“A pidsa mam sũurã raabo”
“M PƲƲSD-Y-LA bark ne m sũur fãa, sebr ning sẽn yaa Approchez-vous de Jéhovah (Pẽneg-y-yã a Zeova) wã sẽn yaa kũun-kãsengã yĩnga. A pidsa bũmb m sẽn da rat ne m sũurã fãa: Bãng t’a Zeova nong-m lame wã. Masã, mam sɩd neeme tɩ m pẽe a Zeova la a Bi-nongrã sõma. Mam dat n goma seb-kãngã yell ne nebã la m pʋɩ-a m zo-rãmbã fãa.” Yaa woto la a Zeova Kaset soab a yembr yeel seb-paal ning sẽn tar seb-nens 320 wã b sẽn yiis “Rĩungã koe-moondb sẽn tar yẽesem” tigs-kãsengã sẽn zĩnd yʋʋmd 2002 n tɩ ta yʋʋmd 2003 sɩngrẽ wã. Bɩ d vaees seb-paal kãngã zĩis kẽere, la d ges bũmb ning sẽn kɩt tɩ b yiis-a wã.
Seb-paallã zĩis kẽere
Bõe la d yãt seb-paal kãngã pʋgẽ? Yaa kɩbay nins fãa sẽn be zãmsg sõs-kãensã b yiibã pʋgẽ wã, la sẽn yɩɩd woto! Sebrã tara sags 31, t’a yen fãa woglem zems Gũusg Gãsgã zãmsg sõsg woglem. Sɩngr-goamã la pipi sags a tãabã poore, sebrã pʋɩɩ bab-kãsems a naase, tɩ babg fãa gomd a Zeova zʋg-kãseng a yembr zugu. Babg fãa sɩngda ne a yembr kʋmsgo. Sags a wãna sẽn pʋgd rẽ wã sõsda a Zeova sẽn pukd zʋg-kãng to-to wã zugu. Babg a ye fãa tara sak sẽn gomd a Zezi yelle. Bõe yĩnga? Be neere, a Zezi ra yeela woto: “Ned ninga sẽn yã maam, a yãa m Ba.” (Zã 14:9) A Zezi sẽn ya a Zeova wõneg sẽn zems zãngã yĩnga, a kõo tõnd makr sẽn tar pãng sẽn wiligd Wẽnnaam sẽn tʋmd ne a zʋg-kãsemsã to-to. Babg fãa baasda ne sak sẽn zãmsd tõnd d sẽn tõe n dɩk a Zeova togs-n-taar to-to a zʋg ning d sẽn vaeesã pukr wɛɛngẽ. Seb-paall kãngã sẽn sõsd a Zeova zʋg-kãsemsã zugã, a tara verse rãmb sẽn yit Biiblã sɛb fãa pʋsẽ la bala.
Approchez-vous de Jéhovah sebrã leb n tara zĩ-zẽngds a taaba. Sẽn na n sɩng ne sak a 2 wã, sak fãa tara zĩ-gũbr gom-zug sẽn yaa: “Sogsg bʋgsg yĩnga.” B pa ning verse rãmbã la sogsgã sẽn na yɩl tɩ yɩ sag-kãng zãmsgã lebg-n-ges ye. B ning-b lame n na n sõng-y tɩ y tõog n tik Biiblã zug n bʋgs y sẽn zãms be wã zug neere. D sagend-y lame tɩ y maag y yĩng n karem Biiblã verse rãmbã fãa. Rẽ poor bɩ y tags sokrã zugu, la y ges yãmb meng sẽn tõe n tũ-a to-to. Bʋgsg woto tõe n sõng-y lame tɩ y tʋlg n pẽnegd a Zeova wakat fãa n paasdẽ.—Yɩɩl Sõamyã 19:1514, NW.
B maaga b yĩng n bao la b segl foto rãmb nins sẽn be Approchez-vous de Jéhovah sebrã pʋgẽ wã sẽn na yɩl n paas zãmsgã pãngã. Sags piig la a yopoe n tar fot neeb sẽn pid seb-neng tõre, sẽn bilgd Biiblã pʋgẽ kɩbaya.
Bõe yĩng la b sẽn yiis-a wã?
Bõe yĩng la b sẽn yiis Approchez-vous de Jéhovah sebrã? Pipi, b yiisa seb-paall kãngã sẽn na yɩl n sõng-d tɩ d bãng a Zeova sõma n paase, la kɩt tɩ tõnd ned kam fãa tõog n tall zems-n-taar sẽn tar pãng ne-a.
Yãmb mii ned Approchez-vous de Jéhovah sebrã sẽn tõe n tall yõod ne bɩ? Wala makre, tõe n yaa neb sẽn zãmsd Biiblã, bɩ saam-biig wall saam-bi-poak sẽn pa le moonde. Rẽ yĩnga, yãmb meng zoe n sɩnga seb-paall kãngã kareng bɩ? Y sã n nan pa sɩng a karengo, bõe yĩng tɩ y pa na n bao sẽk tao-tao n sɩnge? Rɩk-y sẽk n bʋgs y sẽn karemdã zugu. Bɩ seb-kãngã sõng-y tɩ y pẽneg Wẽnnaam a Zeova wakat fãa, tɩ rẽ kell n paas y sũ-noogã la y yẽesmã a Rĩungã mooneg pʋgẽ!