɩnga Tall-y b tẽebã buud sebrã zãmsg tigingã pʋgẽ. Seb-kãngã gomda pagb la rap 14 sẽn tall tẽeb tɩ b kibayã be Biiblã pʋgẽ yelle. B gʋlsa sebrã tɩ d tõe n mams nin-kãensã kibayã d yamẽ tɩ lebg vẽenega, tɩ yaa wa d sɩd ne-b lame, n wʋmd zu-loees nins b sẽn paam a Zeova tũubã pʋgẽ wã võore. Sebrã leb n wilg-d-la yam ning d sẽn tõe n dɩk kibayã pʋgẽ, tɩ sõng-do.—Ebre. 6:12.
2. Wilg-y bũmb kẽer sẽn be Tall-y b tẽebã buud sebrã pʋgẽ.
2 Sebrã pʋgẽ bũmb kẽere: Sebrã tara kart la taablo sẽn tõe n sõng-d tɩ d bãng b sẽn gomd ned ning yellã sẽn vɩɩmdẽ, la sẽn yɩ wakat ningã. Sẽn paase, sak fãa pʋgẽ, zĩig n be tɩ b gʋls tɩ “bʋgs-y sogs-kãensã zugu.” Na n sõnga tõnd tɩ d bʋgs kibayã zugu, la d bãng d sẽn tõe n tũ saglsã to-to. Fot-neeb la imaaz-rãmb me n be be n kɩtd tɩ kibayã yaa vẽeneg d yamẽ.
3. Wãn to la d tõe n dɩ sebrã zãmsg nafa?
3 Sebrã sẽn tõe n naf yãmb to-to: Siglgã taoor lʋɩtb sull koɛɛgã pʋgẽ, b sagl-d-la woto: “Y sã n wa karemd ned kibar bɩ y mams bũmb fãa y yamẽ, n ning y meng a soab zĩigẽ. Modg-y tɩ yɩ wa y zĩnda be, tɩ bũmb fãa yaa vẽeneg y yamẽ. Bʋgs-y n ges-y sẽn be-b kibarã pʋgẽ wã sẽn tall manesem ningã, la y tags n ges yãmb sẽn da na n maanega, sã n da yaa yãmba.” La b sẽn yeel tɩ d mams kibarã d yamẽ wã pa rat n yeel tɩ d wẽed no-koeemd ye. Yaa sẽn na yɩl tɩ d tags kibarã zug neere, n bao n wʋm neb nins yell b sẽn gomdã zu-loeesã võore. D sã n dat n maan woto, rẽnda d bao sẽk n bʋgse. (Nee. 8:8) Y sã n sɩng sak zãmsg n pa sa, ned ning sẽn na n lʋɩ-a taoor semen ning sẽn pʋgdã segd n deng n kʋmsa zãmsg ning loogã, segõnd 30 bɩ minit a ye pʋgẽ. “Bʋgs-y sogs-kãensã zug” sogsgã sã n pa naag semennã zãmsgã, taoor lʋɩtã tõe n soka sokr a yembr bɩ a yiib n kʋms zãmsgã.
4. Bõe yĩng tɩ d segd n zãms Tall-y b tẽebã buud sebrã?
4 Dũniyã a Sʋɩtãan sẽn so wã maanda a sẽn tõe fãa n dat n koms tõnd tẽebo. Yaa a Zeova n kõ tõnd seb-kãngã, n paas Gũusg Gasgã sõss nins a sẽn tikã, sẽn na yɩl n paas d tẽebã pãnga. (Zak 1:17) Bɩ d fãa modg n da vaal tigingã Biibl zãmsg ye. D sã n wa me, bɩ d kẽes d toogo. Woto la d na n tõog n dɩ sebrã nafa sõma.